Gálatas
Inin kagta awahkiska gapit Uhokri giwatni amekene Pol. In awahkiska giminkis Jesus gihiyegapu apitnenepwi waxri Galásiyamnaw.
Ig amekene Pol ikene gihiyakemnikis adahan igkis ka kinikiswa gitkis kinisekeputnepwi ku pariye awna ku amawka madikte Jesus gihiyegapu ihpanekwiye judeyenepwi gihiyakemnikis. Ig akki gitkis ku wixwiy ka hiyá wixwiyma humaw kibeyne giwtrik Uhokri akak ku samah wixwiy mpiksaw akak ukehbetanwiynenwa adahan wixwiy humaw kibeyne. Amawka ku wixwiy kamaxwa gipititnen Jesus Cristo. Ini ku samah wixwiy pahapwiwa gikak, ini ku samah gihiyakemni ay abet uhiyakemniwiy, ininewa keh wixwiy kibeynepwi giwtrik Uhokri.
1
Nah Pol Awahkis Inin Kagta Yimin
1 Nah Pol awahkis inin kagta yimin. Nah Uhokri giwatni. Nah ka awahkiska gapitma hiyeg amadgaya ininma. Iné ig Uhokri kawnata kawih hiyeg amedgenepwi inin adahan ignes nawahkisten. Ig Kiyapwiye Jesus Cristo ignewa nawahkisten gikak Wigwiy Uhokri ku pariye kannikasepri ariw gimiremni ignesnewa nawahkisten.
2 Nah gikakkis madikte ukebyupwiy Jesus gihiyegapu ku pariye ay nukakhu, usuh awahkis kabayka yimin yis Jesus gihiyegapu galásiyenepwi.
3 Ig Wigwiy Uhokri gikak Ukiparawiy Jesus Cristo gabaykis yikaknek. Igkis kariswehse yiyakninek.
4 Kibeyne, ig Kiyapwiye Jesus Cristo igwa umahkiswe udukwenaprikwiy adahan katiwnihpiye utaraksanwiy. Ig umahkiswa kahadbe wixwiy isamtaw ariw inin hawkri ahiyakemni mbeyepye. Hennewa Wigwiy Uhokri gimawkan.
5 Kibeyne gidahan Uhokri takunipti apanenekwa. Ameh.
Ka Ba Yi Iha Kinisekeputnepwi Ginetnikis
Mt 7.15; Rom 16.17; 1 Kor 12.3; 2 Kor 11.1; Ef 4.14, 5.6; Kol 2.8, 20; 2 Ped 2.1; 1 Jo 4.1; Judas 4
6 Nukebyupwi nah wakaymni yidahan kaayhsima. Ig Uhokri humekwewiy adahan wixwiy msakwa gikak Cristo gabay. Hiyaksa yis aynewa yis isahkiswe giw adahan yis ihpene nawenéwa hiyakemniki akiw ku pariye yis ikiy ku in kibeyne.
7 Bawa yumahwa kibeyne hiyakemniki akiw. Nah timé yak ku gaytakkis hiyeg ayge yibet igkis mategbetene yihiyakemni. Igkis yiwegespitni ariw inakni unetni yit gimin Cristo ku pariye usuh kuwis ekke yit.
8 Kuwis usuh ekke yit Uhokri ginetni ku pariye inyerwatnene. Ku pariye hiyeg ayta ekkene yit nawenéwa inetit ariw inakni, ig Uhokri hiyapkis gitkisnek. Waké usuhnewa ekkene yit nawenéwa inetit akiw, ig Uhokri hiyapkiskam wothunek. Waké pahapwi ahj muhuke inugiktak ig ekkene nawenéwa inetit wotwiy akiw, ig Uhokri hiyapkiskam gitnek.
9 Kuri nah akkite yit akiw ku pariye amakohnokwa usuh akki yit. Ku hiyeg ayta ekkene yit inetit nawenéwa ariw inakni ku pariye usuh kuwis ekke yit, ig Uhokri hiyapkis gitkisnek.
Nah Ka Aharitnema Adahan Hiyeg Batek Nukakhu
Jo 2.24, 5.34, 41, 44; 2 Kor 6.8; Gál 2.6
10 Igkis hiyeg mategbetenepwi yihiyakemni igkis awna numinhu ku inakni nnetni ka ariknawnama. Igkis awna ku nah he awna inetit ku pariye hiyeg batek timap. Bawa ka hennema, nukebyupwi. Nah ka aharitnema adahan hiyeg amedgenepwi inin adahan ignes batek nukakhu. Nah aharitne adahan ignewa Uhokri batek nukakhu. Nah ka kehnema hiyeg amedgenepwi ininma gibetkikisnen. Waké nah kehne hiyeg amedgenepwi inin gibetkikisnenwatbe, kawkama nah gibukma Cristokam.
