5
Ere haiyadu yafagede, Anyakaro no monbona.
1 Tere baabo gane, ere taate fati langa, taate saini langa nere dada heigodbode waha letigei nomo beele te ada yerege tagoboya. 2 Tere tage iseyeha, Anyakaro nomo Fati no, yebu fai ooru la maina dorofe, fasayadu onou heigonbona. 3 Nere fai-aita benou lewodbode, “Elebe saini gai hilobainga tigini. Ere yafa deya,” ono gogunga fasayadu onou, dada nere inyabamu nigei nomo waha nere langa heigonbona, wa aita magana bisei nomo jimiri tuna dorofe. Ono wonga nere dada waha feiyawei nomo edo uwa. 4 Onou wa, tere baabo gane, tere agugu langa yafegu uwa, onodu tere fati waha heigonga uredu bonade, tere fai no, yebu fai maiganga uredu bona horotona dorofe ada horoto wagu ganga. 5 Tere oruwanga hoonga, lala bagu nomo fai-aita. Ere ooru, agugu bagu nomo gane uwa. 6 Onou waha bona, gamaji ere nere fai ila dorofe agore jiri woga. Hilobainga ere agege igei boya, ere ebere ninage foowou inyona. 7 Ere isiya, nere fai agore jirigou nere ooru langa agore jiri-jiride. Nere fai bia nyi-nyide waha, nere ooru langa nyi-nyide. 8 Onou wa, ere hoonga nomo waha ere ninage foodu isoya. Ere Itou boya huwanyage ngalengawou fanyimu bagu, nere ila gaude nigei nomo fanyimu bagu tedu boya, fanyimu waha siot kapa dorofe tanoya. Onodu Itou no ege gidu haigei nomo itari tuya fanyimu waha tedu boya, kafa teteri dorofe tanidu boya, danga bagu oto boya oofa dewei nomo. 9 Itou no ere no nomo houmu mayou isei nomo bona hangada higei uwa. No ere Yesus Kristus, ere ebere Anyakaro, no edo ere ege gidu haigei bona hangada higai. 10 Yesus no ere hoyo higei nomo bona umaiha, onou waha bona, ere agege auma yafoya yo, ere umoya yo wa edonga, ere no ngate agege auma yafoboya. 11 Onou waha bona, tere etenga-etenga, elebe onoya benou, tere beele hilobainga nere Itou nomo fai-aita ila lenigi bonade, nere nebere huwanyanege dangamu nagagu.
Itou no nere Kristen fanyimu hilobainga tigini tei nomo waha edo hoyo nigonbona.
12 O baabo gane, ere tere benou letigei nomo onoya, tere fai nere hoyo tigide waha nebere huuna langa yafagu. Anyakaro no nere tebere mora bagu tafa nigai yafabode, nere tere fanyitege tiginimuwei nomo bona beele letigi-tigide. 13 Tere nere haruwe tede waha bonade ninatege isidu, tere huwanyatege hilobainga nigi bonade, gaude nigagu. Onodu tere oruwanga huwanyatege etengadu yafagu.
14 O baabo gane, ere tere fai kejiwe hogonyi taide waha nebere fanyinege tiginimu nagei nomo bagu, nere fai umugede waha nebere huwanyanege dangamu nagei nomo bagu, nere fai danganege uwau waha hoyo nigei nomo bagu bona jaimu tigiya. Onodu tere fai oruwanga foinga ono nigagu.
15 Ariya nere fanyimu inyaba ono tigei mata wogunga, tere kabaka fanyimu inyaba gidu adai ono nigagu. Tere saini oruwa Itou nomo fai-aita fanyimu hilobainga ono nigei nomo danga tafa bonade, nere fai-aita oruwanga fere onounga ono nigadu.
16 Tere saini oruwa edega wagu, 17 onodu tere gai-gai hauya wagu. 18 Edo tere langa taate dada heigona, tere Itounga hilobainga tuwagu. Itou no tere fai-aita Yesus Kristus fada tuya waha, tere fanyimu onouha waha ono wagu ganga bona gau tuna.
19 Saini Hauri Guuni no tere dada ete onowei nomo jaimu tigonga, tere adai karu tuwagu, 20 onodu nere fai profet beele malalamudu letigei nomo ono wogunga, tere huwanyatege adai inyaba nigagu. 21 Onou wa tere beele oruwanga nomo fanyimu bagu haawe dewagu. Onodu tere fanyimu hilobainga waha yaasu bonade, 22 fanyimu inyaba hogo fere-fere oruwanga feiya wagu.
23 Itou no huwanyage foinga inyou hugu, no edo ono tigonga tere tebere agetege auma yafou oruwanga no tuwagu ganga, onodu ono tigonga tigini guuni heigagu ganga. Onodu no edo tere tebere hauri bagu, anutege bagu, getege gala bagu oofade tagi gonga, tere hilobainga tigini yafagu ganga, onogade saini ere ebere Anyakaro Yesus Kristus ege gidu mona langa tere nyabuluwou te uwau. 24 Onodu Itou no tere yaure tigaiha, no nere dada waha ono nigonga tere langa heigodbode, taate bona, no nomo beele oruwanga lewai waha, no tigini oojo-oojona.
25 O baabo gane, tere Itou no ere hoyo higei nomo hauya tuwagu.
26 Ere Itou nomo fai-aita ebere fanyige langa, tere etenga‑etenga nere ila uumba nigagu.
27 Ji Anyakaro unyi langa beele danga bagu letigini, tere pas beha Itou nomo fai-aita oruwanga lelege nagagu.
28 Ere ebere Anyakaro Yesus Kristus nomo aau warou edo tere bagu inyonbona.