1 Kaba tasi mital narako ta Karisito, wara hapataam ira nianga mital wara tangtangai hoken ta muat: muat na sasaring uta mital bia no hinhinawas tano Watong naga haan hoing ga haan nalamin ta muat. Io, muat na saasaring bia naga haan harbasiai gasien ma bia ira tunatuna diet na ruu ia. 2 Ma muat na saasaring mah bia Kalou na halangalanga sei mital ta ira mangana sakana tunatuna kanong ira tunatuna bakut, taia nudiet ta nurnur. 3 Ma senbia no Watong na gil haruatanei ira nuna nianga, ma ia na hadadas muat ma na balaurei bat muat tano tena sakena. 4 Muat kis taar tano Watong, hua mital balamasa taar ta muat bia muat la gilgil haruatanei ira numital dadas na nianga ma bia muat na gilgil hait at hua ta ira kaba bungbung. 5 Ma mital sasaring bia no Watong na hapalainei ira numuat lilik waing muat naga nas kilam bia Kalou i manga sip muat hua. Ma mital sasaring mah bia na harahut muat bia muat na tur dadas haruat ma no tuntunur dadas ta Karisito.

6 Kaba tasi mital narako ta Karisito, mital tar ra dadas na nianga ta muat tano hinsana no nudahat Watong Iesu Karisito hoken: muat na haan talur ira malmalungana talai dahat. Pa diet mur ira numital kaba hausur ing mital ga tar ta diet. 7 Ma muat at muat nunurei bia i tahut bia muat na lon hoing mital ga lon hua nalamin ta muat. Pa mital ga malmalunga kaia nalamin ta muat. 8 Pa mital ga ien bia ta nian nuna tikai. Taia. Mital ga kulkul at ra mital nian. Ta ira kaba bungbung, ra kasakesa ma ra bung, mital git manga papalim uta ira numital sunupi ma mital git kilkilinganei ra ngunungut uta kaikek ra pinapalim bia pa mital naga kap tar ta tinirih taar ta tikai. 9 Ma muat lik bia mital ga lon hua kanong pai takodas ta mital bia mital na kap ta nian makaia ta muat? Taia. Gaar takodas ta mital bia mital na gil hua senbia pa mital ga gil kanong mital ga nem bia mital na haminis ra bilai na malalar narako ta ira numital nilon bia muat naga mur ia. 10 Io, ma ing bia mital ga kis tikai taar ma muat, mital git tangtangai hadadas ta muat hoken: “Ing bia tiga tunatuna pa na papalim, pa na iaan.”

11 Ma mital tangai hua kanong mital ta hadadei bia a mon tabalesuana tunatuna nalamin ta muat ing pa diet la paapalim, senbia diet la hamalmalaas ira mes ta ira nudiet pinapalim. 12 Io, ta kaiken ra mangana tunatuna mital tangai hadadas ma mital haragat diet tano hinsana no Watong Iesu Karisito bia diet na kis timaan ma diet na papalim wara adiet at. 13 Senbia muat ira tasi mital, waak muat malmalunga wara gilgil ira tahut taar ta ira mesa.

14 Ma ing bia tikai pa na taram kaiken ra numital nianga ta iakan ra pakpakat, io, muat na nas kilam timaan ia. Pa muat na manga lon tikai ma ia waing naga kilinganei ra hirhir. 15 Ma senbia waak muat nas kilam ia hoing bia tikai muat malentakuanei ia. Taia. Muat na hatumarang ia kanong a tasi muat ia narako ta Karisito.

16 Io, ma mital sasaring bia no Watong at, ia no burena tano malum, bia na tar ia ta muat ta ira kaba bungbung ma ta ira numuat kaba ngaas mah. Ma mital sasaring bia no Watong na kis tikai ma muat bakut.

17 Io, kaiken um, iau Pol, iau pakat iakan ra mutuaina sibaan ta iakan ra pakpakat ma no limagu tus at tupas muat bia iau na tula harkaro ta muat. Ma iau hakilang ira nugu kaba pakpakat bakut hua. Ma ira nugu mangana pakpakat i nanaas hokaiken.

18 No harmarsai tano nudahat Watong Iesu Karisito na kis ta muat bakut.