1-2 Yiitjunya yaṉangu tjuṯaṯarra yuru Kaliliyila yila ngarangi. Yuru palunya yaṉangu tjuṯangku yini kutjupa watjalpayi, “Tapiriyatjanya.” Yaṉangu paluru tjana Yiitjuku yunypa nyinangi, paluru miiṉṯa tjuṯa ngangkari tiṉatjarrangku palyantjala nyangangi. Yiitjunya palumpa kutunguḻu tjuṯaṯarra puutangka kaḻpakatirra yuruwana manta kutjupakutu yanu. Yaṉangu paluru tjana mantawana parra yanangi Yiitjula tjungurringkula piyuku kulilkitja. 3-4 Palunya tayimi tuḻku yini “Patjuwupanya” Tjarutjalumala kuwarripa ngarangi. Yiitjunya, palumpa kutunguḻu tjuṯaṯarra puutangka tjarukatirra yankula puḻingka kaḻparra nyinangi. 5 Yiitjulu tjananya walu nyangangi, yaṉangu paluru tjana ngalya kaḻpanyingka. Yiitjulu Pilipanya tjapiṉu, “Yaalytjingkala mangarri tiṉa mantjilku nyarra tjuṯa paḻtjantjaku?” 6 Wangka panyapa Pilipanya tjapiṉu yalatji kulira, “Wati ngaangkuṉi tjinguru kuliṉi ngayulu Katutjakuṉu ngangkari tiṉatjarrangku mangarri palyalku.” Yilta Yiitjulu walytjangku kuliṉingi mangarri palyalkitjangku. 7 Pilipalu kutjupawana kulira palunya watjaṉu, “Yaṉangu ngaa tjuṯaku mangarri tiṉa payimilantjaku, tjinguru tiin tjawutjun talangka, tjinguru wirriḻi nguwanpa. Mangarri tiṉa palunya wiimaṯu wiimaṯu tjananya yungkunytjaku kilytjuntankula, ngalkunytjakuya.” 8-9 Yiitjuku kutunguḻu kutjupa Yanturunya nyinangi, Tjaaman Piitaku maḻanypa. Paluru Yiitjunya watjaṉu, “Uḻa ngaangku kanyiṉi, puriiti kapuṯu payipala, piitji wiima kutjarraṯarra. Ngaangku wiya tjuṯalingku paḻtjalku.” 10 Yiitjulu tjananya watjaṉu, “Watjala tjananyaya nyinakatinytjaku!” Puḻi palula yukiri tiṉa luuna nguwanpa ngarrirra waṉingi. Nyinanyinakatinguya. Wati tjuṯalingkuya ngurra palula nyinangi payip tjawutjunpala. Kungka tjuṯa, pipirri tjuṯaṯarraya nyinangi. 11 Yiitjulu mangarri panyapa mantjira Katutjanya tjapiṉu yalatji, “Paapa, nyuntulanyatjunu mangarri anta piitji ngaatjanya yungu, waḻkuṉilatjunta.” Kilytjuntankula tjananya yaṉangu tjuṯa yungangi. Piitjiṯarra tjananya yungangi kilytjuntankula. Yuwankarrangkuya ngalkula paḻtjarringu. 12-13 Yiitjulu palumpa kutunguḻu tjuṯa watjantjala, mangarri tiṉa ngalkura waṉingutja mantjira tjarrpatjunangi kaṉilpa tiṉa tjuṯangka, tuwalpalangka. Kaṉilpa panyapa tjuṯangka mangarri punturringkula katu ngarala waṉingi. Yuwa, puriiti kapuṯu payipalatjanu Yiitjulu yalatji mangarri tiṉa palyaṉingi.

14 Yiitjulu mangarri panyapa palyaṉingka, nyakula yaṉangu tjuṯangku watjaṉu, “Palatja Katutjaku wangka watjalpayi panyapa, Muutjalu irriṯi watjaṉutja. Paluru iltalpi nyinanyi. Palatja nyakukitja nganaṉa rawa paṯaṉingi.” 15 Yaṉangu paluru tjana wangkarra waṉingu, “Nganaṉa tjungurringkula Yiitjunya mayutju tiṉa nganampa ngaratjunkunytjaku. Kala, nganaṉa palatja witira katirra ngaratjunkunytjaku, nganampa mayutju tiṉa nyinanytjaku.” Tjakulpa yalatji palunya kulira Yiitjunya tjaalpa yankula puḻingka maa kaḻparra nyinangi, paluru tjana mayutju tiṉa ngaratjunkutjipingkamarra.

