1 Ya mi ma da zøhø ra pa de ra ngo dega pascua núꞌbʉ mi tsꞌi ra thuhme nsi rá nzoi. 2 Ya nda̱ gá macja̱ ne ya xahnate de ra ley mri ꞌñʉꞌti pa hanja da za da hyo ra Jesu, pe himi tsa da gʉ ngueꞌa̱ mi tsuꞌʉ ya ja̱ꞌi.

3 Nepʉ de gueꞌa̱ ra Satá bi yʉtꞌa ja rá mfeni ra Juda núꞌa̱ xqui thuꞌmbabi nehe ra Iscariote, ꞌna de núꞌʉ ꞌrɛtꞌamayoho yá apostol ra Jesu. 4 Y nuꞌá̱ bi ma bá cꞌa̱ꞌtsa ya nda̱ gá macja̱ ne ya nda̱ de ra nija̱ pa bá ña̱uiꞌʉ hanja da za da ꞌyɛntꞌua ra Jesu ja yá ꞌyɛꞌʉ. 5 Ha nuꞌʉ́ xi bi johya ne bi hña̱ꞌtuabi ra boja̱ꞌa̱. 6 Hangue nuꞌá̱ ꞌbestho xi mi honi hanja da za da da ra Jesu, ne bi huahna ꞌnara ora mi joꞌo ya ja̱ꞌi.

7 Ne bi zø ra pa de ra ngo pa da tsꞌi ra thuhme nsi rá nzoi, gueꞌbʉ mi pɛꞌtsi da tho ꞌnara tꞌʉdɛti dega hña̱ꞌti. 8 Nuꞌbʉ́ ra Jesu bi mɛhna ra Pedro ne ra Xuua ne bi ꞌñembabi:

―Rí maha ꞌbɛtꞌohʉ pa grí hocjʉ ra hñuni de ra pascua ga tsihʉ.

9 Nepʉ nuꞌʉ́ bi ꞌyambabi ne bi ꞌñembabi:

―¿Habʉ guí ne ma grá hocjeꞌa̱?

10 Nuꞌbʉ́ ra Jesu bi ꞌñembabiꞌʉ:

―Nu xcrí cʉthʉ ja ra hnini gui nthɛhʉni ꞌnara ꞌñøhø di ha̱ ꞌna ꞌbada ra dehe. Ne gui tɛnhʉ asta ja núꞌa̱ ra ngu habʉ da yʉtꞌiꞌa̱. 11 Ne ꞌñembabihʉ núꞌa̱ toꞌo ra me ngu: “Ra Xahnate bá pɛhnꞌa ra noya ga eñꞌahe njaua: ¿Habʉ ja ra ngu xcá ꞌuegagui pa ga tsihe ra ntꞌoxi dega pascua co ma nxadi?” 12 Nepʉ nuꞌá̱ ma da ꞌñuꞌtꞌahʉ ꞌnara da̱nga ngu maña̱ ja ra tøngu, ya xa thoqui xá hño, ne ja gui hocjʉni ra ntꞌoxi.

13 Nepʉ nuꞌʉ́ bi ma bá nthɛui gatho ngu núꞌa̱ xqui xipa ra Jesu. Ne ja bi hyocniꞌʉ ra ntꞌoxi.

14 Y nu mi zø ra ora da ñuniꞌʉ, ra Jesu co yá apostol bi hñudi mahyɛgui ja ra mexa. 15 Nepʉ nura Jesu bi ꞌñembabiꞌʉ:

―¡Xi stá ne ga tsihʉ mahyɛgui ra ntꞌoxi de ra pascua ngu dí ꞌbʉihʉbya, ante da zø ra ora ga tu! 16 Ngueꞌa̱ nugui dí xiꞌahʉ gue ya hinga ma ga yopa tsi ra ntꞌoxi de ra pascua maꞌnaꞌqui asta hinda zøhø núꞌa̱ ra pa grá tsihʉ nuni mahetsꞌi habʉ brí manda Ajua̱ ma Dada.

