1 Tuḻku yini Patjuwupanya kuwarripa ngarangi. Yiitjunya, palumpa kutunguḻu tjuṯaṯarra tawunu Piitjaniyilakutu piyuku yanu. Yurrunpa tawunu palula Yiitjulu Latjarratjanya mirringuru kanaṉutjangka, 2 ngurra palunya ngurrara tjuṯangku Yiitjunya nyakula yunyparringu. Tjana watjaṉu, “Yiitjunya ngalyankunytjala nganaṉa tjungungku mangarri ngalkura yunyparringkunytjaku.” Tjana tjungurringkula nyinanytjala Maatjalu tjananya mangarri parra yungangi. Latjarratjanyaṯarra tjanala tjungu nyinangi. 3 Yiitjunya ngalkukitja paṯantjala, Miirilu ngalya yankula wuyila paṉṯi palyatjarra paatula alytjurankula yintira nyapara wiyaṉu, Yiitjula tjinangka. Paluru nyapara mangkangku turayiṉu tjina. Wuyila palunya paluru yurrunpa mani tiṉangka payimilara kanyiṉingi. Wuyila panyapanguru waaḻa yunngu yiwarrngarangi palyalingku. 4 Yiitjuku kutunguḻu yini Tjuutatja Yitjikarriyatanya ngurra palula tjungu nyinangu. Wati paluru tjananya mayutju tjuṯangka ngaṉṯi tjakultjunu Yiitjunyaya witintjaku. Paluru Yiitjuku kutunguḻu kutjupa tjuṯangka tjananya watjaṉu, 5 “Nyaaku kungka palangku nyapara wiyaṉu? Paluru wuyila palunya ngayunya yungamara. Katirraṉa tjalamilara, mani tiṉa palunya tuuntiyi tjawutjuna tala ngayulu mantjinmara. Mantjiraṉa maralpa tjuṯakuṉa tjanampa yungamara.” Yalatji watjara Miiriku Tjuutatjanya pikarringu. 6 Tjuutatjalu tjanampa Yiitjuku kutunguḻu tjuṯakuṯarra mani pawutji tiṉa katiyankupayi. Pawutji palula paluru mulyaṯangkuṯarra mantjilpayi. Tjuutatjalu maralpa tjuṯaku wiya kulilpayi, ngunytji paluru wangkangu, “Maralpa tjuṯakuṉa yungamara.” Paluru kuliṉu mani mulyaṯangku yarrkatjunkukitjangku. 7 Yiitjulu Tjuutatjanya marrkuṉu, “Kungka palatja wanti!, pikarringkunytjawiyangku. Ngayula paluru nyapara wiyaṉu, palya. Nganaṉa mirri ngarrinytjala kututja wuyila paṉṯi palyatjarrangku nyapalpayi, ngarritjunkukitjangku. Kungka palangku yalatji kulira ngayunya yurrunpa nyapaṉu. 8 Maralpa tjuṯa nyurrangarrila kutu nyinamalpa, kala ngayulu nyurrangarrilawana wiya kutu tjungu nyinamalpa. Maralpa tjuṯaku yunytjurringkula tjanampa nyurrangarri palya yungkula kanyintjaku. Yilta kungka ngaangku wuyila ngayula nyapara yintira wiyaṉu.”

9 Yaṉangu uwankarrangkuya tjakulpa kuliṉu, Yiitjunya tawunu Piitjaniyila nyinanytjala. Yaṉangu paluru tjana kulira tawunu Piitjaniyilakutu yanu, Yiitjunya Latjarratjanyaṯarra nyakunytjaku. Paluru tjana wangkangu, “Yiitjulukunyu Latjarratjanya mirringuru kanaṉu. Yarralaka!, Yiitjunya, Latjarratjanyaṯarra kanarringutja nyakunytjaku.” 10 Yaṉangu paluru tjana Yiitjuku wangka kulilkitja tjungurringkunytjala tuḻkuku mayutju tiṉa tjuṯangku tjungurringkula wangkangu miitingingka Latjarratjanya mirri pungkunytjaku. 11 Tjana yalatji kuliṉingi, “Latjarratjanya kanarringutjangka nyakula yaṉangu tjuṯaya Yiitjuku yunyparringkula walytja palumpa nyinaku. Latjarratjanya tjana pungkunytjala kutjupa tjuṯa wiyaya tjungurriku Yiitjuku wangka kulintjaku. Palya tjana Yiitjuku wangka kulilwiyangkulpi wantiku.”

