1 Nyurrangarri Katutjaku walytja tjuṯa nyinanyi. Katutjanya nyurrangarrimpa kalypa nyinanyi. Nyurrangarri yaṉangu kutjupa tjuṯaku yalatji kalypa nyinanytjaku, Katutjanya nguwanpa. 2 Yaṉangu kutjupa tjuṯaku nyurrangarri yunytju nyinanytjaku. Yalatji Yiitju Kurayitjanyalampa yunytju nyinarra watiyangka waralyngarala tjawirrilyi tjiipi nguwanpa mirrirringu, nganaṉa katirra Katutjaku tjunutja nguwanpa. Katutjalu tjawirrilyi palunya yini Yiitjunya nyakula yunyparringkula nganampa kuya waṉingu.

3 Katutjaku walytja tjuṯanyurra nyinanyi. Katutjanya nguwanpanyurra tjukarurru nyinanytjaku. Wiyanyurra miiṯa walytjawiyangka kuya palyantjaku. Wiya nyurrangarri yalatji kuya palyalkitjangku kulintjaku. Mani yulytja tiṉa kanyilkitjangku wiyanyurra kulira yunytjurringkula nyinanytjaku. Mangarri kuka tiṉa wiyanyurra yungkuwiyangku ngalkuntjaku yaṉangu kutjupa tjuṯanyurra nyakula yungkunytjaku. 4 Yaṉangu kutjupa warrkinytjawiyanyurra nyinanytjaku. Wiya nyurrangarri tjungurringkula kutu wangkanytjaku miiṯamiiṯangka ngarrikitja. Tjungurringkula Katutjaku wangkawananyurra tjukarurru wangkarra Katutjanya waḻkuntjaku. 5 Wangka ngaatjanyaya kulila! Wangka palulawana kuya palyalpayi tjuṯa wiya Katutjaku walytja tjuṯaya nyinanyi, wiya tjana Yiitju Kurayitjaku walytja nyinanyi. Paluru tjana wiya Katutjanya yunyparringkula waḻkulpayi, Katutjaku wangka tjana wantirra kuya palyalkitja yunyparringkupayi. Tjana maniku, mangarriku miiṯa kutjupaku yunyparringkula nyinapayi, Katutjaku wiya.

6 Paluru tjana tjinguru watjalku yalatji, “Nganaṉa Yiitjuku walytja tjuṯa palya tjungurringkula wangkanytjaku miiṯatjarra ngarrikitja. Palya nganaṉa miiṯa kutjupa kutjupa kanyintjaku. Palya nganaṉa mangarri kuka tiṉaṯarra yungkuwiyangku ngalkunytjaku, kutjupa tjuṯa paḻtjalwiyangku.” Wangka palunya tjana yalatji wiyawanangku kuliṉi. Yalatji tjana kuya palyantjala Katutjalu tjananya ngula kuutamilara payilku. 7 Palula tjanalawana wiya nyurrangarri tjungurrinytjaku, wantiya!

8 Irriṯi nyurrangarri Katutjaku ngurrpa nyinangu kuya palyalpayi tjuṯa. Kuwarri nyurrangarri Yiitju Kurayitjaku walytjarringkulalpi Katutjaku nintilpi nyinanyi. Yiitju paluru ilta nganampa mayutju nyinanyi. Katutjaku nintirringkula nyurrangarri palumpa tjukarurru nyinanytjaku. 9 Yalatji tjukarurru nyinanytjaku. Yaṉangu kutjupa tjuṯaku palya nyinanytjaku, pikarrinytjawiya. Yaṉangu kutjupaku palyalkitjangku tjukarurru watjara palyantjaku, wantinytjawiyangku. 10 Mayutju Yiitjuku nyurrangarri tjukarurru nyinanytjaku ngunytjinytjunkunytjawiya. 11 Yiitju Kurayitjaku ngurrpa tjuṯangkuya tjaalpangku kuya palyalpayi, kutjupa tjuṯangku nyakupayingka. Yalatji wiyanyurra tjanala tjungurringkula kuya palyantjaku, wantinytjaku. Tjana yalatji kuya palyantjala, marrkula tjananya!, wantinytjakuya, tjukarurrulpiya nyinanytjaku. 12 Paluru tjana tjaalpangku kuya puntu palyalpayi. Yaṉangu kutjupangku tjakulpa kulira yilta puntura kuṉṯarringkula yalatji kulilpayi, “Kuya puntu paluru palyaṉi.” 13-14 Nganaṉa Yiitju Kurayitjakuṉu wangkaku nintirringkula nganaṉa yalatji kuliṉi, “Paluru tjana tjaalpangku kuya puntu palyalpayi.” Yalatji Katutjaku wangka yirriṯi wakara tjunutja ngarrinyi.

