1 Eto dagota namei kamei ke tutumota amo Bada ta ke hande ore sigeto eneteto ere pahua amo ungona humbuheva ainge dombo embomeni na otohu ke ijie umbara dago ke hande ari embo avoembo pari evujo. 2 Eto ke nei amo embo nei uhoho na God ta ke amo ke be mane ke eagora avoeto God na embo sasapura ta ingeni ta oreketo umbaja dago embo pari evujo. 3 Eto Bada amo humota ari embo avoeto Sapura Embo peikihe ungo oreketo humbuto sovera ari ikau humbasova. 4 Eto ungo Bada na ere ua avoeto ungo humota ere ora avoeto dago ere kogora amo ke mahu eo ingito ere ovova eto ehako aisova. 5 Eto Bada na hondate ururou God ta osa ari avo be kogue Keriso ta hondate ari na pure mane toasova te kaiketo aisova.

6 Eto nau namei kamei ungo Bada Iesu Keriso ta javota ari erevi ava erera, amo ahe poekehere humbuheva avo ungota namei vahai na ambo ambo ae kupi pegogo ururou kito amo be tovujo oenga iroi. 7 Eto ungo kogova amo ungo daingeto iresova avo ahe kihira uera amo dago ungote mihie kupi pegogo ae 8 eto indari amo teho humbuto indae rate dago mine ikihe humbuto indimahara. Eto ungo osaga kiagova dago ungo embo mumete ijite pure ngahia uera. 9 Amita ke be amo dagota pure ta mine avoeto ungota undurari amo teho humbahera te ungota ahe kihira ainge ava eto ari ainge amo uera. 10 Eto ungote mihie ke peni erevi ungota degi ikihara amo “Pure ae embo na indari mane indesuja.”

11 Eto dago ke nei eha ingera amo kupi pegogo embo amo ungote mihera amina pure be ue keko namei ta degi ta ke kaikari erera avo ingera. 12 Avoeto Bada Iesu Keriso ta javota erera amo embomeni amina ari enana ta avo simba ue ingeni pure eto ungo oenga indari umbara erera. 13 Eto nau namei kamei ungo ari javotoho asi ue kupi pegogo avojo. 14 Eto ke ahari ei ta ere kajihera amo embomeni nei uhoho ungote mihera amina agi ari uje ae ururoro kito amo tovujo oenga mihie me kiore. 15 Eto embo amo kitoho mane rate no namei rate ngahia na teho isembejo.

16 Eto Bada amo ungotenau peka humbari embo avoeto iji tapa te ari tapa te amita peka ikau humbuhurovo amina ungote iresuja. 17 Eto na Paul ingeni nau na ke erevi ere kajihena. Eto na Paul nanena ungo ere pekihena, eto nau ahari kajari tapa amita tutumota amo einge kajagona, amo kikiva ta hajire naura. 18 Eto Bada Iesu Keriso ta hondate ari amo ungote iresuja.