12 Yaṉangu yuwankarraya tawunu Tjarutjalumala yankula tjungurringu tuḻkungka Patjuwupala nyinakitja. Yaṉangu paluru tjana ngarrirra tjiṉṯurringkula tjakulpa kuliṉu, “Yiitjunya ngalyananyi tuḻku Patjuwupala nyinanytjaku.” 13 Yalatji kulira tjana watiya parrkatjarra yantara Yiitjulakutu yanu. Tjungurringkulaya mirrarra watjaṉingi yalatji, “Mayutju tiṉa ngaatjanyalaka waḻkula! Ngaatjanya Katutjakuṉu ngangkari tiṉatjarra. Nganaṉa palunya waḻkuntjaku.”

14 Yiitjulu tuungkiyi wiima ngaranyingka nyakula kaḻparra yanu. Katutjaku wangka yirriṯi wakara tjunutja yalatji yutitjarringu.

16 Tjana palunya puḻkawaṉinyingka nganaṉatju palumpa kutunguḻu tjuṯangku puṯu kuliṉingi, “Nyaakuya yaṉangu ngaa tjuṯangku ngaatjanya puḻkawaṉinyi?, tuungkiyingka ngalya yananyingka.” Ngula Katutjalu palunya ilkarikutu katinytjala nganaṉalpi kulira yalatji nintirringu, “Yuwa, Katutjaku wangka watjalpayingku yirriṯi yara palunya wakaṉu. Yaṉangu tjuṯangku tjukarurru palunya puḻkawaṉingi, tuungkiyitjarra paluru ngalya yananyingka.” 17-18 Yuwa, yaṉangu yuwankarrangkuya Yiitjunya puḻkawaṉingi, yurrunpa kutjupa tjuṯangku tjananya yalatji tjakultjunanyingka, “Nyangukunyulatju Yiitjulu Latjarratjanya mirringuru kanaṉu.” 19 Paratji tjuṯangku yaṉangu tjuṯa tjungurringkunytjala nyakula yalatjiya wangkarra waṉingu, “Wiya. Nganaṉa puṯu tjananya marrkuṉi yataṉarrinytjaku. Yaṉangu yuwankarrangkuya palumpa yunyparringkula palunya puḻkawaṉinyi.”

20 Kiriki wangkapayi tjuṯaya Tjarutjalumalakutu yanu tuḻku panyapangka nyinarra Katutjanya waḻkuntjaku. 21 Yiitjuku kutunguḻu Pilipanya tawunu Piitjatanya ngurrara nyinangu. Tawunu paluru manta Kaliliyila ngarangu. Paluru tjanaya kuliṉu, “Pilipanya nganampa wangkaku ninti nganaṉa palunya tjapintjaku.” Tjana Pilipalakutu yankula watjaṉu, “Yunytjurringanyilatju Yiitjula wangkanytjaku.” 22 Pilipalu yankula Yanturunya tjakultjunu. Tjungurringkulapula yankula Yiitjula wangkangu, “Pala tjuṯa yunytjurringanyi nyuntula wangkanytjaku.”

23 Yiitjulu palunya kutjarra, yaṉangu kutjupa tjuṯaṯarra watjaṉu, “Kala, kuwarri nguwanpa yaṉangu tjuṯangku ngayunya yaṉanguku katjanya mirrintanku. Ngayulu mirrirrinytjala Katutjaluṉi puḻkawaṉimalpa. 24 Wangka ngaatjanyaya kulila! Tjiiṯa kutju mantangka tjawara tjunutja yukiri pakantjala tjiiṯa wiyarriku. Yukiri palulanguru pakara tjiiṯa tjuṯatjarralpi ngaraku. Tjiiṯa tjuṯa mantjira tjawara tjunutja paṉangka watiya tjuṯalingkulpi ngarala waṉiku. Tjiiṯa kutjupa yurrunpa tjawara tjunkunytjawiyangka tjiiṯa paluru yukiri tjiiṯa tjuṯatjarra pakara ngaranytjawiya, tjiiṯa palunya kutu ngarrirra piḻṯirriku. Yara palunya tjiiṯa kutju wiyarrinytja nguwanpa, ngayulu wiyarriku. Tjiiṯa palunya tjawara tjunutja paṉangka tjiiṯa tjuṯatjarralpi ngaraku. Yukiri palunya tjiiṯa tjuṯatjanu watiya tjuṯalingku ngarala waṉinytja nguwanpa, yaṉangu tjuṯa ngayuku walytjarringkula nyinaku, ngayuluṉa ilunytjala. 25 Yuwa ngayulu tjiiṯa nguwanpa wiyarriku. Yalatji nguwanpa nyurrangarrinyaṯarra tjana mirrintanku, ngayuku waarrkanyurra palyantjala. Ngayuku waarrkanyurra kutu palyara kana kutu nyinaku Katutjaku ngurrangka. Tjinguru nyurrangarri ngayuku waarrka palyalwiyangku wantirra yulytjaku manikuṯarra yunytjurringkula nyinaku. Yalatjinyurra nyinanytjala Katutjalu nyurrangarrinya kuutawutjungka payira iyalku. 26 Nyurrangarri ngayuku waarrka kutu palyara ngayulawana nyinamalpa. Yalatji nyurrangarri palyantjala ngayuku paapangku nyurrangarrinya puḻkawaṉiku.”

