78
A ninge ta Asap.
1 Ais 51:4; 55:3Ira nugu matanaiabar, i tahut bia muat na hadade ira nugu harausur.
Muat na taram ira nianga na hagu.
2 Mt 13:35Iau ni papos no hagu ma ira nianga harharuat.
Ni hinawas ta ira linge menalua saakit ing dahat pai palai ine katin,
3 ira linge ing dahat gate hadade ma dahat gate nunure tar,
ing ira hintubu dahat diet gate hinawase tar dahat ine.
4 KBk 12:26; 13:8,14; Lo 6:7; 11:19Dahat pa na suhe kaike ta ira udiet bulumur.
Dahat na hinawase diet ing diet na lon namur
ta ira pakpakilai tano Watong ing da pirlat ie urie,
iakano uno baso ma ira tamat na melmel na gingilaan na kinarup ing ga gil.
5 Lo 4:9; 6:4-9; Ga hakisi ira harkurai utano huntunaan ta Iakop,
ma ga tar harausur ta Israel.
Ga tange hadadas ta ira hintubu dahat
bia diet na hausur ira nati diet uta kaiken ra linge,
6 waing diet ing diet na lon namur diet na nunure kaiken ra harkurai,
ma ira nat na bulu mah ing pa di kaha baak diet,
waing diet mah diet naga hapalaine ira nati diet.
7 Lo 4:2; 5:1,29; 6:12; Jos 22:5Io kaik, diet naga so ira udiet nurnuruan ta God
ma diet pa naga luban ira uno gingilaan,
iesen diet na taram ira uno hartula.
8 2Sto 30:7; KBk 32:9; Lo 9:7,24; Het 2:19Diet pa naga ngan ho ira hintubu diet,
a tabuna taram nianga ma ra tunotuno na patnau diet,
diet ing ira bala diet pa ga tutun uram ho God,
ma ira udiet nilon pa ga tur dikdikit taar tana.
9 Ira tunaan tano huntunaan ta Epraim, diet ga palim laplapot taar,
iesen diet ga tahurus tapukus tano bung na hinarubu.
10 Het 2:20; 2Kng 17:15; 18:12; Jer 32:23Diet pa ga mur no kunubus ta God
ma diet ga malok bia diet na lon mur ira uno harkurai.
11 Diet ga luban ira linge ga gil,
ira tamat na melmel na gingilaan na kinarup ing ga haminas ta diet.
12 KBk 7:1—12:51; Ais 19:11Ga gil ira dadas na gingilaan na kinarup ra matmataan ta ira hintubu dahat
kaia tano taman Zoan narako tano hanuo Isip.
13 KBk 14:21; 15:8; Nng 74:13Ga paleng no tes ma gaam lam habalosne diet.
Ga gil no taah, gaam tur kis hoing tiga balo.
14 KBk 13:21; 14:24Ga lamus diet ma no katona bahuto ra kasakes
ma no murarang tano iaah tano kudulena bung ra bung.
15 KBk 17:6; 1Ko 10:4Ga parok ira haat ram narako tano hanuo bia,
ma ga tabar diet ma ra taah ing ga labon hono tes.
16 Nam 20:8,10,11Ga tar no taah, gaam saal laah tano ula haat,
ma ga saal suur ho ira taah saal.
17 Lo 9:22; Hb 3:16Iesen kana at diet git gilgil ira sakana magingin tupas ie,
ma ram narako ra hanuo bia, diet git patnau taar at ta Nong i Naliu Harsakit.
18 KBk 17:6; Lo 6:16; 1Ko 10:9Diet ga sip at bia diet na walar God,
ing diet ga manga saring ie utano nian diet ga manga kalak.
19 KBk 16:3; Nam 11:4; 20:3; 21:5Diet ga ngurungur taar ta God, diet gaam tange,
“I tale bia God na bul hawaat ta nian kai ra hanuo bia?
20 Nam 11:18; 20:11Ing ga lawat no haat, no taah ga raronga suur,
hoing ira laman taah di hasapang.
Iesen i tale bia na tabar mah dahat ma ra nian?
I tale bia na tar ginama mah ta ira uno matanaiabar?”
