1 Palulanguru Puulalu tawunu Yatjanytjanya wantirra tawunu Kurinytjiyalakutu yanu. 2 Ngurra palula miiṯararrapula Tjuwu kutjarra nyinangi. Wati paluru yini Yakuwilanya, manta Puntutjanya ngurrara. Kungka paluru yini Piritjilanya. Paluru kutjarra mungaṯu manta Yitaliyalanguru, tawunu Ruumalanguru tawunu Kurinytjiyalakutupula yanu, mayutju Kulutiyatjalu tjananya Tjuwu tjuṯa payira iyaṉutjangka tawunu palulanguru. Puulanya pulanya nyakula tjungurringu. 3 Paluru kutjarra wangkanytjala Puulalu kuliṉu, “Ngaa kutjarrangku waarrkarringkula kaliki palyalpayi.” Puulalu pulanya watjaṉu, “Ngayuluṯarramayi kalikingka waarrkarringkula palyalpayi.” Palula kutjarra Puulanya nyinarra tjunguya waarrkarringkula kaliki palyalpayi. 4 Tawunu palula Tjuwuku tjaatjingka Puulalu tjarrparra tjananya nintilpayi Yiitjukuṉu wangka. Tjana kulira ngaparrtjingku tjapiṉu kutu nintintjaku. Tjarritiyi kutjupa Tjarritiyi tjaatji palula paluru tjanala nintilpayi, Tjuwu tjuṯangka, Kiriki wangkapayi tjuṯangkaṯarra.

5 Manta Matjatuniyalangurupula Tjayilitjanya Timitjiyinyaṯarra yanu Puulalakutu. Palulanguru Puulalu tjananya Tjuwu tjuṯa tjiṉṯu kutjupa kutjupangka nintiṉangi, kalikingka waarrkarringkunytjawiyangku. Kutu tjananya nintilpayi yalatji, “Yiitjunya yilta Kurayitjanya nyinangi, Katutjalu yirriṯi watjara ngalya wantirriyaṉutja.” 6 Tjuwu paluru tjana Puulaku wangka kulilwiyangkuya wantirra palunya panypurangangi. Palulanguru Puulalu tjananya wantikitjangku tjaaṯa walytja yarrara yulpurru patara tjanala, watjaṉu, “Kala, ngayulu nyurrangarrinya wantikatinyi. Tjuwuwiya tjuṯangka ngayulu yankula tjananya Katutjaku wangka nintinmalpa. Ngayulu nyurrangarrinya nintintjala, nyurrangarri tjukarurrungku kulinmara. Kuliranyurra wantingutjangka, Katutjalu nyurranya ngula kuutawutjungka payira iyalku. Wiyaṉi paluru kuru watjalku, ngayulu nyurrangarrinya Yiitjuku wangka tjukarurru nintiṉutjangka.” 7 Puulalu tjananya wantikatirra wati Tayitutjaku waaḻakutu yankula nyinangi. Wati paluru Tjuwuwiya nyinangi, Katutjaku walytja. Palumpa waaḻa Tjuwuku tjaatjingka yila ngarangi. 8 Wati Kiritjipanya Tjuwuku tjaatjiku mayutju nyinangi. Paluru Puulaku wangka kulira Yiitjuku walytjarringu, palumpa ngulytju tjuṯaṯarra. Kurinytjiyanya ngurrara kutjupa tjuṯangkuṯarraya Puulaku wangka kulira Yiitjuku walytjarringu. Paluru tjana papatatji mantjiṉu. 9-10 Palulanguru mungangka Puulalu tjukurrpa nyakunytjala, Katutjalu yalatji watjaṉu, “Nyuntu nguḻuwiyangku kutu tjanala nintinma!, wantiwiyangku. Ngayuluṉanta kutu yaṉṯayaṉṯanmalpa, kutjupangkunta pungkutjipingka. Yaṉangu ngaa ngurrara tjuṯa tjananya kutu nintinma!, tjana ngayuku wangka kulira ngayuku walytjarrinytjaku. Tjuṯalingkuya ngayuku walytja nyinaku.” 11 Palunyatjanu Puulalu tjananya kutu nintiṉingi, Katutjaku wangka, yiiya kutjarra nguwanpa.

