65
A nianga tupas no tunotuno nong i kure ira ut na ninge: Devit ga pit iakan ra ninge na lotu.
1 God, a num ira pirharlat aram Saion.
Mehet na pakile haruatne ira numehet kunubus ukatiga ho ugu.
2 Ais 66:23Augu nong u la hadada sinasaring,
ira tunotuno bakut diet na hanuat ukatiga ho ugu.
3 Nng 38:4Ing ira numehet magingin sakena ga manga ubal mehet,
u ga lik luban se kaike ra numehet tintalen na laka harkurai.
4 A haraidaan na kis ta diet ing u te gilamis leh ma u te lam hutaten diet
bia diet na lon narako ta ira num katon na lotu.
Mehet hung ma ira bilai na linge tano num hala,
iakano tamat na halhaliana hala na lotu.
5 Nng 45:4U tutun wara balbalu mehet ma ra tamat na pinapalim na harharahut,
God, no numehet Ut na Harhalon,
augu nong ira katon bakut tano ula hanuo tuk ta ira ngus na tes bakut
diet so nurnuruan taam.
6 Nng 95:4Augu at u ga huul ira uladih ma no num dadas
ing u ga papalim ma ra baso.
7 Mt 8:26; Ais 17:12,13Augu nong u ga hamarur no nunungo tano tes,
no wawaang ta ira pakananoh,
ma ira tamat na purpuruan ta ira kantri.
8 Ais 24:16Diet ing diet la lalon tapaka saakit taam diet burte ira num dadas na gingilaan.
Mekatiga ing no laar i daras ie ma ing no kasakes i suguh,
u tataau hawaat a ninge na gungunuama.
9 WkP 26:4; Nng 104:14,24,28U balaure tar no pise ma u kapal ie.
U tabar no pise ma ra haleng nian saakit.
Ira salsalin taah ta God i hung ma ra taah
wara tar nian ta ira tunotuno,
kanong u gate kure tar huo.
10 Nng 147:8,14U la manga kapkapal ira lalong,
ma u la ruprupusane ira kanaap.
U la hamhamalusne no pise ma ra minmis na bata,
ma u la haidane ira uno sinaso.
11 No bilai na linge saakit nong u gil ta tiga tinahon, bia u hartabar ma ra haleng nian,
ma bia nu haan uhe, ira nian i hung.
12 Jop 38:25-27Ira mamasina katon i hung ma ra bilai na huro,
ma ira uladih diet sigasigam ma ra larlaro.
13 Ira huna sipsip diet banot bakut ira salil,
ma ira nat na salil diet hung taar ma ra wit.
Diet kup ma ra gungunuama ma diet inge.