4
Yiitjunya tjingapungku mamuku mayutjungku
1 Katutjaku kurrunpatjarra Yiitjunya karru Tjuutanalanguru yanu. Kurrunpa paluru palunya yaḻṯirra katingu ngurra kapiwiyawana. 2 Ngurra palula Puratiyi tjikitjipala nyinayinangi. Mamuku mayutjungku Yiitjunya tjingapungkuyinangi kuya palyantjaku. Ngurra palula mangarri ngalkuwiya rawa nyinarra, paḻtjatjirratjarringu. 3 Palulanguru mamuku mayutjungku yalatji watjaṉu, “Tjinguru nyuntu Katutjaku katja nyinarra puḻi palatja mangarri palyala ngalkukitjangku!” 4 Yiitjululpi watjaṉu, “Katutjaku wangka ngaranyi alatji, ‘Wiya mangarri kutju ngalkura yaṉangu kana kutu nyinaku.’ ” 5 Mamuku mayutju paluru Yiitjunya katuwana katirra nintirinangi manta, waaḻa tjuṯa, mani puntu waaḻangka ngarrinyingka, yaṉangu tjuṯaṯarra. 6-7 Nintira watjaṉura, “Ngaa tjuṯaku ngayulu mayutju tiṉa nyinanyi. Mayutjungkuṉanta watjaṉi. Ngaa tjuṯakuṉanta mayutju tiṉalpi nyinatjunku, ngayunyaṉin mayutju puḻkapunganyingka. Nyuntu ngayunya puḻkapungku, yilta?” 8 Yiitjulu watjaṉu, “Katutjaku wangka ngaranyi yalatji,
‘Mayutju Katutjanya kutju puḻkapungkula tjukarurru nyinanytjaku.’ ”
9 Puṯu tjingapungkula tawunu Tjarutjalumalakutu mamuku mayutjungku Yiitjunya katirra tjaatji tiṉangka katu nyinatjunu. Nyinatjunkula watjaṉu, “Tjinguru nyuntu Katutjaku katja nyinarra katunguru wararrakati!” 10 Mamuku mayutjungku piyuku watjaṉu, “Katutjaku wangka yalatji ngaranyi,
‘Ilkari ngurrara tjuṯa tjananya Katutjalu watjalku nyuntunyaya purinytju kanyintjaku.’ ”
11 Palulanguru Yiitjula piyuku watjaṉu, “Katutjaku wangka kutjupa ngaranyi,
‘Marangkuntaya ilkari ngurrara tjuṯangku katiyanamalpa, puḻingkanu punkaltjipingka.’ ”
12 Yiitjulu watjaṉu, “Katutjaku wangka ngaranyi yalatji,
‘Yaṉangungku wiya Katutjanya watjantjaku, paluru walytjangku kulira palyalpayi.’
Palulanguru ngayulu wiya Katutjanya watjalku ngayunya yaṉṯayaṉṯantjaku.” 13 Mamuku mayutjungku Yiitjunya puṯu tjingapungkula puṯu kuliṉingi. Ngula piyuku ngalya yankula tjingapungkunytjakitjangku wantikatirra yanu.
Paṉa Kaliliyilawana tjananya Yiitjulu tjakultjurinamalpa
14 Palulanguru Yiitjunya yanu Katutjaku kurruntjarra, manta Kaliliyilakutu. Ngurra palula Yiitjunya nyinanyingka yaṉangu tjuṯangkuya watjarinangi, ngurra palula tjayiṯiwanangku. 15 Yiitjunya yankula Tjuwuku tjaatji tjuṯawana tjananya nintirinangi. Nintiṉingitjangka kuliraya yaṉangu yuwankarrangku puḻkapungangi. 16 Tawunu Natjaritjalakutu Yiitjunya yankula Tjuwuku tjaatjingka tjarrpangu, tjiṉṯu Tjarritiyingka. Kututja paluru Tjuwuku tjaatjingka tjarrpapayi, tjiṉṯu Tjarritiyingka. Ngurra nyarra palula paluru pipirri wiima nyinarra tiṉarringu. Tjaatjingka tjarrparra nyinarra pakaṉulpi Katutjaku wangka riitamilalkitja. 17 Yiitjukuraya yungu piipa, Katutjaku wangka, yurrunpa nyinapayingku Yaatjayalu tjunutja. Piipa palunya ruulutapintjatjanu kanyiraya yungu. Yiitjululpi piipa palunya mantjira yarralytjanu riitamilalkitjangku. Alatji paluru riitarringu,
18 “Katutjaku kurrunpatjarra ngayulu nyinanyi palumpa waarrka palyalkitja. Katutjaluṉi ngurrtjara watjaṉu palumpa wangka tjakultjunkunytjaku, maralpa tjuṯangka, yaṉangu kutjupa tjuṯangkaṯarra. Paluru ilta aḻṯurunytju nyinanyi. Paluru tjiilangka nyinapayi tjuṯa yaṉṯayaṉṯalpayi. Paanga tjuṯaṯarra paluru yaṉṯayaṉṯalpayi. Paluru maralpa tjuṯaṯarra yaṉṯayaṉṯalpayi.