12 Palulanguru mayutju Ruumanya ngurrarangku watjaṉu Kaliyunya mayutju tjanampa manta Kiritjinya ngurrara tjuṯaku, tawunu Kurinytjiyanya ngurrara tjuṯakuṯarra nyinanytjaku. Paluru mayutju nyinanytjala Tjuwu tjuṯangku Puulanya witira katingu kuutawutjukutu. Tjana kuutawutjuku mayutjungka tjakultjunu yalatji, 13 “Wati ngaangku tjananya yaṉangu tjuṯa nintilpayi, Muutjaku luwuya wantirra wangka kutjupawana Katutjanya waḻkuntjaku.” 14-15 Puulanya wangkakitja ngaranytjala mayutju Kaliyulu tjananya Tjuwu tjuṯangka yalatji watjaṉu, “Tjuwu tjuṯangkuṉiya kulila! Nyurrangarrimpa wangka ngayulu wiya kulira watjalku. Tjinguru palangku nganampa luwu kilytjuntanutjangka, ngayulu nyurrangarrimpa wangka kulinmara. Palangku wiya nganampa luwu kilytjuntanu, wiya. Kala, nyurrangarri Puulanya katirra ngurra kutjupangka ngaratjunkula watjala! Tjinguru paluru Muutjaku luwu kilytjuntanu, tjinguru paluru wangka kutjupawana yaṉangu tjuṯa nintilpayi, ngayulu ngurrpa. Nyurrangarri kulira watjantjaku, ngayulu wiya.” 16 Kuutawutjuku mayutjulu tjananya watjara wantirriyaṉu. 17 Palulanguruya paluru tjana yankula Tjatjiyanytjanya witira katingu, kuutawutjukutu. Tjatjiyanytjanya Tjuwuku tjaatjiku mayutju. Kuutawutjungka yurilpa palunya katirra rungkaṉingi watiyatjarrangku. Mayutju Kaliyulu yunngu nyinarra kulira wantingu, wiya tjananya marrkuṉupaka rungkalwiyangku wantinytjaku, wantingu tjananya rungkantjakuya.

18 Palulanguru Puulanya tawunu Kurinytjiyala kutu nyinangi, Yiitjuku walytja tjuṯawana. Nyinarra paluru tjananya wantirra yanu, tawunu Kinkiriyalakutu. Tawunu palulakutuya Piritjilanya Yakuwilanyaṯarra tjungu yanu manta Tjiriyalakutu yankukitja. Yankula tawunu Kinkiriyala Puulalu kulirinangi, “Yurrunpa ngayulu Katutjanya watjaṉu tjukarurru nyinakitjangku. Yalatji watjara ngayulu mangkaṉatju muṯura kata puliinalpi nyinaku yaṉangu tjuṯangku ngayunya nyakula yalatji kulintjaku, ‘Puulalu Katutjanya watjara mangkanku muṯuṉu.’ ” Yalatji kulira Puulalu mangkanku muṯuṉu. 19 Puutangkaya kaḻpakatirra tawunu Yipitjalakutu yankula tjarukatingu. Puulalu pulanya Yakuwilanya Piritjilanya wantirra Tjuwuku tjaatjingka tjarrpangu. Tjaatji palula Puulalu tjananya yaṉangu tjuṯa nintiṉingi wangka Yiitjunyatjarra. 20 Kutu tjanala wangkarra ngurra kutjupakutu yankukitjangku watjaṉu. Paluru tjana Puulanya marrkuṉu, “Ngurra kutjupakutu yankunytjawiya, nyuntu nganaṉalawana rawangku nyinarra nintila!” 21 Paluru wiya watjaṉu. Puutangka kaḻpakatirra yankukitjangku paluru tjananya piyuku watjaṉu, “Tjinguru Katutjaluṉi ngula nintintjala ngayulu ngalyanku. Kala, ngayulu yananyi.” Puutangka kaḻparra Puulanya tawunu Tjiitjarriyalakutu yanu. 22 Tawunu Tjiitjarriyala puutangka tjarukatirra tjina yanu tawunu Tjarutjalumalakutu. Yiitjuku walytja tjuṯangka nyinarra, paluru wayinta yanu, tawunu Yantiyukalakutu. 23 Kutu ngurra palula nyinarra paluru yanu manta Kilitjiyalawana, manta Puritjiyalawanaṯarra. Tawunu tjuṯawana yankula Puulalu Yiitjuku walytja tjuṯa tjananya nintirinangi. Paluru tjana palumpa wangka kulira raparringu Yiitjuku kutu tjukarurru nyinakitja.

