90
A sinasaring tane Moses no tunotuno gar tane God.
1 Watong, augu no numehet subaan bia mehet git lalon kaia,
tur leh ta ira hintubu mehet menalua ma tuk katin.
2 Nng 102:24-27U gate kis bia God ugu, tur leh menalua, katin, ma pa na pataam.
Ing ira uladih baak pa ga hanuat
ma pau ga bul hawaat baak no pise ma no ula hanuo bakut,
u gate kis bia God ugu.
3 Stt 3:19; Jop 34:14,15U kios ira tunotuno, diet gi hanuat kaabus baling,
ma u tange bia, “Muat na tapukus baal taar ra kaabus, muat ing muat ira tunotuno mon.”
4 2Pt 3:8Kanong u la nes tar bia tiga arip na tinahon
i haruat mon ma tiga bung kaiken mon i patpataam,
bia hoing tiga kumkumina pakana bung ra bung.
5 Ais 40:6-8U hanuat ho ira taahit ma u salirane se ira tunotuno ukaia ra minaat.
Diet ngan mon hoing ira purpur i papalas ra malaan.
6 Mt 6:30; Jm 1:11A tutun bia i papalas ra malaan,
iesen ra matarahien mon na mahiawa ma na maranga.
7 No num ngalngaluan i te hamalmalungo mehet
ma mehet ramramin tano am kamahar.
8 Sav 12:14U te bul tar ira numehet nironga menalua taam,
ma ira numehet magingin susuhai pai mun tano madaraas tano num matmataan.
9 Ira numehet bung na nilon pai pas no num ngalngaluan.
Ira numehet tinahon na nilon i pataam ma ra sunuah.
10 Ira punpuo ta ira numehet bung na nilon a liman ma airuo na sangahul na tinahon,
bia a liman ma aitul na sangahul, ing bia a numehet mon baso at baak.
Iesen kaikek ra bung i hung ma ira tinirih ma ra tapunuk sen mon.
Kaike ra tinahon diet saakit gasien ma mehet pupungo laah.
11 Sige tikai i nunure no dadas tano num ngalngaluan?
No num nginangar i tamat saakit. I haruat hoing i takodas bia da ru ugu.
12 Nng 39:4-6Hausur mehet bia mehet na nes kilam bia ira numehet bung na nilon pai talona,
waing mehet naga minonas.
13 Watong, waak um u manga ngalngaluan! Nu sal halawaas ie haruat hunanges?
Nu hamines ra marmaris ta ira num tultulai.
14 Hanunuhuan mehet ra malaan ma no num harmarsai nong pa na pataam
waing mehet naga inge na gungunuama ma mehet naga laro ta ira numehet bung na nilon bakut.
15 Haguama mehet ta ira bung haruat ma ing u ga hangungut mehet ine,
ma haruat mah ma ira tinahon mehet ga nes ira tinirih ine.
16 Hab 3:2; Ais 6:3I tahut bia nu hamines ira num pinapalim tar ta ira num tultulai,
ma nu hamines no num minamar ta ira nati diet.
17 Nng 37:23; 1Ko 3:7Watong, no numehet God, i tahut bia nu kanakana ta mehet.
Nu tar ira hunena ira pinapalim na lima mehet.
Masa! Nu tar ira hunena ira pinapalim na lima mehet.