19 Paluruṉi wantirriyaṉu ngayulu yalatji nyurra nyatjakultjunkunytjaku, ‘Katutjalu nyurrangarrimpa kuya waṉirra yaṉṯayaṉṯalku.’ ”
20 Yiitjulu yalatji riitarrirra piipa panyapa ruulutapimilara wati kutjupakura maa katirra yungkula nyinakatingu. Tjaatji palulaya yaṉangu tjuṯangku yungkula nyinakatingutja nyakula nyinatjunu. 21 Palulanguru Yiitjulu tjananya nintiṉu yalatji, “Wangka panyapa Yaatjayalu yurrunpa tjunutja ngayunyatjarra. Yaatjayalu ngayunya watjaṉu, Katutjalu ngayunya wantirriyaṉu nyurrangarrila tjakultjunkunytjaku.” 22 Kulira tjana yunyparringkula wangkangu. “Ninti puntungkulanya nintiṉi. Paluru ngangkari puntutjarrangku palyalpayi. Nganalumpa palunya nintiṉu.” Kutjupa tjuṯangkuya watjaṉu, “Palatja wiya Katutjakuṉu, palatja ngaa ngurrara, Tjutjupaku katja nyinanyi.” 23 Yiitjulu tjananya watjaṉu, “Tjinguruṉinyurra watjalku, ‘Ngaa ngurrara nganaṉanya Katutjakuṉu ngangkari tiṉatjarrangku palyala!’ Tjinguruṉinyurra yalatjiṯarra watjalku, ‘Kuliṉulatju, nyuntu tawunu Kapaniyamala tjananya ngangkaritjarrangku palyaṉutja. Ngaangka nganaṉanyalpilanyatju ngangkaritjarrangku palyala!, nyuntupa ngurra walytjangka.’ ” 24 Piyuku tjananya Yiitjulu watjaṉu, “Wangka ngaatjanyaya kulila! Katutjaku wangka watjalpayiku wiyaya yunyparringanyi, ngurra kutju ngurrara tjuṯaraya. Palumpa wangka kulilwiyaya nyinanyi. Yalatji nguwanpa ngayuku wangka nyurrangarri wiya kuliṉi.” 25 Yiitjulu tjananya piyuku watjaṉu, “Yuwa, ngayulu tjananya tawunu Kapaniyamala palyalpayi. Katutjaluṉi wantirriyaṉu tawunu kutjupa tjuṯangka yaṉangu tjuṯa palyantjaku, Yilaatjanya wantirriyaṉutja nguwanpa, ngurra walytja ngaakutu wiyaṉi wantirriyaṉu. Wangka yalatjinyurra kulintjaku. Yirriṯi Katutjaku wangka watjalpayi, Yilaatjanya nyinanyingka, Tjuwu tjuṯaya kuya nyinangi. Wiyaya Yilaatjaku wangka kulilpayi. Yiiya tjirripala nguwanpaya nyinangi, kapi punkantjawiya. Mangarri tjanampa wiyarringu. Minyma waḻukuta tjuṯaṯarra mangarriwiyaya nyinangu. 26 Katutjalu wiya Yilaatjanya wantirriyaṉu tjanalakutu waḻukuta Tjuwu tjuṯakutu paḻtjantjaku, wiya, waḻukuta kutjupakutu paluru wantirriyaṉu paḻtjantjaku, manta kutjupangka Tjayitanala, tawunu Tjirapatjala. Palunya nguwanpa ngayulu kutjupa ngurrara tjuṯangka ngangkaritjarrangku palyalpayi.” Yiitjulu tjananya piyuku watjaṉu,
27 “Wangka kutjupa palunya nguwanpa yalatji. Katutjaku wangka watjalpayi yini Yilatjanya yirriṯi nyinanyingka, Tjuwu tjuṯaya kuya nyinangu, Yilatjaku wangka kulilwiya. Tjuwu pangki pikatjarra tjuṯaṯarraya nyinangi. Katutjalu wantirriyaṉutjangka Yilatjalu tjananya wantirra ngurra kutjupa ngurrara pangki pikatjarra palyaṉu, Tjiriyanya ngurrara, yini Nayamananya. Palunya nguwanpa ngayulu kutjupa ngurrara tjuṯangka ngangkaritjarrangku palyalpayi.” 28 Wangka panyapaya kulira tjaatji ngurrara tjuṯara yunytjuwiyarringu. 29 Ngurrkurringkula pakara Yiitjunya witira katingu, tawunungka tjayiṯiwana. Puḻi katuwanaya maa katingi. Tawunu tjanampa ngarangi puḻi katu palula. Katinguya puḻi ngankirrikutu, Yiitjunya yuṉṯura yiluntankukitjangku. 30 Palulanguru Yiitjunya ngururrngururrpa tjanampa yaṉangu tjuṯanguru yanu. Wiyaya nyangu palunya.
