Luukalu Tjunutja Yiitjunyatjarra
1
1-4 Mayutju Tjiyupulatja, yara ngaatjaṉa Luukalu nyuntupa wakaṉi nyuntu Yiitjunya mantangka nyinanyingka tjukarurrungku kulintjaku. Tjuṯa kutjupangkuya yara piipangka wakara tjunu, yurruntitja tjuṯangkuya Yiitjunya kurungku nyakula tjakultjunutja. Paluru tjanaya Yiitjukuṉu wangka nganaṉanya tjakultjunkupayi. Piipa Yiitjukuṉu wangkatjarra ngayulu riitarringkula kuliṉi. Palulanguru ngayulu yunytjurringanyi purinytju kulira wakantjaku, piipa ngaatjanya Yiitjukuṉu wangka yuwankarra, nyuntu tjukarurrungku kulintjaku. Yara ngaatjaṉa nyuntupa wakara wantirriyaṉi nyuntu nintingku kulintjaku.
Watjalku, Tjaananya pipirri ngarrinytjaku
5 Yirriṯi manta Tjuutiyanya ngurrara tjuṯaku tjanampa, mayutju tiṉa, yini Yirutanya nyinanyingka, tuḻkuku mayutju yini Tjakarriyatjanya nyinangi. Tjakarriyatjanyangarri tuḻkuku mayutju tjuṯa nyinangi tjungu. Mayutju tiṉa kutju tjanampa yirriṯi nyinangi yini Yapayatjanya. Tjakarriyatjaku miiṯa kungka Litjipitanya nyinangi. Paluru Yiranaku walytja ngaṉṯitja nyinangi. Yirana paluru tuḻkuku mayutju yurruntitja nyinangi. 6 Miiṯararra paluru kutjarra Katutjaku tjukarurru nyinapayi. Katutjaku wangkapula kulilpayi, tjukarurru yilta. 7 Kungka paluru pipirriwiya nyinarra yulkuminarringu, tjungupula palumpa miiṯaṯarra nyinarra tjiḻpirringu. 8-9 Tjakarriyatjanya, tuḻkuku mayutju tjuṯa kutjupaṯarra, Katutjaku tjaatji tiṉangka waarrkarripayi. Tuḻkuku mayutju kutjungku tjaatji tiṉangka, mungawinki tjarrparra nyiṯi paṉṯi palya tililpayi, puyungaranytjaku. Tuḻkuku mayutju tjuṯaya mungawinki tjungurripayi. Ngaralaya waṉipayi puḻi kutju nampatjarra. Nampa nyakula tjana wati kutju nampatjarra tjarrpatjunkupayi tjaatji tiṉa palula waru tilira puyutjunkunytjaku. Tjakarriyatjanya ngurrtjaraya watjaṉu, tjarrparra tilira puyutjunkunytjaku. Palulanguru tjarrparra tilira puyutjunu, tiipula kuultangka, 10 tjaatjingkaya yurilta yaṉangu tjuṯangku Katutjala tjapintjala. 11 Yunngu Tjakarriyatjalu tiipula kuultangka tilira puyutjunkula, nyangulpi ilkari ngurrara yila ngaranyingka. 12 Ilkari ngurrara palunya, nyakula nguḻurringu. 13 Ilkari ngurrara paluru watjaṉu, “Tjakarriyatja. Nguḻurringkuwiyangkuṉi kulila! Katutjalunta kulilpayi, yirriṯinu tjapiṉangi. Litjipitalu ilta katja mantjilku. Katja palunya yini watjala!, ‘Tjaananya.’ ” 14 Ilkari ngurrarangku Tjakarriyatjala piyuku watjaṉu yalatji, “Nyuntu yunyparringku Tjaananya utirrinytjala, yaṉangu kutjupa tjuṯaṯarraya yunyparringku. 15 Yutirrirra tiṉarrinytjala Katutjalu palunya nyakula yunypangku kulilku, ‘Ngaatjanya palya nyinanyi, ngayuku waarrkana.’ Palulanguru katja nyuntupanta tiṉarringkula pulakina, waama wiya tjikintjaku. Pipirri wiima paluru Katutjaku kurruntjarra ngarrirra tiṉarringkula kutu Katutjaku kurruntjarra nyinaku. 16 Tjaananya tiṉarringkula Yitjurilaku ngaṉṯitja tjuṯa nintilku, piyukuya Katutjaku tjukarurruya nyinanytjaku. Palulanguruya Katutjaku tjukarurru nyinaku. 17 Paluru tjananya nguḻuwiyangku nintilku Katutjaku wangka, wati Yilaatjalu yirriṯi tjananya nguḻuwiyangku nintilpayi nguwanpa. Kurayitjanya ngalya yananyingka, yurrun yurrunpangku Tjaanalu tjananya nintinmalpa, yaṉangu tjuṯaya Katutjaku tjukarurruya nyinanytjaku. Paapa an maama tjuṯangku Tjaanakuṉu wangka kulira katja tjuṯa an yuṉṯal tjuṯa palyangku yaṉṯayaṉṯara kanyilku. Katutjaku yunytjuwiya tjuṯangku Tjaanaku wangka kulira tjukarurrulpi nyinaku. Yalatji tjananya paluru nintilku mayutju Kurayitjakulpiya tjukarurru nyinanytjaku.” 18 Tjakarriyatjalu ilkari ngurrarangka watjaṉu, “Puṯuṉa kuliṉi. Yaalytjiyaalytjikampalitju pipirri mantjilku? Ngalitjulitju tjiḻpi an yulkumina nyinanyi.” 19 Ilkari ngurrara paluru watjaṉu, “Katutjaluṉi ngalya wantirriyaṉu, tjakultjunkunytjaku, nyupalipulan katja mantjilku. Ngayuluṉa yini Kipirilanya, Katutjalawana tjungu ngarapayi. 20 Ngayuluṉanta tjakultjunutjangka tjukarurru yilta ngaraku. Wangka palunya nyuntu kulira wantingu, palunyatjanu nyuntu tjaa patilpi nyinaku. Pipirri paluru yutitjarrinytjala kutju, nyuntu tjaa yaḻarringkula wangkaku.” 21 Tjaatji tiṉangka yurilpangkaya yaṉangu tjuṯangku ngarala puṯu kuliṉingi, Tjakarriyatjanya parrpaṯu pakantjawiyangka. 22 Pakara ngarangutjangkaya nyakula kuliṉu, yalatjingku, “Tjinguru tjukurrpa nyakunytjatjanu puṯu wangkanyi.” Puṯu tjananya wangkarra marangku kutju nintiṉingi. 23 Palulanguru paluru tjaatji tiṉangka waarrkarrirra tjiṉṯu maṉkurrpangka ngurrakutu yanu. 24 Palulanguru ngaṉṯi Litjipitanya muṯi purrkalpi nyinangi. Kiṉara payipalangka muṯi purrka ngurrangka kutu nyinangi. 25 Litjipitalu watjaṉunku yalatjingku, “Wiyalpiṉiya kulilku maṉṯi nguwanpa, Katutjaluṉi yungutjangka.”