16 Mungarrtjirrinytjala palumpa kutunguḻu tjuṯaya yurukutu yankula 17 puutangka kaḻpakatirra yanu. Yuruwana tjana yanu tawunu Kapaniyamalakutu. Ngururrpaya yankula mungarringu Yiitjunya mantangka kutu nyinanyingka. 18 Waḻpa tiṉarringanyingka, yuruṯarralpi ngalya katurringangi. Kapingku puuta tjanampa pirrtjipirrtjitjingaṉingi. 19 Watiyatjarrangkuya tjana puuta yuṉṯurinangi, yankunytjaku. Kutuya puuta yuṉṯuralpi nyangu, Yiitjunya yuru katuwana ngalya yananyingka. Yilarringanyingka nyakularaya nguḻurringu, kurrunkurrunpakutjuraya kulira. 20 Yiitjulu tjananya watjaṉu, “Nguḻuwiyaya nyinama!, ngayulu Yiitjunya maa yananyiṉa nyurrampa.” 21 Yiitjunya wangkanytjala kulira tjana yunyparringu puutangka kaḻpatjunkukitja. Palulanguru puuta tjanampa tjaalpa yanu parrpaṯu mantakutu mantangkalpi yila ngarangi tawunu Kapaniyamala yila.

22-24 Yaṉangu tjuṯa yuru Kaliliyila kakarrara nyinangi, ngurra palula Yiitjulu tjananya mangarri yungutjangka. Paluru tjana nyangu Yiitjuku kutunguḻu tjuṯa puutangka kaḻpakatirra yananyingka. Nintingkuya kuliṉu, “Yiitjunya wiya tjanalawana kaḻpakatirra yanu.” Ngurra palula paluru tjana ngarringi. Tjiṉṯurringkula tjana pakara nyangu puuta kutjupa tjuṯa ngurra Tapiriyatjalanguru ngalya yanutja. Puuta tjuṯa ngalya yankula ila ngarangi. Paluru tjana Yiitjuku, palumpa kutunguḻu tjuṯaku puṯu nyakula puuta palula tjanala kaḻpakatingu, ngurra Kapaniyamala Yiitjuku ngurrilkitja.

25 Puuta tjuṯangkaya yankula tjarukatirra Yiitjunyalpi tjana nyangu yurungka wilurarra tjayiṯingka. Yankulaya ilarringkula tjapiṉu, “Nintilpayi. Yaalytjiyaalytji nyuntu ngurra ngaakutu ngalyanu?” 26 Yiitjulu tjananya watjaṉu, “Wangka ngaatjanyaya kulila! Nyurrangarri ngayulakutu piyuku ngalya yanu mangarri panyapanyurra ngalkula paḻtjarringkula. Mangarri piyuku piyuku kutjunyurra ngalkukitjangku kuliṉi. Ngayulu ngangkari tiṉatjarrangku mangarri palunya palyantjala nyurrangarri ngayunya kulinmara Katutjakuṉu katja. 27 Mangarriku kutju wiyanyurra kulira nyinanytjaku. Mangarri ngarrirra yuṉarringkupayi. Kutjupakunyurra kulintjaku yalatji, ‘Yaalytjiyaalytji ngayulu kana kutu nyinaku Katutjaku ngurrangka?’ Ngayulu yaṉanguku katjangku nyurrangarrinya nintilku palumpa ngurrangka kana kutu nyinanytjaku. Yalatji yaṉangu tjuṯa nintintjaku paapa Katutjaluṉi mantakutu watjara wantirriyaṉu.” 28 Paluru tjana Yiitjunya yalatji tjapiṉu, “Nganaṉa yunytjurringanyi Katutjaku tjukarurru nyinanytjaku. Yaalytjiyaalytji nganaṉa kulilku tjukarurru nyinakitjangku?” 29 Yiitjulu tjananya watjaṉu yalatji, “Katutjalu ngayunya mantakutu wantirriyaṉu. Paluru yunytjurringanyi nyurrangarri ngayuku wangka kulintjaku palumpaṉu katjangku watjaṉingka.” 30 Paluru tjana watjaṉu, “Ngangkari tiṉatjarrangku nganampa palyala!, nyakulalatjunta kulintjaku Katutjakuṉu katja.” 31 Tjana piyuku watjaṉu, “Irriṯi, Muutjalu tjananya ngangkari tiṉatjarrangku palyantjala Katutjalu mangarri maana tjanampa yungkupayi, nganampa walytja irriṯitja tjuṯa ngurra kapiwiyawana nyinayinkunytjala. Nyuntu Muutjalu ngangkari tiṉatjarrangku palyantja nguwanpa nganampa palyantjaku. Muutjalu tjanampa ngangkari tiṉatjarrangku palyantjala ilta tjana mangarri aaḻi kutjupa aaḻi kutjupa yurrara ngalkupayi. Yalatji Katutjaku wangka yurruntitja tjunutja ngarrinyi, ‘Paluru tjananya mangarri ilkari ngurrara kutu yungkupayi, ngalkunytjakuya.’ ”