24 Palulanguru wati kutju, yini Yapulutjanya tawunu Yipitjalakutu yankula nyinangu. Paluru Tjuwu nyinangu, tawunu Yalikitjantiriyanya ngurrara. Katutjaku wangka paluru yaṉangu tjuṯangka nintilpayi. Paluru Katutjaku wangkaku nintilingku nyinangi. 25 Yirriṯi Tjaanalu tjananya yaṉangu tjuṯa nintira kapingka tjarrpatjunkula papatatjimilalpayi. Tjaanakuṉu wangkaku Yapulutjanya ninti nyinangi. Yaṉangu Yiitjuku walytjarrinytjala kapingka tjarrpatjunkula papatatjimilantjaku, paluru ngurrpa nyinangu. Yurrunpa kutjupangku palunya wangka Yiitjunyatjarra aapa nintiṉu. Paluru wangka palunya Yiitjunyatjarra yunypangku nintilpayi. Paluru Yiitjuku wangka aapaku kutju ninti nyinangi. 26 Paluru tjananya nguḻuwiyangku nintiṉangi, Tjuwuku tjaatjingka. Piritjilalu Yakuwilalupula Yapulutjaku wangka kulira yunyparringu. Paluru kutjarra Yapulutjanya katingu ngurra walytjakutu, piyuku palula wangka kutjupa Yiitjunyatjarra nintilkitjangku. Yalatji paluru kutjarra Yapulutjanya wangka Yiitjunyatjarra nintiṉingi.

27 Yapulutjanya Yipitjala nyinarra manta Kiritjilakutu yankukitja kulira wangkangu. Yiitjuku walytja tjuṯangku palumpa wangka kulira yunypangku watjaṉu, “Yuwa, palya nyuntu yankunytjaku manta palulakutu. Piipalatju wakara nyuntunya yungku katirra tjananya nintintjaku, tjana riitarringkula nyuntupa yunyparringkunytjaku.” Yalatjiya piipa wakara tjunu Yipitjanya ngurrara tjuṯangku, Yiitjuku walytja tjuṯangku riitarrinytjaku, waṉma ngurrara tjuṯangku. Tjana yalatji wakaraya Yapulutjaku piipa palunya yungkula wantirriyaṉu. Kiritjinya ngurrara tjuṯangku Yapulutjanya nyakula piipa riitarringkula yunyparringu. Yiitjuku walytja tjuṯaya tjungurrinytjala paluru tjananya nintilpayi. Paluru tjana raparringkula Yiitjuku tjukarurru nyinangi. Paluru tjana yurrunpa Yiitjuku walytjarringu Katutjaku kurrunpangku tjananya nintintjala. 28 Yapulutjalu tjananya Tjuwu tjuṯa nguḻuwiyangku nintilpayi wangka Yiitjunyatjarra. Tjana Muutjaku wangka kulira Yapulutjanya ngaparrtji wangkapayi, yaṉangu kutjupa tjuṯa ngaranytjala. Paluru tjananya alatji nintilpayi, “Yiitjunya yilta mayutju Kurayitjanya nyinanyi, Katutjalu watjara wantirriyaṉutja. Yalatji Katutjaku wangka ngaranyi.”