1 Ra Jesu ne yá nxadi ya mi ma da zønga Jerusale, ne mi ꞌyo guetbʉ de Betfage ne Betania, nehe guetbʉ ra tꞌøhø ꞌbo Olivo, hangue ra Jesu bi mɛhna yoho yá nxadi pa da ꞌmɛtꞌo, 2 ne bi ꞌñembabiꞌʉ:

―Grí maha ja nuni ra tꞌʉca hnini bí jani, ne nu xcrí tsøñhʉni gui tsʉhʉ ꞌnara zi burru di tha̱tꞌi núꞌa̱ hinto xa tøguetho. Bá xoꞌthʉ ne bá tsincahʉua. 3 Ha nuꞌbʉ toꞌo da ꞌyañꞌahʉ ne da ꞌñeñꞌahʉ hanja guí øthʉ njabʉ, ꞌñembabihʉ: “Ra zi Hmu bí honi, nepʉ ꞌmɛfa ma ga yopa tsinꞌahe maꞌnaꞌqui,” gui ꞌñembabihʉ njabʉ.

4 Nuꞌbʉ́ núꞌʉ yoho yá nxadi bi ma ja núꞌa̱ ra tꞌʉca hnini, ne ja bá tsʉhni ꞌnara zi burru mi tha̱tꞌa møte ja ꞌnara gosthi ja rá hyo ra ꞌñu, ne bá xoꞌtiꞌʉ. 5 Y mi ꞌbahni ꞌraya ja̱ꞌi bi ꞌñembabiꞌʉ:

―¿Te gui japhʉ núꞌa̱ ra burru guí xoꞌthʉ?

6 Ha nuya nxadi bi da̱di ngu xqui xipa ra Jesu, hangue núꞌʉ ya ja̱ꞌi bi hyopi bi zitsꞌi. 7 Nepʉ nuꞌʉ́ bá tsimpa ra Jesu núꞌa̱ ra burru, y bi hña̱ca yá patꞌiꞌʉ pa bi xiꞌtsua ra burru pa bi tøgueꞌa̱. 8 Nepʉ ra hmuntsja̱ꞌi bi hña̱ca yá patꞌi pa bi mø ja ra ꞌñu, ha nu maꞌra mi toca ya ꞌyɛza pa mi pøgue nehe ja ra ꞌñu.

9 Y núꞌʉ toꞌo mri ꞌbɛfa ne mri ꞌbɛtꞌo mi thø ya hmafi mi ena:

―¡Xá nsunda núni xpá mɛncahʉ Ajua̱! ¡Ajua̱ da ja̱pni! 10 ¡Ajua̱ da ja̱pi núni ma da nda̱! Nuni go guehni ra nda̱ xqui hña̱ꞌtuabi ndu ma dadahʉ ra nda̱ Davi. ¡Xá nsunda Ajua̱ bí ꞌbʉi mahetsꞌi!

11 Nepʉ ra Jesu bi yʉtꞌa Jerusale ne gá yʉtꞌa ja ra nda̱nija̱, ne bi hyanda xá hño gatho núꞌa̱ mi jani mbo ra nda̱nija̱. Y coñꞌa ya bi nde, nuꞌá̱ bi bøni de guehni bi ma Betania co núꞌʉ ꞌrɛtꞌamayoho yá nxadi.

12 Y rá hyaxꞌa̱ ra Jesu ne yá nxadi bi bønga de Betania, y de má ꞌñu bi zʉ ra thuhuꞌa̱. 13 Ne dega yabʉ bi hyanda ꞌnara ꞌbai gá igo mi cꞌamtho, hangue bi ma bá cꞌa̱ꞌtshma̱ ua mi tø yá igo. Pe nu mi zønini hinte bi zʉdi, mi ꞌraꞌta yá xi ngueꞌa̱ mri ꞌbɛtho da nøgue. 14 Hangue ra Jesu bi ꞌñembabi ra ꞌbai gá igo:

―Hinhyaꞌmʉ ma da yopa nøgue ri igo.

Ha yá nxadi bi ꞌyøde núꞌa̱ bi ma̱.

15 Nepʉ bi yopa zøñꞌʉ Jerusale, y ra Jesu bi yopa yʉtꞌa ja ra nda̱nija̱ ne bi mʉdi bi ꞌyɛnga gatho núꞌʉ mi ꞌbʉhni mri mpa ne mri ntai mbo ra nija̱. Bi pʉntsꞌua yá mexa núꞌʉ ya mpatboja̱ ne yá thuhni núꞌʉ toꞌo mi pa ya domitsu. 16 Ne ya himbi hopi to bi thoguini pa da hña̱xa ya tꞌøtꞌe. 17 Nepʉ nuꞌá̱ bi xipabi ya ja̱ꞌi ne bi ꞌñembabi:

―¿Ha hinguí pa̱hʉ gue xa ntꞌofo ja ra Ma̱ca Tꞌofo ne ena: “Numa ngu rá thuhu ra ngu dega nsadi pa gatho ya hnini”? Ha nuꞌahʉ́ go xcá ꞌyøtꞌathohʉ ra ngu dega mfe.

