1 Tjinguru nyurrangarri kutu kuliṉi nganaṉa ingkaṯa tjuṯa mayutju tjuṯa nyinanyi. Yalatji wiya, nganaṉa Yiitju Kurayitjaku waarrkana tjuṯa nyinanyi. Yirriṯi Katutjalu kuliṉu yaṉangu tjuṯa palumpa walytjarrinytjaku wangka Yiitju Kurayitjanyatjarra kulira. Kuwarrilpi Katutjalu nganaṉanyatju watjaṉu Yiitjuku wangka tjakultjurinkunytjaku, wangka palunya yaṉangu tjuṯangku kulira palumpa walytjarrinytjaku. 2-4 Nganaṉatju mayutju walytjaku Yiitjuku tjukarurru nyinarra waarrkarringanyi. Tjinguru tjaampalangkunyurra kuliṉi ngayulu wiya Yiitjuku waarrka tjukarurru palyaṉi. Nyurrangarri wiya ngayunya watjantjaku, mayutjungku kutju ngayunya watjantjaku Yiitjulu. Tjinguru kuutawutjungka wangkarra kuutawutjuku mayutjungku ngayula watjalku, ngayulu Yiitjuku waarrka kutjupawana palyantjaku. Yalatji watjantjala ngayulu wiya kulilku. Ngayuku mayutju Yiitjunya kutju ngayulu kulilku. Ngayuluṉa puṯu kuliṉi yalatji, “Tjinguru ngayulu Yiitjuku waarrka Kurinytjiyanya ngurrara tjuṯangka wiyawanangku palyaṉu?” Yalatjiṉa puṯu kulira wantingu. Tjinguru ngayulu nyurrangarrilawana wiyawanangku palyantjala ngayuku mayutju Yiitjuluṉi watjantjaku, yaṉangu kutjupangkuṉi wiya watjantjaku. 5 Palulanguru ngayunya, ingkaṯa kutjupa tjuṯaṯarra wiya nyurrangarri panypurangkunytjaku. Ngula kuutawutjungka mayutju nganampa piyuku ngalya yankunytjala paluru kutju nganaṉanyatju watjalku. Nganaṉa mantangka kuya palyaṉutjangka, wiyawanangku palumpa waarrka palyaṉutjangkaṯarra Katutjalu kulira watjalku. Paluru nganaṉanya waḻkulku nganaṉa palumpa waarrka tjukarurrungku palyaṉutjangka.

6 Walytja tjuṯa, wangka ngaatjanyaya kulila! Ngayulu nyurrangarrinya watjaṉu wiya ngayunya, Yapulutjanyaṯarra waḻkuntjaku, wanti! Ngalimpa nyurrangarri palya nyinanytjaku, ingkaṯa kutjupa tjuṯakuṯarra. Katutjaku wangka ngaranyi yaṉangu tjuṯa waarrkana nguwanpa nyinanytjaku, mayutjurrikitjangku kulintjawiya. Wiyanyurra ingkaṯa kutju mayutju nguwanpa waḻkura, ingkaṯa kutjupa panypurangkunytjaku. Ingkaṯa yuwankarraku palya nyinanytjaku. 7 Tjaampalangkunyurra walytjangku waḻkura ngayunya panypurangkupayi yalatji, “Nganaṉa Yiitjuku walytja tjuṯaku mayutju nyinanyi. Nganaṉa kuliṉi Puulalu Yiitjuku waarrka wiyawanangku palyaṉingi.” Katutjalu kutju tjukarurru kulilpayi, nyurrangarri wiya.

8 Wiyawanangkunyurra yalatji kuliṉi, “Nganaṉa Yiitjuku walytja palya nyinanyi, palumpa wangkaku nintilingku. Nganaṉa palya Yiitjuku waarrka palyalpayi, Puulalungarri nganaṉanya wiya nintintjaku, wangka wiima kutju tjana nintilpayi. Nganaṉa Yiitjuku walytja nintilingku nyinanyi wangka uwankarraku.” Tjingurunyurra yilta Yiitjuku palyalingku nyinanytjala ngayulu nyurrangarrilawana tjungu nyinaku, Yiitjunya piyuku mantakutu ngalyananyingka. Wiyanyurra yalatji Yiitjuku palyalingku nyinanyi. 9 Yuwa, nganaṉatju Yiitjuku waarrkana tjuṯa nyinanyi, mayutju tjuṯa wiyalatju nyinanyi. Yaṉangu tjuṯangku nganaṉanyatju panypurangkula pungkupayi, yaṉangu kutjupa tjuṯangku, ilkari ngurrara tjuṯangkuṯarra nyanganyingka. 10 Yiitju Kurayitjaku walytja nganaṉatju nyinanytjala yaṉangu tjuṯangkulanyatju panypurangkupayi yalatji, “Puulanyangarri Yiitjuku walytja mungutja tjuṯa nyinanyi. Yiitjuku wangkakuya nintiwiya nyinanyi. Tjanampaṉu wangka wiyalatju kulintjaku, kuyakuya tjuṯaya nyinanyi.” Nyurrangarri Kurinytjiyanya ngurrara tjuṯangku yalatji kuliṉi, “Nganaṉa Yiitjuku walytja nintilingku nyinarra palumpa waarrka tjukarurrungku palyaṉi. Yaṉangu tjuṯa nganampa palya nyinanyi, wiya nganaṉanya panypurangkupayi, Puulanyangarri nguwanpa, wiya.” 11 Kuwarri nganaṉatju mangarriku puṯu kuliṉi paḻtjatjirratjalatju nyinanyi, kapikuṯarralatju paarritji nyinanyi. Tjaaṯa kuyakuyatjarralatju nyinanyi wintarrpatjarra. Puṯulatju kuliṉi ngurrangka ngarrikitjangku, ngurra walytja wiyalatju kanyiṉi. Yiitjuku yunytjuwiya tjuṯangku nganaṉanyatju panypurangkula pungkula wantirriyalpayi ngurra kutjupakutu. Ngurra palulalatju nyinarra yaṉangu tjuṯa nintilpayi. Palulanguru Yiitjuku yunytjuwiya tjuṯangku nganaṉanyatju panypurangkula pungkula ngurra kutjupakutu wantirriyalpayi. Yalatjilatju nyinapayi. 12-13 Yiitjuku waarrka palyalkitjangku nganaṉatju rawa waarrkarringkupayi maniku. Mani palunyatjarrangkulatju mangarri walytjangku payimilara ngalkura nyinapayi. Yalatji waarrkarringkulalatju purrkarringkupayi. Yaṉangu tjuṯangku nganaṉanyatju panypurangkunytjala nganaṉatju purinypa tjananya wangkapayi kaangkinytjingku. Kutjupa tjuṯangku nganaṉanyatju panypurangkula pungkunytjala nganaṉatju tjananya pungkuwiyangku wantipayi. Yaṉangu tjuṯangku yalatji nganaṉanyatju panypurangkupayi, “Puulanyangarriya kuyakuya tjuṯa nyinanyi, nganaṉa wiya wangka tjanampa kulintjaku. Tjana kuya palyara nyinapayi.”