21 Nam 11:1Ing no Watong ga hadade diet, ga manga ngalngaluan.
No uno iaah ga lulungo suur taar tano huntunaan ta Iakop,
ma no uno kamahar ga hanuat tamat taar ta Israel,
22 Lo 1:32; 9:23; Hb 3:18kanong diet pa ga nurnur ta God
ma diet pa ga so no udiet nurnuruan tana bia na halon diet.
23 Ma sen ga tar tiga hartula uram naliu ra hurmauhuo
ma ga papos ira matanakalangar tano mawe.
24 KBk 16:3-4Ma ga hurange hasur ira mana ho ira bata taar ta ira matanaiabar wara ienien.
Ga tabar diet ma no pat na wit meram ra mawe.
25 A tunotuno diet ga ien no beret adiet ira angelo.
Ga tar se a haleng na nian haruat ma ira udiet sinisip.
26 Nam 11:31Ga lapus ise no dadaip meram ra mawe makatiga ra kasakes i la tutut hut kaia,
ma ga lamus hawaat no taubar ma no uno baso.
27 KBk 16:13Ga tule hasur ira ginama naliu ta diet ho ira kaabus,
kaike ra haleng na maan haruat ho ira wana tano wasasar.
28 Diet ga puko suur nalamin ta diet,
ma diet ga puko harbasia ta ira udiet palpalih.
29 Nam 11:19,20Diet ga iaan tuk diet gaam hahos,
kanong gate tabar diet ma ira linge diet ga manga kalak.
30 Diet pa ga bing baak no udiet tamat na sinisip tano nian,
ma a nian baak kana ta ira ha diet,
31 Nam 11:33,34ma no ngalngaluan ta God gaam hanuat taar ta diet.
Ga bing diet ira adiet tabi bolbol nalamin ta diet,
gaam kato hainoh ira subulo gar ta Israel.
32 Nam 14:1-45; 16:1-50; 17:1-13; 14:11Ga gil kaiken ra linge bakut, iesen kana at diet ga gilgil ira sakana magingin.
Kaiken ra dadas na gingilaan na kinarup ga hanuat, iesen diet pa gale nurnur tana.
33 Nam 14:29,35Huo, diet ga hasurum bia ira udiet bung na nilon,
ma ira udiet tinahon ga pataam narako ra ramramin.
34 Nam 21:7; Hos 5:15Ing bia God git bubu bing tari ta diet, diet git silsilihei.
Diet git lilik pukus, diet gaam git nanaas tana ma ra tutun.
35 Lo 32:4; KBk 15:13; Ais 41:14Diet ga lik habaling leh bia God, aie no udiet Haatkis,
ma bia ne God Nong i Naliu Harsakit, aie Nong i Kul Halangalanga diet.
36 KBk 24:7,8; 32:7,8Ma sen bia diet ga harababo ma ira ha diet,
ma diet ga habatoi ma ira karame diet.
37 Ira udiet nilon pa ga tur dikdikit taar tana,
ma diet pa ga murmur timaan no uno kunubus.
38 KBk 34:6; Nam 14:18-20; Ais 48:9Ma sen bia ga harmarsai,
ma ga lik luban se ira udiet magingin sakena,
ma pa ga haliare diet.
A haleng na pakaan ga palim kawase habaling no uno ngalngaluan,
ma pa ga hatatik no uno kudulena nginangar.
39 Ga lik leh bia a tunotuno mon diet,
hoing ra dipdip nong i pupuh saakit ma pa na tapukus baling.
40 Hb 3:16Diet ga patnau hait taar tana aram narako tano hanuo bia,
ma diet ga gil hatapunuk ie kaia.
41 Nam 14:22; 1Kng 19:22; Nng 89:18Hait diet git walwalar God.
Diet ga gil hangalngaluan no Halhaliana gar ta Israel.
42 Het 8:34Diet pa ga lik leh ira uno baso
tano bung ing ga kul halangalanga leh diet sukun ira adiet suk,
43 KBk 4:21; 7:3ing ga haminas ira hakilang ma ira dadas na gingilaan na kinarup
kenam narakoman tano hanuo Zoan, narakoman tano taman Isip.