Watjalku, Yiitjunya pipirri ngarrinytjaku
26-27 Litjipitanya kiṉara tjikitjipala muṯi purrka nyinangi. Palulanguru Katutjalu ilkari ngurrara Kipirilanya wantirriyaṉu, tawunu Natjaritjalakutu, yukarra yini Miirila wangkanytjaku. Tawunu palunya manta Kaliliyila ngarangi. Yukarra palunya Miirinya watiku ngurrpa nyinangi, rawa. Yurrunpa Miiriku walytja tjuṯangku Tjutjupanya tjangkuṉu, Miirinya miiṯa mantjira kanyintjaku. Tjutjupanya Tapitaku walytja ngaṉṯitja nyinangi. 28 Ilkari ngurrarangku Miirilara watjaṉu, “Kuutayi. Katutjanyanta yunypa nyinanyi, palurunta yilangku yaṉṯayaṉṯalku.” 29 Wangka palunya kulira puṯu kuliṉu, “Yaalytjimpaṉi ngaangku wangkangu?” 30 Miirilara ilkari ngurrarangku piyuku watjaṉu, “Miiri. Nyuntu puṯu kulintjawiya nyinama! Katutjanya yunypanta nyinanyi, palurunta ngurrtjaṉu. 31 Palulanguru nyuntu muṯi purrka nyinaku, katjalpinta yutirriku. Yutirringanyingka yini watjala!, ‘Yiitjunya.’ ” 32 Ilkari ngurrarangku piyuku watjaṉu, “Katja palunya tiṉarrirra, mayutju tiṉa nyinaku. Palunyaya yaṉangu tjuṯangku watjalku, ‘Paluru Katutjaku katjara.’ Katutjalu katja palunya nyinatjunku, mayutju tiṉa. Mayutju Tapitanya yurrunpa nyinangutja nguwanpa, mayutju tiṉa nyinaku. 33 Katja paluru Yitjurilaku ngaṉṯitja tjuṯa tjananya, kutu yaṉṯayaṉṯalku.” 34 Kulira Miirilu tjapiṉu ilkari ngurrara, “Yaalytjiyaalytjingkuṉa pipirri mantjilku?, watikuṉa ngurrpa, miiṯawiyaṉa.” 35 Ilkari ngurrarangku watjaṉura, “Miiri nyuntulakutu Katutjanyapula kuṉpu tiṉa palumpa kurrunpaṯarra tjungu ngalyankula puritjunanyingkanta katjan mantjilku. Nyuntupa katja palunya nyakulaya yaṉangu tjuṯangku watjalku, ‘Paluru Katutjakuṉu katja kutju nyinanyi.’ ” 36 Ilkari ngurrarangku Miirilara piyuku watjaṉu, “Kulila! Nyuntupa walytja wulkumanu palunya, Litjipitanya kiṉara tjikitjipalangka muṯi purrka nyinanyi. Yirriṯiya watjalpayi Litjipitanya maṉṯi nguwanpa, pipirri mantjilpayiwiya nyinanyingka. Wiya, Katutjalu aḻṯururringkula kuṉpu tiṉatjarrangkura yungu pipirri. 37 Katutjalu tjakultjunkunytjatjanungku palyalpayi, tjukarurrungku, wiya puṯu palyalpayi paluru.” 38 Miirilu watjaṉura, “Ngayulu Katutjaku waarrkana, ngayuluṉa yunyparringanyi wangka palumpa, yiltarrinytjaku ngayulawana.” Panyapa watjara ilkari ngurrara yanu.
Miirinya Litjipitalakutu yankuku
39 Palulanguru Miirinya wala yanu tawunu kutjupakutu, Litjipitanya nyakukitja. Tawunu palunya puḻi tjuṯangka ngarangi, manta Tjuutiyala. 40 Wala yankula Tjakarriyatjaku ngurrangka tjarrpangu. Litjipitanya kuutayi watjaṉu. 41-42 Miirilu kuutayi watjantjala Litjipitala pipirri pirrtjipirrtjingu wiḻangka. Katutjaku kurrunpa Litjipitala tjarrparra tjukarurrungku nintiṉu yalatji Miirila wangkanytjaku. Yalatji yunyparringkula palurura watjaṉu, “Nyuntupanta Katutjanya yunypalingku nyinanyi, Miiri. Nyuntupa pipirrikuṯarra puntura yunyparringanyi.” 43 Litjipitalu piyuku watjaṉu Miirinya, “Ngayuku mayutju ngula nyinaku, nyuntu palumpa maama nyinanyi. Ngayuluṉanta puntura yunyparringanyi, nyuntu ngayunya nyakukitja ngalya yanutjangka. 44 Yurrunpangkuṉin kuutayi watjaṉutjangka, wiḻangkaṉi pipirri pirrtjipirrtjingu. 45 Katutjaku wangka palunya ilkari ngurrarangkunta watjaṉutjangka, nyuntu yilta kuliṉu wangka palumpa. Palulanguru nyuntu yunypa nyinanyi.”
