1 Puulanya Panapatjanyaṯarra tawunu Yakuniyamalapula tjarrparra Tjuwuku tjaatjikutu yanu. Tjaatjiku mayutju tjuṯangku pulanya kutjarra tjapiṉu nintintjaku tjananya. Paluru kutjarrangkupula tjananya wangka Yiitjunyatjarra nintiṉingi. Yalatji yurrunpa tawunu Yantiyukala tjananya yaṉangu tjuṯa Tjuwuku tjaatjingka nintiṉingi. Yakuniyamalapula tjaatjingka nintintjala palunya ngurrara tjuṯangkulpiya Tjuwu tjuṯangku, Tjuwuwiya tjuṯangkuṯarra Yiitjukuṉu wangka kulira palumpa walytjarringu. 2 Tjuwu kutjupa tjuṯangkuya Yiitjukuṉu wangka kulira wantingu. Paluru tjana Yiitjuku walytja tjuṯaku yunytjuwiyarringkula panypurangkupayi. Yaṉangu kutjupa Tjuwuwiya tjuṯa tjana tjingapungkupayi Yiitjuku walytja tjuṯaku yunytjuwiya nyinanytjaku. 3 Puulanya Panapatjanya kutu tawunu palula nyinarra yaṉangu tjuṯa nintiṉingi, yunytjuwiya tjuṯaku nguḻurringkula wantinytjawiyangku. Katutjalu pulanya nintiṉu, palumpaṉu ngangkaritjarrangku kutjupa kutjupa palyara tjananya nintintjaku. Miiṉta tjuṯa mamutjarra tjuṯa palyarrinytjala yaṉangu tjuṯangkuya yalatji kuliṉu, “Katutjakuṉu ngangkaritjarrangkupula palyantjala nganaṉa nyakula kuliṉi, paluru kutjarra yilta Katutjakuṉu wangka Yiitjunyatjarra nganaṉanya tjakultjunanyi.”

4 Yaṉangu tjuṯangkuya, palunya ngurrara tjuṯangku puṯu kuliṉingi, “Tjinguru Puulaku Panapatjaku wangka Yiitjunyatjarra tjukarurru ngaranyi, tjinguru Tjuwu tjuṯaku wangka wiya tjukarurru ngaranyi.” Yalatjiya kulira kutjupa tjuṯa Puulaku Panapatjaku yunypa nyinangi, kanya kutjupa tjuṯaya Tjuwu tjuṯaku yunypa nyinangi. 5 Palulanguruya Tjuwu tjuṯa, Tjuwuwiya tjuṯa, mayutju tjuṯaṯarra tjungurringkula wangkangu Puulanya Panapatjanya puḻingka rungkara yiluntankunytjaku.

6-7 Paluru kutjarra tjakulpa kulira kumpira yanu manta Lakuniyalakutu, pungkupayi tjuṯangkamarra. Tawunu Litjarrala tawunu Taapilaṯarra paluru kutjarra Yiitjukuṉu wangka nintiṉangi. Tawunu palula kutjarrangka yila ngurra kutjupa tjuṯa ngarangi. Ngurra palula tjanalawana paluru kutjarra Yiitjukuṉu wangka tjakultjurinangi.

8 Tawunu Litjarrala wati nyumpu nyinangi, tjina yankupayiwiya. Wati paluru pipirri wiima nyumpu nyinarra nyumpu kutu nyinangi. 9 Nyumpu paluru wangka Yiitjunyatjarra kuliṉangi Puulalu tjakultjunanyingka. Puulalu palunya nyakula yurrukuliṉingi, “Wati nyumpu palangku Yiitjukuṉu wangka kuliṉi. Paluru kuliṉi ngayulu Yiitjukuṉu ngangkaritjarrangku palyalpayi.” 10 Yalatji kulira Puulalu wati palunya kurungku puntura nyakula ngalya watjaṉu, “Pakara ngara!” Yilta wati paluru pakara parra ngarayinangi.

