1-2 Yurrunpa nyurrangarri piipa wakara ngayulakutu wantirriyaṉu. Piipa palula nyurrangarri wakara watjaṉu yalatji, “Kutjupa tjuṯangku mangarri kuka tjuṯaṯarra katirra tjaatji kutjupangka tjunkupayi Katutjanya nguwanpa waḻkulkitjangku. Palunyatjanu tjana waḻkura wiyarringkula tjaatjingka kuka mangarri palunya mantjira ngurra walytjakutu katirra nyinarra ngalkupayi. Yaalytji nyuntu kuliṉi? Tjinguru Yiitjuku walytja tjuṯangku mangarri kuka palunya palya ngalkuntjaku?, tjinguru wantinytjaku.” Ngayulu Puulalu nyurrangarrinya watjaṉi. Yiitjuku walytja kutjupa tjuṯangku kuliṉi mangarri kuka palunya ngalkuntjaku, kanya palumpa walytja kutjupa tjuṯangku kuliṉi mangarri kuka palunya wiya ngalkuntjaku, wantinytjaku. Kutjupa tjuṯangku walytjangku puḻkapungkupayi, “Ngayulu nintingku kuliṉi, yaṉangu tjuṯa ngayulu nintilku wangka mangarri kukatjarra Katutjanya nguwanpaku tjunutja, tjana tjukarurru kulintjaku. Tjana ngayuku wangka kulintjaku.” Yaṉangu walytjangku puḻkapungkupayingku, nganaṉaṯarra wiya yalatji walytjangku puḻkapungkunytjaku nganaṉa yaṉangu tjuṯaku wangka kulira purinypangku wangkarra nintintjaku. 3 Nganaṉa yalatji yaṉangu tjuṯaku, Katutjakuṯarra yunytju nyinanytjala Katutjanya nganampa yunypa nyinanyi.

4 Yaṉangu tjuṯangku tjana mangarri an kuka tjuṯa katirra tjunkupayi tjaatji kutjupangka Katutjanya nguwanpaku. Nganaṉa nintingku kuliṉi wiya Katutjanya nguwanpa kana nyinanyi, wiya. Katutjanya kutju mayutju tiṉa nyinanyi. 5 Yaṉangu tjuṯangku tjananya Katutjanya nguwanpa tjuṯa puḻkapunganyi yalatji, “Ilkari ngurrara. Nyuntu mayutju tiṉa nganampa nyinanyi.” Paluru tjana Katutjanya nguwanpa wiya mayutju tiṉa nyinanyi, wiya. 6 Katutjanya kutju nganampa mayutju tiṉa nyinanyi. Paluru manta ilkariṯarra palyara yaṉangu tjuṯa nganaṉanya nyinatjunkupayi. Palunya kutju nganaṉa puḻkapungkula nyinanytjaku. Yiitju Kurayitjanyaṯarra nganampa mayutju tiṉa nyinanyi, paluru kutjarra manta ilkariṯarra palyaṉu. Kurayitjanya paluru nganampa mirrirringkula kuyalampa waṉingu, Katutjaku ngulytjura nganaṉanya nyinatjunkukitjangku. Paluru kutjarra nganaṉanya kana kanyiṉi.

7 Kutjupa tjuṯangkuya wiya wangka panyapa kuliṉi. Paluru tjana wiyawanangku kuliṉi Katutjanya nguwanpa tjuṯaya kana nyinanyi. Paluru tjana irriṯi pipirri tjuṯangku yalatji kulilpayi. Yiitjuku walytjarringkula tjana kutu yalatji kulilpayi. Paluru tjana mangarri tjinguru kuka ngalkukitjangku yalatji puṯu kulilpayi, “Wiyala Yiitjuku walytja tjuṯangku mangarri an kuka ngaatja ngalkulku, kutjupa tjuṯangku tjaatji kutjupangka katirra tjunutjangka Katutjanya nguwanpaku.” 8 Katutjanya nganampa yunypa nyinaku nganaṉa mangarri an kuka palunya ngalkuntjala. Nganaṉa mangarri an kuka palunya ngalkuwiyangku wantinytjala Katutjanya nganampa yunypa nyinaku. 9 Tjinguru nyuntu Yiitjuku walytjangku kulilku mangarri an kuka palunya ngalkukitjangku. Tjinguru kutjupangku Yiitjuku walytjangku kulilku mangarri an kuka palunya wiya ngalkunytjaku. Yalatji paluru kulintjala nyuntu wantinytjaku palula kurungka wiyanu mangarri an kuka palunya ngalkuntjaku. 10 Nyuntu nintingku kuliṉi mangarri an kuka palunya ngalkuntjaku. Yalatji kulira nyuntu yankula tjaatji kutjupangka nyinaku Katutjanya nguwanpakuṉungka. Ngurra palula nyinarra nyuntu kuka palunya ngalkuku, Katutjanya nguwanpa palunya puḻkapungkunytjawiyangku. Yalatji nyuntu ngalkuntjala Yiitjuku walytja kutjupangkunta nyakula kulilku, “Wati pala palunya nguwanpangku ngayululpiṉa ngalkulku kuka palunya.” Tjinguru tjiṉṯu kutjupangka wati paluru tjaatji palulakutu yankula mangarri an kuka palunya ngalkuku. Yalatji paluru kutu ngalkula Katutjanya nguwanpa palunyalpi puḻkapungamalpa, Yiitjunyalpi puḻkapungkunytjawiyangku. 11 Yalatji wiya nyuntu yaṉangu kutjupa Yiitjuku walytja tjingapungkunytjaku, mangarri an kuka palunya ngalkuntjaku, wanti!, paluru munupinarringkula Yiitjuku walytja wiyarritjipingka. Yiitju Kurayitjanya wati palumpa mirrirringu palumpa walytja paluru kutu nyinanytjaku. 12 Yalatji wati paluru Katutjanya nguwanpa puḻkapungkula wiyawana nyinanytjala Yiitju Kurayitjanya nyuntupa wiya yunypa nyinaku. Nyuntu yalatji palunya tjingapungkula kuya palyalku. 13 Mangarri an kuka Katutjanya nguwanpaku tjunutja ngalkukitjangku nyuntu kulira wanti! Ngayulu Puulalu kuliṉi yalatji. Wiyaṉa mangarri an kuka palunya ngalkunmalpa, Yiitjuku walytja kutjupangkuṉi nyakula munupinarringkula Katutjanya nguwanpalpi kutjupa puḻkapungkutjipingka.