63
Devit ga pit iakan ra ninge na lotu ing ga kis aram ra malubil kaia Iudeia.
1 Nng 143:6God, augu no nugu God.
Iau manga silsilihe ugu.
Iau maruk pane augu,
ma no palatamaigu i masmasingan utaam,
hoing no pise i mamasa ma i te bangbanga
ing taie ta taah kaia.
2 Nng 27:4Iau te nes ugu kaia tano num halhaliana katon,
ma iau te mate no num dadas ma no minamarim.
3 No num harmarsai i manga bilai tano nilon,
kaik iau nigi pirlat ugu.
4 Iau ni pirlat ugu haruat ta ira bung ni lon ine,
ma iau ni raun ra limagu tano hinsaam.
5 Hoing bia iau ien bilai na nian, no nugu lon na duuk huo.
No hagu na pirlat ugu ma ra ninge na gungunuama.
6 Nng 42:8Tano ula suhugu ing iau lik leh ugu,
iau liklik ugu tano kudulena bung bakut ra bung,
7 Nng 17:8kanong augu no nugu harharahut.
Iau inge tano ududuh ta ira airuo babaam.
8 Lo 10:12-13,20Iau papalim dikdikit taar taam.
No dadas na kata na limaam i sukal hatur tar iau.
9 Diet ing diet sisilih ta ngaas wara halhaliare iau,
diet na hansur ures napu tano tingena no pise.
10 Da bing diet ma no wise na hinarubu
ma diet na hanuat nian ana paap rakaia.
11 Lo 6:13; Ais 45:23Iesen no king na guama ta God.
Diet bakut ing diet sasalim tano hinsa God, diet na pirlat ie,
ma ira ha diet ira ut na harabota na tabanus.