17 Nepʉ nuꞌá̱ bi gʉ ra vaso ne bi umba njama̱di Ajua̱ ne bi ꞌñembabiꞌʉ:

―Na̱, tsihʉ ꞌra ꞌna tsiqui grí gathohʉ. 18 Nugui dí xiꞌahʉ gue ya hinga ma ga yopa tsi ra vinu dega obxi asta núꞌa̱ ra pa grá ꞌbʉhʉ nuni mahetsꞌi habʉ brí manda Ajua̱ ma Dada.

19 Nepʉ nuꞌá̱ bi gʉ ra thuhme ne bi umbabi njama̱di Ajua̱ ne bi hecuabiꞌʉ bi umbi, ne bi ꞌñembabi:

―Guehna ma ndoꞌyo ma ga uni po rá ngueꞌahʉ. Ora gui tsihʉ, gueꞌa̱ ꞌnara feni de ma du.

20 Nepʉ de ya xqui uadi ra ntꞌoxiꞌʉ, nuꞌá̱ bi gʉ ra vaso, ne bi ꞌñembabi:

―Nuna vinu guehna ꞌnara seña de ra ꞌraꞌyo cohi xa tꞌøtꞌe co ma ji núꞌa̱ ma ga fani po rá ngueꞌahʉ.

21 Y nubyá ꞌna de gue núꞌahʉ guí ꞌbʉhʉua con guequi ja ra mexa, ma gui dagaguihʉ. 22 Núꞌa̱ Toꞌo e bi Nja̱ꞌi, ya ri ne nuna ra ꞌñu xa tꞌutuabi pa rí ma ja ra du, pe ¡huecate núꞌa̱ toꞌo ma da daꞌa̱!

23 Nepʉ nuꞌʉ́ bi mʉdi bi ꞌñámbabi ꞌna ngu ꞌna toꞌo núꞌa̱ mi ma da ꞌyøtꞌa njabʉ.

24 Nepʉ nuꞌʉ́ bi mʉdi bi ꞌñámbabi toꞌo de gueꞌʉ mi ma da uaꞌa̱ da ma̱. 25 Pe ra Jesu bi ꞌñembabiꞌʉ:

―Ya nda̱ ri manda yá hnini ngu ya hmu, ha nuya hnini eꞌtsua yá nsu yá nda̱ gue xi øtꞌe xá hño. 26 Pe nuꞌahʉ́ hingue rí ꞌñepi gui njahʉbʉ. Nuꞌa̱ rí ꞌñepi gui ꞌyøthʉ, nuꞌa̱ da nja rá nsu de gueꞌahʉ, mahyoni da notsi, ha nuꞌa̱ tóꞌo da manda, mahyoni da nja ngu ꞌnara ꞌbɛgo. 27 ¿Toꞌo maꞌna tꞌumba ra nsu, ha gue núꞌa̱ toꞌo da hñudi ja ra mexa, o núꞌa̱ toꞌo pɛpabi? ¿Ha hingue núꞌa̱ hudi ja ra mexa? Masque njabʉ, pe nugui drá ꞌbɛgo de gueꞌahʉ.

28 Nuꞌahʉ hinxcá ꞌueguehʉ de guequi masque xcá hyanthʉ ya tsꞌothogui núꞌʉ stá thogui. 29 Hangue nugui ma ga ꞌraꞌahʉ ri nsuhʉ dega nda̱, ngu ma Dada xa ꞌracagui ra nsu pa ga nda̱. 30 Ha nu xcrá nda̱, ma gui ꞌbʉhʉni nehe con guequi, ne ga ñuñhʉ. Ne ja ma grá ꞌraꞌahʉni ri hudihʉ nehe dega nda̱ pa gui mandahʉ núꞌʉ ꞌrɛtꞌamayoho ya ꞌmʉi de ya ja̱ꞌi de Israel.

