1 Katutjalu kuliṉi nganaṉatju palumpa waarrka palyantjaku. Paluru wiya kuliṉu yalatji, “Puulalungarri kuya palyalpayi wiya tjana ngayuku waarrka palyantjaku.” Yalatji kulintjawiyangku paluru watjaṉu nganaṉatju palumpa waarrka palyantjaku. Yalatji kulira nganaṉatju kutu palumpa waarrka palyarinkupayi, wantinytjawiyangku. 2 Palumpa wangka nganaṉatju tjukarurru tjakultjurinkupayi ngunytjinytjunkunytjawiya. Yirriṯi nganaṉatju wiyawana nyinarra kuya palyara nyinapayi. Yalatji nyinarra nganaṉatju tjukarurrulpi nyinanyi. Katutjala kurungka nganaṉa tjukarurru watjaṉi Katutjaku wangka kutju nganaṉatju yaṉangu tjuṯangka tjukarurru nintilpayi. Yaṉangu tjuṯangku wangka yutitja palunya kulira yalatji kulilpayi, “Puulalungarri Katutjaku wangka tjukarurru nintiṉi.” 3 Tjaampalangku uunwayi nyinakitjangku nganampaṉu wangka puṯu kulilpayi, wangka Yiitjunyatjarra nganaṉatju tjakultjunkunytjala. Paluru tjana wangka palunya wantinytjala Katutjalu tjananya warukutu waṉiku.

4 Paluru tjana wangka Yiitju Kurayitjanyatjarra kulira wantipayi mamuku mayutjungku tjananya tjingapunganyingka. Yiitju paluru nganaṉanya nintilpayi yaalytjiyaalytji Katutjanya nyinanyingka. 5 Yaṉangu tjuṯangka nganaṉatju wiya wangka Puulanyatjarra tjakultjunkupayi, wangka Yiitju Kurayitjanyatjarra kutju nganaṉatju tjakultjunkupayi. Paluru nganampa mayutju tiṉa nyinanyi. Yalatjilatju tjakultjurinkupayi. Paluru nganaṉanyatju watjaṉu palumpa waarrkana nyinanytjaku. Yalatji nyinarra nganaṉa nyurrangarrimpa Kurinytjiyanya ngurrara tjuṯaku waarrkanaṯarra nyinanyi. 6 Katutjalu yirriṯi watjaṉu tili tjuṯa ngaranytjaku. Nganaṉa Katutjakuṉu wangka Yiitjunytjatjarra kulira walytjarringkula nganaṉa tilitjarra nguwanpa nyinanyi, Yiitjunya nganampa mayutju nyinanyingka.

7 Yiitjukuṉu wangka palyaku nganaṉatju ninti nyinanyi. Wangka palunyalatju tjakultjurinkupayi wangka maṯupurra. Yaṉangu tjuṯangku nganaṉanyatju nyakula yalatji kuliṉi, “Puulanyangarri mungutja nguwanpa nyinanyi mayutju tiṉa tjuṯa wiya tjana. Puulakungarrimpa tjanampa wangka palyalingku Katutjakuṉu. Yaṉangungku wangka palunya kulira Yiitjuku walytjarrinytjala Katutjalu ngangkari tiṉatjarrangku ngulytjuṉi.” 8-9 Yaṉangu tjuṯangku kutu nganaṉanyatju panypurangkula pungkupayi iluntankunytjawiyangku. Katutjaku waarrka palyalkitjangkulatju puṯu kulilpayi. Yalatji puṯu kulintjala paluru nganaṉanyatju nintira rapalpayi. Kutulatju palumpa waarrka palyalpayi wantinytjawiyangku. 10-11 Yirriṯi, kuya tjuṯangku Yiitjunya pungkula iluntanu. Palunya nguwanpa paluru tjana watjalpayi nganaṉanyatju pungkula iluntankukitjangku. Yalatjilatju kulira kutu Yiitjuku tjukarurru nyinapayi. Yalatjilatju nyinanytjala kutjupa tjuṯangku nyakula watjalpayi, “Yiitjulu Puulanyangarri yaṉṯayaṉṯara kanyiṉi. Tjana kutu Yiitjuku tjukarurru nyinanyi.” 12 Yiitjukuṉu wangkalatju tjakultjurinanyingka, kanya kuya tjuṯa yunytjurringanyi nganaṉanyatju yiluntankukitja. Nyurrangarri yunytjurringkula wangka palunya kulira walytjarringkula kutu Yiitjuku tjukarurru nyinamalpa. Yalatjilatju kulira yunyparringanyi.

13 Katutjaku wangka yirriṯi tjunutja yalatji ngarrinyi, “Katutjaku wangka ngayulu yilta kulira yaṉangu tjuṯangka tjakultjunu.” Palunya nguwanpa nganaṉatju Katutjaku wangka Yiitjunyatjarra yilta kulira yaṉangu tjuṯangka tjakultjunkupayi. 14 Nganaṉa nintingku kuliṉi yalatji. Katutjalu mayutju Yiitjunya mirringuru kanaṉu. Palunya nguwanpa nganaṉanyaṯarra paluru ngula mirringuru kanalku. Nganaṉanya nyurrangarrinyaṯarra paluru katiku kana kutu nyinanytjaku palulawana. 15 Yuwa, nganaṉanyatju tjana panypurangkula pungkupayi, yiluntankukitja yunytjurringkula. Yalatji nganaṉanyatju pungkunytjala nganaṉatju kulilpayi, “Palya tjana nganaṉanya punganyi Yiitjuku walytja kutjupa tjuṯa wantirra. Tjana yilta kutjupa tjuṯangka wangka Yiitjunyatjarra tjakultjurinku, tjuṯalingkulpiya Yiitjuku walytjalpi nyinanytjaku. Tjuṯalingkungkulpiya Yiitjuku walytjarringkula Katutjanya tjapira kutu puḻkapungamalpa.”

16 Kutulatju Katutjaku waarrka palyarinanyi, wantinytjawiyangku. Yiitjuku yunytjuwiya tjuṯangku nganaṉanyatju panypurangkula pungkupayi. Kutulatju parra tjakultjurinkula kata wiritjarrarringkulalpi purrkarringkupayi, tjiḻpirringkula. Katutjalu nganaṉanyatju rapalpayi palumpa waarrkalatju kutu palyarinkunytjaku. 17 Mantangka kutju nganaṉanyatju tjana panypurangkula pungkupayi. Ngaangka kutjulatju rawangku tjakultjurinkula tjiḻpirringkula purrkarripayi. Ngula nganaṉatju ngurra palula palya nyinamalpa, purrkawiyalpi yunypalingkulpi. 18 Nganaṉatju mantangka kutu nyinakitjangku wiya yalatji kuliṉi. Ngurra ilkari palula nyinakitja nganaṉa kulira nyinanyi, kana kutu nyinakitja. Ngurra ilkari palunya nyakunytjawiyala nyinanyi kuwarripa. Nganaṉa ngurra palumpa paṯara nyinanyi ilkariku.