27 Yiitjulu tjananya piyuku watjaṉu, “Kuwarri ngayulu watjilarrirra puṯu kuliṉi, ‘Nyaaṉa ngayuku paapangka wangkaku?’ Tjinguruṉa wangkaku yalatji, ‘Paapa, yaṉṯayaṉṯaraṉi kanyila, pungkupayingkamarra!’ Yalatji wiyaṉa palunya tjapilku. Ngayulu mantakutu ngalya yanu ilunytjaku. 28 Yalatjiṉa watjalku, ‘Paapa. Nyuntu kulintjawana palya tjana ngayunya pungkunytjaku, ngula yaṉangu tjuṯangku nyuntunya mayutju tiṉa kulira puḻkawaṉinytjaku.’ ” Palulanguru ilkaringuru watjaṉu yalatji, “Ngayulu yaṉangu tjuṯa tjananya nintilpayi ngayunya puḻkawaṉinytjaku. Ilta paluru tjana ngayunya puḻkawaṉipayi. Yalatji tjana piyuku ngayunya puḻkawaṉiku.” 29 Yaṉangu tjuṯangkuya ilkaringuru wangkangutja kulira watjaṉu, “Layitningi tuutuuntjala nguwanpa nganaṉa kuliṉu.” Kutjupa tjuṯangkuya kulira watjaṉu, “Ilkari ngurrara Yiitjula wangkangu.” 30 Yiitjulu tjananya watjaṉu, “Yaṉangu tjuṯangkunyurra kuliṉi, ‘Paluru ilkaringuru wangkangu Yiitjulu kulintjaku.’ Wiya yalatji, ilkaringuru wangkangu nyurrangarri yalatji kulintjaku, ‘Yiitjunya ilta Katutjakuṉu nyinanyi.’ 31 Kuwarri Katutjalu yaṉangu tjuṯa kuutamilantjaku ngaranyi, kuyanyurra palyaṉutjangka paluru nyurranya watjalku. Mamuku mayutju yaṉangu tjuṯaku nyurrangarrimpa mayutju nyinanyi, kala kuwarri paluru mayutjuwiyalpi nyinaku. Kuwarri Katutjalu palunya payira wantirriyalku. 32 Ngayunyaṉiya waralytjunku. Ngayulu waralyngarala mirrirringutjangka yaṉangu yuwankarrangku kulilku, ‘Yiitjunya waralyngarala mirrirringu nganampa kuya waṉinytjaku.’ Tjana ngayunya kulira ngayuku walytjalpi nyinaku.” 33 Yiitjulu tjananya wangka panyapa waralytjunkunytjatjarra watjaṉu, tjana yalatji kulintjaku, “Tjinguru tjana palunya watiyangka waralytjunkula iluntanku, tjuuḻatjarrangkupaka wakara iluntankunytjawiyangku.”

34 Yaṉangu tjuṯangku Yiitjunya watjaṉu, “Muutjaku wangka ngaranyi yalatji Kurayitjanya kutu kana nyinamalpa. Nyaaku nyuntu yara panyapa watjaṉu?, ‘Yaṉanguku katjaya waralytjunkula mirrintanku.’ Puṯulatju kuliṉi. Ngananya nyuntu panyapa yaṉanguku katjanya watjaṉu?” 35-36 Yiitjulu tjananya watjaṉu, “Kuwarri kutju ngayulu nyurrangarrilawana nyinaku. Ngayulu nyurrangarrila Katutjakuṉu wangka tjakultjunkupayi. Yaṉangungku wangka palunya kulira yunypa nyinaku. Kutunyurra wangka palulawana nyinanytjaku, yiwarra kutjupawana yankunytjawiya. Yalatjinyurra nyinarra ngayuku walytja tjuṯa nyinaku.” Panyapa wangkarra tjanala wantirra Yiitjunya yanu.

