1 Yaṉangu tjuṯangka tjananya wangkarra wiyarringkula Yiitjunya yankula tawunu Kapaniyamala tjarrpangu. 2 Ngurra palula tjuulytji tjuṯaku mayutju nyinangi. Mayutju palumpa waarrkana pikatjarra ngarringi, ilukitja. Pikatjarra palumpa mayutju palurura yunypa nyinangi. 3 Yiitjunya tawunu palula nyinanyingka mayutju paluru kulira mayutju Tjuwu tjuṯa iyaṉu, yankulaya Yiitjunya tjapintjaku yalatji, “Ngayuku waarrkana pika puntutjarra ngarrinyi. Ngalya yankula palyala!” 4-5 Mayutju paluru tjanaya Yiitjulakutu yankula watjaṉu yalatji, “Ngalya yankulara waarrkana palyala! Tjuulytji tjuṯaku mayutju paluru wati palyalampa nyinanyi, walytja nganampa, Tjuwu tjuṯaku. Palurulampatju tjaatji palyaṉu. Palulanguru palya nyuntu yankula palyalku?” 6-7 Kulira tjananya tjungurringkula Yiitjunya yanu mayutju palumpa waaḻakutuya. Yaṉangu tjuṯangku Yiitjunya wanarinangi. Yilarringanyingkaya mayutju paluru palumpa walytja tjuṯa iyaṉu, ngaparrikatirra wangkanytjaku, yalatji Yiitjularaya, “Mayutju paluru watjaṉu. Wiya nyuntu ngalya yankula palumpa waaḻangka tjarrpanytjaku. Paluru nyuntupa mayutju tiṉaku kuṉṯarringanyi. Nyuntu ngaanguru kutju ngarala watjala!, waarrkana palumpa pikatjarra palyarrinytjaku. Paluru nyuntupa kuṉṯarringanyi. Paluru mayutju wiima nyinanyi, kanya nyuntu mayutju tiṉa nyinanyi. 8 Paluru yalatjiku ninti nyinanyi, mayutjungku watjaṉingka waarrkanangku palyalpayi. Palumpa mayutju tjuṯangkuya watjantjala, nganampa mayutjungku palyalpayi. Paluru tjanampa mayutju nyinanyi tjuulytji tjuṯaku. Tjuulytji kutju paluru watjara iyantjala, paluru yankupayi. Tjuulytji kutjupa paluru ngalya yankunytjaku watjantjala, palulakutuya ngalya yankupayi. Paluru waarrkana kutjupangka tjaamtjingi palyantjaku watjantjala, waarrkana paluru palyalpayi. Palulanguru paluru nyuntunya watjaṉu ngaanguru ngarala kutju mayutju tiṉangku watjala!, palumpa waarrkana pikatjarra palyarrinytjaku.” 9 Mayutju tjuulytji paluru Yiitjunya ngangkaritjarra kuliṉu palyalpayi. Yalatji paluru kulintjala Yiitjunya yunyparringu. Nguṉṯilangarala tjananya Yiitjulu yaṉangu tjuṯangka watjaṉu, “Tjuulytji tjuṯaku mayutju paluruṉi ngangkari puntutjarra kuliṉi, ngayuluṉa waṉmanguru wangkarra kutju palyantjaku. Yaṉangu kutjupa tjuṯangku wiya kuliṉi ngayuluṉa ngangkaritjarrangku waṉmanguru watjara palyalpayi. Yitjurilaku walytja ngaṉṯitja tjuṯangkuṯarra wiya yalatji kuliṉi.” Palulanguru Yiitjulu wangkarra yurilnguru mayutjuku waarrkana kanaṉu. 10 Mayutju palumpa walytja tjuṯaya ngaṉṯikutu waaḻakutu yanu. Yankulaya nyangu, waarrkana palunya palyalpi nyinanyingka.