44 KBk 7:20; Nng 105:27-36Ga pukusane ira audiet taah gaam hanuat de,
ma pa ga tale bia diet na mom kaia ta ira adiet taah.
45 KBk 8:6,24Ga tule ira haleng na langa, diet gaam hurut diet,
ma ra rokrok ing gaam haliare diet.
46 1Kng 8:37; 10:14Ga tule tar ira ko ta ira audiet sinaso,
ma ira kubawa taar ta ira pakana ira udiet sinaso.
47 KBk 9:23-25Ga tule a bata na ais, gaam haliare ira udiet ina wain,
ma ga haliare ira udiet ina papus ma ra tamat na madahon.
48 KBk 9:19Ga tule tar mah a bata na ais taar ta ira udiet bulumakau,
ma a hile ga bing ira udiet sipsip ma ira me.
49 KBk 15:7Ga tule no uno mamahien na ngalngaluan ma kamahar taar ta diet.
Ga malentakuane tunat diet, ma ga sip bia na hagahe diet.
Ga tule tiga matana ubane na angelo wara halhaliare diet.
50 KBk 12:29,30Ga tagure tiga ngaas utano uno ngalngaluan,
ma pa ga hok tikai bia pa na maat.
Iesen ga tule tar no tamat na halhaliarai ta diet.
51 KBk 12:29Ga bing ira matana bulu na tunaan ta ira Isip,
diet ira luena nati diet ira subulo mekaia narakoman ta ira udiet hala.
52 KBk 15:22Iesen ga kap hasur ira uno matanaiabar hoing tiga huna sipsip,
ma ga lua ta diet nalamin tano hanuo bia.
53 KBk 14:19,20,27,28Ga lue timaan diet waing diet pa na hiruo, ma diet pa ga burut,
iesen no tes ga takap bus ira udiet ebar.
54 KBk 15:17Hokaiken kaik, ga kap hawaat tar diet tano gagena no uno halhaliana pise
uram ta ira uladih ing gate kap leh ma no kata na limana.
55 Jos 11:16-23; 13:7; 23:4Ga pasak hasur se baak ira huntunaan mekaia
ma ga palau ira uno matanaiabar ma ira subaan na pise wara audiet tus.
Ga hakisi timaan tar ira huntunaan me Israel ta ira ngasia diet at.
56 Het 2:11-13Iesen diet ga walar God
ma diet ga patnau ta Nong i Naliu Harsakit,
ma diet pa ga mur ira uno harkurai.
57 Ese 20:27,28; Hos 7:16Diet ga talingaan tapukus ma diet tur talur ie hoing at mon ira hintubu diet.
Diet ga haruat ma tiga laplapot di poroi tar mon mei.
58 WkP 26:1,30; Lo 4:25; 32:16,21; Het 2:12; 1Kng 3:2; 14:9; 2Kng 16:4Diet ga hangalngaluan ie ing diet ga lotu kaia ta ira uladih.
Ga likilik taar ta diet ma ira udiet kaba palimpuo.
59 Lo 1:34; 9:19; 32:19Ing God ga hadade diet, ga manga ngalngaluan,
ma ga miliguruane tunat diet ira Israel.
60 Jos 18:1; 1Sml 4:11; Jer 7:12,14; 26:6Ga papook talur no hala na lotu kaia Sailoh,
iakano palpalih nong ga luk ie nalamin ta ira tunotuno.
61 1Sml 4:17Ga bale tar ira udahat ebar bia diet na palim kawase no bokis na kunubus
nong i hakilang no uno baso ma ira minarine.
62 Het 20:21; 1Sml 4:10Ga waak tar ira uno matanaiabar bia diet na hiruo ta ira wise na hinarubu.
Ga manga ngalngaluan taar ta ira uno tus.
63 Nam 11:1; 21:28A iaah ga tun bing ira audiet marawaan,
ma ira udiet bulahin pa ga inge ta ninge na tinolen.
64 1Sml 4:17; 22:18A wise na hinarubu ga ien ira udiet ut na pakila lotu,
ma ira udiet makosa pa ga haruat bia diet na suah.
65 Kaik um, no Watong ga tangahun hoing tikai i kubaba taar,
hoing tiga dadas na tunotuno i mama wain taar ma i malurau baling um.
