1 Udu hamon ta lakou doh ano badeh, jo anyolom kandrah ma kon munyak ha-un asahan. Kandrah hawe kon munyak malen badeh, amai ndra-au laleyah. Ma gwa ndras ale bado ja bwe. 2 Ma jo ale anyolom kon tinan Jerusalem ha-un ndrabun labai asahan. Jo anyolom kon tinan doh udu hawe Kindrei, udu bolo kandrah eme andri, i buku badih ndralokowani iy, ma ndranyosowani iy ta anya kili bahandra mwan tan. 3 Jo ale anuhun boho ndramak ari udu bada koyeu ta Kindrei asehek sahou boto-on labai i buku doh, “Nadah, ndrahu manyah ta Kindrei udu hawe lau mwan ma badih! Iy kameh manyah udu hawe iri, ma iri kameh asahan lau tan. Kindrei le amwenen kameh udu hawe iri, ma iy kameh asahan Kindrei tiri. 4 Iy kameh owei wa-i mada iri mara-ei iu. Iri mwan ma badih kameh winiyan bamak ja bwai, iri kameh winiyan batikisiy ma baden, o babwese iri maha-an ma sisi-in ja bwai. Iri lakou malen bwena badeh, ndrano mara-ei.”

5 Ano ja, iy ndramak nane manyah udu bada koyeu ta kabin tiye i buku doh, “Nadah kameh jo bwidi iri lakou mara-ei asahan ha-un ja.” Iy tiye ale i buku doh, “Ou torowenei sahou doh kili bolo buk. Tasah, sahou doh handru mara-ei, ma iri mwan ma badih winiyan atehei budon tiri handru in hamon ta aliy.” 6 Ma iy tiye eme tek, “Iri lakou marakon nane jo anya kamekes badeh, ndrano ai! Jo ma mwena handru, ma jo in ndrobek mara-ei, jo ale badeh, kati iri lakou marakon, ma jo in ndrobek handru ta amekes iri gok mara-ei ano. Buku are lau, balen amar ta gwa, jo kameh edeu gwa i wa-in badu kaloh ta adeu kohan handru winiyan bano bwe, ya iy kameh winiyan bakeh ari luk ta asih gwa doh bwe. 7 Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, iri lau doh kameh akohok lakou mara-ei doh badu minek amwenen. Jo kameh asahan Kindrei tiri, ma iri asahan naduk. 8 Arile, iri lau nane anoh, ma atobwak ala hamon, ma iri lau batehei budon tiri bala ta Kindrei bwe, ma iri lau amekes kandriyen ndra-in solo-an labai, ma iri lau adai lau rayah amak, iri lau ta amekes kandriyen ta karei, iri lau balahak udu tiri ta bekebek lau amak, iri lau ta atehei bwili ndruu iri i andri i ta sukumada kei, iri lau ta amekes sahou wendreya, ya kon tiri lau mara-ei doh badeh, bolo lek ta jih nyarahan, anya udu ta bek solpa. Imek ari hamon ja dah badeh, ma kabwai.”

9 Ano, angelo ari badu hawe oro ma ndro taloh mene, tawi bwekei ma ndro taloh irek na losen ta Kindrei udu aliy, eme hawek asehek i buku doh, “Ou ame ma jo kaleheya ou ta udu Nadu Sipsip, iy badih doh kameh i tasou i tan.” 10 Malawin Ndrabun eme bwele-ek, ma angelo bwese-ei jo ma mwasin iu ili bwele-e mandrei ari doh loken labai. Ma iy leheyani jo ta Jerusalem ha-un, kon laba tinan ma ndrabun labai, ta Kindrei udu bolo kandrah eme andri. 11 Nyikadi lomada Kindrei badeh, anya ili bwele-e kon tinan nane doh. Lomadan badeh, i randrah labai, i buku bek mwasin, sowan tinan labai. Lomadan i buku bek ari iri aloh jaspa, lewen mara-ei i buku torowe, ou winiyan anyolom udu bilisiu tabasi bilisiu. 12 Kon tinan doh badeh, kowah awudiy mara-ei, ma ili loken labai. Ma kou tan ma ronoh la-uh, ya oro angelo ma ronoh la-uh badeh, atondrok oro kou doh. Udu bwele-e oro kou ma ronoh la-uh doh badeh, iri torowenei nyara boho kamen ma ronoh la-uh tiri lau badu Isra-el udu aliy. 13 Kowah doh badeh, iri atehei kou taloh, taloh udu kabowen ma hahuw. Iri atehei taloh ili loboho rai, taloh udu loboho kum, taloh udu loboho tolau, ma taloh ja udu loboho jaha. 14 Kabowe kon tinan nane doh, bilisiu ma bilisiu iri atudun i bwele-e bek laba tinan. Ya udu bada oro bek nane doh iri torowenei nyara oro aposel ma ronoh la-uh ta Nadu Sipsip ta Kindrei udu aliy.

