1 Itou ago langa, Yesus Kristus ago langa, no fai-aita oruwanga agenege auma yafade bagu, umeru wane fere nebere onowou haawe nagonbona, ji beele danga bagu benou lehinini, Yesus Kristus no fai-aita oruwanga agenege langa heigedu bona, no king gai-gai yafonbona, 2 onou waha bona, ne nomo beele malalamudu lewei nomo danga tafau. Edo fai nere beele isei nomo haiya wane yo, nere haiya wegu uwa yo, ne gai-gai Kristus nomo beele malalamudu lewei nomo danga tafau. Ne nere beele huwanyanege warei nomo bagu, nere jaimu nigonga huwanyanege ngalenga wonga, Itou nomo fanyimu oojo wodbode waha danga bagu lenigau. Onodu ne gai-gai, nere foinga ono nigi bonahe, fanyimu Itou gau tuna waha isisiwou nigidewau. 3 Isau. Iinga gonga nere fai ege beele tigini waha isei nomo ada gau nigona. Nere nebere agenege kuli beele hogo fere-fere isei nomo gau nigonbona, ono bode nere beele hogo fere ete isei nomo gau nigina waha, isisiwou nigei nomo bode fai baingaro hanigobode. 4 Onou bode, nere beele ngalenga moge tubode, aasa hogo fere-fere ewe waha, agenege kuli tafadu aagu wodbode. 5 Onou wa, ne nage gai-gai ninate foowou. Ne ou jimiri bagu aulau. Ne fai-aita hilou beele malalamudu lenigei nomo haruwe tau. Ne fai-aita hoyo nigei nomo haruwe bagu, onodu ne haruwe waha tigini tau.

6 Ne isini, ji elebe umoni juguni, ono wehenga yame ganefe wain Itou toota tu‑tude dorofe feu wonbona. Ji yame goyei nomo saini jugu waha. 7 Ji danga bagu agege auma yafou nomo, feiya guruwou hilobainga langa guriyeneha. Onodu ji Itou boni huwanyafe ngalengawou yaasudu, elebe ji haawe langa heigene. 8 Elebe fai no feiya guruwou langa guriyedu, amugou heigena waha nomo agou itari hiyaha inyina. Agou waha no benou. Anyakaro no ji fai tigini hiyonbona. No fanyimu tigini wahanga oojo bona, fai-aita nebere onowou haawe nagi-nagina, onodu no nomo kot nomo Fati anyakaro langa, no ji agou waha hiyona bona. Wa no ji yagenga ada hiyonbona. No fai oruwanga no urodbode gaude nigi ganga, nere no malala heigei nomo itari tude waha fere nigonbona.

9 Ne ji bagu fasayadu mayei nomo danga tafau. 10 Isau. Demas no ji awa hiyaiha. No oula beha nomo onowou gaude tuwainga, no Tesalonaika taon goyai. Kresens no Galesia prowins langa goi gainga, Taitus no Dalmesia distrik langa goyai. 11 Luk no nogonga ji bagu yafana. Onou waha bona, ne Mak hawahenga ne ngare mayaru. No ji haruwe hoyo hiyei nomo fai hilobainga. 12 Ji Tikikus amina huuru tunanga Efesus goyaha.

13 Saini ne mayau ganga wonga, ji yame saket ufaro Troas taon langa, Karpus nomo mata langa awene waha tetamai hayau. Onodu buk fere elegou. Onodu ne ure dewau, nere buk kaafa osoko langa atane waha bonahe agene kuli adai digou.

14 Aleksander no bras langa dada atigou fai, no ji inyabamude hiyai. Iinga gonga Anyakaro no fanyimu onowai waha agou, no inyabamude tuwonbona. 15 Ne fere fai waha bona ure dewau. No ere ebere beele sei tuwai.

16 Saini amugou langa, ji kot nomo beele agou gidu letuwene waha, fai ete te no ji ngare otodu bona no yame beele hoyowei uwa. Fai oruwanga awa hiyaneha. Ji Itou nere nebere nyabuluwou bona ninau adai isei nomo boni hauya tuwene. 17 Onou wa, Itou no ji riya hibona, no ji danga hiyai. Onou bona, ji hilou beele edo langa tigini malalamudu lewenenga, haiden nere oruwanga isaneha. Onodu Itou no ji laion nomo hao langa gidu haifaiha. 18 Onou dorofenga, Anyakaro no ji nere fanyimu inyaba oruwanga ono hiyode onode waha langa ege gidu haifedu bona, no ji ono hiyonga yafade gehenga, haifedu no nomo huuna langa yafou ha laluwa langa inyina walanga goyonbona. Ngalenga. Ere no nomo unyi gai-gai isou woboya.

Ngalenga.

19 Ne yame kaiyewou Prisila Akwila ngare niri bonahe, Onesiforus nomo gane bagu nigau. 20 Erastus no Korin taon langa gai yafana. Onodu Trofimus no taura bagu bona, ji no Miletus taon langa awa tunaha yafana. 21 Ne fasayadu mayei nomo danga tafau. Gamaji ne itari gahenga, oto saini bagu karaga saini bagu heigoga.

Yubulus wanga, Pudens wanga, Linus wanga, Klodia wanga, nere Kristen baige gane oruwanga tere kaiye tigou huuru tagane.

22 Anyakaro no edo name anute bagu yafonbona. Onodu no nomo aau warou edo tere oruwanga langa inyonbona.