1 Piitanya Tjaananya Tjuwuku tjaatji tiṉakutu yanu. Palulakutu Tjuwu tjuṯa kututja mungarrtji yankupayi, Katutjalakutu wangkanytjaku. 2 Tjaatji tiṉa palula alytjurangka wati nyumpu yinkapayi nyinangi. Alytjura paluru yini yalatjitjarra, “Alytjura Palya.” Wati nyumpu paluru pipirri wiima nyumpurringkula nyumpu kutu nyinangi. Palumpa ngulytju tjuṯangku wati palunya kututja katirra nyinatjunkupayi, tjaatji tiṉa palula alytjurangka, maniku yinkanytjaku. Yaṉangu tjuṯa palulawana yiwarrakatinytjala paluru tjanala maniku yinkapayi. 3 Piitanya Tjaananya alytjura palulakutu yankunytjala wati nyumpu paluru nyakula yinkangu. 4-5 Paluru kutjarra wati palunya nyakula Piitalu watjaṉu, “Nyawalinyatju!” Paluru pulanya nyangangi alatji kulira, “Ngaa kutjarrangkuṉi tjinguru mani yungku.” 6 Piitalu watjaṉu, “Maniwiyaṉa ngaranyi, ngayuluṉanta palyalku. Yiitju Kurayitja Natjaritja ngurrarakuṉu ngangkaritjarrangkuṉanta watjaṉi, pakara parra ngara!” 7 Piitalu miṉa witira ngaratjunu. Palulanguru nyumpu paluru tjina palyarringulpi. 8 Wati paluru yunyparringkula pakara ngarala purinypa parra yulytjayinangi. Wati nyumputjanuṯarra tjana tjungu tjarrpangu tjaatji tiṉangka. Paluru yunypa parra yinkarra tjalkaḻungkuyinangi, Katutjanya waḻkuyinangi. 9-10 Yaṉangu tjuṯangku palunya nyangu yunypa parra tjalkaḻungkunytjala. Nyakulaya nuuwimilara watjaṉu, “Wati nyumpu panyapa alytjurangka kutu nyinapayinya.” Palunya nyakula tjana puṯulpiya kuliṉingi, “Yaalytjiyaalytji paluru nyumputjanu palyarringu?”

11 Wati paluru nyumpu palyarringutjatjanungku yunypangkulpi Piitanya Tjaananya pulanya mara witirinangi. Yaṉangu tjuṯangku palunya nyakula puṯu kuliṉingi. Paluru tjana parra yankula yaṉangu kutjupa tjuṯangka tjakultjurinkupayi. Palulanguru yaṉangu tjuṯangku kulira ngalya tjalkaḻungkula tjungurringu, nyumpu palunya palyarringutjalpi nyakukitja. Puri palunya yini yalatjiya watjaṉangi, “Tjalamunaku Puri.” 12 Yaṉangu tjuṯa tjungurrinytja nyakula Piitalu tjananya watjaṉu, “Yitjurilaku walytja ngaṉṯitja tjuṯa, kulilaṉiya! Nyurrangarri ngalinyatju nyakula wiyawanangku kuliṉi yalatji, ‘Pala kutjarra ngangkari tiṉatjarrangku wati palunya palyaṉu. Tjukarurrupula Katutjaku nyinanyi.’ Wiyanyurra yalatji kulintjaku. Yiitjukuṉu ngangkari tiṉatjarrangkulitju palyaṉu. 13 Nganampa walytja yurruntitja tjuṯa nyinangi, Yipuramanya, Yatjikanya, Tjikupanya. Palumpa tjanampa Katutjanya mayutju nyinapayi. Yiitjukuṯarra Katutjanya mayutju nyinangu. Paluru Katutjaku waarrkana tjukarurru nyinanytjala, Katutjalu Yiitjunya mayutju tiṉa nyinatjunu. Yiitju palunya nyurrangarri mayutju tjuṯangka kurungka watjaṉu tjana witira katirra iluntankunytjaku. Mayutju Payilatalu Yiitjunya pakaltjingalkitjangku yunytjurringutjangka, nyurrangarri wiya watjaṉu.

