1 Mayutju Yakiripalu Puulanya watjaṉu, “Kala palya, nyuntulpilanyatju tjakultjurra!” Puulalu marangku yuwa wangkangu, watjalkitjangku. 2 “Mayutju Yakiripa. Ngayulu yunyparringanyi nyuntu nyinanyingka, ngayuku wangka kulilkitja. Tjuwuku mayutju tjuṯangkuṉiya kuru watjaṉutjangka, ngayuluṉanta tjakultjunanyi. 3 Yuwa, ngayulu yunyparringanyi nyuntu Tjuwu tjuṯaku luwuku ninti nyinanyi. Paluru tjana wangkarra punganyingka nyuntu nintingku kulilpayi. Tjapiṉiṉanta, nyuntu purinytju ngayuku wangka kulintjaku.” Puulalu piyuku watjaṉu mayutju Yakiripanya, 4 “Ngayulu pipirri wiima ngurra walytjangka nyinangu. Uḻa tiṉarringkula ngayulu Tjarutjalumalalpi nyinangu. Yalatjiku Tjuwu tjuṯaya ninti nyinanyi ngayuku. 5 Ngayuluṉa yurrunpa Paratji nyinangu. Paluru tjana kuliṉi Paratji tjuṯa Muutjaku luwuwana tjukarurru nyinapayi. Ngayuluṯarra yalatji tjukarurru nyinapayi. Wangka palunya ngayulu tjukarurru tjakultjunu. Tjinguru nyuntu Tjuwu tjuṯa tjananya tjapiṉingka tjana nyuntunya tjakultjunku yalatji, ‘Yuwa, Puulanya yilta Paratji nyinapayi.’ 6-7 Kuwarriṉa kuutawutjungka ngaranyi wangka yalatjiṉa kulira. Yaṉangu tjuṯa mirringuru kana pakalku. Yalatji Katutjalu nganampatju walytja yirriṯitja tjuṯangka watjaṉu. Yitjurilaku katja tuwalpala yurrunpa nyinangu. Palumpa tjanampa walytja ngaṉṯitja tjuṯangku kuwarri wangka panyapa kuliṉi, aṉangu tjuṯa ngula mirringuru kanarringkula pakalku. Yalatji tjana kulira Katutjanya kututja waḻkulpayi. Wangka palunya ngayuluṯarra kuliṉi. Nyaakuṉiya Tjuwu kutjupa tjuṯangku ngayunya kuru watjalpayi?, wangka panyapa ngayulu kulintjala. Tjana kuru watjantjawiyangku ngayunya wantimara.” Puulalu piyuku tjananya watjaṉu, 8 “Yaalytjinyurra kuliṉi?, ‘Katutjalu wiya yaṉangu tjuṯa mirringuru pakaltjingalku.’ Tjukarurrungkunyurra kulinmara.

9 “Ngayulu yurrunpa nyinarra yalatji kulilpayi, ‘Yiitjunya Natjaritjanya ngurrara ngunytjinytju nyinapayi. Palya ngayulu palumpa walytja tjuṯa tjiilangka tjarrpatjunkupayi.’ 10 Yalatji kulira ngayulu tawunu Tjarutjalumala Yiitjuku walytja tjuṯa witira tjiilangka tjarrpatjunkupayi, tuḻkuku mayutju tiṉa tjuṯangkuṉi watjantjala. Yiitjuku walytja tjuṯa kuutawutjungka ngaranyingka tjungungkulatju watjalpayi, tjananya wakara iluntankunytjaku. 11 Yiitjuku walytja tjuṯa tjana witira katirra Tjuwuku tjaatji tjuṯangka ngaratjunanyingka ngayuluṯarra watjalpayi tjananya wiipatjarrangku pungkunytjaku. Pungkunytjala ngayulu tjananya watjalpayi yalatji, ‘Yiitjunya mungutja, wiya Katutjalu yirriṯi palunya watjaṉu wantirriyalkitjangku, wiya. Yiitjuku wangkaya wanti!, palunya wiya waḻkuntjaku.’ Yiitjuku walytja tjuṯaku ngayulu puntura yunytjuwiya nyinapayi. Ngayulu tjananya witira tjiilangka tjarrpatjunkupayi. Waṉmaṉa yankula tjananya tawunu kutjupa tjuṯangka witira tjiilakutu katipayi.

