98
Tiga ninge na lotu.
1 Inge tiga sigar ninge tupas no Watong,
kanong i te gil ira tamat na gingilaan na kinarup ing i melmel saakit.
No halhaliana kata na limana te hatahuat no uno harhalon.
2 Ais 52:10; 62:2; Rm 3:25No Watong i te hinawas palai tano uno harhalon,
ma i te hapuasne no uno takodasiana magingin taar ta ira hunhuntunaan ta ira mes na hanuo.
3 Lk 1:54,72God i te lik leh no uno kunubus bia na tar harmarsai ta ira Israel, ma bia na hatutun ing ga tange ta diet.
Ira katon bakut tano ula hanuo diet te nes no harhalon tano udahat God.
4 Nng 100:1Muat tano ula hanuo bakut, muat na kup ma ra gungunuama tupas no Watong.
Muat na inge hatamat ira ninge na pirhakasing.
5 Ting no haap uram hono Watong.
Pirlat ie ma no haap ma ra kinkel na ninge.
6 Nam 10:10Hus ira tulaal ma ra tahur.
Kup ma ra gungunuama tupas no Watong, no King.
7 I tahut bia no tes na wawaang, ma ira linge mah kenam narako tana,
no ula hanuo mah, ma ira linge ing diet lon narako tana.
8 Ais 55:12I tahut bia ira taah diet na pasapasar,
ma ira uladih diet na inge tika ma ra gungunuama.
9 Nng 96:10,13Diet na inge ra matmataan tano Watong,
kanong i te hutet bia na hanuat wara kurkure no ula hanuo.
Auno no dadas wara kurkure no ula hanuo, ma na harkurai ma ra takodasiana magingin.
Na bul ira takodasiana harkurai wara gaie ira matanaiabar bakut.