1-3 Yirriṯi nyurrangarri Yiitju Kurayitjaku wangka kulira walytjarringu. Yirriṯi ingkaṯa tjuṯangku nyurrangarrinya nintilpayi kapingka papatatjirringkula tjukarurru kutu nyinanytjaku, kuya kutu palyantjawiya. Nintingkunyurra kuliṉi yaṉangungku kuya kutu palyantjala Katutjalu aṉangu palunya ngula warukutu wantirriyalku. Yurrunpa ingkaṯa tjuṯangku nyurrangarrinya mara katangka tjunkupayi Katutjaku waarrkanyurra rapangku palyarinkunytjaku. Yurrunpa ingkaṯa tjuṯangku nyurrangarrinya nintilpayi nganaṉaṯarra mirringuru kanarringkula kuutawutjungka ngula pakara ngarala waṉiku. Yaṉangu kutjupa tjuṯa paluru watjara warukutu wantirriyalku. Yaṉangu kutjupa tjuṯa nganaṉanyaṯarra watjara palumpa ngurrangka nyinatjunku kana kutu nyinanytja. Wangka ngaa tjuṯaku nintinyurra nyinanyi. Wangka palunya tjuṯakunyurra wiya piyuku nintirringkunytjaku. Katutjaku wangka kutjupa tjuṯaku nyurrangarri puntura nintirringkunytjaku. Ngayulu yalatjiku yunytjurringanyi tjinguru Katutjanyaṯarra yunytjurringanyi nyurrangarri puntura nintirringkunytjaku, palumpa wangkaku.

4-6 Tjaampalaya Yiitjuku walytja Katutjaku kurrunpatjarra nyinarra munupinarringkula Yiitjuku wangka wantingulpi. Paluru tjana ninti nyinangu yalatjiku. Katutjalu ngangkari tiṉatjarrangku palumpa walytja tjuṯa katirra palumpa ngurrangkalpi nyinatjunku. Paluru tjana yalatji munupinarringkula Yiitjuku wangka wantinytjala Katutjalu wiya piyuku tjananya ngula ngulytjulku, wantiku tjananya. Paluru tjana ilta Katutjaku katjaku tuunlayiki nyinanyi, yirriṯitja tjuṯa nguwanpa. Yirriṯi palumpa tuunlayiki tjuṯangku Yiitjunya panypurangkula watjaṉu watiyangka waralytjunkula iluntankukitjangku. 7-8 Manta palyangka kapingku pungkunytjala watiya yukiritjarra pakalpayi nguwanpa, Yiitjuku walytja tjukarurru kutu nyinanyi. Manta puḻitjarrangka kapingku pungkunytjala watiya wiima pakara piḻṯirringkula wiyarriku Yiitjuku walytja kutjupa nguwanpa nyinanyi. Paluru Yiitjuku walytja nyinarra munupinarringkula palumpa wangka wantinytjala Katutjalu palunya ngula warukutu wantirriyalku.

9 Yilta kutjupa tjuṯa Yiitjuku walytja nyinarra munupinarringkula palumpa wangka wantipayi. Nganaṉatju kuliṉi nyurrangarri palumpa tjukarurru kutu nyinanyi. Yalatjinyurra tjukarurru kutu nyinanytjala Katutjalu nyurrangarrinya palumpa ngurrangka nyinatjunku kana kutu nyinanytjaku. 10 Katutjalu kuliṉi nyurrangarri palumpa yunytjurringkula tjukarurru kutu nyinangutjangka. Paluru nintingku kuliṉi nyurrangarri Yiitjuku walytja kutjupa tjuṯa kutu yaṉṯayaṉṯaṉingitjangka. 11 Nganaṉatju puntura yunytjurringanyi nyurrangarri tjukarurru kutu nyinanytjaku, palumpa wangka wantinytjawiya. Yalatjinyurra tjukarurru nyinarra yilta palumpa ngurrangka kana kutu nyinaku. 12 Yuwa, kutunyurra tjukarurru nyinanytjaku purrkarringkula palumpa wangka wantinytjawiya. Yiitjuku walytja kutjupa tjuṯa yunypa nyinanyi yalatji tjana kuliṉi, “Katutjalu watjaṉutjangka nganaṉa yilta palumpa ngurrangka kana kutu nyinaku. Nganaṉa palumpa tjukarurru kutu nyinanytjaku.”

13-16 Yipuramanya yirriṯi nyinangitjangka, yaṉangu kutjupangku wangka ngunytjiwana wiya wangkanytjaku, yaṉangu tjuṯangka yalatji watjalpayi, “Katutjala kurungka ngayuluṉanta tjukarurru watjaṉi.” Yipuramalu Katutjaku wangka tjukarurru kulintjaku, Katutjalu yalatji Yipuramanya watjaṉu, “Ngayuluṉanta tjukarurru watjalpayingku Katutjalu watjaṉi. Ngayuluṉanta kutu yaṉṯayaṉṯanmalpa. Miiṯararrangku nyupali katja mantjilku, palulanguru nyuntupa walytja ngaṉṯitja tjuṯalingkulpiya nyinarra waṉiku.” Wangka palunya kulira Yipuramanya yunypa paṯara katjatjarrarringulpi, Katutjalu watjaṉutjangka. 17 Yuwa, Katutjalu Yipuramala wangka panyapa watjalkitjangku kuliṉu kutu tjananya palumpa walytja ngaṉṯitja tjuṯaṯarra yaṉṯayaṉṯalkitjangku. Yalatji kulira paluru Yipuramanya watjaṉu, “Ngayuluṉanta tjukarurru watjalpayingku Katutjalu watjaṉi. Ngayuku wangka yiltarringkula tjukarurru kutu ngaraku.” 18 Katutjalu wiya ngunytji watjalpayi, tjukarurru kutu paluru watjalpayi. Palumpa wangka iltarringkula ngaraku. Nganaṉa nintingku kuliṉi Katutjalu yilta Yipuramaku walytja ngaṉṯitja tjuṯa, nganaṉanyaṯarra yaṉṯayaṉṯara kanyilpayi. Yalatji kulira nganaṉa kutu palumpa tjukarurru nyinanyi, ngurra ilkaringka kana kutu nyinakitja. 19-20 Ngurra palula Yiitjulawana nyinakitjangku nganaṉa kutu kuliṉi. Paluru tjaatji ilkaringka tjarrparra mantarra waralyngarala yangatjunkupayingka wirriḻi tjarrparra waarrkarringkupayi Katutjalawana. Paluru nganampa tuḻkuku mayutju tiṉa kutu nyinamalpa, tuḻkuku mayutju tiṉa yini Milkitjitikanya nguwanpa.