66 1Sml 5:6Ga pasak pukus ira uno ebar
ma ga hahirhir hatikane diet.
67 Io, ga was ise ira tunotuno ta Iosep,
ma pa ga gilamis no huntunaan ta Epraim wara uno.
68 Iesen ga gilamis leh no huntunaan ta Iuda
ma no uladih Saion, nong ga kalak ie.
69 1Kng 6:1-38Ga gil no halhaliana ngasiana bia na manga naliu,
haruat ma no ula hanuo nong ga hakisi tar ie ma pa na pataam.
70 1Sml 16:11,12I ga gilamis Devit no uno tultulai,
ma ga kap leh ie merau ra lip na sipsip.
71 2Sml 5:2; 7:8; 1Sto 11:2Ga lamus leh ie mekaia hoing git balbalaure ira sipsip
waing na balaure ira uno matanaiabar, diet ira bulumur ta Iakop,
diet ira Israel, ira uno tus.
72 1Kng 9:4Ma Devit ga balaure diet ma ra takodasuana bala.
Ga lamus diet ma ira keskes na limana.
78:1: Ais 51:4; 55:3
78:2: Mt 13:35
78:4: KBk 12:26; 13:8,14; Lo 6:7; 11:19
78:5: Lo 4:9; 6:4-9;
78:7: Lo 4:2; 5:1,29; 6:12; Jos 22:5
78:8: 2Sto 30:7; KBk 32:9; Lo 9:7,24; Het 2:19
78:10: Het 2:20; 2Kng 17:15; 18:12; Jer 32:23
78:12: KBk 7:1—12:51; Ais 19:11
78:13: KBk 14:21; 15:8; Nng 74:13
78:14: KBk 13:21; 14:24
78:15: KBk 17:6; 1Ko 10:4
78:16: Nam 20:8,10,11
78:17: Lo 9:22; Hb 3:16
78:18: KBk 17:6; Lo 6:16; 1Ko 10:9
78:19: KBk 16:3; Nam 11:4; 20:3; 21:5
78:20: Nam 11:18; 20:11
78:21: Nam 11:1
78:22: Lo 1:32; 9:23; Hb 3:18
78:24: KBk 16:3-4
78:26: Nam 11:31
78:27: KBk 16:13
78:29: Nam 11:19,20
78:31: Nam 11:33,34
78:32: Nam 14:1-45; 16:1-50; 17:1-13; 14:11
78:33: Nam 14:29,35
78:34: Nam 21:7; Hos 5:15
78:35: Lo 32:4; KBk 15:13; Ais 41:14
78:36: KBk 24:7,8; 32:7,8
78:38: KBk 34:6; Nam 14:18-20; Ais 48:9
78:40: Hb 3:16
78:41: Nam 14:22; 1Kng 19:22; Nng 89:18
78:42: Het 8:34
78:43: KBk 4:21; 7:3
78:44: KBk 7:20; Nng 105:27-36
78:45: KBk 8:6,24
78:46: 1Kng 8:37; 10:14
78:47: KBk 9:23-25
78:48: KBk 9:19
78:49: KBk 15:7
78:50: KBk 12:29,30
78:51: KBk 12:29
78:52: KBk 15:22
78:53: KBk 14:19,20,27,28
78:54: KBk 15:17
78:55: Jos 11:16-23; 13:7; 23:4
78:56: Het 2:11-13
78:57: Ese 20:27,28; Hos 7:16
78:58: WkP 26:1,30; Lo 4:25; 32:16,21; Het 2:12; 1Kng 3:2; 14:9; 2Kng 16:4
78:59: Lo 1:34; 9:19; 32:19
78:60: Jos 18:1; 1Sml 4:11; Jer 7:12,14; 26:6
78:61: 1Sml 4:17
78:62: Het 20:21; 1Sml 4:10
78:63: Nam 11:1; 21:28
78:64: 1Sml 4:17; 22:18
78:66: 1Sml 5:6
78:69: 1Kng 6:1-38
78:70: 1Sml 16:11,12
78:71: 2Sml 5:2; 7:8; 1Sto 11:2
78:72: 1Kng 9:4