12 “Mayutju Yakiripa, kulilaṉi! Yiitjuku walytja tjuṯa witilkitja ngayulu tawunu Tamatjakatjalakutu yanu, tuḻkuku mayutju tiṉa tjuṯangkuṉiya watjaṉutjangka. 13 Yankulaṉa kaḻaḻangka tawunu palula tjarrpakitjangkuṉa nyangu katunguru tili tiṉa ngaranyingka. Tili paluru tjiṉṯu nguwanpa ngarangu nganaṉala. 14 Mantakutulatju punkara ngarringu. Kuliṉuṉa Yaramayiki wangkatjarrangkuṉi watjantjala yalatji, ‘Tjuula! Tjuula! Nyaangurutjun pikarringkupayi, ngayuku walytja tjuṯakuṯarra. Nyuntu wiyawanangku ngayunya panypurangkupayi, ngayuku walytja tjuṯaṯarra.’ 15 Ngayulu tjapiṉu, ‘Nyuntumpan mayutju ngananya wangkanyi?’ Mayutjungkuṉi watjaṉu, ‘Ngayulu Yiitjunya nyinanyi. Nyuntu ngayuku pikarringkupayi. 16 Kala, pakara ngara! Ngayuluṉanta yutitjarringu yalatji watjalkitja. Ngayulu kuliṉi nyuntu ngayuku waarrkana nyinanytjaku. Nyuntu yankula yaṉangu tjuṯangka tjanala tjakultjunkunytjaku, kuwarriṉin kuliṉutjangku. Ngulaṉanta wangka kutjupa nintilku. Wangka palunyaṯarra nyuntu tjananya tjakultjurinkunytjaku.’ 17 Mayutju paluruṉi piyuku watjaṉu yalatji, ‘Ngayuluṉanta wantirriyaṉi Tjuwu tjuṯakutu, Tjuwuwiya tjuṯakutuṯarra. Ngayuluṉanta yaṉṯayaṉṯanmalpa, paluru tjanantaya pungkutjipingka. 18 Panyapa tjuṯakutu nyuntu yankula ngayuku wangka tjanala nintintjaku, tjana kulira ngayuku walytjarrinytjaku, mamuku walytjaya kutu nyinapayingka. Tjana yalatji ngayuku walytjarrinytjala Katutjalu tjanampa kuya waṉiku. Tjana Katutjaku tjukarurru nyinapayi tjuṯawanalpi nyinaku.’

19 “Mayutju Yakiripa, kulilaṉi! Wangka palunya katunguru wangkanytjala kulira ngayulu ilta palumpa wangka yaṉangu tjuṯangka tjakultjunu. 20 Yurrunpa ngayulu Tamatjakatjanya ngurrara tjuṯa nintiṉu. Palulanguru ngayulu tjananya Tjarutjalumanya ngurrara tjuṯa, manta Tjuutiyalawana nyinanytja tjuṯaṯarra nintiṉu. Tjuwuwiya tjuṯaku ngurrawanaṯarra ngayulu tjananya nintirinangi. Palunya tjananya ngayulu nintilpayi yalatji, ‘Kuya palyantjawiya nyurrangarri Katutjaku tjukarurru nyinanytjaku. Yalatji tjukarurru nyinarra kutu Katutjaku tjukarurru nyinanytjaku.’