32-33 Yiitjulu tjananya watjaṉu, “Wangka ngaatjanyaya kulila! Wiya Muutjalu tjananya yungkupayi mangarri ilkari ngurrara, ngayuku paapangku tjananya yungkupayi. Yuwa, ngayuku paapangku nyurrangarrinya mangarri ilkari ngurrara nguwanpa yungku ngalkuranyurra kana kutu nyinanytjaku. Yuwa, ngayuku paapangku ngayunya ilkari ngurrara mantakutu wantirriyaṉu, nyurrangarri, yaṉangu kutjupa tjuṯangkuṯarra ngayuku wangka kulira kana kutu nyinanytjaku.” 34 Paluru tjana watjaṉu, “Mayutju, mangarri ilkari ngurrara panyapa nganaṉanyatju kutu yungama!”

35 Yiitjulu tjananya watjaṉu, “Mangarri ilkari ngurrara panyapa nguwanpa ngayulu ilkari ngurrara nyinanyi. Yaṉangungku ngayuku wangka kulira kana kutu nyinamalpa. Paḻtjatjirratjangku mangarri ngalkula yaṉangu yunypa nyinaku. Kapitjirratjangkuṯarra kapi tjikira yunypa nyinanytja nguwanpa ngayuku wangka kulilpayi tjuṯa yunypa nyinamalpa, kana kutu. 36 Wangka panyapa ngayulu nyurrangarrinya watjaṉu yalatji. Nyurrangarri ngayuku wangka kulira wantipayi, kutunyurra kulira wantinyi. Nyurrangarri kulinmara ngayulu ilkari ngurrara, Katutjakuṉu katja nyinanytjala. 37 Paapa Katutjalu yaṉangu tjuṯa nintiṉi, ngayunya Katutjakuṉu katja kulintjaku. Paluru tjana ngayuku wangka kulira yilta ngayuku walytja tjuṯa nyinaku. Ngayulu tjananya kutu kanyira yaṉṯayaṉṯanmalpa, wantinytjawiyangku.

38 “Paapa Katutjaluṉi ilkaringuru watjara iyaṉu. Palumpaṉu wangkawana ngayulu mantangka palyalpayi, wiya ngayulu walytjangku kulira palyaṉi. Paluruṉi nintintjala kutju ngayulu palyalpayi. 39 Paluruṉi nintiṉu ngayunya kulilpayi tjuṯa kutu yaṉṯayaṉṯantjaku, tjana kutu ngayuku walytja tjuṯa nyinanytjaku. Paluru kuliṉi tjana mantangka nyinarra mirrirringutja tjuṯa ngayulu ngula kanara pakaltjingalku, yaṉangu tjuṯa kuutawutjungka ngaranytjala. 40 Ngayuku paapangku kuliṉi yaṉangu tjuṯangku ngayuku wangka kulira walytjarringkula kana kutu nyinanytjaku. Paluru tjana walytjarringkula nyinarra wiyarringutja tjuṯa ngayulu ngula kanara pakaltjingalku, yaṉangu tjuṯa kuutawutjungka ngaranytjala.”

