1 Eto dagota namei kamei ari erevi iji deina puvurou kesora amita ke amo ungota degi ahari ta mane kajasora. 2 Ungo mahu kiagova amo Bada ta puvurari iji kombu te amo pegene embo mume jo ta puvaguja ainge dombo puvuresuja. 3 Eto embomeni na “Eha amo iji javotoho peka ta mihera,” ainge ijiroro ari sasapura ta isoro peni sau be puvuresuja amo evohu na meni humbasi ue hamo memenga titimbaguja ainge dombo puvurou kogue joru tiumbeto pambuto ojikari degi avo irae be ra. 4 Rate nau namei kamei, ungo mume ta irari embomeni mane rate iji ta eto usasa ta meniundi avoeto iji kombu na ungota degi pegene embo na puvaguja ainge dombo mane puvuresuja. 5 Ungotena mume ta toho mane avoeto embo nei na evagora ainge avojo, 6 rate ereto tihi kujeto kogue irivujo. 7 Eto embomeni evagora amo mumete evagora, eto umo indiore tihivi eaguja amo mumete eaguja 8 te ungotena iji embopo avoeto siro jigama ue hotembari javotoho ue isoro embo na beha ingeni na peiketo jigaguja ainge dombo humota ari osa ari avo be jigesora, eto God na ungotenau ari sasapura oreketo humbasuja amo ungotenau siro orekari kope mihia avo hotembeto tunga javotoho aisora. 9 Eto God na ungotena orekasuja ke amita be amo ungotena avo God na ungotenau ari sasapura avoeto amita tumo kiagora ijie umbae rate Bada Iesu Keriso na ungotenau ari sasapura oreketo humbau amita toho ara umbuna 10 avo eto ungotena teho irorote mo peheto iroro Iesu puvurou amiga vahaita daroho iresora avoeto pehena. 11 Avoeto ungo ere ova ainge pere ue ke javotoho mine ara ijie osa kageni ue sovera ari umbuvujo.

12-13 Eto dagota namei kamei ungota degi ke erevi erera amo Bada ta javo ta pure ere ora embo ungote mihie oje ere kahihera embo avo pepeni ke ijie osa evujo enana ta pure avoeto. Eto hini kambari avo, teho peka ta irivujo.

14 Eto dagota namei kamei, ke erevi ava erera amo kupi pegogo embomeni avo oje kahevujo, eto sovera ae ere ora avo hondate evujo, eto jopapa ere ora avo ke avo hamo ngahia ururou embomeni amita degi tumo sausau mane aisova. 15 Eto embo na ari sapura ungota degi au kito mine ungo na amita degi ari sapura mine avojo, eto iji tapa ari javotoho embo tapa ta degi mine ara evujo. 16-17 Eto iji tapa tunga javotoho ue iji tapa pari evujo. 18 Eto iji nei javotoho puvurou amo osa evujo eto iji nei sapura puvurou kito amo God osa evujo amo ungo Iesu Keriso ta toho na ainge ava God na uje ere ua.

19 Eto God ta ahihi otohu na ungota jo ta ji evekarako ere ua avo seikavojo. 20 Eto embo na ke emo God ta ke ra ainge ijie au ingito sokova ke mane asova 21 te ke tapa avo eto kito ke be davore sokova davore avo kito ke be avo jigama ue 22 ke sokova nei te nei te tapa tovujo.

23 Eto pari ta erera amo God, peka ikari embo amina au ungota jo tongopa irae au ungo otohu aisova. Eto God na au ungota ahihi te hamo te hotembari jo te tapa javotoho au pehumba ari inono ae ururovo Bada Iesu Keriso puvuresuja. 24 Eto ungo siriketo amita toho ava umbuna embo amo humota ari haite avoeto erena amo aisuja. 25 Eto dagota namei kamei, dago avoembo pari evujo. 26 Eto namei kamei tapa avo mune tavo ue pekevujo. 27 Eto Bada ta javo ta erena, ekalesia namei kamei tapa ta degi ahari erevi ehekevu ingore. 28 Aravora, ungotenau Bada Iesu Keriso ta hondate ari avo ungota degi iresuja.