18 Nuꞌbʉ́ ya xahnate de ra ley ne ya nda̱ gá macja̱ bi ꞌyøde núꞌa̱ bi ma̱nga ra Jesu, hangue nuꞌʉ́ bi ꞌñʉꞌti pa da hyohma̱ꞌa̱, ngueꞌa̱ mi tsuꞌʉ da hña̱nba yá nsu, ngueꞌa̱ gatho ya ja̱ꞌi xi mri ho núꞌʉ ya noya mi udiꞌa̱. 19 Ha nu mi putꞌa ra nde, ra Jesu ne yá nxadi bi bønga de guehni Jerusale.

20 Ha nurá hyaxꞌa̱ de mi xudi bi thoguini maꞌnaꞌqui habʉ mi ꞌbai núꞌa̱ ra igo xqui zʉi ra Jesu, ne bi hyandiꞌʉ gue ya xqui ꞌyotꞌi gatho, asta yá ꞌyʉ. 21 Ra oraꞌa̱ ra Pedro bi benga núꞌʉ ya noya xqui ma̱nga ra Jesu, ne bi ꞌñembabiꞌa̱:

―Ma Xahnateꞌi, handi, nuna ꞌbai gá igo gá xipi gue ya hinhyaꞌmʉ ma da yopa nøgue yá igo, ya xa ꞌyotꞌi.

22 Nuꞌbʉ́ ra Jesu bi ꞌñembabiꞌʉ:

―Camfrihʉ Ajua̱. 23 Xi majua̱ni dí xiꞌahʉ gue ꞌbʉ toꞌo ja ndunthi rá jamfri ne hinda dʉhʉ, da za da ꞌñembabi nuna ra tꞌøhø gue da mponi dí ma ja ra ndehe, ne da njabʉ ngu núꞌa̱ da ꞌyadi. 24 Hangue nuga dí xiꞌahʉ gue nuꞌa̱ gatho gui ꞌyaphʉ Ajua̱ ra Dada, camfrihʉ gue nuꞌá̱ xa ꞌyøꞌtꞌahʉ ri tꞌadihʉ, y núꞌa̱ gui ꞌyaphʉ da ꞌraꞌahʉ. 25 Pe ora gui ꞌyaphʉꞌa̱, ꞌbʉ to xa ꞌyøꞌtꞌahʉ ꞌnara ntsꞌoꞌmʉi, pumbahʉ, pa njabʉ Ajua̱ ra Dada bí ꞌbʉi mahetsꞌi da punꞌa ri tsꞌoquihʉ nehe núꞌa̱ xcá ꞌyøthʉ. 26 Ngueꞌa̱ nuꞌbʉ hingui pumbahʉ núꞌʉ toꞌo xa ꞌyøꞌtꞌahʉ ꞌnara ntsꞌoꞌmʉi, Ajua̱ ra Dada bí ꞌbʉi mahetsꞌi hinda punꞌa ri tsꞌoquihʉ nehe.

27 Nepʉ bi yopa menguiꞌʉ pa Jerusale, y ra Jesu bi yopa yʉtꞌa ja ra nda̱nija̱, ne bi joni habʉ mi ꞌbaiꞌa̱ ya nda̱ gá macja̱ ne ya xahnate de ra ley ne ya nda̱xjua nda̱. 28 Nepʉ nuꞌʉ́ bi ꞌyambabi ne bi ꞌñembabi:

―¿Toꞌo rá hmandaꞌa̱ pa gui ꞌyøtꞌa nuya ya tꞌøtꞌeya? ¿O toꞌo xa ꞌraꞌa nsɛqui?

29 Ha nura Jesu bi da̱di ne bi ꞌñembabiꞌʉ:

―Dí ne ga anꞌahʉ ꞌnara ntꞌani nehe. Nuꞌbʉ gui xicaguihʉ, necagui ga xiꞌahʉ toꞌo rá hmandaꞌa̱ pa dá øtꞌa njabʉ. 30 ¿Xi toꞌo bi hñuxa ra Xuua pa bi nxiꞌtsate? ¿Ha gue Ajua̱ o ya ja̱ꞌi?

31 Nuꞌbʉ́ nuꞌʉ́ mri ꞌñémsɛ ꞌna ngu maꞌna:

―Nuꞌbʉ ga emfʉ gue go Ajua̱ bi hñuxa ra Xuua, nuꞌbʉ́ nuní da ꞌñenjʉ gue hanja hindá camfrihʉ núꞌa̱ mi ma̱ñꞌa̱. 32 Ha nuꞌbʉ ga emfʉ gue go ya ja̱ꞌi xa hñutsꞌi, xiꞌbʉ da bø rá cuɛ ra hnini.

Mi ma̱ñꞌʉ njabʉ ngueꞌa̱ mi tsu ya ja̱ꞌi, ngueꞌa̱ gathoꞌʉ mi ena gue nura Xuua go mi gueꞌa̱ ꞌnará ꞌmɛhni Ajua̱. 33 Hangue nuꞌʉ́ bi da̱di ne bi ꞌñembabi ra Jesu:

―Hina hindí pa̱he.

Nuꞌbʉ́ ra Jesu bi da̱di ne bi ꞌñena:

―Nuꞌbʉ́ nixi gueque hinga xiꞌahʉ nehe toꞌo rá hmanda pa dá øtꞌa njabʉ.