15 Iy angelo nane asehek sahou eme tek badeh, tawi bala kei ari nyikilikin labai, udu minen ta tumundroh tinan ta kon tinan doh, ma kou hawe kowah awudi kon tinan nane doh. 16 Kon tinan nane doh, kabowen ma hahuw badeh, i le randra. Lawe-en ma tinan tan mara-ei badeh, ili le randra ale. Angelo tomondrohei na bala kei tan ta tumundroh lakou, ma lawe ta kon tinan amwenen i buku luwa lunek (2,200) kilomita mara-ei. Kabowen ma hahuw hawe bwele-en ta loboho loken badeh, ili le randra. 17 Angelo ale tomondrohei kowah mara-ei asahan buku ndro hanoh limeh (65) mita lawe-en ta iu ili loken.* Iri lau rayah ta tanan abudon anya, lawe-en ta iu ili loken, badeh buku 65 mita. Iri rayah ja abudon anya, hutu-u kowah i bolon badeh, buku 65 mita. Tumundroh doh badeh, in hamon tiri lau ale tumundroh lakou. Angelo tumundroh kowah badeh, in hamon ta san ari le nane doh.

18 Kowah ta kon tinan nane doh, iri amekes na bek jaspa, ya kon tinan mara-ei, iri amekes na bek nyikilikin, lewen mara-ei i buku torowe. 19 Mwe-e ndru ta kon tinan doh badeh, ma ronoh la-uh, ma Kindrei nyosowani mwe-e ndru ari ari doh na iri bek, randrah, randrah sowa iri laba tinan labai. Mwe-e ndru ma bwena badeh, iy nyosowaniy na bek jaspa, ano bek sapaya iy nyosowani mwe-e ndru la-uh na aliy, bek aget iy nyosowani mwe-e ndru taloh na aliy, ano bek emeral iy nyosowani mwe-e ndru hahuw na aliy. 20 Bek sadonikis badeh, sowan laba tinan labai, iy nyosowani mwe-e ndru limeh na aliy. Tariyen badeh, saraman hawe belen. Ano bek ari ja, koniliyen tariyen saraman, iy nyosowani mwe-e ndru onoh na aliy, iy atehei bek krisolait tariyen nyokowan udu bada mwe-e ndru ndro taloh, bek beril tariyen nyorowan, iy nyosowani mwe-e ndru ndru la-uh na aliy. Ano iy atehei bek topas, tariyen nyokowan udu bada mwe-e ndru ndro ari. Iy atehei bek krisopres udu bada mwe-e ndru ronoh. Bek hayasin badeh, iy atehei udu bada mwe-e ndru ronoh ari. Ano badeh, iy nyosowani mwe-e ndru ronoh la-uh na bek ametis, tariyen saraman. 21 Ya, madasan ma ronoh la-uh badeh, Kindrei amekes na bek man ma ronoh la-uh. Kou ari, ari, iy amekes na laba bek man ari, ari. San mara-ei badu bolo kon tinan doh badeh, iy amekes na bek nyikilikin, lewen mara-ei i buku torowe.

22 Jo badeh, banyolom asiu tinan ta Kindrei bado bolo kon tinan doh bwe, tasah Kindrei badeh, iy boto-on labai, hawe Nadu Sipsip tan, uru ma la-uh badeh, i buku asiu tinan tan. 23 Udu bolo kon tinan nane doh, an ma bun badeh, banya bwe, tasah lomada Kindrei le ari anya ili bwele-en. Ya, Nadu Sipsip badeh, anya i nyara sun ta aliy. 24 Iri lau marakon badu kon munyak tinan kameh adek ta lomada sun doh, ma iri kabin mara-ei badu kon munyak kameh, atiye iri nyasou tiri mari mwasin eme le ta lomada sun doh. 25 Kou mari ta kon tinan doh kameh asak ta udu le buku doh, winiyan bahis bwe, tasah ben kameh winiyan basahan ja bwe. 26 Iri nyasou hawe luk tiri lau badu kon munyak tinan mara-ei kameh, iri tiyaniy ili le bolo kon tinan nane doh. 27 Arile, iri lakou ndraka-an, hawe iri lau ta amekes kandriyen ndra-in, iri lau ta karei, ma iri lau ta amekes sahou wasai, iri mara-ei doh kameh winiyan bala bolo kon tinan doh bwe. Iri lau le nyara iri udu bolo buk ta Nadu Sipsip, iri le lau doh kameh akohok kohan handru ma winiyan ala bolo kon tinan don ai.