Ignewa Cristo Akki Gihiyakemni Nuthu
2 Kor 1.12, 4.2, 5.11, 10.7; 1 Tess 2.4
11 Igkis hiyeg hawwata awna ku nnetni ka giwntakwatma Uhokri. Nukebyupwi, nah ikene yinetni ku apim inin kahadbe yis hiyakni kabayhtiwa ku inakni nnetni kawki gikehbetanma pahapwi hiyeg amadgayama inin.
12 In ka ekkepka nuthu gapitkisma hiyeg amedgenepwima inin. Kawki igkisma nukannuhten. Ignewa Kiyapwiye Jesus Cristo ku pariye akkin nuthu abet nuhiyakemni.
13 Yis kuwis timá nakhu ku samah minikwak nah wewnete akak judeyenepwi gihiyakemnikis. Apim ini nah keh mbeyepye hawkri gikakkis Uhokri gihiyegapu. Numawkan nah pisenwepye akak ini gihiyakemnikis. Nah mpiksaw gitiputkis akak madikte ndatni. Mmanawa ke nuthube ignes siguhne Uhokri.
14 Apim ini nah aharitpiye inenewa judeyenepwi gihiyakemnikis. Nah pi iwte gihiyakemnikis giwkis kaayhsima nukebyupwi judeyenepwi ku pariye nukekwenepwi. Mmanawa nah mpiksaw kaayhsima adahan nah kehne ku samah amekenegben gihiyakemnikis.
15 Henneme kibeyne, apit nah amadga wayk ig Uhokri ayipa kaniypen kuwis. Ayteke nikwe ig humekwen ta gimkat akak gabay adahan nah humaw gihiyega.
16 Ig akki gikamkayh nuthu adahan nahme gekketni ta gitkis hiyeg ku pariye kane judeyenepwima. Nah hiyapni henne, nah ka atak kibentenwatma ta gitkis hiyeg amedgenepwi inin adahan igkis nukannuhten gimin Cristo gihiyakemni.
17 Nah ka atak gimkatkis Kiyapwiye Jesus giwatnipwi pitatyepwi ku pariye msekwenepwi ayhté Jerusalém. Henneme nah tipik temkete amadgate amatap kewye Arábyamnaw. Nah danuh atere, ayge igwa Kiyapwiye Jesus Cristo nukannuhten. Ayteke pisenwa nah diyuhe tahhan arimkanit paytwempu Damasku akiw.
18 Mpanabu kamukri nah mpiyasa nah ka atak atere Jerusalém. Ayteke metakwa nah tipik atere ta gimkat kiyapwiye Pedru adahan nah giyaweswitni atere. Nah msakwa ayge gimun adahan madikawku hawkri akak pohowku arawna (15).
19 Nah ka hiyá pahapwinama gaytakkis Jesus giwatnipwi akiw. Nah hiyá ignewa Jesus gisamwi kiyapwiye Tiyagu. Yuma akiw.
20 Hennewatbaki in. Nah awna giwtriknewa Uhokri. Inin nannasan in kawki wasaymkama. Ignewa Kiyapwiye Jesus nukannuhten.
21 Pisenwa nudawnhapni ayge Jerusalém nah tipik ta apitit Síriyamnaw. Nah danuh atere, ayteke nah tipik akiw ta apitit Silísiyamnaw.
Jesus Wagese Nuhiyakemni Madikte
22 Henneme Jesus gihiyegapu ayhté Judeyamnaw igkis ku pariye kamaxwenepwi gipitit Cristo, apim ini igkis kote hiyapunte.
23 Igkis he timé nakhunen. Hiyeg awna gitkis: “Ner ku pariye minikwak kehne mbeyepye hawkri ukakwiy, kuri ig ekkene ini uhiyakemniwiy adahan wixwiy kamaxwa ta gipitit Kiyapwiye Jesus. Minikwak ig pisenwepye akak ini uhiyakemniwiy. Kurime ig ka hennema akiw.”
24 Igkis timapni henne, igkis kabayha Uhokri ndahan.