41-42 Yiitjulu tjananya yalatji watjaṉu, “Mangarri ilkari ngurrara panyapa nguwanpa ngayulu ilkari ngurrara nyinanyi.” Yalatji watjantjala yaṉangu tjuṯangku wangkarra waṉingu, “Yiitjunya wiya ilkari ngurrara, paluru manta ngaa ngurrara, Tjutjupaku katja. Palumpa paapa maamaṯarra, walytjalampa nyinanyi.” 43-44 Yiitjulu tjananya watjaṉu, “Wiyanyurra ngayunya panypurangkunytjaku. Ngayuku paapangkuṉi iyara paluru tjananya yaṉangu tjuṯa nintiṉi ngayuku wangka kulira walytjarrinytjaku. Yaṉangu ngayuku walytjarringkula nyinarra mirrirringutja tjuṯa ngayulu ngula tjananya kanara pakaltjingalku, yaṉangu tjuṯa kuutawutjungka ngaranytjala. 45 Yirriṯi Katutjaku wangka watjalpayingku yalatji wakaṉu, ‘Katutjalu tjananya yaṉangu ngurra tjuṯawana nyinanytja tjuṯa nintilku.’ Wangka palulawana yaṉangungku palumpa wangka kulira ngayuku wangkaṯarra kulira walytjarringku. Paluru ngayuku paapa nyinanyi. 46 Yaṉangungku palumpa wangka kulilpayi kurungku nyakunytjawiyangku. Paapaku ngurrangka ngayulu nyinarra nyakupayi. Palunyatjanu ngayulu mantakutu ngalyanu. Ngayulu kutju palunya kurungku nyakupayi, yaṉangu kutjupangku wiya palunya nyakupayi. 47 Wangka ngaatjanyaya kulila! Yaṉangungku ngayunya Katutjakuṉu katja kulira walytjarringkula kana kutu nyinamalpa.

48 “Yaṉangungku mangarri ngalkula kana nyinanyi. Ngayulu mangarri nguwanpa nyinanyi, ngayuku wangka yaṉangungku kulira kana kutu nyinamalpa. 49 Nganampa walytja yirriṯi nyinapayi tjuṯangku mangarri ilkari ngurrara yini maana ngalkuyinangi, ngurra kapiwiyawana nyinarra. Mangarri palunya tjana ngalkula nyinapayi, palunyatjanu tjana mirrirringu, Katutjaku ngurrangka kana kutu nyinanytjawiya. 50-51 Katutjaluṉi ngayunya ilkari ngurrara wantirriyaṉu, ngayulu mangarri ilkari ngurrara nguwanpa nyinanyi. Ngayuku wangka yaṉangungku kulira kana kutu nyinamalpa Katutjaku ngurrangka. Ngayulu yaṉangu mangarri nguwanpa nyinanyi. Mangarri palunya ngayulu yaṉangu tjuṯa yunganyi tjana ngalkula kana kutu nyinanytjaku.”

52 Yaṉangu tjuṯangku puṯu kulira tjapira waṉingu, “Yaalytjiyaalytji paluru nganaṉanya yungku yaṉangu palumpaṉu ngalkuntjaku?” 53-54 Yiitjulu tjananya watjaṉu, “Wangka ngaatjanyaya kulila! Yaṉangukuṉu katjaṉinyurra yaṉangu ngalkura, ngurrkaṉinyurra tjikira kutju kurrunpa kananyurra nyinaku. Yaṉangu ngayunyaṉinyurra ngalkura ngurrka ngayunya tjikira ngayuku walytja nyinarra mirrirringutjangka, ngayulu ngula nyurrangarrinya kanara pakaltjingalku, yaṉangu tjuṯa kuutawutjungka ngaranytjala. 55 Ngayunya yaṉangu mangarri maṯupurra ngalkunytjaku. Ngayunya ngurrka maṯupurra tjikintjaku. 56 Yaṉangu ngayunyaṉinyurra ngalkura ngurrka tjikira ngayuku walytja tjuṯanyurra nyinanyi, pamuli kutju nganaṉa nyinanyi. 57 Ngayuku paapa kana kutu nyinapayi. Paluruṉi wantirriyara kanyiṉi ngayulu kana kutu nyinanytjaku. Yalatji nguwanpa Yaṉangu ngayunya yaṉangungku ngalkula nyinanytjala ngayulu palunya kanyiṉi kana kutu nyinanytjaku. 58 Nganampa walytja yirriṯitja tjuṯangku mangarri ilkari ngurrara kutjupa maana ngalkupayi. Tjana ngalkula nyinarra mirrirringu, Katutjaku ngurrangka kana nyinanytjawiya. Mangarri palunya yaṉangu ngayunya ilkari ngurrara kutjupa. Yaṉangungku ngayunya ngalkula kana kutu nyinaku Katutjaku ngurrangka.” 59 Wangka palunya Yiitjulu tjananya nintiṉingi, Tjuwuku tjaatjingka, tawunu Kapaniyamala.

