1-2 Palulanguru nganaṉa yuru Kaliliyila yila nyinangu. Yuru palunya yini kutjupalatju watjalpayi, “Tapiriyatjanya.” Nganaṉatjulatju yalatji tjungu nyinapayi, Tjaaman Piitanya, Tamatjanya, Natjaniyalanya, Tjayimitjanya, ngayulu Tjaananya, Yiitjuku kutunguḻu kutjarra kutjupaṯarra. Tamatja palunya tjana yini kutjupa watjalpayi yalatji, “Tuwinanya.” Natjaniyalanya paluru manta Kaliliyinya ngurrara, tawunu Kayinanya ngurrara nyinangu. Nganaṉa yuru palula nyinanytjala Yiitjunya nganaṉala piyuku yutitjarringu yalatji. 3 Tjaaman Piitalu nganaṉanya watjaṉu, “Ngayulu yananyi kuka piitji mantjintjaku.” Nganaṉatju yini pala tjuṯangku watjaṉu, “Tjungulaka yarra!” Puutangkalatju kaḻpakatirra yuruwana yankula mungarringulpi. Nganaṉatju yankuwiyangku puṯu ngurririnangi kuka piitjiku.

4 Tjiṉṯurringkulalpilatju nganaṉatju puutangka pakara nyangu wati kutjupa mantangka ngaranytjala. Wiyalatju nuuwumilaṉu Yiitjunya, wati kutjupakutjuralatju kuliṉangi. 5 Yiitjulu nganaṉanya mirrarra tjapiṉu, “Wati tjuṯa. Kukanyurra mantjiṉu?” Nganaṉatju watjaṉu, “Wiya. Puṯulatju ngurriṉu kuka mantjilkitjangku.” 6 Paluru nganaṉanya watjaṉu, “Niitingiya waṉi!, puuta kutjupa tjayiṯingka. Niitingi waṉirranyurra kuka mantjilku.” Palulangurulatju kutjupa tjayiṯi waṉingu. Puutakutulatju puulamilara puṯulatju katura mantjiṉingi, kuka tjuṯalingku.

7 Ngayulu wati palunya nuuwimilara Piitanya watjaṉu, “Palatja mayutjunya, nganampa nyinanyi.” Piitalu ngayunya kulira kuuta walytjangka tjarrparra puutanguru tjarukatirra kapiwana Yiitjulakutu yanangi. 8 Nganampa puuta mantangka yila ngarangi. Nganaṉa puuta kutu katingi mantangka ngaratjunkunytjaku. Niitingi palunya nganaṉa puutatjarrangku puulamilara katiyanangi ngaṉṯiwana mantakutu.

9 Mantangka nganaṉa tjarukatirra waru nyangu, kampanyingka. Piitji tjuṯa warungka kampangi. Mangarriṯarra yila ngarringi. 10 Yiitjulu nganaṉanya watjaṉu, “Piitji kuka aapa niitingingka mantjiraya ngalya kati!, ngalkunytjaku.” 11 Palulanguru Tjaaman Piitalu puutangka kaḻparra niitingi palunya puulamilara katingi mantakutu. Piitji kuka tjuṯalingku ngarringi, yantaṯan pipitiyi tjirripala. Niitingi paluru nguwanpa yarralytjarringu, kuka tjuṯalingkutjarra. Wiya niitingi paluru kuka tjuṯatjarra yarralytjarringupaka, wiya. 12 Yiitjulu nganaṉanya watjaṉu, “Ngalya yarraya ngalkunytjaku!” Nganaṉa uwankarrangku kuliṉingi, “Yilta, palatja Yiitjunya ngaranyi, mayutju nganampa.” 13 Yiitjulu mangarri piitjiṯarra mantjira katirra nganaṉanya yungu ngalkunytjaku. 14 Yalatji Yiitjunya mirritjanu pakara yutirringu nganaṉala. Paluru yurrunpa nganaṉala waaḻangka kutjarrangara yutitjarringu, palumpa kutunguḻu tjuṯangka, mirringuru pakara.

