1 Kapiwana nganaṉa mantakutu yankula yilarringkula tjinalpi yanangi. Yankulalatju purrkarringkula nyinangu. Ngurra palunya ngurrara tjuṯa nganaṉala ngalya yankula tjungurringu. Yalatji tjana watjaṉu, “Manta ngaatjanya yini Multanya.” 2 Paluru tjana nyakulalampatju walytjarringu, nyakula wantinytjawiyangku. Warringkulanyatju pungkunytjala, paluru tjana nganampa waru kutjaṉu yaḻṯururringkula, nganaṉa yuumpirrirra palyarrinytjaku. 3 Puulalu waru tjuṯa yurrara katirra kutjaṉu, waru wiyarrinytjala. Watiyangka yunngu piḻkaṯi ngarringi. Watiyanguru pakara Puulanya patjaṉu. Mara patjara nganytjaralpi waralyngarangi. 4 Nganytjara waralyngaranytjala Multanya ngurrara tjuṯangku nyakula yalatji kuliṉangi, “Tjukurrpa nguwanpa piḻkaṯi palurulanya nintiṉi. Ngaatjanya wati kutjupa pungkupayi.” Tjana yalatji wangkarra waṉingu, “Wati ngaangku wati kutjupa pungutjangka piḻkaṯingku patjaṉu. Paluru kapinguru kanarringkula yilta mirrirriku, ilkari ngurrarangkulpi mirrintanku, paluru kuya palyaṉutjangka.” 5 Puulalu mara pirrtjitjingantjala piḻkaṯi warukutu punkaṉu. Puulanya wiya mikinpatjarra ngarangi. 6 Manta Multanya ngurrara tjuṯangkuya puṯu nyakula paṯaṉingi, “Puulanya tjinguru taḻṯurringkula punkara mirrirringku.” Paluru tjana kutu paṯara kuliṉulpi yalatji, “Palatja ilkaringuru ngalya yankula nyinanyi, mayutju tiṉa.”

7 Multanya ngurrara tjuṯaku mayutju, yini Papiliyatjanya nyinangi. Palumpa ngurra kaana, waaḻaṯarra yila ngarangi. Mayutju palurulanyatju watjaṉu palumpa waaḻakutu yankula nyinanytjaku. Paluru nganaṉanya yaṉṯayaṉṯaṉingi tjiṉṯu maṉkurrpa, palumpa ngurrangka. 8 Papiliyatjaku paapa miiṉṯa ngarringi waaḻangka yunngu. Paluru yuumpi wiḻa mikinpa ngarringi. Puulanya waaḻangka yunngu tjarrparra mara tjunkula wati miiṉṯa palula Katutjanya tjapiṉu. Yilta paluru palyarringu. 9 Paluru palyaṉutjangka tjakulpaya kulira miiṉṯa kutjupa tjuṯa tjana Puulalakutu katingu pampura palyantjaku. Yuwankarraya yilta palyarringu.

10-11 Manta Multangkalatju maanytja tjirripala nyinarra puuta kutjupangkalpilatju yankukitjangku watjaṉu. Puuta paluru ngurra palula warri tayimingka kutu ngarangi, waḻpa tiṉangku kutu rungkaṉingka. Puuta paluru yurrunpa tawunu Yalikitjantiriyalanguru yankula ngurra Multangka ngarangi. Puuta paluru yini yalatji, “Yilkari ngurrara mayutju kutjarrakuṉu.” Multanya ngurrara tjuṯangku nganampa yunyparringkula yulytja tjuṯa yungu, kaangkinytjingku. Paluru tjanalanyatju mangarri tjuṯa, kuka tjuṯaṯarra yungu, nganaṉa puutangka katirra ngalkunytjaku. Kala, puutangkalpilatju kaḻparra yanu. 12-13 Kapiwanalatju yankula tawunu Tjarakurutjala puuta ngaratjunu. Tawunu palula tjiṉṯu maṉkurrpalatju nyinarra puutangka kaḻpakatirra kutu yanangi tawunu Ritjiyamalakutu. Palulangurulatju yankula waḻpa yulparirrangurulpi wangkanyingka tawunu Putiyulilakutulpi yanu tjiṉṯu kutjarra. 14 Tawunu palulalatju tjarukatirra tjanala tjungurringu Yiitjuku walytja tjuṯangka. Paluru tjana nganaṉanya tjapiṉu tjungu nyinanytjaku. Wiika kutjulatju nyinarra tjina yanu tawunu Ruumalakutu.