21 “Ngayulu wangka panyapa ngurra tjuṯawana nintiṉingitjangka, Tjuwu tjuṯangkuṉiya tjaatji tiṉangka Tjarutjalumala witiṉu, mirri pungkukitjangku. 22 Yuwa, Katutjaluṉi kututja yaṉṯayaṉṯalpayi, ngayulu wangka Yiitjunyatjarra tjakultjurinkunytjala. Yaṉangu maralpa tjuṯangka, yaṉangu manitjarra tjuṯangkaṯarra ngayulu wangka palunya tjakultjunkupayi. Muutjalu yurrunpa wakaṉutja, Katutjaku wangka watjalpayi tjuṯangkuya yurrunpa wakaṉutjaṯarra ngayulu tjanala tjakultjunkupayi. Paluru tjana Katutjaku wangka watjalpayi tjuṯangku yalatji watjaṉu. 23 ‘Mayutju Kurayitjanyaya pika mikinpa wakara iluntanku. Palulanguru Katutjalu palunya mirringuru kanara pakaltjingalku. Palunyatjanu ngula yaṉangu kutjupa tjuṯalpi tjananya mirringuru kanara pakaltjingalku. Yalatji Katutjalu Kurayitjanya pakaltjingantjala palumpa walytja tjuṯangku palumpa wangka ngurra tjuṯawana tjakultjurinkuku, Tjuwu tjuṯangka, Tjuwuwiya tjuṯangkaṯarra.’ ”

24 Puulanya wangka panyapa wangkanyingka mayutju Pitjatjalu rapangku watjaṉu, “Puula. Nyuntu pina rama. Piipa nyuntu kutu riitarringkula ramarringu.”

25 Kanya Puulalu watjaṉu, “Mayutju Pitjatja, ngayulu wiya rama nyinanyi. Ngayulu wangka tjukarurru watjaṉingi, ilta. 26 Wangka palunya ngayulu tjakultjunutjangka yaṉangu tjuṯaya ninti nyinanyi, mayutju Yakiripanyaṯarra. Paluru nintingku kuliṉingi wangka panyapa. Paluru kulintjaku, ngayulu wangka panyapa tjukarurru yutitja watjaṉingi, wiyaṉa wangka tjayiṯwayi watjaṉingi. 27 Mayutju Yakiripa kulilatju! Katutjaku wangka watjalpayi tjuṯangku wakaṉutja yilta ngarrinyi. Nyuntu wangka palunya yiltampa kuliṉi? Ngayulu nyuntupa ninti, nyuntu wangka palunya yiltangku kuliṉi.” 28 Kanya Mayutju Yakiripalu watjaṉu, “Wiya. Nyuntu wiyawanangku kuliṉi. Nyuntupa wangka kuwarri kutjuṉa kulira wiyaṉa Yiitjuku walytjarringu.” 29 Puulalu watjaṉu, “Ngayulu yunytjurringanyi nyuntu, ngaangka nyinapayi tjuṯaṯarra, Yiitjuku walytja nyinanytjaku ngayunya nguwanpa. Tjaampala Yiitjukuṉu wangka rawawiyangku kulira palumpa walytjarripayi, tjaampala rawangku kulira palumpa walytjarripayi. Ngayulu tjiinatjarra nyinanyi kuwarri. Ngayulu yunytjurringanyi nyurrangarri ngayunya nguwanpa palumpa walytja nyinanytjaku, tjiinawiya.”

30 Palulanguruya mayutju Yakiripanya kungka Punitjanya pakara tjungurringu mayutju Pitjatjala, mayutju kutjupa tjuṯangkaṯarra. 31 Tjana ngarala wangkangu, “Wati paluru wiya tjiilangka kutu nyinanytjaku, wiya yiluntankunytjaku. Paluru mungutja, kuya palyantjawiya.” 32 Mayutju Yakiripalu mayutju Pitjatjanya watjaṉu, “Tjinguru Puulalu mayutju Yukatjatjakutu yankukitjangku tjapintjawiyangka, ngali watjanmara pakaltjingantjaku.”