20
Uva kasiroini vakabadaniki varani vihina
1 Hari. Jesus va'ora ni'aha:
—A'onira vara oni'avini hiki ida bana rajomi kavaranihi. Uva kasiroini kaka'da'dini honai abono-ra nako'dihavini vani fori hiki ida Deus ija'ari-ra vaka'da'divini. Mahi avagani kama'dani ajihi'aha ada ka'da'di, honai abono-ra va'ora nako'dihavini, kidiuva kasiroinia bada vakhanira kaimoni. 2 Honai abono-ra va'ora karagaha, va'ora ni'aha:
“Kodisiroia bada avakhanini-ra avanofihi;
a'onira ono'avini hiki ida jiniro 'ba'dani prata
amonahaki hoarani afohanana,
mahi hoarani badani abosini.”
Va'ora ni'aha. Vani'aha:
“Jahaki ida badani abosini. Bada akhaniki hari kadasiroia.”
Vakhani'aha. Vakadihojai hiki ida honai abono gahinana hiki jiniro 'ba'dani prata amonahaki hoarania, kidibadani abosini mahi hahavi. Oniaroa, va'ora karona'aha kidisiroia bada vakhanihana. Ajoi'aha ada ka'da'di gorana.
3 Safini namahikajomana vani, ajihi'ianaha ada ka'da'di, ija'ari 'bai-ra vakapavakarivini ibavini kania okha'aha. Va'ora noki'aha adani makhira vakabadaniriki. 4 Hari. Va'ora ni'aha:
“Kodiuva kasiroinia avikha'a mahija bada avakhanivini.
Mithani vani a'onira ono'aja bana avakadibadani abosinia asohiki.”
Va'ora ni'aha. 5 Avikha'aha adani makhira bada vakhanira kaimoni kidisiroia.
Safini sohirarina okha'ianaha ija'ari 'bai-ra kapavakarihavini ibavini kania, makhira vahoariha bada vakhaniriki-ra va'ora karagaha'ianaha, va'ora nava'isohivini hi'ihi ida mithani vakadibadani binaabosivini. Naothinia, va'ora karona'ianaha adani makhira kidisiroia.
Safini aadosina vani, onivani fori hi'ianahi ida ka'da'di kabadani. 6 Safini ajorana vani okha'ianaha ada ka'da'di. Va'ora noki'aha adani makhira vahoariha bada vakhaniriki, va'ora nana'dohi'aha:
“Niha avakhanimanija mahi oadani bada avakhaniriki?”
7 “Ni-ka'da'di haria honariafiahaki badania.”
Vakhaniha.
Oniaroa, uva kasiroini kaka'da'dini va'ora ni'aha:
“A'onivani jaboni kodisiroia avikha'a mahija bada avakhanivini.”
8 Hari. Mithani vani ka'da'dia bini'aha ada kidisiroi akadava'ava abono:
“Va'ora baranaha adani honai abono mahija va'ora inaabosivini vakadibadani abosinia.
Va'ora naabosi'imidia adani makhira kodisiroia avikhaki safini ajorana.
Safini aadosina vakadibadani kama'daki maina-ra va'ora naabosi bana.
Safini khanomananina vakadibadani kama'daki maina-ra va'ora naabosi bana.
Va'ora naabosisiaga adani mahi oadani bada vakhaniki.”
Niha ada ka'da'di. Oniaroa, siroi avakadava'ava abonoa binaabaki ida athi.
9 Makhira safini ajorana vakadibadani kama'daki vagahina'iki jiniro 'ba'dani hoarani afohanana. 10 Hari. Makhira mahi avagani vakadibadani kama'daki vava'i bodini vara ni'iki:
“Mahi oadani bada akhani'iki hari. Ka'da'dia binaipohiki bana ida akadibadani abosini.”
Vaabono vani'aha. Ni-ka'da'dia binaipohiki ida vakadibadani abosini. Va'oaniaro maina vagahina'aha vakadibadani abosini jiniro 'ba'dani hoarania afohanana. 11 Vagathani'ihi ida jiniro, vakadika'da'di-ra vaka'da'digaria'aha:
12 “Hi'adani aripohina safini ajorana bada vakhanipa'itxiki adani.