31 Nehe ra Jesu bi ꞌñembabi ra Simu Pedro:

―Nugue Simu, ra Satá xa ꞌyadi pa da hña̱cꞌa ri jamfrihʉ, ne da ꞌyøꞌtꞌahʉ ngu ra trigo ora ꞌbiqui. 32 Pe nugui stá apabi Ajua̱ ma Dada por gueꞌi, gue hinda ꞌmɛdi ri jamfri. Ha nu xcrí yopa jʉ ri jamfri, gui japi da zɛdi yá jamfri nehe nuyʉ maꞌra ri cu.

33 Ha nura Simu bi ꞌñembabi:

―Ma zi Hmuꞌi, nugui dí ꞌbʉcua ꞌbʉ da tsꞌixꞌaꞌi ra fadi, ga ma nehe, ha nuꞌbʉ da thoꞌi, dá thogui nehe.

34 Ha nura Jesu bi ꞌñembabiꞌa̱:

―Nugui dí xiꞌaꞌi nuꞌi Pedro, gue núbya dí nxuui ante da mafi ra menja̱ ma gui ma̱ hñuꞌqui gue hinguí pa̱cagui.

35 Ra Jesu bi ꞌyambabi yá nxadi ne bi ꞌñembi:

―Xi núꞌbʉ dá pɛhnꞌahʉ hingá hña̱xa ri buxahʉ nixi ri ncʉboja̱hʉ nixi ri mponga zɛsthihʉ, ¿ha gue bi nja te bi ꞌyøꞌtꞌahʉ ra ꞌbɛdi?

Nepʉ nuꞌʉ́ bi da̱di ne bi ꞌñena:

―Hina.

36 Nepʉ nuꞌá̱ bi ꞌñembabi:

―Pe nubyá ha̱, dí xiꞌahʉ gue nuꞌʉ tóꞌo pɛꞌtsa rá buxa ne rá ncʉboja̱, dá hña̱tsꞌi. Ha nuꞌa̱ tóꞌo hingui pɛꞌtsa rá huai, dá pa rá patꞌi pa da dai. 37 Ngueꞌa̱ nugui dí xiꞌahʉ gue mahyoni da njabʉ ngu ma̱nga ra Ma̱ca Tꞌofo de guequi habʉ ena: “Nuꞌá̱ ja ra uɛnda ꞌnara ꞌyøtꞌatsꞌoqui.” Ngueꞌa̱ gatho núꞌa̱ xa ntꞌofo de guequi pɛꞌtsi da njabʉ.

38 Nepʉ nuꞌʉ́ bi ꞌñembabi:

―Ma zi Hmuꞌihe, jaua yoho ya huai dí pɛꞌtshe.

Ha nuꞌá̱ bi da̱di ne bi ꞌñembabi:

―Con sɛhɛꞌʉ yoho.

39 Nepʉ nura Jesu bi bøni bi ma ngu mrá nza̱i pa ja ra tꞌøhø ꞌbo Olivo. Ne gatho yá nxadi bi dɛniꞌa̱. 40 Ha nu mi zøni de guehni, bi ꞌñembabiꞌʉ:

―ꞌYaphʉ ndunthi Ajua̱ pa gui tsɛthʉ ya tsꞌothogui nu stí ꞌñepʉ.

41 Nepʉ ra Jesu bi ꞌuegue de gueꞌʉ tsꞌʉ zi yabʉ pa bá ndandiña̱hmu bá apabi Ajua̱ rá Dada, 42 ne bi ꞌñembabi:

―Ma Dadaꞌi, ꞌbʉ gui nehma̱, gui ꞌueca nuna thogui ma ga thogui, pe hindí ne gui ꞌyøtꞌe ngu núꞌa̱ ga nega, go da ꞌyøtꞌa ngu núꞌa̱ ri pahague.

43 Nepʉ nuni habʉ mi apabi Ajua̱ꞌa̱, bi zøhni ꞌnara ɛnxɛ xqui ꞌñehe de mahetsꞌi pa bi umbabi ra tsꞌɛdi pa da zɛta ra tsꞌothogui. 44 Nuꞌá̱ xi mi tu rá mʉi ndunthi de mi apabi Ajua̱, pe maꞌna mi apabi co ndunthi ra tsꞌɛdi asta mri xanthe, ne nuyá xanthe ngu myá da̱nga tagui dega ji, mi tʉi ja ra hai.

