1 Röhu Christian ö muenoꞌe göehu gö huë baerovaruje muoho ëho avoho maꞌenore. 2 Ëhiꞌoromo gaꞌirarije ae gö jemesi amore iꞌe öꞌamu gavëꞌiroho uënövore: Nosi osaro ro raromohëjo. Urimoroho a mamiohuro gavare ae iꞌe rovamu uvareje: Ma-a maëremu rovaruëromo ajëmijareje. Röhu bogo aehu rueruomamu ajëmiꞌi aneraëro rueruomamu ajëmijareje. Ëhuni ae iꞌe öꞌego ajëmiꞌirarije muoho nadi rumonimore. 3 Iesuare jöëni savoji gagore raromarue ariböviohuni uehorovore. Uvore: Jabuhu savoji gagore raromaruoho noꞌo gemu mae raromaruëromo ëhi huë vavaene baere. O viꞌehi baeruomaje ariböviohuni uehorovore. Uvore: Jabuhu sino viꞌehi baejaruoho noꞌo gemu mae baejaruëromo jabesi jöëni huë vavaene baere.

4 Röhu masurovarue muoho ae ahoꞌobëhe mae uehorovore. Baruohuꞌo vaborohuꞌo jemesi arijoꞌëremu garorovore. Önöꞌe jijihëꞌoho o gohoꞌamëꞌoho ëhuro God-ro iꞌue mana bojëmiꞌëꞌe.

5 O nadi moniohemu baeꞌi uehorovoꞌi aꞌi uvore: Noehu bövi biseꞌo baejaruoho iae eni höjo. Rabëni God-ro no uövuëꞌeje: Na bogo mae bogo ja vuororamiromo ramo vaꞌejöjo. 6 Ëhuni no biririvoromo uvoꞌejo:

7 Jemesi ekaresia a masijoho uehorovore God-are jö aevoꞌi majëhijaroho. Jabuhu avoho raromo jijihojuvo ma-mae vuovëvade jöho uehorovoromo jabuhu God mae uehorovarëhi jemëꞌo ëhi gemuoho God mae uehorovore. 8 Ëhesi bëhoho Iesu Keriso hu urimo jiadoho jaruvohuꞌo ijonöhuꞌo ëhi ma-gemuohemu jiemu jioꞌëꞌe. 9 Ëhuni aehu sareriꞌe jöe gö gö barueromo röjëhijëꞌiroho nadi ëho uehorovoromo öri mare vaꞌarujoho vuonugoꞌi ione aho buꞌöromo öri göroho vaꞌore. Noehu uvëꞌoho: God-ro hesi nimoromo ajamuiꞌiramu nosi aruꞌahoho biririvahuoꞌajë uvëꞌoho ëho mahoje. Aꞌi noehu uvëꞌoho: I iꞌiröhe jögoru rihiromëꞌohuro ëhuro nosi aruꞌahoho biririvahuoꞌajë uvëꞌoho ëho bogo maehuje. I ijarue jögoru ejarue aribövioho bogo ëhuro marëjëvajeje.

10 Nosi sisë muꞌuvahuoröhego suvuoro maho God-are örire bojamijëꞌeje. Sisë muꞌuröhe suvuoroho Jew rajo priest niögu javu hesi mu vaejaruoho bogo iꞌëꞌö. 11 Jew rajo priest börömohuro mi köho baeromo God-hu jiaje osare ë rumo vaꞌoromo hesi örire suvuore bojaminövadeje sisëho muꞌuꞌamoröhego. Aꞌi mi maho bogo amoroho nugoꞌi aꞌi amore jioromo ujuoho vaꞌo roriꞌo vëniro huonövadeje. 12 Roriꞌo huonövadëhi aëro ëhi Iesu bogo amoroho nugoꞌi aꞌi amo börömore jiamu roriꞌo bavaꞌareje. Bavaꞌamu viꞌehe baeromo guomadeje ëhuro hesi kö maho rovego hesi aribövi nosi sisëho uꞌovahuoröhego. 13 Iesu amore jiamu roriꞌo bavaꞌamu guomëꞌego ëhuni noꞌo amo rajehu sisëꞌi uehorovarue bogo jabesi gemuoroho uehorovoꞌi aꞌi Iesuare jöëni iꞌue baeromo huꞌo gemuore riravoꞌejo. 14 Rabëni ave saꞌaroho noehu ioroꞌioremu raromoꞌiröhe amoho bogojavue. Aꞌi ijonö jioröhe amohemu ëhuremu uehorovö. Ëhuni amo rajehu sisëꞌi uehorovarue jabesi gemuoroho no bogo uehorovoꞌi Iesuꞌo riravoꞌejo. 15 Huꞌo riravoromo mi suvuoroho bogo aꞌi Iesuare ihore God rajahiromo ëhuro suvuoroho hu bojaminövoꞌejo. Ësuvuoro hesi bëhoho noehu hesi iho a huruoho majëhijëꞌoho ëho noro jöꞌo öge i vaꞌëne ëhi God-are örire suvuore bojamarueje. 16 O huë baerovoromo ajamirovarujoho nadi rumonimore. Ëhi jiëꞌe mu vaejëꞌoho God-ro uvajeje: Jabumë ëhi ëꞌaruoho ëho mi suvuoro mabëhe bojemaruëjo.