14-15 Nintilpayi kutjupa tjuṯangku nyurrangarrinya nintilpayi. Ngayulu nyurrangarrimpa nintilpayi walytja nyinanyi. Yirriṯi nganaṉa tjungu nyinapayi. Ngayulu paapa nguwanpangku nyurrangarrinya nintira yaṉṯayaṉṯalpayi. Wangka panyapa ngayulu wakaṉu nyurrangarri kulira Yiitjuku waarrka tjukarurrungku palyantjaku, wiyanyurra wangka palunya kulira kuṉṯarringkula wantinytjaku. Irriṯi Yiitju Kurayitjaku wangkanyurra kulira palumpa walytjarringu. Nyurrangarri ngayuku pipirri walytja tjuṯa nguwanpa nyinanyi. Wangka palunya ngayulu wakaṉu nyurrangarrinya pina yaḻara tjukarurrulkitjangku. 16 Ngayulu kuliṉi nyurrangarri ngayunya nguwanpa Yiitjuku walytja tjuṯa tjukarurru nyinanytjaku. 17 Ngayulu yalatji Yiitjuku tjukarurru nyinarra nintiṉangitjangka wati Timitjiyilu nyurrangarrinya yankula nintilku. Ngayulu wangka palulawana Yiitjuku walytja tjuṯa nintilpayi ngurra tjuṯawanangku. Yalatji nyurrangarrinya nintintjaku ngayulu palunya nyurrangarrilakutu wantirriyalku. Paluru ngayulawana rawa nintirringkupayi katja nguwanpa.

18 Tjaampalangkunyurra kuliṉi ngayulu wiya nyurrangarrilakutu yanku. Yalatjinyurra ngayuku yunytjuwiyangku kuliṉi, “Puulanya nganampa mayutju wiyarringu, palunyatjanu nganaṉa wiyalpi palumpa wangka kulintjaku.” 19 Tjinguru Katutjalu kuliṉi ngayulu nyurrangarrilakutu yankunytjaku. Yalatji paluru kuliraṉi watjantjala ngayulu yilta nyurrangarrilakutu maa yanku. Maa yankula nyurrangarrinya, ngayuku yunytjuwiya tjuṯaṯarra ngayulu nyakula watjalku. Ngayulu nyurrangarrinya nyakula kulilku, “Ngayulu tjanampaṉu wangka kulira wantiku. Kurungku nyakula tjananya ngayulu kulilku. Tjinguru pala tjuṯangku tjukarurru Yiitjuku waarrka palyaṉi, tjinguru wiya.” 20 Wiya Katutjalu nganaṉanya yaṉangu tjuṯa yaṉṯayaṉṯalkitjangku watjara wantipayi. Paluru nganaṉanya ngangkari tiṉatjarrangku yaṉṯayaṉṯalpayi. Tjinguru ngayuku yunytjuwiya tjuṯangkunyurra Katutjaku wangka nintira wantipayi, palulawana tjukarurru nyinanytjawiyangku. Nyurrangarri yalatji nintira wangka palulawana tjukarurru palyantjaku, Katutjalu ngangkari tiṉatjarrangku tjukarurru palyantja nguwanpa. 21 Nyaanyurra kuliṉi? Tjinguru wangka ngaatjanyurra kulira tjukarurrurriku. Yalatji tjukarurrurrinytjawiyangka ngayulu maa yankula nyurrangarrinya watjalku tjukarurrulkitjangku. Nyurrangarri tjukarurru nyinanytjala ngayulu maa yankula nyurrangarrinya purinypangku nintilku kaangkinytjingku.