45 Nu mi uadi bi ꞌyapabi Ajua̱ꞌa̱, bi mengui pa habʉ xqui zogui yá nxadi, ne bi zʉdi gatho xqui ꞌña̱ha̱ ngueꞌa̱ ya xqui uentꞌiꞌʉ co ra dumʉi. 46 Ha nuꞌá̱ bi ꞌñembabi:

―¿Hanja xcá a̱ha̱hʉ? Nanjʉ, ne ꞌyapabihʉ Ajua̱ pa gui tsɛthʉ ya tsꞌothogui.

47 Tsꞌa mi ña̱ui yá nxadi ra Jesu, bi zøhø xi ndunthi ya ja̱ꞌi, ne nura Juda ꞌna de núꞌʉ ꞌrɛtꞌamayoho ya nxadi, mbra ꞌbɛtꞌo de ja ya ja̱ꞌi. Ne ꞌbestho bi uatꞌa habʉ mi ꞌba ra Jesu pa bi zʉꞌtsiꞌa̱. 48 Nepʉ ra Jesu bi ꞌñembabi:

―Juda, ¿ha gue co ꞌnara ntsʉꞌtsi grí da Núꞌa̱ Toꞌo e bi Nja̱ꞌi?

49 Ha núꞌʉ mri ꞌñoui ra Jesu mi hyandi te ma da nja bi ꞌñembabi:

―Ma zi Hmuꞌihe, ¿ha guí ne ga xithe co ya huai?

50 Y ꞌna de gueꞌʉ bi mɛnpa ꞌnara ntsɛqui ꞌnará ꞌbɛgo ra da̱nga nda̱ gá macja̱ ne bi dacua rá gu ra ꞌñɛi. 51 Pe ra Jesu bi ꞌñembabiꞌʉ:

―Hyɛhʉbʉ, oguí øthʉ njabʉ.

Nepʉ nuꞌá̱ bi hñuxa rá ꞌyɛ ja rá gu núꞌa̱ ra ꞌbɛgo, ne bi ña̱ni ꞌbestho. 52 Nepʉ bi zofo nuya nda̱ gá macja̱, ne ya nda̱ de ra nda̱nija̱, ne ya nda̱xjua nda̱, gatho núꞌʉ xqui ꞌñehe pa e da zitsꞌiꞌa̱, ne bi ꞌñembabiꞌʉ:

―¿Ha gue drá be pa e gui jʉgaguihʉ co ya huai ne ya za? 53 Pe núꞌbʉ ndí ꞌbʉi hyastho con gueꞌahʉ ja ra nda̱nija̱, hinte gá ꞌyøtcahʉ. Pe xibya, go xcuá ehʉ masque dega xuui pa gui jʉgaguihʉ. Ngueꞌa̱ nuya ya orabya go ri orahʉ pa gui nda̱hʉ de guequi, ne ya orabya go ya ora pa da nda̱ ra ꞌbɛxuui.

54 Nepʉ de guehni bi gʉ ntsꞌa̱hniꞌʉ ra Jesu, ne bi zitsꞌi ja rá ngu ra da̱nga nda̱ gá macja̱, ha nura Pedro mi ꞌbɛfa dega zi yabʉtho, mri dɛni. 55 Ha nu mi zønga ra Pedro ja rá ngu ra da̱nga nda̱ gá macja̱, xqui tꞌudi ꞌnara faspi ja ra patio, ne ja mi huhni ꞌraya ja̱ꞌi mri mpaꞌti, nehe ra Pedro ja bi hñuhni con gueꞌʉ. 56 Y de guehni ꞌnara nxutsi rá ꞌbɛgo ra da̱nga nda̱ gá macja̱ nu mi hyandi gue mi huhni ra Pedro ja ra tsibi xi bi nʉꞌtiꞌa̱ ne bi ꞌñena:

―Pøde ne nuni ra da̱me go mri ꞌñoui ra Jesu nehe.