46-47 Palulanguru Miirilu watjaṉu,
“Kurrunpa winkingkuṉa Katutjanya puḻkapunganyi. Kurrunpaṉara yunyparringanyi Katutjaku. Paluru ngayunya yaṉṯayaṉṯara kanyilku warungkamarra. 48 Katutja paluruṉi kuliṉi ngayulu palumpa waarrkana nyinanyingka. Yaṉangu tjuṯangku ngayunya kulira kutuya watjalku yalatji, ‘Miiri paluru yilta yunypa nyinanyi, Katutjalu tjakultjunkunytja kulira.’ Ngula yaṉangu kutjupa tjuṯangkuṯarra wangka palunya watjalku, ngaṉṯitja tjuṯangku.
49 Nyaatjanuṉiya wangka yalatji watjalku?, Katutjalu kuṉpu tiṉatjarrangku palumpa katjaṉi yungutjangka. Katutjanya kutju mayutju tiṉa nyinanyi.
50 Yaṉangu kuwarri nyinanytja tjuṯangku, ngaṉṯitja tjuṯangkuṯarra, palunya kutungku waḻkuṉingka, paluru tjananya yaḻṯurunytjungku yaṉṯayaṉṯanmalpa.
51 Ngayulu waḻkuṉi Katutjanya, kuṉpu tiṉatjarra. Katutja paluru, payira tjananya wantirriyalpayi, yaṉangu walytjalungku puḻkapungkupayi tjuṯanya. Paluru tjanaya mayutju nyinakitja wangkapayi, paluru tjananya payira wantirriyalpayi.
52 Katutjalu tjananya mayutju paṉatja tjuṯanya payira wantirriyalpayi, kanya waarrkana tjuṯa tjananya mayutjulpi nyinatjunkupayi.
53 Katutjalu paḻtjatjirratja tjuṯa paḻtjalpayi, kanya yulytja tiṉatjarra tjuṯa tjananya payira wantirriyalpayi, yungkuwiyangku.
54-55 Nganampa yirriṯi nyinanytja tjuṯangka tjananya Yipuramanyangarri Katutjalu watjaṉu nganaṉanya ngaṉṯitja tjuṯa yaṉṯayaṉṯalkitjangku. Yilta paluru nganaṉanya kutu yaḻṯurungku yaṉṯayaṉṯara kanyiṉi.” Yalatji Miirilu Katutjanya puḻkapungkupayi.
56 Miirinya Litjipitala kiṉara maṉkurrpa nyinarra ngurrakutu piyuku yanu.
Tjaananya pipirri ngarriku
57 Palulanguru Litjipitalu katja mantjiṉu. 58 Ngurra kutju ngurrara tjuṯangkuya walytja tjuṯangkuṯarra kulira yunyparringu, Litjipitaku katja palunya yutirringutjangka, Katutjalura yaḻṯururrirra yungutjangka. 59 Katja palunya pipirri wiima kanyiṉu, tjiṉṯu tjapanpalangara. Palulanguru walytja palunya tjuṯaya tjungurringu pipirri uḻa watilkitja. Pipirri palunya watira paapawanaya yini watjaṉu, “Tjakarriyatjanya.” 60 Litjipitalu watjaṉu, “Wiya, yini ngaatjanya Tjaananya.” 61 Watjaṉuya, “Palumpa walytja kutjupa wiya yini palunya nguwanpa nyinanyi. Paapawana yini watjala!” 62 Marangkuya nintiṉu Tjakarriyatjala, pipirri yini nintintjaku. 63 Tjakarriyatjalu tjananya marangku nintiṉu piipa ngalya katinytjaku, wakantjaku. Piipa palula tjanampa wakaṉu, “Yini palunya, Tjaananya.” Riitarrirraya puntura kuliṉu. 64 Palulanguru Tjakarriyatjanya tjaa alytjurarrirra palyalpi wangkangu. Paluru Katutjanya puḻkapungu. 65 Palunya ngurrara tjuṯangkuya tjaa alytjurarrinytja tjakulpa kulira nguḻunguḻurrirra kuliṉu, “Yilta Katutjalu tjaa alytjuranu, Tjakarriyatjanya, tjaa patitjanu.” Litjipitalu yukarrawiyangku wulkuminangku kutju pipirri mantjiṉutjangka, Tjakarriyatjanya tjaa alytjurarringutjangka, yaṉangu tjuṯangku tjakulpa kulira tjakultjurinangiya ngurra tjuṯawana, manta Tjuutiyalawana. 66 Yaṉangu tjuṯalingkungkuya, Tjuutiyanya ngurrara tjuṯangku tjakultjunkunytja kulira tjapiṉuyanku, “Yilta katja palunya Katutjangka marangka nyinanyi. Pipirri palunya nyaa nguwanpa nyinaku?, tjinguru mayutju tiṉalampa nyinaku?”
