1 Walytja tjuṯa, wangka ngaatjanyaya kulila! Yiitju Kurayitjanya nganampa mayutju palya nyinanyi. Palumpa walytja tjuṯa nyurrangarri yalatji nyinanytjaku. Yaṉangu yuwankarraku nyurrangarri yunypa nyinanytjaku, wiya yaṉangu tjaampalakunyurra yunytjuwiya nyinanytjaku. 2-4 Tjinguru nyurrangarrimpa tjaatjikutu yaṉangu tjuṯaya yankula nyinakatiku. Ngaṉṯi wati kutjupa mantarra yiritjarra, mani tiṉatjarra ngalya yanku. Palunya nyakula nyuntu palumpa yunyparringkula yalatji watjalku, “Ngalyarra ngaangka nyinakati tjiiyingka!” Wati kutjupalpi ngalya yanku mantarra wintarrwintarrtjarra maniwiya, maralpa. Palunya nyakula nyuntu watjalku, “Palangka maa nyinakati, yaatjayiṯi!” Tjinguru nyuntu yalatji watjalku, “Palangka maa nyinakati!, tjimintangka.” Yalatji nguwanpa nyurrangarri yaṉangu tjaampalaku yunyparringkupayi, yaṉangu kutjupa tjuṯaku yunytjuwiyarringkupayi. Wiyawanangku nyurrangarri kuliṉi, yuwankarrakunyurra yunyparrirra tjanampa nyinamara. Katutjanya wiya manitjarra tjuṯaku yunyparringkula maralpa tjuṯaku yunytjuwiyarrinyi. Nganaṉa wiya yalatji tjaampalaku kutju yunyparrinytjaku, nganaṉa yuwankarraku yunyparrinytjaku.

5 Walytja tjuṯa wangka ngaatjanyaya kulila! Katutjanya tjanampa palumpa walytja maralpa tjuṯaku yunypa nyinanyi. Paluru kuliṉi, “Pala maralpa tjuṯanya Yiitjuku walytjarringkula kutu tjukarurru ngayuku nyinanyi. Ngayulu ilta tjananya kana kanyilku ngayuku ngurrangka, ngayuku walytja kutjupa tjuṯawana. Paluru tjana ngayuku yunytjurripayi tjuṯa ngayulawana nyinaku.” 6 Nyurrangarri maralpa tjuṯa nyakula wantipayi, yaṉṯayaṉṯantjawiyangku. Manitjarra tjuṯaku kutju nyurrangarri yunypa nyinapayi, maralpa tjuṯakuṯarranyurra yunypa nyinamara, nyurrangarrimpa aḻṯurunytju tjuṯaku. Wiyawanangku nyurrangarri kuliṉi, yalatjinyurra kulinmara. Manitjarra tjuṯangku nyurrangarrinya aḻṯuruwiyangku kuutawutjukutu katipayi. 7 Nyurrangarri Yiitjuku walytja nyinanyingka manitjarra tjuṯangku nyakula panypurangkupayi. Tjana yinkayinkarringkula watjalpayi, “Tjana ngunytjinytjungku Yiitjunya waḻkuṉi.”