15 Yiitjuku walytja Ruumanya ngurrara tjuṯangku tjakulpa kuliṉu nganaṉa Ruumalakutu yananyingka. Kulira tjana tawunu Yapiyatjala ngalyankula nganaṉala tjungurringu. Yiitjuku walytja kutjupa tjuṯaṯarra ngalya yankulaya nganaṉala tjungurringu tawunu kutjupangka. Tawunu paluru yini yalatji, “Waaḻa maṉkurrpanya.” Puulalu tjananya nyakula yunyparringu. Paluru Katutjanya waḻkuṉu yalatji, “Palya nyuntu tjananya wantirriyaṉu tjungurringkunytjaku.”

16 Yankulalatju tawunu Ruumalalpi tjarrpangu. Puulanya tjiilangka wiya nyinangi, waaḻa kutjupangka nyinangi, tjuulytji kutjungku palunya kanyiṉangi. 17 Puulalu tjiṉṯu maṉkurrpa nyinarra waarrkana wantirriyaṉu Tjuwu tjuṯaku mayutju tjuṯa tjananya yaḻṯinytjaku. Tjana Puulaku waaḻangka tjungurringanyingka Puulalu tjananya yalatji watjaṉu, “Walytja tjuṯa, ngayuku wangka kulila! Ngayulu mungutja kuya palyantjawiya. Nganampa walytja yirriṯitja tjuṯaku luwu ngayulu wiya kilytjuntankupayi. Wiyaṉa Tjuwu kutjupa tjuṯa panypurangkupayi, wiya. Tjarutjalumala tjuulytji tjuṯangku ngayunya witira katirra mayutju Ruumanya ngurrarangka ngaratjunu kuutawutjungka. 18 Mayutju Ruumanya ngurrara tjuṯangkuṉiya tjapira kuliṉu, ‘Puulalu wiya nganampa luwu kilytjuntanu, paluru mungutja. Nganaṉa palunya pakaltjingantjaku, wiya nganaṉa watjalku palunya pungkula yiluntankunytjaku.’ 19 Tjuwu tjuṯaku mayutju tjuṯangku watjaṉu wiya ngayunya tjiilanguru pakaltjingantjaku. Palulanguru ngayuluṉa mayutju Ruumanya ngurrarangka tjapiṉu mayutju Yukatjatjalulpi ngayuku wangka kulintjaku, tawunu Ruumala. Kuutawutjungka kuwarri ngayulu ngarala wiyaṉa Tjuwu Tjarutjalumanya ngurrara tjuṯa panypurangkuku. Ngayulu mayutju Yukatjatjanya wangkarra tjapilku ngayunya pakaltjingantjaku. 20 Nganaṉa Yitjurilaku walytja ngaṉṯitja tjuṯa paṯara nyinapayi mayutju Kurayitjaku. Katutjalu yirriṯi palunya watjaṉu wantirriyalkitjangku. Wangka palunya ngayulu kulira nyinangutjangka, tjiinangkaṉiya tayimapiṉu. Tjiinatjarraṉa kutu nyinanyi. Mayutju Kurayitjaku nganaṉa paṯara nyinapayi. Wangka yalatjiwana ngayulu nyurrangarrinya tjakultjunkukitjangku watjaṉu, nyurrangarri ngalyankula ngayula tjungurrinytjaku.”