14 “Yiitju paluru ilta Katutjaku tjukarurru nyinapayi, kuya palyantjawiya. Nyurrangarri yaṉangu kutjupaku mirri pungkupayiku yunytjurringkula watjaṉu, Yiitjunya wiya pakaltjingantjaku. 15 Yalatji watjaranyurra Yiitjuku puntura tuunlayikirringu, ‘Palya tjana Yiitjunya iluntankunytjaku.’ Yalatjinyurra yaṉangu kanalpayinya kulilwiyangku watjaṉu iluntankunytjaku. Katutjalu palunya mirringuru kanara pakaltjingaṉu. Paluru kanarrinytja kurungku nyakulalatju nyurrangarrinya tjakultjunanyi. 16 Wati ngaatjanya nyumputjanu palyarringutjangku Yiitjunya Katutjakuṉu kuliṉi. Yalatji kulira ngaatja wati paluru palyarringulpi, yaṉangu tjuṯangka kurungka.”

17 Piitalu tjananya piyuku nintiṉu, “Ngayuku walytja tjuṯa, kulilaṉiya! Ngayulu nintingku kuliṉi, nyurrangarri, mayutju tjuṯangkuṯarra ramarringkula watjaṉu tjana Yiitjunya yiluntankunytjaku. 18 Yirriṯi, Katutjaku wangka watjalpayi tjuṯangku watjaṉangi, ‘Yaṉangu tjuṯangku Kurayitjanya panypurangkula pungku.’ Wangka yalatji watjaṉutja yiltarringu, Katutjalu kulintjawana. 19 Nyurrangarri kutu kuya palyantjawiya tjukarurrulpi Katutjaku nyinanytjaku. Yalatjinyurra Katutjaku wangka kulintjala Katutjalu nyurrangarrimpa kuya waṉiku. 20 Palulanguru paluru nyurrangarrinya kaṉṯilyanku tjukarurru nyinanytjaku. Ngula paluru nyurrangarrimpa Yiitjunya piyuku mantakutu ngalya wantirriyalku. Paluru yurrunpa watjaṉu, mayutju Kurayitjanya wantirriyalkitjangku, mayutju nyurrangarrimpa nyinanytjaku. 21 Katutjaku ngurrangka Yiitjunya kutu nyinamalpa, palunyatjanu paluru piyuku ngalyanku mayutju tiṉalampa nyinanytjaku. Paluru mantakuturringkulalpi mayutju nyinanytjala yaṉangu tjuṯa palya nyinaku, ngurra tjuṯaṯarra palya ngaraku. Yalatji Katutjaku wangka watjalpayi tjuṯangku yurrunpa watjaṉu.

22 “Nganampa walytja yurrunpa nyinapayingku Muutjalu yirriṯi watjaṉu, ‘Ngayulu Katutjaku wangka watjalpayi nyinanyi. Ngayunya nguwanpa Katutjaku wangka watjalpayi kutjupa Katutjalu wantirriyara nyurrangarrimpa mayutju ngaratjunku. Paluru walytja nyurrangarrimpa nyinaku, wangka walytjatjarra. Palumpa wangkanyurra kulira tjukarurru nyinanytjaku. 23 Katutjaku wangka watjalpayi palunya yaṉangu tjuṯangku kulira wantinyingka, Katutjalu yaṉangu palunya tjuṯa warukutu waṉiku, wiya palumpa walytja paluru tjana nyinaku, wiya.’

24 “Katutjaku wangka watjalpayi yuwankarrangkuya, Tjamiyulaluṯarra watjaṉu, ‘Kurayitjanya yilta mayutju tiṉa nyinaku.’ Tjamiyula paluru wangka panyapa yurrunpa watjaṉu. Tjamiyulanya nyinanyingka ngaṉṯiya Katutjaku wangka watjalpayi kutjupa tjuṯangkuṯarra wangka palunya watjaṉu. Wangka tjanampaṉu iltarringu Yiitju Kurayitjanya paṉangkalpi nyinangi. 25 Katutjaku wangka watjalpayi palunya tjuṯaku nyurrangarri walytja ngaṉṯitja tjuṯa nyinanyi. Katutjalu nyurrangarrinyaṯarra wangka yalatji watjaṉu, ‘Yipuramala Katutjalu yalatji watjaṉu. Nyuntupa walytja ngaṉṯitja kutju ngula nyinanyingka, yaṉangu yuwankarraya yunyparriku, manta kutjupa kutjupa ngurrara tjuṯaṯarra.’ ” 26 Piitalu tjananya piyuku watjaṉu, “Palulanguru Katutjalu nyurrampa yurrun yurrunpangku palumpa katja wantirriyaṉu, nyurrangarri yunyparrinytjaku, nyurrangarri palumpa wangka kulira kuya palyalwiyalpi palumpa tjukarurru nyinanytjaku.”