1 Palulanguru yaṉangu tjaampalangku Yiitjunya tjakultjunu yalatji, “Kaliliyinya ngurrara tjuṯaya ankula Tjarutjalumala tjarrpangu, tjawirrilyi Katutjaku yungkukitja. Tjaatji tiṉangka Payilataku tjuulytji tjuṯangku tjananya mirri pungu. Tjinguruya Kaliliyinya ngurrara paluru tjana kuya puntura palyaṉutjangka, tjuulytji tjuṯangku pungu. Katutjalu yaṉṯayaṉṯalwiyangku kuliṉu tjuulytji tjuṯangkuya tjananya mirri pungkunytjaku.” 2-3 Tjakulpa palunya kulira Yiitjulu tjananya yaṉangu tjuṯa watjaṉu, “Wiyawanangku nyurrangarri ngunytji kuliṉi. Kaliliyinya ngurrara palunya tjananya Katutjalu wiya wantingu. Tjana wiya kuya puntura palyaṉutjangka tjuulytji tjuṯangku pungu. Yaṉangu yuwankarrangkunyurra kuya wiima palyalpayi nguwanpa, tjana kuya wiima palyalpayi, wiya tjana kuya puntura palyalpayi. Wangka ngaatjanyaya kulila! Katutjaku wangkawana nyurrangarri tjukarurru nyinanytjaku. Wiyangka nyurrangarri palunya tjananya nguwanpa yilta mirrirriku. 4 Tjalumanya ngurrara tjuṯanya kulilaya! Waaḻangku tjananya yaṉangu yayitinpala punkara paḻira iluntanu.” Piyuku tjananya Yiitjulu watjaṉu, “Tjingurunyurra ngunytjingku kuliṉi Tjalumanya ngurrara paluru tjana kuya puntura palyaṉutjangka Katutjalu yaṉṯayaṉṯalwiyangku wantingu waaḻangku tjananya paḻira iluntankunytjaku. Yalatji wiya. Yaṉangu yuwankarrangkunyurra kuya wiima palyalpayi nguwanpa, tjana kuya wiima palyalpayi, wiya tjana kuya puntura palyalpayi. 5 Wangka ngaatjanyaya kulila! Katutjaku wangkawana nyurrangarri tjukarurru nyinanytjaku. Wiyangka nyurrangarri palunya tjananya nguwanpa yilta yiluku.”

6 Palulanguru Yiitjulu tjananya yaṉangu tjuṯangka, yara yalatji watjaṉu. “Mayutju kutjungku watiya awalyurru wiima tjawara ngaratjunku, palumpa kaanangka, ngula mangarri mantjilkitjangku. Kaana palula watiya kutjupa tjuṯaṯarra ngarala waṉimalpa, kiripitji tjuṯa. Ngula mayutju paluru piyuku ngalyankula mangarri awalyurru watiya palula puṯu nyaku. 7 Palulanguru paluru palumpa waarrkanangka watjalku, ‘Yiiya tjirripalangkaṉa ngalya yankula mangarri awalyurru puṯu nyangangi, watiya palula. Palulanguru nyuntu yatura waṉirriyala warukutu!’ 8 Waarrkanangku watjalku, ‘Mayutju. Wanyuwarri paṯala!, ngayuluṉa tjinguru tjawara piyuku kurrpinmalpa. Piyukuṉa yarrkalku, mangarri pakantjaku. 9 Yiiya kutjupangka tjinguru mangarri pakalku. Wiyangka nyuntu watjantjala kala palyaṉa yatura waṉiku warukutu.’ ”

10 Palulanguru tjiṉṯu Tjarritiyingka, Yiitjulu tjananya nintiṉingi Tjuwuku tjaatjingka. 11 Tjaatji palula minyma pikatjarra nyinangi, pupapupa ulytjayinkupayi, mamungku yirriṯi patjara kuyaṉutjatjanu. Pika palunyatjarra rawa puntu nyinangi yiiya yayitinpala. 12 Minyma palunya nyakula Yiitjulu yaḻṯirra watjaṉu, “Yulkumina. Nyuntu palyalpi nyinaku.” 13 Yiitjulu pampura palyaṉutjangka, tjukarurrulpi ngarangi pupapupawiyalpi. Palulanguru minyma paluru Katutjanya waḻkuṉu.