15 Mangarri kukaṯarra nganaṉa ngalkura wiyara Yiitjululpi Tjaaman Piitanya tjapiṉu yalatji, “Piita, Tjaanaku katja. Ngaa tjuṯaya ngayuku yunytju nyinanyi. Tjinguru nyuntu ngaa tjuṯangka wirriḻi ngayuku puntura yunytju nyinanyi, yilta?” Paluru Yiitjunya watjaṉu, “Yuwa mayutju, nyuntu kuliṉi ngayulu nyuntupa yunytju nyinanyi.” Yiitjulu watjaṉu, “Ngayuku walytja tjuṯa tjananya yaṉṯayaṉṯara nintinma!, tjiipi wiima tjuṯa nguwanpa.” 16 Yiitjulu Piitanya piyuku tjapiṉu, “Piita, Tjaanaku katja. Tjinguru nyuntu ngayuku puntura yunytju nyinanyi, yilta?” Paluru Yiitjunya watjaṉu, “Yuwa mayutju, nyuntu kuliṉi ngayulu nyuntupa yunytju nyinanyi.” Yiitjulu watjaṉu, “Ngayuku walytja tjuṯa tjananya yaṉṯayaṉṯara nintinma!, tjiipi tjuṯa nguwanpa.” 17 Yiitjulu Piitanya piyuku tjapiṉu, “Piita, Tjaanaku katja. Tjinguru nyuntu ngayuku puntura yunytju nyinanyi, yilta?” Piitanya watjilarringu, Yiitjulu tjirripalangara wangka palunya tjapiṉutjangka. Piitalu palunya watjaṉu, “Mayutju nyuntu yuwankarraku ninti nyinanyi, wangka yalatjiṯarra nyuntu kuliṉi, ngayulu ilta nyuntupa yunytju nyinanyi.” Yiitjulu palunya watjaṉu, “Ngayuku walytja tjuṯa tjananya yaṉṯayaṉṯara nintinma!, tjiipi tjuṯa nguwanpa.” 18 Paluru Piitanya piyuku watjaṉu, “Wangka ngaatjanya kulila! Nyuntu yangupala nyinarra walytjangku kulira ngurra kutjupa tjuṯawana yankupayi. Ngula nyuntu tjiḻpirrinytjala yaṉangu kutjupangku mara ruupatjarrangkunta tayimapira katiku ngurra kutjupakutu. Ngurra palumpa nyuntu yunytjuwiya nyinaku.” 19 Yalatji Yiitjulu Piitanya watjaṉu nganaṉa yalatji kulintjaku, “Piitanya wiya walytja mirrirriku, kutjupangku palunya katirra yiluntanku. Yalatji paluru mirrirringutjangka yaṉangu tjuṯangku Katutjanya waḻkulku Piitanya kutu tjukarurru Katutjaku nyinangutjangka.” Yiitjulu Piitanya piyuku watjaṉu, “Ngayuku walytja nyuntu kutu tjukarurru nyinama!”

20-21 Piitanya Yiitjunyaṯarra tjungu yuru tjayiṯiwana yankunytjala ngayulu Tjaanalu pulanya wanaṉingi. Piitalu taaṉarringkula ngayunya Tjaananya nyangu, ngaṉṯiwana ngayulu palunya wanaṉingka. Nyakulaṉi Yiitjunya tjapiṉu, “Tjaananya nyaalytjirriku?” 22 Yiitjulu watjaṉu, “Tjinguru ngayulu Katutjanya yalatji tjapilku, ‘Tjaananya nyuntu kutu kana kanyinma!, ngayulu mantakutu piyuku ngalyananyingka.’ Tjinguru wiyaṉa wangka panyapa tjapilku. Nyuntu wiya Tjaanaku kulintjaku, nyuntu kutu ngayukutju tjukarurru nyinama, Piita!” 23 Yiitjuku walytja tjuṯangku watjara waṉipayi, “Tjaananya wiya mirrirriku.” Yiitjulu wiya palunya watjaṉu, yalatji kutju paluru watjaṉu, “Tjingurukunyu ngayulu Katutjanya tjapilku Tjaananya kana kutu kanyintjaku, tjinguru wiya.”

24 Ngayuluṉa Tjaanalu wangka yilta ngaatja wakaṉi, nyurrangarri kulintjaku. Ngayuku wangka ngaatja yilta ngarrinyi, yalatjikunyurra ninti nyinanyi. 25 Irriṯi Yiitjunya mantangka nyinapayi. Paluru tjananya yaṉangu tjuṯa palyalpayi, kuya tjanampaṯarra paluru waṉipayi. Kutu tjanala paluru ngangkari tiṉatjarrangku kutjupa kutjupa palyalpayi. Wiya yalatji yara tjuṯa ngaangka piipangka ngarrinyi, yara yalatji wiya kutju ngarrinyi. Tjinguru ngayulu yara uwankarra wakanmara, piipa tjuṯalingku ngarrimara.