Harivani mahi oadani bada akhani'iki hari safini afakia.
Akadibadani abosini vakadibadani abosini fori hiki.
Ni-asohiki ida ka'da'di badani-ra naabosivini nini.”
13 Hari. Vakadika'da'dia bini'aha ada makhira hoarana:
“Ivani, mitha ini'a bana hida kodivarani.
Asohiki ida ira ono'avini
jiniro 'ba'dani hoarani.
Kodisiroia iokhani viahania ira onava'isohivini hiki ida kadabadani abosini.
Jahani ikahiki ida jiniro
'ba'dani hoarania ira onaabosivini.
14 Oniania igathani'a hida kadabadani abosini,
igorania okha'a.
Onofiki ida kodisiroia okasiagaki-ra ono'avini hini kidibadani abosini ipohini,
kadabadani abosini ipohini vani fori hija ida ono'avini hiki.
15 Kodijiniro oamani hida. Kodijiniroa ono'avini onofihi; ono'ahi.
Ono'avini onofirihi; ni-ono'aki.
Asohiriki ivanihamanija ida hoariha-ra ono'avini hiki jiniro 'ba'dani hoarani?
Iakabaimanija ida hoariha-ra okajoamoravini?”
Niha ada ka'da'di.
16 Hari. Anokhomi'ihi ida Jesus rajomi kavaranihia kavaranina. Jesus va'ora ni'aha adani vajoroniki:
—Makhira mahi avagani badania kabadanini kama'daki fori vihiki adani kodihojai-ra va'oaniaro imidia vagathaniki vakadika'da'di ohina. Makhira safini ajorana vakadibadani kama'daki fori vihiki adani vahoariha vikasiagaki va'ora ovaka'da'diki. Vakhanina vani va'ora onaibavijahajahakiki adani oipohina va'ora ovaka'da'diki — va'ora ni'aha ada Jesus.
Jesua vara bivani'a'ianaki ida abinina kamahini
(Marcos 10.32-34; Lucas 18.31-34)
17 Hari. Oniaroa, ai vihi'aha adani Jesus, Jerusalém sidajia avigaimori'aha. Vaadahana kaba'i, ipohina 12 vihiki-ra va'ora avikharibanipa'itxi'aha, vahoariha vakamitharia kaimoni ida kidivarani, va'ora nava'isohi'ianavini hiki ida namitha'iariki:
18 —Mitha vani'a. Jerusaléa aokhaki hari. Hovani ija'ari hahavi vakadi'aajo ho. Hora avarakhaki bana adani vahoariha sasidotxi vavaka'da'diva, judeus kaija'ari vaka'ojomo'iva abono khama vasa'a kabodinia. Va'oaniaro vakhaniki bana adani:
“Jahaki ida abinina.”
Vakhaniki bana adani. 19 Oniani ida ija'ari Deu-ra avigariki vasa'a kabodinia hora avarakhavini hija bana. Oniaroa, hora avigarahaki bana adani, hora vidafiavini, ava akasanakhamakia hora avaka'itapoamisahanaki, hora vanaabiniki bana adani. Hari. Mahi ahoarabakosiki radaha'ihi oahokiki bana ho — va'ora nava'isohijora'aha ada Jesus.
Tiago vakadiamia bikanikhariaki ada Jesus
(Marcos 10.35-45)
20 Oniaroa, Jesu-ra vanamaakari'aha adani Zebedeu kaisai vi'bamiki vakadiamia khama. Jesus viaha aasiarari'ihi ida vakadiamia, Jesu-ra kanikhariavini hiki kajoamorani hina. 21 Jesua binana'dohi'ihi:
—Nahina mani ida inofija?
—Ija'ari hahavi-ra ivaka'da'divini kamahini, va'ora honaria bana adani kodisai i'dihania vavithina ija'ari-ra va'ora vavaka'da'divini kadania. Va'ora onofiki hadani kodisai hoarana ipitani aniaja vithina, hoariha ipitani kajasonija vithina — nihi. 22 Jesus va'ora ni'aha adani kidisai:
—Ni-avakadiamia biogajahakiki ida bikanikhariaki avakadimoni hini. Okapoariki bana ida oimana 'banani. A'onivani avakapoarimania koda bana ida avaimani 'banani jaboni? Hofori avihimania koda bana?