11 Palulanguru tawunu kutjupakutu yanu Nayinalakutu, Yiitjunya, palumpa kutunguḻu tjuṯaṯarra. Yaṉangu kutjupa tjuṯaṯarra palulawana tjungurringkula yanu. 12 Tawunu Nayinala yilarrirra Yiitjulu, palumpa kutunguḻu tjuṯangkuṯarra nyangu, wati mirri kuupinangka ngalya katinyingka tjawara tjarrpatjunkukitjangku, palunya ngurrara tjuṯangku. Kuupina palunya patilpayiwiyaya katiyanangi. Mirri palunya, minyma waḻukutaku katja kutjura ngarringi. 13 Mayutju Yiitjulu minyma waḻukuta palunya nyakula yaḻṯururringkula palunya watjaṉu, “Ulanytjawiyarriwa!” 14 Yiitjulu yankula kuupina pampuntjala mirri katipayi tjuṯaya nyakula ngarakatingu. Mirri palunya Yiitjulu watjaṉu, “Yangupala. Watjaṉiṉanta pakara katurringkula nyina!” 15 Palulanguru mirri palunya kanarringkula nyinarra palyalpi wangkawangkangi. Yiitjulu marangku witira walatjunkula kuupinanguru katingu palumpa maamakutu. 16 Nguḻurringkulaya wangkarra waṉingi, “Ngaatjanya Katutjakuṉu ngangkari tiṉatjarra.” Palulanguruya Katutjanya waḻkuṉu alatji, “Ngaatja Katutjaku walytja, mayutju tiṉa, Katutjaku wangka watjalpayi. Katutjalu palunyalampa wantirriyaṉu. Ilta ngaatjanya Katutjakuṉu.” 17 Palunya ngurrara tjuṯangkuya mirri kanaṉutjangka tjakultjurinangi ngurra kutjupa kutjupawana, manta Tjuutiyalawanaṯarra.

18 Tjaanaku walytja tjuṯangkuya tjakulpa palunya kulira Tjaananyaya tjakultjunu. 19 Tjaanalu pulanya palumpa walytja kutjarra yaḻṯirra iyaṉu mayutju Yiitjulakutu yankula yalatji wangkanytjakurapula, “Tjaanalulinyatju ngalya wantirriyaṉu. Palurulinyatju watjalpayi mayutju Kurayitjanya ngalya yankunytjaku. Nyuntu tjinguru Kurayitja?, Katutjalu watjara wantirriyaṉutja. Tjinguru paluru ngula ngalya yankuku?” 20-21 Ngurra palula Yiitjulu tjananya kutu palyaṉingi, yaṉangu pikatjarra tjuṯa, kurutjarra tjuṯaṯarra. Mamutjarra tjuṯangka mamu tjuṯa payira wantirriyalpayi. Tjaanaku walytja paluru kutjarrangku yankula Yiitjunyapula tjapiṉu, “Tjaanalulinyatju iyaṉu kapingka papatatjimilalpayingku nyuntunya wangkarra kulintjaku yalatji, ‘Nyuntu tjinguru Kurayitjanya?, Katutjalu watjara wantirriyaṉutja. Tjinguru paluru ngula ngalya yankuku?’ ” 22 Palulanguru pulanya watjaṉu, “Tjaanalakutupula yankula watjala!, nyupalipulan kuwarri nyakula kuliṉutjangku. Yalatjipula yankula watjala! Pampa tjuṯangkuya kurungkulpi nyanganyi. Nyumpu tjuṯaya tjunta taayitilpiya yulytjayinanyi. Pangki pikatjarra tjuṯaya pangki palyalpiya yulytjayinanyi. Pinatjarra tjuṯangkuya pina alytjurangkulpiya kuliṉi. Mirri ngarringutja tjuṯaya kanalpi nyinanyi. Maralpa tjuṯangkuya tjakulpa palya kuliṉi.” 23 Yiitjulu pulanya piyuku watjaṉu, “Nyupali yankula Tjaananya watjala! ‘Ngayuluṉa yaṉangu tjuṯa palyalpayi Katutjakuṉu ngangkaritjarrangku. Tjaana nyuntu tjukarurru kutu kulintjaku, ngayulu Katutjakuṉu, ngangkari tiṉatjarra Kurayitjanya nyinanyingka.’ ” 24-26 Palulanguru Tjaanaku walytja kutjarrapula ngaṉṯikutu yanutjangka ngaṉṯi tjananya, Yiitjulu yaṉangu tjuṯa nintiṉingi yalatji, “Tjaananya paluru ngurra kapiwiyawana nyinapayi. Yirriṯi nyurrangarri waṉma yankupayi, palunya nyakula kulilkitja. Wiyanyurra waṉma yankupayi, wati mungutja kulilkitja, Katutjaku wangka watjalpayi kulilkitjanyurra yankupayi. Wiyanyurra waṉma yankupayi, yaṉangu mantarra palyatjarra nyakukitja, Tjaanaku wangka kulilkitjanyurra ankupayi. Mani puntutjarra, mantarra palyatjarra mayutju tiṉaku waaḻangka nyinapayi, kanya Tjaananya ngurra palulawana wiya nyinapayi mantarra palyatjarra. Yuwa, Katutjaku wangka watjalpayi kulilkitja nyurrangarri waṉma yankupayi. Katutjaku wangka watjalpayi palyalingku Tjaananya nyinanyi. Paluru wirriḻi nyinanyi, Katutjaku wangka watjalpayi kutjupa tjuṯangka. 27 Yirriṯi nyinapayingku wakaṉu, Tjaananya ngula utirringkula tiṉarrirra nyinanytjaku. Yirriṯi yalatjingku wakaṉu Katutjakuṉu wangka, ‘Ngayuluṉa wati kutju tjakultjunkupayinyaṉa yurrunpa paṉakutu wantirriyalku. Palunyatjanu ngayulu mayutju tiṉa kutjupa wantirriyalku. Palunyaṉa iyalku yankula tjananya yurrunpa nintintjaku, tjukarurrutjuya nyinanytjaku.’ ” Yiitjulu tjananya yaṉangu tjuṯa piyuku watjaṉu, 28 “Kulilaya! Yaṉangu kutjupa tjuṯangka wirriḻi Tjaananya nyinanyi, Katutjaku wangka watjalpayi tjuṯangkaṯarra. Wangka kutjupaya kulila! Katutjanya Tjaanaku yunypa nyinangu. Paluru kutjupa tjuṯakuṯarra yunypa nyinanyi, palumpa walytja tjuṯaku. Ngayuku wangka kulilpayi tjuṯakuṯarra Katutjanya yunypalingku nyinaku. Paluru tjananya ngulytjura yaṉṯayaṉṯalku.” 29 Yirriṯi yaṉangu yuwankarrangku Tjaanakuṉu wangka kulira papatatjirringkupayi, kuya palyalpayi tjuṯa, kamantaku mani mantjilpayi tjuṯaṯarra. Yalatji palyaya kulira papatatjirripayi, 30 kanya Paratji tjuṯangku, Muutjaku wangka nintilpayi tjuṯangkuṯarra Tjaanalu Katutjakuṉu wangka nintintjala, kuliraya wantipayi. Wiyaya tjapilpayi Tjaanalu tjananya papatatjimilantjaku.

31 Yiitjulu tjananya yaṉangu tjuṯangka piyuku watjaṉu, “Yaṉangu tjuṯa kuwarri nyinanyi. Nyaa nguwanpaya nyinanyi? 32 Yalatji nguwanpaya nyinanyi. Pipirri tjuṯaya ngurrangka ngururrpa yinkangarapayi nguwanpa. Pipirri tjuṯangku tjananya kutjupa tjuṯangka watjalku yalatji, ‘Nganaṉatju kiitawu wangkatjingantjala nyurrampa, wiyanyurra taanytjirrikitja kulira ngalya yanu. Nganaṉatju yulanyingka, wiyanyurra kulira ngalya yanu, tjungu yulakitja. Nganaṉanya nyurrangarri kulira wantipayi.’ ” 33 Yiitjulu tjananya piyuku watjaṉu, “Tjaanalu tjananya kapingka papatatjimilalpayi, paluru waamaku ngurrpa nyinangi. Paluru mangarri wantipayi ngalkuwiyangku Katutjanya tjapilkitjangku. Tjaanaku wangkanyurra kulira wantipayi. Yalatjinyurra wiyawanangku watjalpayi, ‘Tjaananya kuya, mamutjarra.’ 34 Ngayuluṉa yaṉanguku katja nyinanyi, yaṉangu kutjupa tjuṯa nguwanpa ngayulu ngalkura tjikiṉi palya. Yalatjinyurra wiyawanangku watjalpayi. ‘Yiitjunya kuya, yaṉangu kuya palyalpayi tjuṯaku tjanampa walytja nyinanyi, kamantaku mani mantjilpayi tjuṯakuṯarra.’ 35 Yuwa, kuya palyalpayi tjuṯangku, kamantaku mani mantjilpayi tjuṯangkuṯarraṉi kulira yunyparripayi, kanya nyurrangarri ngayukuṉu wangka kulira wantinyi.”