8 Katutjaku wangka, luwu yalatji ngaranyi, maṯupurra, “Walytjangkunku yaṉṯayaṉṯantja nguwanpa, kutjupa tjuṯa nyurrangarri yunytjurringkula yaṉṯayaṉṯantjaku.” Luwu palunya maṯupurrawana nyurrangarri nyinanytjaku. 9 Tjingurunyurra yaṉangu tjaampalaku yunytju nyinarra maralpa tjuṯaku yunytjuwiya nyinaku. Yalatji nyinarranyurra luwu palunya kilytjuntanku. Yalatji kilytjuntankulanyurra kuya palyalku. 10 Yaṉangu Yiitjuku walytjangku tjinguru yalatji walytjangku kulilku, “Maralpa tjuṯaku ngayulu yunytjuwiya nyinarra Katutjaku luwu kutju palunya wiya ngayulu kilytjuntanu. Palumpa luwu kutjupa tjuṯaku ngayulu tjukarurru nyinanyingka paluru ngayuku yunypa nyinanyi.” Yaṉangu paluru wiyawanangku wangka panyapa kuliṉi kanya Katutjanya yunypawiya palumpa nyinarra yalatji kuliṉi, “Yaṉangu paluru maralpa tjuṯa wantirra ngayuku luwu kilytjuntanu, paluru ilta kuya palyaṉu.” 11 Katutjaku luwu kutjarra ngaranyi yalatji, “Wiya miiṯa walytja wantirra miiṯa kutjupangka ngarrinytjaku.” Luwu kutjupa yalatji ngaranyi, “Yaṉangu kutjupa wiya mirri pungkunytjaku.” Tjinguru yaṉangungku kutjupanya mirri pungkuwiya palumpa miiṯa walytja wantirra miiṯa kutjupangka ngarriku. Yalatji ngarrirra Katutjaku luwu kilytjuntanku. Katutjanya yunypawiya palumpa nyinarra yalatji kulilku, “Yaṉangu paluru ngayuku luwu kilytjuntanu, paluru ilta kuya palyaṉu.” 12 Wiya nyurrangarri yalatji nyinanytjaku, yaṉangu kutjupa tjuṯakunyurra tjukarurru palyantjaku. Kulilaya wangka ngaatjanya! Ngula nganaṉa kuutawutjungka ngaranyingka Katutjalulanya watjalku, palumpa luwutjirratjangku. Yalatji kulira nganaṉa Yiitjuku tjukarurru nyinanytjaku. 13 Kuutawutju palula Katutjalu aḻṯururrinytjawiyangku watjara warukutu wantirriyalku, maralpa tjuṯaku aḻṯurunytjuwiya mantangka nyinangitjangka. Yaṉangu kutjupa mantangka maralpa tjuṯaku aḻṯurunytju nyinangitjangka Katutjanya kuutawutju palula aḻṯurunytju nyinaku. Yalatji nyinarra yaṉangu palunya palya watjara tjarrpatjunku palumpa ngurrangka. Yalatji kulira nganaṉa yaṉangu yuwankarraku yunytju nyinarra tjukarurru palyantjaku.

14 “Ngayulu Yiitjuku wangka kuliṉi. Ngayulu palumpa walytja nyinanyi.” Tjinguru yaṉangungku yalatji kulira yankula wiya yaṉangu kutjupaku tjukarurru palyalku. Yaṉangu paluru ngunytjinytju nyinaku, wiya Yiitjuku walytja. Katutjalu wiya yaṉangu palunya palumpa ngurrakutu katiku, wantiku. 15-16 Tjinguru Yiitjuku walytja mantarrawiya, tjinguru mangarriwiya nyinarra ngalya yankula yinkanyingka, wiyanyurra yungkuwiyangku watjantjaku yalatji, “Nyuntu palya nyinaku. Ngurra kutjupakutu yankula tjanala inka! Ngalkura nyuntu wuumpi ngarriku!” Wiya nyuntu yalatji watjantjaku, mangarri mantarra kanyira nyuntu palumpa yungkunytjaku. Yungkuwiya nyinarra nyuntu Yiitjuku walytja ngunytjinytju nyinaku, wiya nyuntu Yiitjuku wangka kuliṉi. 17 Nganaṉa Yiitjuku wangka kulira yaṉangu kutjupa tjuṯaku tjukarurru palyantjaku. Nganaṉa tjananya yungkula aalpamilantjaku. Yalatji nganaṉa tjananya yungkula aalpamilantjawiya nyinarra, nganaṉa Yiitjuku walytja wiya, ngunytjinytju nyinaku.