Tjakarriyatjalu Katutjanya puḻkapungku
67 Katutjaku kurrunpa Tjakarriyatjala tjarrpanyingka, watjaṉu Katutjaku wangka yalatjingku,
68 “Katutjalu nganaṉanya Yitjurilaku ngaṉṯitja tjuṯa yaṉṯayaṉṯalpayi, palunyatjanu nganaṉa palya nyinanyi. Palunyalaka puḻkapuwa! 69 Katutja paluru kanalpayilampa iyalku. Kanalpayi palunya Kurayitjanya mayutju Tapitaku ngaṉṯitja nyinaku. Tapitanya paluru yirriṯi Katutjaku waarrkana nyinangi.
70-71 Yirriṯi Katutjaku wangka watjalpayi tjuṯa, tjukarurru nyinapayi. Paluru tjana Katutjakuṉu wangka watjaṉu yalatjingku. Katutjalu watjaṉu Yitjurilaku ngaṉṯitja tjuṯanya nganaṉanyaṯarra yaṉṯayaṉṯalkitjangku, yunytjuwiya tjuṯangkulanya pungkutjipingkamarra.
72 Yirriṯi paluru tjananya Yipuramanyangarri nganampa yirriṯi nyinanytja tjuṯa watjaṉu, purinytju tjananya kanyilkitjangku. Yilta paluru tjananya yalatji kanyiṉangi. 73-75 Yilta, Yipuramala paluru yirriṯi watjaṉu palumpa ngaṉṯitja juṯa, nganaṉanyaṯarra yaṉṯayaṉṯalkitjangku, pikaṯi tjuṯangkulanya pungkutjipingkamarra, nguḻuwiyalara Katutjaku tjukarurru kutu nyinanytjaku.”
76 Tjakarriyatjalu piyuku watjaṉu yara yalatji palumpa katjakutura, “Katja nyawaṉi! Nyuntu tiṉarringanyingka, yaṉangu tjuṯangkuya watjalkuntaya yalatji, ‘Tjaananya paluru Katutjaku wangka watjalpayi. Katutja paluru ngangkari tiṉatjarra nyinanyi. Tjaana paluru Katutjaku walytja nyinanyi.’ Katja nyuntu tiṉarringkula, nyuntu tjananya yaṉangu tjuṯa nintilku tjana tjukarurrulpi nyinanytjaku mayutju kutjupaku.
77 Nyuntu tjananya yaṉangu tjuṯa nintilku yalatjingku, ‘Katutjalu kuya nyurrangarrimpa waṉiku, kana kutunyurra nyinanytjaku.’
78-79 Katutjanyalampa yaḻṯurunytju nyinanyi. Paluru tjananya yirriṯi watjaṉu kanalpayinya wantirriyalkitjangku. Yilta kanalpayinya paluru ngalya yankula nintilkulanya kana kutu nyinanytjaku. Nganaṉa kuya kutu palyara nyinapayinya paluru nintilku, yiwarra palyawana yunypa nyinanytjaku.”
80 Pipirri palunya Tjaananya tiṉarrirra Katutjaku tjukarurru nyinangi. Ngurra kapiwiyawana paluru kutu nyinarra, ngula tjananya Yitjurilaku walytja ngaṉṯitja tjuṯa nintiṉingi Katutjaku wangka.