37 Yaṉangu tjuṯangku wiya Yiitjunya Katutjakuṉu kulilpayi. Yiitjulu Katutjakuṉu ngangkari tiṉatjarrangku tjuṯangara palyantjala tjana nyakula tjukarurru kulinmara. 38 Yalatji tjana wiyawanangku kulintjala Yaatjayaku wangka iltarringu. Irriṯi Katutjaku wangka watjalpayi Yaatjayalu yalatji watjaṉu,

39 Yaṉangu paluru tjana Yiitjuku wangka kulira wantingu Katutjalu tjananya kawaṉtjingantjangka. Yalatji Yaatjayaku wangka kutjupa ngarrinyi.

41 Yiitju Kurayitjaku wangka tjana kulira wantinytjala Yaatjayalu yirriṯi kulira wangka panyapa ngaa kutjarranya watjaṉu. Yaatjayalu kuliṉu mayutju tiṉa Kurayitjanya ngula nyinaku. 42 Tjuwuku mayutju tjaampalangkuya wangka palunya Yiitjulu watjaṉutja kulira palumpa walytjarringu. Tjana Paratji tjuṯaku nguḻurringkula wiya yaṉangu kutjupangka tjakultjunu, Paratji tjuṯangku Tjuwuku tjaatjingka payira wantirriyalpayingkamarra. Paratji tjuṯangku yurrunpa yalatji watjaṉingi, “Yaṉangungku Yiitjuku wangka kulira walytjarrinytjala nganaṉa tjaatjinguru payira wantirriyantjaku.” 43 Paluru tjana Yiitjuku walytjarringkula nguḻurrinytjawiyangku Paratji tjuṯangka tjakultjunamara, Katutjanya tjanampa yunyparrinytjaku. Tjana tjakultjunkuwiyangku wantingu, yalatji kulira, “Ngayulu Yiitjuku walytja tjakultjunkunytjawiya nyinaku, tjana ngayuku kutu yunypa nyinanytjaku.”

44-45 Palulanguru Yiitjulu tjananya yaṉangu tjuṯangka katungku watjaṉu, “Yaṉangungku ngayuku wangka kulira walytjarringkula ngayuku paapakuṯarra Katutjaku walytja nyinaku. Paluruṉi mantakutu wantirriyaṉu. 46 Ngayulu mantakutu ngalya yanu Katutjaku wangka yaṉangu tjuṯangka tjakultjunkunytjaku. Yaṉangungku ngayuku wangka kulira walytjarringkula ngayuku tjukarurru nyinaku, wiya paluru yiwarra kuyawana yanku, wiya. 47 Tjinguru yaṉangungku ngayuku wangka kulira wantinytjala Katutjalu palunya kuutawutjungka watjara warukutu iyalku, ngayulu wiya. Ngayuku waarrka yalatji ngaranyi. Mantakutu ngayulu ngalya yanu yaṉangu tjuṯangka tjakultjunkunytjala tjana kulira ngayuku walytjarrinytjaku. Ngayulu wiya mantakutu ngalya yanu yaṉangu tjuṯa kuutawutjungka ngaratjunkula watjara iyalkitja warukutu, wiya. 48-50 Ngayulu walytjangku kulira watjantjawiya, ngayuku paapangkuṉi nintiṉi. Palumpaṉu wangka ngayulu nyurrangarrila tjakultjunanyi. Paluru mayutju tiṉangku ngayunya wantirriyaṉu. Ngayulu nintingku kuliṉi yalatji. Palumpaṉu wangka ngayulu tjakultjunkunytjala yaṉangungku kulira walytjarringkula kana kutu nyinamalpa. Wangka palumpa maṯupurra yalatji ngayulu nyurrangarrila tjakultjunanyi. Wangka palunya ngayulu tjakultjunkunytjala yaṉangungku tjinguru kulira wantiku. Yalatji kulira wantinytjala Katutjalu palunya ngula kuutawutjungka payira wantirriyalku, ‘Nyuntu Yiitjuku wangka kulira wantipayi ngayuluṉanta wantirriyaṉi warukutu.’ ”