14 Tjuwuku tjaatjiku mayutju, Yiitjukura mulyarrarringu, Tjarritiyingka Yiitjulu minyma pikatjarra palunya palyaṉutjangka. Tjaatjiku mayutju paluru yaṉangu tjuṯangka watjaṉu, “Tjarritiyingka, pikatjarra tjuṯa wiya ngaakutu ngalya katinytjaku, ngangkaritjarrangku palyantjaku. Luwulampa ngaranyi tjiṉṯu tjikitjipalangka ngangkaritjarrangku waarrkarringkula palyantjaku, Tjarritiyingka wiya.”

15 Mayutju Yiitjulu watjaṉu yalatji, “Wiyawanangkunyurra kuliṉi. Tjarritiyingkanyurra tuungkiyi ruupatjarraku, tjinguru puluka ruupatjarraku aḻṯururringkula yarrara wantirriyalpayi kapikutu. 16 Palunya nguwanpa minyma ngaatjanya pikatjarraku ngayulu aḻṯururringkula palyaṉu Tjarritiyingka. Paluru tuungkiyi mungutja nguwanpa wiya paluru Yipuramaku walytja ngaṉṯitja nyinanyi, nganaṉanya nguwanpa nyinanyi.” 17 Tjaatjiku mayutju paluru, palumpa walytja tjuṯaṯarra Yiitjukuraya mulyarra ngarangi. Yaṉangu kutjupa tjuṯangkuya wangka panyapa kulira yunyparringuraya, “Paluru ilta ngangkari tiṉatjarrangku pikatjarra tjuṯa tjananya palyalpayi.”

18 Yiitjulu tjananya watjaṉu yalatji, “Katutjalu palumpa walytja tjuṯa ngulytjura kanyilku. Yurrunpa Katutjaku walytja maṉkurrpa nguwanpa ngurra kutjungka nyinanytjala paluru yaṉangu kutjupa tjuṯa ngulytjulku, tjuṯalingkulpi tjana nyinanytjaku. Yalatji tjana tjuṯarrinytja nguwanpa yara ngaatjanya ngaranyi. 19 Watingku tjiiṯa yiṯaratjanu mantjira tjawara tjunkuku pakantjaku. Tjiiṯa wiimatjanu tjawara tjunutja pakara watiya wiimalpi ngaraku. Tjuḻpu kutjarrangku yankula watiya palula pinytjunpa palyara nyinaku. Palulanguru watiya paluru tiṉalpi pakara ngaraku. Tjuḻpu tjuṯangkuya yankula pinytjunpa palyalku. Palyaraya nyinaku yiṯara palula, tjuṯalingku.”

20 Yara kutjupa Yiitjulu tjananya watjaṉu nintilkitjangku, “Katutjalu palumpa walytja tjuṯa ngulytjura kanyilku. Ngurra kutjungka Katutjalu yaṉangu tjuṯa purinypangku nintira ngulytjulku, maṉkurrpa nguwanpaya nyinaku. Paluru kutjupa tjuṯa tjananya ngulytjura kanyilku palumpa walytja tjuṯalingkulpiya nyinaku. 21 Wangka yalatji nguwanpa yara ngaatjanya ngaranyi. Minymangku pulawu palyara kapuṯu kutjarra tjunku aapanangka yuṉmirrinytjala paluru mantjira tjunku. Mangarri palumpa kutjarraku yunyparringkula piyuku paluru kutjupa tjuṯalpi palyalku. Tjuṯangara rungkantjala mangarri kapuṯu tjuṯalingkulpiya ngarriku.”

22 Palulanguru Tjarutjalumalakutu yankukitjangku tjananya Yiitjulu nintirinangi tawunu tjuṯawana. 23 Yiitjula yaṉangu kutjungku tjapiṉu, “Mayutju. Tjinguru Katutjalu tjananya yaṉangu aapa kutju ngulytjura nyinatjunku kana kutu nyinanytjaku.” Yiitjulu kulira yara kutjupa tjananya watjaṉu, 24 “Waaḻa alytjura yutjungka, nyurrangarri ngarala paṯanma!, yunngu tjarrpanytjaku. Yaṉangu tjuṯaya tjarrpakitja puṯu ngarala waṉiku, alytjura yutju palula.”