11 Tjina parra ngaranytjalaya nyakula yaṉangu tjuṯangku mirrarra watjaṉu, tjaa walytjangku. Lakuniya wangkatjarrangku watjara waṉingu, “Yilta, pala kutjarra nganampa mayutju tiṉa kutjarra ilkaringurupula ngalyanu. Kuwarri kutju nganaṉa ngaa kutjarra nyanganyi, rawangku nyakuwiyangku waḻkura. Ilkaringurupula ngalyankula yaṉangurringulpi.” 12 Lakuniyanya ngurrara tjuṯangkuya Katutjanya nguwanpa tjuṯa waḻkulpayi. Katutjanya nguwanpa kutjarra yini yalatji, “Tjiyatjanya”, kutjupa yini yalatji, “Yamitjanya.” Panapatjanyaya yini kutjupa watjaṉu, Tjiyatjanya. Puulanyaya yini kutjupa watjaṉu, Yamitjanya. Tjana kuliṉingi, “Nganaṉa nintingku tjukurrpa kulira watjalpayi Yamitjalu mayutju Tjiyatjaku wangka tjakultjunkupayi, Tjiyatjanya wangkawiyangka.” Yalatji tjana kulira Puulanya Yamitjanya yini watjaṉu, paluru tjanampa wangka tjakultjunkupayi.

13 Mayutju tiṉa Tjiyatjaku tjaatji tawunungka tjayiṯi ngarangu. Yaṉangu tjuṯangku palula tjungurringkula Tjiyatjanya waḻkulpayi. Tawunu Litjarranya parriki tiṉangka ngururrpa ngarangi. Parrikingka tjarrpanytjaku kiiṯa ngarangi tjaatji palula yila. Tjaatji palunya ngurrara waarrkanangku, yaṉangu tjuṯangkuṯarra kuliṉu kuka tjawirrilyi katirra pungkunytjaku, mayutju tiṉa kutjarra Puulanya Panapatjanya ngalyanutjangka. Palunyatjanu tjaatji ngurrara paluru puluka tjuṯa putipulawu tjuṯaṯarra katingu kiiṯa palulakutu, puluka pungkula palunya kutjarra waḻkulkitjangku, yaṉangu tjuṯangkuṯarra. 14 Yaṉangu palunya ngurrarangku tjakultjunu palula kutjarrangka, tjana waḻkuntjakitjangku kulintjala. Pulukaya katirra ngaratjunutjangka Puulalu Panapatjalulpi kuliṉu, “Yilta, yaṉangu tjuṯangku ngalinya waḻkulkitjangku puluka tjuṯa ngalya katirra ngaratjunu, tjawirrilyilimpa pungkunytjaku. Wiya tjana ngalinya yalatji waḻkuntjaku, wantinytjakuya.” Yalatjilpipula kulira mantarrankupula wintarrpungkula yaṉangu tjuṯawana yankula watjarinangi, 15 “Wiya nyurrangarri puluka pungkula ngalinya waḻkuntjaku. Ngalitju yaṉangu kutjarra nyinanyi, wiyalitju ilkaringuru ngalyanu. Wiya nyurrangarri kutjupa kutjupa tjuṯa waḻkuntjaku, mayutju tiṉa kutjunyurra yilta waḻkuntjaku Katutjanya. Paluru ilkari, manta, yuruṯarra palyalpayi. Paluru ilkari ngurrara tjuṯa, manta ngurrara tjuṯa, yuru ngurrara tjuṯaṯarra palyalpayi. 16 Yirriṯi yaṉangu tjuṯangku palumpa wangka kulira wantipayi. Katutja paluru tjananya wantingu tjana walytjangku kulira nyinanytjaku. 17 Yirriṯi yaṉangu kutjupa tjuṯa Katutjaku ninti nyinangu, Katutjalu yuwankarra palyaṉutja tjuṯa nyakula. Paluru kapi tjanampa ilkaringuru wantirriyalpayi. Paluru mangarri tjiiṯatjanu pakaltjingalpayi tjana mangarri yunypangku ngalkura nyinanytjaku. Yalatji kuwarri paluru nyurrangarrimpa kapi ilkaringuru wantirriyalpayi. Mangarri nyurrangarrimpa tjiiṯatjanu pakaltjingalpayi yunypanyurra mangarritjarra nyinanytjaku. Yalatji paluru nyurrangarrinya yaṉṯayaṉṯaṉi.” 18 Wangka panyapa wangkarra paluru kutjarra tjananya rawangku marrkuṉingi, wiya puluka pungkula pulanya waḻkuntjaku. Kalalpi yaṉangu tjuṯangku kuliṉu, waḻkuwiyangku pulanya wantinytjaku.