Ngaatja wati mamutjarra
31 Tawunu Kapaniyamalakutulpi Yiitjunya yanu. Tawunu palunya manta Kaliliyila ngarangi. Tawunu palula Yiitjunya yankula Tjuwuku tjaatjingka tjarrparra nintiṉu tjananya, tjiṉṯu Tjarritiyi. 32 Yiitjulu tjananya nintingku nintintjala yunypangkuya kuliṉingi, “Ngaangkulanya nintingku nintilpayi, wiya Muutjaku wangka nintilpayi tjuṯangku nintingkulanya nintilpayi, wiya.” 33 Tjuwuku tjaatji palula wati mamutjarra nyinangi. Paluru mirrarra raapangku Yiitjunya tjapiṉu yalatji, 34 “Yiitju, Natjaritjanya ngurrara. Nyaakitjanu ngalyanu? Ngayunyaṉinu mamutjarra pungkukitja, mamu kutjupa tjuṯaṯarra, tjunguralanyatjunu? Ngayulu nyuntupa ninti nyinanyi, nyuntu Katutjaku walytjaran nyinanyi yilta, palumpa. Nyuntu tjukarurru kutu palumpa nyinapayi.” 35 Yiitjulu mamu palunya payiṉu, “Ataṉarri! Wati palatja wantirra pakara yarra!” Mamu paluru wati kurrunpangka nyinangitjatjanu pakara tjalkaḻungu. Tjalkaḻunganyingka, wati palunya punkara ngarrirra pakaṉulpi, pikara wiyarringu. 36 Yaṉangu tjuṯangkuya nyakula yunypangku wangkangu yalatji, “Ngaangku ngangkari tiṉatjarrangku payira wantirriyalpayi. Tjinguru ngaatja wangka palyatjarra, kulintjaku nganaṉa.” 37 Yiitjulu mamutjarra tjuṯa, pikatjarra tjuṯaṯarra palyarinkupayi. Yaṉangu tjuṯangku nyakula tjana tjakultjurinangi ngurra tjuṯawana.
Yiitjulu tjananya palyalku
38 Pakara Tjuwuku tjaatji palunya wantirra, Yiitjunya yanu Tjaamanaku waaḻakutu. Waaḻa palula Tjaamanaku yumari miiṉṯa puntu wuumpi ngarringi. Tjapiṉuya palyantjaku. 39 Wulkumina palulakutu yankula ngarala Yiitjulu watjaṉu palyarrinytjaku. Pika paluru wiyarringu. Wulkumina paluru pakara parra ngarala mangarri kukaṯarra yungkula tjananya kanyiṉingi. 40 Palulanguru tjiṉṯu yunngurrinytjala, yaṉangu palunya ngurrara tjuṯangkuya pikatjarra tjuṯa katingu Yiitjulakuturaya, pampura palyantjaku. Pikatjarra yuwankarra tjananya Yiitjulu marangku pampura palyaṉu. 41 Mamutjarra tjuṯaku tjanampa mamu payira wantirriyalpayi. Mamu tjuṯangkuya watjalpayi tjalkaḻungkukitjangku, “Nyuntu Katutjaku katja.” Kala tjananya marrkuṉu wangkawiyarrinytjaku. Yiitjulu mamu tjuṯa marrkulpayi, wangkarraya Yiitjunya Katutjakuṉu watjalpayingkamarra. Mamu tjuṯa ninti nyinangu paluru Kurayitjanya nyinangu, Katutjalu yirriṯi palunya watjara wantirriyaṉutja.
Yiitjulu kuliṉu, “Ngayulu tjananya ngula tjakultjunku ngayuluṉa Katutjaku katja, wiya mamu tjuṯangku tjakultjunkunytjaku tjanala.”
42 Palulanguru Yiitjunya palumpa kutunguḻu tjuṯaṯarra ngarringu. Mungawinkilingku Yiitjunya kutju pakara yanu liiḻiwana, yaṉanguwiyakutu. Yaṉangu tjuṯangkuraya puṯu nyakula ngurriṉingi. Ngurrira nyangulpiya. Puṯuya marrkuṉu ngurra panyapakutu ngaṉṯikutu yankunytjaku. 43 Watjaṉu tjananya, “Ngurra tjuṯa kutjupawanaṯarra ngayuluṉa tjananya yankula nintirinamalpa. Yalatjikuṉi Katutjalu ngayunya wantirriyaṉu, ngurra tjuṯawana nintirinkunytjaku. Ngayuluṉa tjananya nintilku Katutjaku tjakulpa palya, yalatji, Katutjalu yaṉangu tjuṯa walytjara yaṉṯayaṉṯalpayi.” 44 Palulanguru Yiitjunya manta Tjuutiyalawana yanangi. Tjuwuku tjaatji tjuṯangka tjananya Tjuwu tjuṯa nintirinangi.