17 Röhu ekaresia muebejëvarue aribövioho jabuhu jö bojëmijaruoho nadi ahoꞌi ma-ejëhore. Rabëni jabumë jemesi dë vövöbajoꞌoho muebejëharueje ijonö God-are örire majahiromo uaruomoröhëni: Iae no jasi aribövioho ëhi ëhi muebejahare höjo. Jemëhu jabesi jö ejëhëꞌohuro ëhuro jabumë bogo huë vavaenoho baeromo ëma muebejëvoꞌi jabesi dëho sasohëvoꞌiramu muebejëvoꞌëꞌö. O bogo ejëhëꞌoho jabu huë vavaene baeꞌëꞌö röhu ëma muebejëvoꞌëꞌö. Ëhuro jemë bogo marëjëvoꞌëꞌe.

18 Röhu jemëro nosi jöëni parie vaenövore. Ëhesi bëhoho noehu uehorovaruoho majae ëhi mu maemu vaeꞌi naguoromo ëhuro no dë sasohavue. Ëhuni parie vaenövore. 19 Na nego avohe jemëro ëhi ëꞌojöro ëhuro God-ro remöꞌöjego na jemesi örire ma-burëro öꞌiro.

20 Röhu na nege huë mae bojamuaje aho God-ro jemë ajëmego mae jëvojöro. Ëhesi bëhoho sheep muebejavuaje a böröme Bada Iesu God-ro ajamijamu guomoromo riꞌöjadeje. God-hu Iesu ajamade hesi bëhoho Iesu köe rueromo guomamu ëhuro God-hu no ioroꞌioremu muebejavuoꞌiröhe jögoroho jiadeje. Ëhuni Iesu ajamamu riꞌöjadeje. 21 Amo na nege God-ro jemë inömo maho mu maho ahoꞌo ajëmego huhu nimaje muoho vae avohoꞌirarijego o huro nosi dë vövöbajoꞌoho mae avohahuego noro mu mae vaejego huro göromo dë mae jioröhego. Huro Iesu Keriso-are jöëni ëhi ajamuijöro nege. Keriso-are ihoho ma-dö maro jiemu jioꞌëꞌe. Iae mae.

22 Aganomë naro ave jö harihoho jajivoromo bamëhe jemëro adahoromo dë vövöbajoꞌoho biririvoꞌirarijego. Jemëro nadi uꞌuvoꞌi ma-here. Jöho bogo ëgehuje. 23 Röhu ave jöho uëꞌiëꞌe jemëro heꞌirarijego. Nosi öho Timothy savoji gagore hijadoho jiovo nugöꞌöjëꞌeje. Hu burëro rovamu gavëꞌoho ëhuro na huꞌo gemu mae öꞌoromo gëꞌejo. O hu bogo burëro rovëꞌiroho naro sivue öꞌejo.

24 Jemesi ekaresia a masijohuꞌo God-are aribövi ioroꞌiorohuꞌo jejëmijode höre. Italy saꞌa rajo ekaresiaho jaburo jemesi örire jejëmijö.

25 God-ro ae ahoꞌobëhe jemë huë baeromo ajëminövoꞌëꞌe. Ahia minoꞌe.