19 Palulanguru Tjuwuku mayutju tjuṯaya, tawunu Litjarralakutu yanu, tawunu Yantiyukanya ngurrara tjuṯa, tawunu Yakuniyamanya ngurrara tjuṯaṯarra. Paluru tjana Puulaku tuunlayikingku Litjarranya ngurrara tjuṯa tjingapungu Puulanya pikarringkula pungkunytjaku. Paluru tjana Puulanya puḻingka rungkaṉingi mirrintankukitjangku. Mirrirrinytjakutjura kuliraya Puulanya yitarrikatirra, tawunu parrikingka yaatjayiṯi wantikatingu. 20 Yiitjuku walytja tjuṯaya yankula Puulala tjungurringu. Tjungurrinytjala paluru pakaṉulpi. Pakara tawunu palulakutu ngaṉṯikutu yankula nyinangi. Aaḻi pakarapula Panapatjanya tawunu Taapilakutu tjungu yanu.

21-23 Ngurra palula paluru kutjarra Yiitjukuṉu wangka nintiṉingi. Yaṉangu tjuṯangkuya kulira Yiitjuku walytjarringu. Palulangurupula tawunu Litjarralakutu ngaṉṯikutu yanu. Tawunu palula paluru kutjarra Yiitjuku walytja tjuṯa nintira rapaṉu yalatji. “Katutjaku walytja tjuṯa nganaṉa nyinanyi. Palurulanya yaṉṯayaṉṯalpayi palumpa yunytjuwiya tjuṯangku nganaṉanya panypurangkula punganyingka. Nganaṉa palumpa kutu tjukarurru nyinarra palumpa ngurrangka nyinaku. Kutunyurra palumpa tjukarurru nyinanytjaku.” Paluru kutjarra mayutju maṉkurrpa tjanampa ngaratjunu Yiitjuku walytja tjuṯa yaṉṯayaṉṯantjaku. Paluru kutjarra mayutju ngaratjunkukitjangku, mangarri ngalkuwiyangku nyinarra Katutjanya yalatji tjapilpayi, “Katutja, yaṉṯayaṉṯala tjananya mayutju ngaa tjuṯa!, nyuntupaya tjukarurru nyinanytjaku.” Palulanguru Puulanya Panapatjanya tawunu Yakuniyamalakutu yankula tjananya rapaṉu. Tawunu Litjarrala ngaratjunutja nguwanpa paluru kutjarra mayutju maṉkurrpa tjanampa ngaratjunu. Palulanguru paluru kutjarra tawunu Yantiyukalakutu yankula tjananya rapaṉu. Piyuku tjanampa mayutju maṉkurrpa kutjupa ngaratjunu yaṉṯayaṉṯantjaku tjananya.

24 Palulangurupula manta Pitjitiyalawana yankula tawunu Paakala tjarrpangu. Tawunu paluru manta Pampiliyala ngaranyi. 25 Katutjaku wangka Yiitjunyatjarrapula tawunu Paakala yaṉangu tjuṯangka tjakultjunkula tawunu Yatalayalakutu yanu. 26 Puutangka paluru kutjarra kaḻpakatirra ngaṉṯikutu yanu, tawunu Yantiyuka kutjupakutu. Yurrunpa tawunu palula paluru kutjarra nyinanytjala Yiitjuku walytja tjuṯangku Katutjanya tjapiṉu yaṉṯayaṉṯantjaku pulanya, Yiitjuku waarrkapula ngurra tjuṯawana palyarinkunytjala. Waarrka palunya paluru kutjarra palyara ngaṉṯikutu yanu tawunu Yantiyukalakutu.

27 Tawunu palula tjarrparra paluru kutjarra Yiitjuku walytja tjuṯa tjananya tjunguṉu. Tjana tjungurrinytjala paluru kutjarra tjananya tjakultjunu Katutjalu pulanya yaṉṯayaṉṯaṉutjangka, yalatji, “Katutjalu ngalinya rapaṉu Tjuwuwiya tjuṯangka wangka Yiitjunyatjarra tjakultjurinkunytjaku. Yaṉangu tjuṯangkuya kulira Yiitjuku walytjarringu.” Yantiyukanya ngurrara tjuṯaya kulira palumpa kutjarra puntura yunyparringu, paluru kutjarra Yiitjunyatjarra ngurra tjuṯawana tjakultjurinangitjangka. 28 Palulanguru paluru kutjarra kutu tjanalawana nyinangi tawunu palula.