57 Pe nura Pedro bi gømbabi núꞌa̱ ra nxutsi ne bi ꞌñembi:

―Hina, hindí pa̱di toꞌoꞌa̱.

58 Nepʉ hinga yaꞌa̱ bi hyanda maꞌna ne bi ꞌñembabi:

―Pøde neꞌi go ngrí ꞌñoui ra Jesu.

Ha nura Pedro bi ꞌñena:

―Hina, hinga majua̱ni ndrí ꞌñoꞌbeꞌa̱.

59 ꞌMɛfa de xqui thogui ngu ꞌna ora bi ꞌñena maꞌna ra ja̱ꞌi:

―Majua̱ni nuna ꞌñøhøni go mri ꞌñouiꞌa̱, ngueꞌa̱ nehni mfa̱tho gue ra me Galilea.

60 Nepʉ nura Pedro bi ꞌñena:

―Dí xiꞌaꞌi gue nixi dí pa̱di núꞌa̱ guí ma̱.

Y núꞌa̱ ra ora de tsꞌa mi ma̱nga njabʉ, bi mafi ra menja̱. 61 Núꞌa̱ ra oraꞌa̱ bi ñegui ra zi Hmu Jesu pa bi hyanda ra Pedro, ha nura Pedro ꞌbestho bi zo rá mfeni de núꞌa̱ xqui xipabi desde rá mʉdi, xqui ꞌñembabi: “Ante da mafi ra menja̱ ma gui cøngagui hñuꞌqui.” 62 Hangue nura Pedro bi bøni pa thi, xi bá nzoni ntsꞌɛdi.

63 Ha nuya ja̱ꞌi núꞌʉ toꞌo mri su ra Jesu xi mi øꞌtua ra ntꞌeni ne mi naꞌmbabiꞌʉ. 64 Y bi goꞌtua yá da co ꞌnara dutu ne mi umba ya mpɛꞌti, ne mi embabiꞌʉ:

―¡Xicaguihe xa̱ toꞌo núꞌa̱ bi napꞌaꞌi!

65 Ne mi xipabi ndunthi ya tsꞌonoya.

66 Rá hyaxꞌa̱ bi muntsꞌa ya nda̱xjua nda̱ ne ya nda̱ gá macja̱ ne ya xahnate de ra ley. Ne bi tsꞌixa ra Jesu pa habʉ mi muntsꞌa núꞌʉ ya da̱nga nda̱ gá xodyo, y de guehni ja bá tꞌambabini ne bi tꞌembabi:

67 ―Xicje, ¿ha gue xi majua̱ni go gueꞌi grá Cristo xuá mɛhnꞌaꞌi Ajua̱ pa gui nda̱?

Nepʉ nuꞌá̱ bi da̱di ne bi ꞌñembabiꞌʉ:

―ꞌBʉ ga eñꞌahʉ gue go guequi, hingui camfriguihʉ. 68 Ha nuꞌbʉ ga øꞌtꞌahʉ ꞌraya ntꞌani, hingui xicaguihʉ, ha nixi gui hyɛgaguihʉ. 69 Pe nuya pa xa ꞌñepʉ, Núꞌa̱ Toꞌo e bi Nja̱ꞌi ma da hñudi ja rá ꞌñɛi Ajua̱ núꞌa̱ toꞌo bí pɛꞌtsa gatho ra tsꞌɛdi.

70 Nepʉ nuꞌʉ́ bi ꞌyambabiꞌa̱ ne bi ꞌñembabi:

―Nuꞌbʉ́, ¿ha gue go gueꞌi rá Tꞌʉꞌi Ajua̱?

Ra Jesu bi da̱di ne bi ꞌñembabiꞌʉ:

―Ha̱ha̱, go guecagui, ngu xcá ma̱ñhʉbya.

71 Nepʉ nuꞌʉ́ bi ꞌñena:

―¡Pa te maꞌra ya testigo ga hoñhʉ gue nucsɛhʉ ya dá øhʉ núꞌa̱ bi ma̱!