18 Tjinguru Yiitjuku walytjangku yalatji watjalku, “Ngayulu Yiitjuku wangka kulira palumpa walytja nyinanyi. Ngayulu wiya yaṉangu kutjupaku tjukarurru palyalku, Yiitjuku walytja kutjupa tjuṯangku palumpa tjukarurru palyantjaku. Ngayulu Yiitjuku waarrka kutjupa palyaṉi.” Ngayulu Tjayimitjalu yaṉangu palula watjalku yalatji. Nyuntu yalatji tjanampa tjukarurru palyantjawiyangka yaalytjiyaalytji Yiitjulu kuliṉi? Tjinguru paluru kuliṉi nyuntu wiya palumpa walytja nyinanyi. Ngayulu yaṉangu kutjupa tjuṯaku tjukarurru palyantjala tjinguru Yiitjulu kuliṉi, “Ngaatja ngayuku walytja ilta nyinanyi.” 19 Ngayulu yaṉangu palula piyuku watjalku. Ngayulu ninti nyuntupa, nyuntu kuliṉi Katutjanya mayutju tiṉa kutju nyinanyi. Wangka palunya mamu tjuṯangkuṯarraya kuliṉi. Tjana yalatji kulira nguḻu nyinanyi palumpa. Mamu tjuṯangku yalatji kuliṉingka wiya Katutjalu tjananya palumpa ngurrakutu katirra kana kanyilku, wiya. Nyuntuṯarra yalatji kuliṉingka wiya paluru nyuntunya palumpa ngurrakutu katirra kana kanyilku.

20 Yuwa, nganaṉa Yiitjuku wangka kulira yaṉangu tjuṯaku tjukarurru palyantjaku, nganaṉa wiya ramarringkula wangka kutjupa tjuṯawanangku kulintjaku. 21 Nganampa walytja Yipuramanya yirriṯi nyinangi. Palunya nganaṉa kulintjaku, paluru Katutjaku wangka kulira tjukarurru palyaṉu. Yurrunpa Katutjalu palunya watjaṉingka Yipuramalu kulira tjukarurru palyaṉu yalatji. Palumpa katja yini Yatjikanya paluru katirra puḻingka ngarritjunu mirri wakalkitjangku. Yilkari ngurrarangku palunya marrkuṉu wantinytjaku. Katutjalu kuliṉu, “Ngayulu ngaaku yunypa nyinanyi paluru ngayuku wangka kulira tjukarurru palyaṉingka.” 22 Wangka ngaatjanyaya kulila! Yipurama paluru Katutjaku wangka yilta kuliṉu. Kulira paluru palumpa katja puḻingka ngarritjunu. Paluru yalatji ngarritjunutjangka nganaṉa kuliṉi, “Yipuramalu ilta Katutjaku wangka kuliṉu.” Paluru kulira wangka palulawana tjukarurru palyaṉu. 23 Muutjalu irriṯi palunya nguwanpa Katutjaku wangka wakaṉu yalatji, “Yipuramalu Katutjanya kuliṉutjangka Katutjanya yunypara nyinangi.” Yalatji Yipuramalu Katutjaku wangka kulira palumpa walytjarringu. 24 Nyurrangarri yalatji kulintjaku. Nganaṉa Katutjaku wangka kulira tjukarurru palyaṉutjangka paluru nganampa yunypa nyinanyi. Nganaṉa palumpa wangka kulira munupinarringkula tjukarurru palyantjawiyangka paluru wiya nganampa yunypa nyinaku.

25 Rayapanya yukarra kuya nyinangi, wati tjuṯangka ngarripayi. Paluru Katutjakulpi tjukarurru palyalpayi. Irriṯi mayutju Tjatjuwalu pulanya waarrkana kutjarra wantirriyaṉu, yankulapula ngurra kutjupawana milirinkula ngalya yankula palunya tjakultjunkunytjaku. Paluru kutjarra yankula tawunungka tjarrpangu, mililkitja. Palunya ngurrara tjuṯangku pulanya pungkutjipingka, yukarra paluru pulanya yarrkatjunu. Yarrkatjunkula pulanya walatjunu mungangka. Katutjanya ilta kulilpayingku pulanya yarrkatjunkula wantirriyaṉu. Paluru yalatji tjukarurru palyaṉutjangka Katutjanya palumpa yunypa nyinangu. 26 Yuwa, Rayapalu Katutjaku wangka kulira tjukarurru palyantja nguwanpa, nganaṉa Katutjaku wangka kulira palulawana tjukarurru palyantjaku, nganaṉa wiya kulira tjukarurru palyalwiyangku wantinytjaku.