3
Yiitjunya Muutjala wirriḻi nyinanyi
1 Walytja tjuṯa, wangka ngaatjanyaya kulila! Katutjalu nganaṉanya ngulytjuṉu palumpa kutju tjukarurru nyinanytjaku. Yiitjunyaṯarra nganaṉa kulintjaku, paluru nganampa tuḻkuku mayutju tiṉa nyinanyi, Katutjalu nyinatjunutja. Paluru Katutjanya tjapilpayi nganaṉa tjukarurru kutu nyinanytjaku. 2 Katutjalu palunya watjara wantirriyantjala paluru tjukarurrungku wangka palulawana waarrkarringkupayi. Irriṯi Muutjaluṯarra Katutjaku waarrka tjukarurrungku palyalpayi Katutjaku walytja tjuṯawana. 3 Yiitjunya yilta Muutjala wirriḻi nyinanyi mayutju maṯupurra nganampa. Paluru Katutjaku walytja tjuṯa ngulytjura yaṉṯayaṉṯalpayi. 4 Katutjanya mayutju tiṉa nyinanyi palumpa walytja uwankarraku. Paluru uwankarra palyaṉu ngangkari tiṉatjarrangku. 5 Muutjalu Katutjaku waarrka palumpa walytja tjuṯawana tjukarurrungku palyalpayi waarrkanangku. Paluru tjananya Katutjakuṉu wangka tjakultjunkupayi yalatji, “Katutjalu ngula nyurrangarrimpa walytja ngaṉṯitja tjuṯangka wangka kutjupa tjuṯa nintilku.” 6 Yuwa, Yiitju Kurayitjanya Katutjaku katja nyinanyi. Paluru Katutjaku walytja tjuṯa, nganaṉanyaṯarra yaṉṯayaṉṯara kanyiṉi. Nganaṉanya paluru kutu yaṉṯayaṉṯanmalpa nganaṉa rapangku palumpa waarrka kutu palyantjala.
Katutjaku walytja tjuṯa ngurra palyangka nyinamalpa
7 Nyurrangarri palumpa wangka kulira palumpa waarrka palyantjaku, Katutjaku kurrunpangku watjaṉu yalatji,
8 “Katutjaku wangka kuwarri kulira nyurrangarri tjukarurru nyinanytjaku. Nyurrangarrimpa walytja yurruntitja tjuṯa nguwanpangku wiyanyurra wangka palunya puṯu kulira wantinytjaku, wiya. Ngurra kapiwiyawana paluru tjana nyinarra palumpa wangka kulira wantipayi. 9-10 Paluru tjana ngurra palulawana rawa nyinayinkupayi, puutiyi yiiya.
Katutjalu tjanampa ngangkari tiṉatjarrangku kutu palyantjala tjana nyakula kulilwiyangku wantipayi. Katutjanya tjanampa puṯu paṯaṉingi tjana tjukarurrurrinytjaku. Palurulpi tjananya watjaṉu, ‘Pina pati nguwanpangku nyurrangarri puṯu ngayuku wangka kulilpayi, tjukarurrungku palyantjawiyangku.’ ” 11 Piyuku Katutjalu tjananya ngurrkurringkula wangkarra payiṉu, “Wiya nyurrangarri ngayuku ngurrangka kana kutu nyinaku, wiya.”
12 Walytja tjuṯa, wangka ngaatjanyaya kulila! Nyurrangarri wiya walytjangku kulira munupinarringkula Katutjaku wangka wantinytjaku. Palumpa wangkanyurra kulira tjukarurru kutu nyinanytjaku. Paluru mayutju tiṉa nganampa kana kutu nyinapayinya. 13 Nyurrangarri tjukarurru nyinarra Yiitjuku walytja kutjupa tjuṯa purinytju wangkarra rapantjaku tjana Yiitjuku tjukarurru kutu nyinanytjaku. Mamuku mayutjungku nganaṉanya kutu tjingapungkupayi kuya palyara nyinanytjaku. Paluru nganaṉanya tjingapungkunytjala nganaṉa palunya kulira wantinytjaku kutu, Yiitjuku tjukarurrula kutu nganaṉa nyinakitjangku. 14 Nganaṉa yurrunpa Yiitju Kurayitjaku walytjarringkula tjukarurru nyinapayi. Kuwarri nganaṉa palumpa tjukarurru kutu nyinanytjaku, wiya munupinarringkula wantinytjaku wangka palumpa.
15 Katutjaku wangka yirriṯi tjunutja yalatji ngarrinyi,
“Katutjaku wangkanyurra kuwarri kulira tjukarurru nyinanytjaku. Nyurrangarrimpa walytja yurruntitja tjuṯa nguwanpangku wiyanyurra wangka palunya puṯu kulira wantinytjaku, wiya.”
16 Yurruntitja palunya tjananyaya kulila. Muutjalu tjananya manta Yitjipilanguru katinytjala paluru tjana Katutjaku wangka kulira rawangku wantipayi. 17 Paluru tjana ngurra kapiwiyawana rawa yulytjayinangi puutiyi yiiya. Tjana kuya kutu palyantjala Katutjanya tjanampa ngurrkurringkula yunytjuwiya kutu nyinapayi. Paluru tjana ngurra tjuṯawanalpi mirrirringangi. 18 Yuwa, Katutjalu watjaṉu, “Ngayuku wangka kulira wantipayi tjuṯa wiya ngurra Kayinanala nyinaku, wiya.” 19 Nganaṉa nintingku kuliṉi yalatji. Paluru tjana Katutjaku wangka kulira wantirra wiya ngurra Kayinanala palya nyinapayi, ngururrngururrpaya mirrirringangi.