15-17 Walytja tjuṯa, kulilaṉiya! Yiitju Kurayitjaku wangka nintirringkula nyurrangarri palumpa tjukarurru nyinanytjaku, wiya Katutjaku ngurrpa tjuṯa nguwanpa nyinanytjaku. Kuwarri ilta kuya palyara nyinapayi tjuṯa nyinanyi. Tjanala tjungurrinytjawiya nyurrangarri Yiitju Kurayitjanya tjapila yalatji!, “Nyuntupa waarrka nyaa nguwanpaṉa ngayulu palyalku? Nintilaṉi!, ngayulu waarrka palunya tjukarurru nyuntupa palyantjaku.” Yalatjiku nintirringkula nyurrangarri palumpa waarrka palyantjaku. 18 Waama tjikira turaangkarrinytjawiyaya nyinama! Kutu turaangkarringkula nyinarra yaṉangu tiltirrmankupayi. Wiyanyurra waamaku kutju kulira nyinanytjaku, Katutjaku kurrunpaku kutjunyurra tjukarurru kulira nyinanytjaku. Kurrunpa paluru nyurranya nintintjala yalatjinyurra palyara tjukarurru nyinanytjaku. 19 Nyurrangarri tjungurringkula Katutjaku tuḻkungka warrantjaku Katutjanya waḻkulkitjangku. Tuḻku kuwarritja tjuṯa anta irriṯitja tjuṯaṯarranyurra warrantjaku, tuḻku mayutju Tapitalu wakaṉutja tjuṯaṯarra palyanyurra warrantjaku. 20 Yiitju Kurayitjanya nganampa mayutju nyinanyingka nganaṉa kuṉṯarrinytjawiyangku kutu paapa Katutjanya waḻkuntjaku yalatji, “Nyuntu nganaṉanyatju yaṉṯayaṉṯara yuwankarra yungkupayi. Nganaṉatju nyuntunya waḻkuṉi.”

21 Yiitju Kurayitjaku walytja kutjarra nyupali nyinanyi miiṯararra. Palya nyupali tjungu nyinanytjaku pikarrinytjawiya. Kungkangku watjantjala watingku kulira palyantjaku. Watingku watjantjala kungkangku kulira palyantjaku. 22 Kungka miiṯatjarra tjuṯangkunyurra yalatji kulintjaku. Mayutju Kurayitjakunyurra tjukarurru nyinanyi, palumpa wangka kulira. Palunya nguwanpa nyuntupa miiṯaku wangka kulira tjukarurru nyinanytjaku. 23 Kungka miiṯatjarra tjuṯangkunyurra yalatji piyuku kulintjaku. Mayutju Kurayitjalu nganaṉanya palumpa walytja tjuṯa yaṉṯayaṉṯaṉi. Palunya nguwanpa wati miiṯatjarrangku mayutjungku miiṯa walytja yaṉṯayaṉṯantjaku. Yiitju Kurayitjanya yaṉangu tjuṯangka munkarralingku mayutju tiṉa nyinanyi paluru nganaṉanya ngulytjura kanyinmalpa palumpa ngurrangka. 24 Wangka palunya nguwanpa kungka miiṯatjarra tjuṯangku miiṯa walytjaku wangka kulira nyinanytjaku, nganaṉa mayutju Yiitjuku wangka kulira nyinapayi nguwanpa. 25 Wati miiṯatjarra tjuṯangku wangka ngaatjanya kulintjaku. Yiitju Kurayitjalu nganaṉanya palumpa walytja tjuṯa kutu yaṉṯayaṉṯalkitja yunytju nyinarra mirrirringu. Yalatji nguwanpa nyurrangarri miiṯa walytja kutu yaṉṯayaṉṯalkitja yunytju nyinanytjaku. 26 Paluru watjaṉu palumpa walytja tjuṯa papatatjimilantjaku wangka yalatji watjara, “Ngayuluṉanta papatatjimilaṉi. Mayutju nyuntupa nyinanyi yini yalatji, paapa Katutjanya, palumpa katja, palumpa kurrunpaṯarra.” Paluru yalatji watjaṉu tjana papatatji mantjira Katutjaku walytja tjuṯalpiya nyinanytjaku. 27 Yiitju Kurayitjalu panyapa watjara yalatji kuliṉu, “Ngayuku walytja tjuṯaya palya nyinaku, tjukarurru kutu.”

28-30 Wati miiṯatjarra tjuṯangku wangka ngaatjanya kulintjaku. Nganaṉa wiya walytjangkulanku pungkupayi yayinatjarrangkupaka marangku, nganaṉa walytjangku yaṉṯayaṉṯalkitjangku kulilpayi yalatji, “Ngayuluṉa paḻtjatjirrangku ngalkura palya nyinaku. Warringkamarraṉa ngayulu tjaampa mantjira tjarrpaku.” Yalatji nguwanpa nganaṉa kulira walytjangku yaṉṯayaṉṯalpayi. Wangka palunya nguwanpa nganaṉa wati miiṯatjarra tjuṯangku miiṯa walytja kulira yaṉṯayaṉṯantjaku. Palunya nguwanpa Yiitju Kurayitjalu nganaṉanya palumpa walytja tjuṯa kulira yaṉṯayaṉṯaṉi. 31 Katutjaku wangka yirriṯi wakara tjunutja yalatji ngarrinyi, “Watingku paapa maamaṯarra wantirra kungka yaḻṯirra miiṯararralpipula nyinanyi. Yalatjipula rawa nyinarra walytja yilatja nguwanpa nyinapayi.” 32 Nganaṉa puṯu kuliṉi, “Yaalytjiyaalytji?, kungka waṉma ngurrara ngalya yankula marriṯirringkula wati palumpa walytja yilatja nguwanpangka nyinanyi? Wati paluru kungka palumpa yilta walytjarringanyi.” Yara palunya nguwanpa Yiitju Kurayitjanya yilta nganampa walytjarringu, palumpa walytja tjuṯangka. 33 Wangka palunyanyurra kulintjaku. Nganaṉa walytjangku kulira yaṉṯayaṉṯalpayi. Wangka palunya nguwanpa nganaṉa wati miiṯatjarra tjuṯangku miiṯa walytja kulira yaṉṯayaṉṯantjaku. Wangka palunya nguwanpa kungka miiṯatjarra tjuṯangku miiṯa walytja kulira yaṉṯayaṉṯantjaku.