36 Palulanguru Paratjingku Yiitjulakutu yankula tjapiṉu, tjungungku ngalkukitjangku. Yankulapula palumpa waaḻangka tjarrparra nyinangi ngalkukitja. 37 Ngurra palula Yiitjunya nyinangitjangka tjakulpa kungka kuya palyalpayingku kuliṉu. Waaḻa palulakutu ankula kungka paluru paatulatjarra tjira katingu Yiitjulakutu, paṉṯi palyatjarra. 38 Yiitjunya nyinanyingka, kungka paluru Yiitjula tjinangkara pupakatirra yulangi. Yularra tjirrmilypangku Yiitjunya tjina wiitanu. Paluru Yiitjunya tjina yuriṉu, mangka waṯawara palumpaṉungka. Yiitjunya tjina nyunytjura paatula alytjura tjira paṉṯi palyatjarrangku nyapaṉu tjina. 39 Wati paluru Paratjingku nyapaṉingka nyakula walytjangku kuliṉu, “Wati ngaatjanya Katutjaku wangka watjalpayi yilta nyinarra ninti nyinamara yalatjiku. Kungka ngaa paluru nyinanyi, wati tjuṯanya yaḻṯirra kanyilpayi, kutjuṯu kutjuṯu. Kungka palunya payira wantirriyanmara ngalya yankula pampuntjala tjina.” 40 Yiitjulu wati palunya watjaṉu, “Tjaamana, watjalkitjarringuṉanta.” Tjaamanalu tjapiṉu, “Nintilpayi, nyaaṉin watjalku?” 41 Yiitjulu yara watjaṉu, “Wati kutjarra nyinarra mani yungkupayingka tjapilkupula ngula ngaparrtji yungkukitjangku. Paluru kutjungku tjapilku mani tiṉaku, ‘Yuwaṉi tala tuuntiyi payip tjawutjuna!’, kanya kutjupangku tjapilku, ‘Yuwaṉi tala tuu tjawutjuna!’ Yalatji mani kanyilpayingku pulampa yungku, ngula ngaparrtjingkupula yungkunytjaku. 42 Ngula paluru kutjarrangku puṯu kulilku ngaparrtji yungkukitjangku. Wati panyapa mani kanyilpayingku aḻṯururringkula pulanya watjalku, ‘Nyupali mani kanyintjawiyangka ngayuluṉantapula wantinyi. Wiyapulan mani palunya ngaparrtjingku ngayunyaṉipulan yungkunytjaku, wantipula!’ Paluru kutjarra pukuḻpa yanku ngurrakutu.” Yiitjulu Tjaamananya watjaṉu, “Tjaamana. Mani kanyilpayi aḻṯururringkula pulanya wantingu. Yaalytjin kuliṉi? Ngananya puntura yunyparrirra nyinaku mani yungkupayi palumpa?, tala tuu tjawutjuna mantjiṉutjanya?, tjinguru tala tuuntiyi payip tjawutjuna mantjiṉutjanya?” 43 Tjaamanalu watjaṉu, “Tala tuuntiyi payip tjawutjuna mantjiṉutjanya. Paluru puntura yunyparriku mani yungkupayiku.” Yiitjulu watjaṉu, “Nyuntu tjukarurru kuliṉi.” 44 Yiitjulu nguṉṯilangarala kungka palunya nyakula Tjaamanala watjaṉu, “Nyuntupa ngurrakutuṉa ngalya yankula nyinanyingka, wiyaṉin yungu kaṉilpa kapitjarra, tjinaṉatju paltjintjaku.” Yiitjulu piyuku watjaṉu, “Kanya kungka ngaatjanya nyawa! Yularra tjirrmilypa yintirra ngaangkuṉi tjina paltjiṉu. Tjirrmilypa yintirra ngayunya yuriṉu mangka palumpaṉungka. 45 Ngayuluṉa ngalya yankula nyinanyingka, wiyaṉin nyunytjuṉu.”

Yiitjulu piyuku watjaṉu, “Kanya kungka ngaatjanya puntura yunyparringu ngayuku, tala tuuntiyi payip tjawutjuna mantjiṉutjanya nguwanpa. Paluru tjina ngayunya tjuṯangara nyunytjuṉu. 46 Nyuntuṉin wiya katangka tjira paṉṯi palyatjarra yintiṉu, kanya kungka ngaangku kutjuṉi tjinangka yintiṉu, tjira paṉṯi palyatjarra. 47 Palulanguruṉanta watjaṉi, kungka palumpa kuya puntuṉara yurrun yurrunpa waṉingu. Palulanguru palurutju puntura yunyparringanyi. Yaṉangu kutjupaku kuya wiima ngayulu waṉinyingka, palurutju wiya puntura yunyparriku.” 48 Kungka palula Yiitjulu watjaṉu, “Yilta, nyuntupa kuyaṉanku yurrunpa waṉingu.” 49 Tjungu nyinanytja tjuṯangkuya wangkarra waṉingu yalatji, “Ngaangku wiya kuya waṉinyi, Katutjalu kutju kuya waṉinyi.” 50 Yiitjulu kungkangka piyuku watjaṉu, “Ngayuluṉa kuya waṉipayi nyuntu kulira yunypa nyinaku. Nyuntu kana kutu nyinaku Katutjaku ngurrangka.”