23
Devit ga pit iakan ra ninge.
1 Ais 40:11; Jer 31:10; Ese 34:11-14; Jn 10:11; 1Pt 2:25; Ni 7:17No Watong aie no nugu ut na harbalaurai. Iau pa ni supi baal um tiga linge.
2 I la waak tar iau bia ni sangeh kai ra bilai na huro i nuhnuhuan.
I la lamlamus iau ta ira gagena ira taah ing i la salsaal kunkun.
3 Snd 8:20I la hasigarine habaling iau.
I la lulue iau ta ira ngaas na taktakodas
waing daga urur tana.
4 Nng 107:14; 27:1; Ais 43:2; Mai 7:14Ing mah bia iau haan
narako tano kankado na salil na minaat,
iau pa ni burte tiga saksakena.
Kanong warah, u sakate iau.
No num kapsil ma no num buko na harharahut,
dir habalaraan tar iau.
5 U tagure tiga suuh na nian menalua tagu,
ra matmataan ta ira nugu ebar.
U puk no ulugu ma ra wel.
No nugu gingop i manga hung, gi bureng.
6 Tutun saakit, a bilbilai ma ra harmarsai na mur iau
ta ira nugu bungbung na nilon bakut.
Ma iau ni kis hathatikai narako tano ngasina no Watong.