21 Mayutju paluru tjana watjaṉu, “Tjuutiyanya ngurrara tjuṯangku wiya piipa yini nyuntunyatjarra wakara ngalya wantirriyaṉu. Palunya ngurrara tjuṯangku wiya ngalyankula nganaṉanya tjakultjunu wangka nyuntunyatjarra. Wiya paluru tjana ngalyankula nyuntunya panypurangkupayi, wiya. 22 Tjakulpalatju kuliṉu yalatji, ‘Ngurra tjuṯawanakunyu Yiitjuku walytja tjuṯa tjungurringanyingka yaṉangu tjuṯangku tjananya panypurangkula yunytjuwiya nyinapayi.’ Nganaṉatju yunytjurringanyi nyuntupa wangka Yiitjunyatjarra kulintjaku. Yaalytjingara nganaṉa piyuku nyuntulawana tjungurriku?, nyuntupa wangka palya kulilkitja.”

23 Puulalu paluru tjanaṯarra watjaṉu tjiṉṯu kutjupangka piyuku tjungurringkunytjaku. Tjiṉṯu palula paluru tjana Puulaku waaḻangka tjungurringu, wangka palumpa kulilkitja. Aaḻi tjananya Puulalu nyinarra nintira mungarrtjirringu. Nintiṉu tjananya yalatji Katutjalu panya yaṉangu tjuṯa ngulytjura yaṉṯayaṉṯalpayi. Piyuku tjananya tjakultjunu, “Yiitjunya yilta Kurayitjanya nyinanyi, Katutjalu yirriṯi watjara wantirriyaṉutja. Muutjalu Katutjaku wangka watjalpayi tjuṯangkuṯarra watjaṉu Yiitjunya ngalyankunytjaku.” Yalatji tjananya rawangku Puulalu nintiṉangi wangka Yiitjunyatjarra, tjana kulira palumpa walytjarrinytjaku. 24 Tjuwu tjuṯaku mayutju tjaampalangkuya Puulaku wangka kuliṉu, “Yilta, Yiitjunya Katutjalu yirriṯi watjara wantirriyaṉutja nyinanyi.” Kutjupa tjuṯangku wiya yalatji kulilpayi. 25 Yalatjiya wangkarra waṉirra tjana yankukitja ngarangi. Puulalu tjananya yara yalatji watjaṉu, “Katutjaku kurrunpangku wati Yaatjayanya wangka tjukarurru watjaṉu nganampa walytja yurruntitja tjuṯangka yankula tjakultjunkunytjaku. Yaatjayalu tjananya yalatji tjakultjunu, 26 ‘Katutjaku kurrunpangkuṉi watjaṉu. Yaṉangu tjuṯangka yankula yalatji tjananya watjala! Yilta nyurrangarri ngayuku wangka puṯu kulilku.

27 Ngayuku wangkanyurra kulira wantipayi, tjukarurrungku wiyanyurra kulilpayi. Yiltanyurra pina pati nyinanyi. Ngayuku wangka kuliranyurra palya nyinamara. Yalatjinyurra kulintjala ngayulu nyurrangarrimpa kuya waṉimara.’ ”

28-29 Puulalu tjananya piyuku watjaṉu, “Yaatjayaku wangka palunya nguwanpa Tjuwu tjaampalangkunyurra ngayuku wangka palunya Kurayitjanyatjarra kulira wantinyi. Tjuwuwiya tjuṯangkuya wangka palunya yiltalingku kulilku. Tjana kulintjala Katutjalu tjanampa kuya waṉiku. Katutjanya ilta yunytjurringanyi tjanampa kuya waṉinytjaku.”

30-31 Puulanya tawunu Ruumala kutu nyinangi, yiiya kutjarra. Paluru waaḻa riinta payimilara nyinangi. Ngurra palulakutu yaṉangu tjuṯa yankupayi palumpa wangka kulintjaku. Tjana ngalya yankunytjala paluru tjananya yaṉṯayaṉṯara yungkupayi, mangarri tiyi. Palunya tjananya Puulalu nintilpayi yalatji, “Katutjalu yaṉangu tjuṯa ngulytjura yaṉṯayaṉṯalpayi.” Wangka Yiitjunyatjarra paluru tjanala kutu nintilpayi nguḻuwiyangku. Kamanta ngurrara tjuṯangku palunya payilwiyangku wantipayi, wangka Yiitjunyatjarra paluru nintintjala.