—Ha'a, ni-akajoniki ida aimana 'banani — vani'aha. 23 Hari. Va'ora ni'aha ada Jesus:
—Avakapoarimania bana ida avaimani 'banani. Hofori avihiki bana a'oni, avakamithaki jaboni bana ida avaimani 'banani. Avavithini-ra avanofihi o'dihana. Kodibadani hirihi ida ija'ari-ra onagathogathovini o'dihana vavithira kaimoni. Kodiabi'ia binaibavijahaki ida ibavi opitana ka'aniajanija kajasonija jaboni, va'ora nagathogatho'iki adani ija'ari vavithiki kaimoni o'dihana.
24 Hari. Oniaroa, vakadivarani kamithamahani vihiha adani 10 vihiki vaipohina, oniani ida Tiago, João vihiki-ra va'ora vakaja'oriavini hija. Va'oaniaroa vanofihananaki ida vithi ibavini jahaki Jesus 'dihana vavithina, Jesus ija'ari hahavi-ra vaka'da'divini kamahini.
25 Hari. Jesus va'ora baranaha'aha adani ipohina hahavi vamaakarina. Va'ora ni'aha:
—Va'ora avarigamanira adani ija'ari Deu-ra avigariki vakadika'da'di vahojana. Va'ora avavadadamiki adani vakadija'ari. Ija'ari Deu-ra avigariki vakadika'da'di va'ora vahonariafiahaki adani jaboni vakadipamoari vaathi naabani vihina. 26 Ni-onofiki ida ija'ari-ra avahonariavini va'oaniaro ija'ari-ra vahonariavini fori hini. Ka'da'di avihini-ra avanofihi; vahoariha vakadihonai abono fori vihi'a bana. 27 Ka'da'di avihini-ra avanofihi; vahoariha-ra va'ora vaakodia bana! 28 Hovani ija'ari hahavi vakadi'aajo ho. Vahoariha-ra va'ora okajoamoravini hida hora rakhaja. Vahoariha hora vakajoamoravini hirihi hida hora rakhaja. Ibavi Jaharika'oakia avikhaki bana adani ija'ari vaipohiki. Oabono ova'ahaki ho oabinina ija'ari hahavi-ra va'ora oakava'ijoaja kaimoni — va'ora ni'aha ada Jesus.
Jesus va'ora anaihotaki adani vakamaodorohaki vi'bamiki
(Marcos 10.46-52; Lucas 18.35-43)
29 Hari. Jericó sidajia vikhaonani'aha adani Jesus. Ija'ari vaipohikia vavaipohiha'aha ada Jesus. 30 Ai vihina kaba'i, hagihi vadinia vavithima'o'aha adani makhira vi'bamiki vakamaodorohaki. Vakamithaki ida Jesus varani hina. Jesus radahana-ra vanamoniha adani vahoariha. Vakamithahi, vabodi'baraha'aha:
—Jesus, ivani Davi kohana kaija'ari namitharonisiagaki i, haria va'adi bana!
31 Ija'ari vaipohiki vahoariha va'ora vakaabaniha:
—Vavisoni'a bana! Hari'a bana vabodi'barahajana!
Ni-avavisoniki. Va'ora vakaabaniha, va'ora ana'baraha'oamanihi.
—Jesus, haria va'adi bana!
32 Ogaakosoaha ada Jesus, va'ora baranaha'aha adani vakamaodorohaki, va'ora nana'dohi'aha:
—Nahina mani hida avanofija?
33 —Jesus, anofiki hida anokho-ra ianavagahavini — vani'aha.
34 Jesus va'ora nakaidivaki adani vakamaodorohaki. Vanokho 'ba'dani bikadasa'aha. Jorakia avagaha'ihi ida vanokho 'ba'dani, oniaroa, Jesu-ra vavaipohiha'aha.