1 Walytja tjuṯa, wangka ngaatjanyalpiya kulila! Nyurrangarri Katutjanyalampatju tjapinma! Yalatjiya tjapinma!, yaṉangu tjuṯangku ngurra tjuṯawana Yiitjukuṉu wangka kulira palumpa walytjarrinytjaku, nyurrangarri yurrunpa kulira palumpa walytjarrinytja nguwanpa. 2 Yalatjiya tjapinma!, Yiitjuku yunytjuwiya tjuṯangku nganaṉanya panypurangkula pungkutjipingkamarra. Paluru tjana wiya Yiitjuku wangka kuliṉi.

3 Wangka ngaatjanyaya kulila! Ilta, Katutjalulanya yaṉṯayaṉṯaṉi paluru nyurrangarrinya yilta kaṉṯilyankula kanyilku, Yiitjuku tuunlayiki tjuṯangku pungkutjipingkamarra. 4 Kuliṉilatju Katutjalu nyurrangarrinya yaṉṯayaṉṯaṉingi. Palulanguru nyurrangarri nganampatju wangkawana kulira tjukarurru nyinanyi. Nganaṉatju kuliṉi nyurrangarri wangka palulawana kutu tjukarurru nyinamalpa. 5 Katutjanya ngayulu tjapilpayi, nyurrangarri yaṉangu tjuṯaku kutu yunytju nyinanytjaku, Katutjanya nganampa yunytju nyinanytja nguwanpa. Yiitju Kurayitjalu Katutjaku waarrka kutu palyalpayi, wantiwiyangku, tjana palunya panypurangkunytjala. Nyurrangarriṯarra palunya nguwanpa palumpa waarrka kutu palyantjaku, tuunlayiki tjuṯangku nyurrangarrinya panypurangkula pungkunytjala.

6 Walytja tjuṯangkuya wangka ngaatjanyalpi kulila! Nganampa mayutju Yiitju Kurayitjaluṉi watjaṉu ngayulu nyurrangarrinya nintintjaku. Palulanguru ngayulu nyurrangarrinya watjaṉi mangarriku waarrkarrinytjaku, purrkarringkula wantinytjawiya. Nyurrangarrimpa ngurrangka Yiitjuku walytja tjaampalangku waarrka wantirra liitjipaka nyinanyi. Tjana waarrka wantinytjala wiyanyurra tjanalawana tjungurrinytjaku. Paluru tjana nganampatju wangka kulira wantipayi. 7 Yurrunpa nganaṉatju nyurrangarrilawana nyinarra maniku waarrkarringangi, wiya nganaṉatju liitjipaka nyinapayi. Palulanguru nganaṉatju nyurrangarrinya Katutjaku wangka nintilpayi. Yalatjikunyurra ninti nyinanyi. Nganaṉatju waarrkarripayi nguwanpa nyurrangarri waarrkarringkula nyinanytjaku. 8 Nyurrangarri mangarri tjinguru kuka yungkunytjala nganaṉatju ngaparrtjingku mani nyurrangarrinya yungkupayi. Yalatjilatju kuliṉingi, “Tjitjaluniyanya ngurrara tjuṯangku wiya mani tiṉa kanyiṉi. Nganaṉa waarrkarringkula mani mantjira mangarri an kuka payimilalku, tjanala yinkatjipingkamarra.” Yalatji kulira nganaṉatju mungangka tjiṉṯungkaṯarra waarrkarringkupayi. 9 Yurrunpalatju nyurrangarrilawana nyinarra yalatji kuliṉu, “Katutjaku waarrkalatju tjanalawana palyantjala, Tjitjaluniyanya ngurrara tjuṯangku nganaṉanya mangarri an kuka ngaparrtjingku yungkunytjaku. Yalatjiya ngurra tjuṯawana ingkaṯa tjuṯa yungkula paḻtjaṉi.” Yalatjilatju kulira wantingu. Piyuku kuliralatju yalatji watjaṉu, “Nganaṉa waarrkarringkula mani mantjira mangarri an kuka payimilalku, tjanala yinkatjipingkamarra. Tjana nyakula yalatji kulintjaku, ‘Puulanyangarri mangarriku waarrkarringkula nyinapayi. Tjananya nguwanpa nganaṉa waarrkarringkula nyinanytjaku.’ ” 10 Nganaṉatju nyurrangarrilawana nyinarra watjaṉingi yalatji, “Yaṉangungku waarrka wantirra nyinanyingka, wiyanyurra paḻtjantjaku.” 11 Panyapalatju nyurranya watjaṉu, kutjupangkulanyatju tjakultjunutjangka. Palurulanyatju kuwarri tjakultjunu, “Tjitjaluniyanya ngurrara Yiitjuku walytja tjaampalaya waarrka wantirra liitjipaka nyinanyi. Tjana tjungurringkula tjaalymara wangkapayi.” 12 Yaṉangu paluru tjana tjukarurrulpi waarrkarringkula nyinanytjaku, mangarri walytjangku payimilara ngalkuntjaku. Nganampa mayutju Yiitju Kurayitjalu yurrunpa watjaṉu ngayulu nyurrangarrinya nintintjaku. Palulanguru ngayulu nyurrangarrinya watjaṉi nyurrangarri palumpa walytja tjuṯa yalatji mangarriku waarrkarrinytjaku. 13 Walytja tjuṯangkuya kulila! Waarrka wantirra nyinapayi tjuṯaku tjanampa wiya yunytjuwiya nyinanytjaku, nyurrangarri tjukarurru tjanampa palyanma! Kutjupa tjuṯakuṯarra tjukarurruya palyanma!, purrkarrinytjawiyangku.

14 Piipa ngaatja nyurrangarri tjanala riitarringanyingka, tjinguru tjaampalangkuya kulira wantiku yalatji, “Wiya Puulalungarri nganaṉanya watjantjaku.” Yalatji kulira wantipayi tjuṯawana wiya nyurrangarri tjungurringkula tjaalymara wangkanytjaku, tjananya wantinytjaku. 15 Palumpa tjanampa wiyanyurra yunytjuwiyarringkula nyinanytjaku, nyakula tjananya palya wangkanytjaku, Yiitjuku walytja kutjupangka palya wangkanytja nguwanpa.

16 Katutjalulanya yaṉangu tjuṯa yunypalpayi. Palulanguru nganaṉatju palunya tjapiṉi, nyurrangarrinya yunypara yaṉṯayaṉṯantjaku. Yunytjurringanyilatju Katutjalu nyurrangarrinya yilangku yaṉṯayaṉṯantjaku. 17 Wati kutjupangku nyinarra ngayuku maḻpangku piipa ngaatjanya wakaṉingi, tjungungkulitju ngayulu Puulalu wangkanytjala. Kala, wangka ngaatjanyalpi ngayulu Puulalu marangku tjayinamilaṉi yalatji, Puula. Nyakulanyurra yalatji kulilku, “Puulalu yilta, piipa ngaatjanya wantirriyaṉu. Paluru yini wakaṉutja ngaatja yalatji paluru kutu piipangka wakara wantirriyalpayi.” 18 Ngayulu Katutjanya tjapinmalpa, nganampa mayutju Yiitju Kurayitjalu aḻṯururringkula nyurrangarrinya yaṉṯayaṉṯantjaku.