60 Palumpa walytja tjuṯangkuya wangka panyapa Yiitjulungku walytjangku watjaṉutjangka ngalkura tjikintjatjarra, kuliraya wangkarra waṉingu, “Wiyala wangka palunya kulintjaku, wantirralaka yarra!” 61 Yiitjulu kuliṉingi paluru tjana wangka panyapa kulintjala. Paluru tjananya watjaṉu, “Nyaaku nyurrangarri ngayuku wangka kulira wantinyi?, ngayuku wangkanyurra kulinmara. 62 Yaṉanguku katjaṉa tjinguru ilkarikutu kaḻpanytjala nyakula tjingurunyurra ilta kulilku ngayulu Katutjakuṉu katja yalatji, ‘Paluru yilta ilkaringuru ngalya yanu.’ Yara palunya yaṉanguṉi ngalkura ngurrka tjikintjatjarra tjukarurrunyurra kulinmara. 63 Ngayuku kurrunpangku Katutjaku ngurrangka yaṉangu kana nyinatjunkupayi, ngurra palula kana kutu nyinanytjaku. Yaṉanguṉi ngalkura kutju, wiya kana kutu nyinamalpa, ngayuku kurrunpangku palunya kana nyinatjunkula kanyinmalpa. Wangka panyapa ngayulu Katutjaku kurrunpatjarrangku nyurrangarrinya watjaṉu. 64 Tjaampalangkunyurra ngayuku wangka kulira wantingu, nyurrangarri kulinmara ngayulu Katutjakuṉu.” Yalatji Yiitjulu tjananya watjaṉu yaṉangu tjuṯaku ninti nyinarra. Yirriṯi yaṉangu tjuṯa tjungurringkupayi palumpa wangka kulilkitja. Panyapa tjuṯa kutu Yiitjulawana tjungurringkupayi kulilkitja. Tjana yurrunpa tjungurringkula kulintjala Yiitjulu yalatji kuliṉingi, “Pala tjuṯangku ngayuku wangka kulira ngayuku walytja tjuṯa nyinarra ngula ngayuku wangkaya wantirralpi yanku.” Wati kutjupakuṯarra paluru yurrunpa ninti nyinangu yaḻṯikitja, “Wati ngaatja ngayuku kutunguḻu nyinarra ngayuku yunytjuwiyarringkula yankula tjananya tjakultjunku ngayunya witintjaku.” 65 Yaṉangu kulira wantipayi tjuṯa, yaṉangu kutjupa tjuṯaṯarra Yiitjulu piyuku watjaṉu, “Kala, panyapa tjuṯangku tjinguru ngayunya wantirra yanku. Panyapaṉa nyurrangarrinya watjalpayi ngayuku paapangku yaṉangu nintintjala kutju, yaṉangu paluru ngayunya Katutjakuṉu kuliṉi.”

66 Palulanguruya Yiitjuku walytja tjaampalangkuya Yiitjunya wantikatirra yanu, piyuku tjungurringkula kulintjawiya. Wiya tjana kutu palumpa walytja nyinangi, wiya. 67 Kutunguḻu tuwalpala tjananya Yiitjulu tjapiṉu, “Nyurrangarriṯarra ngayunya wantikatirra yankuku?” 68-69 Tjaaman Piitalu watjaṉu, “Wiya mayutju. Nganaṉa yunytjurringanyi nyuntupa wangka kutu kulilkitja. Nyuntupa wangka kutjulatju kulira kana kutu nyinaku Katutjaku ngurrangka, kutjupakuṉu wangka wiya nganaṉa kulilku. Nganaṉatju kuliṉi nyuntu ilta Kurayitjanya Katutjalu ngalya wantirriyaṉutja, palumpa katja.” 70 Yiitjulu palumpa kutunguḻu tjuṯa watjaṉu, “Ngayulu nyurrangarrinya tuwalpala watjaṉu ngayuku kutunguḻu tjuṯa nyinanytjaku. Ngayulu kuliṉi, kutju ngaangka nyinanyi mamuku walytja.” 71 Panyapa mamuku walytja watjaṉu Tjuutatjanya, Tjaamana Yitjikarriyataku katja. Paluru Yiitjuku kutunguḻu nyinarra ngula tjananya mayutju tjuṯangka tjakultjunu Yiitjunyaya witintjaku.