25 Yiitjulu tjananya piyuku watjaṉu, “Waaḻa ngurrarangku pakara alytjura yutju patintjala, puṯuya yatura watjalku, waaḻa ngurrarangka, ‘Mayutju, alytjurarralampatju!’ Palulanguru tjanala watjalku, ‘Ngayulu nyurrangarrimpa ngurrpa, walytjawiya nyurrangarri ngaranyi.’ 26 Puṯuya watjalku yalatji, ‘Tjungungkula ngalkura tjikiṉu, ngurra kutjungka. Nyuntu nganaṉanyatju nintiṉingi nganampatju ngurrangka.’ 27 Waaḻa ngurrarangku tjanala watjalku yalatji, ‘Ngayulu panyapa nyurrangarrinya watjaṉu. Nyurrangarri ngayuku walytjawiya, ngayulu ngurrpa nyurrangarrimpa. Kuya palyalpayi tjuṯaya maa yarra!’

28 “Puṯuya tjarrpaku Katutjaku ngurrangka palumpa walytja tjuṯawana nyinakitja. Palunya tjuṯangka wiya tjanalawana tjungu nyinaku. Yurilta tjana nyinarra nyaku, yunngu palya nyinapayi tjuṯa, Yipuramanya, Yatjikanya, Tjikupanyaṯarra, Katutjaku wangka watjalpayi tjuṯaṯarra. Tjana nyakula puṯu tjungurrirra nyinakitja yulamalpa. 29 Walytja palunya tjuṯa, Katutjalu yaṉṯayaṉṯaṉingka kutjupa tjuṯa, Tjuwuwiya tjuṯaya yankula tjanalawana tjungurrirra nyinamalpa. Ngurra tjuṯawana nyinanytja tjuṯaya yankula tjungurriku kakarraranguru, yulparirranguru, wilurarranguru, yalinytjarranguru. Paluru tjana tjungurringkula tjungungku ngalkula yunyparriku, Katutjaku walytja tjuṯa. 30 Kuwarriya paṉangka mayutju tjuṯa nyinarra, ngulaya ngurra palula waarrkana tjuṯalpi nyinaku. Kutjupa tjuṯaya kuwarri waarrkana tjuṯa nyinarra, ngulaya mayutju tjuṯalpi nyinaku, ngurra palula.”

31 Palulanguru Paratji maṉkurrmaṉkurrpa kutjuya Yiitjuku palya nyinangi. Paluru tjana yankula Yiitjula tjakultjunu, yalatji, “Manta Kaliliyiku mayutju Yirutalu kuliṉi palumpa waarrkana tjuṯa wantirriyalkitjangku, nyuntunya mirri pungkunytjaku. Palulanguru nyuntu ngurra kutjupakutu yankunytjaku, pungkutjipingka.” 32-33 Yiitjulu tjananya watjaṉu, “Yirutanya ngunytjinytju nyinanyi. Nyurrangarri palulakutu ankula alatji watjala! ‘Kuwarriṉa pikatjarra tjuṯa palyara mamutjarra tjuṯaṉa tjanampa payira wantirriyaṉi. Tjiṉṯungkaṉa palunya nguwanpa waarrkarrimalpa. Tjiṉṯu kutjupangkaṉa waarrkarrirra wiyarriku, Katutjaku waarrkaku. Ngayulu palya yanamalpa Tjarutjalumalakutu. Tawunu palula Tjuwu yirriṯi nyinapayi tjuṯangku Katutjaku wangka watjalpayi tjuṯa mirri pungkupayi. Palunya nguwanpa ngayunyaṯarra Tjarutjalumanya ngurrara tjuṯangku mirri pungku. Yirutaku waarrkana tjuṯangku ngayunya wiya mirri pungku ngaangka manta Kaliliyingka.’ ”

34 Yiitjulu tjananya piyuku watjaṉu, “Tjarutjalumanya ngurrara tjuṯaku, ngayulu tjanampa aḻṯururringanyi, tjana Katutjaku wangka kulira wantipayi. Tjanampaṉu walytja yirriṯi nyinapayi tjuṯangkuya Katutjaku wangka watjalpayi tjuṯanya mirri pungkupayi. Katutjalu tjanalakutu palumpa wangka tjakultjunkupayi tjuṯa iyantjala, paluru tjana kulilwiyangku tjananya mirri pungkupayi. Ngayulu Tjarutjalumanya ngurrara tjuṯaku aḻṯururringanyi ampura kanyilkitjangku lukuluku maama nguwanpangku. Tjuḻpu lukuluku maamangku wiima tjuṯa nyaḻpingku kapuṯura kanyilpayi nguwanpangku ngayulu tjanampa aḻṯururringanyi. Ngayuku wangka tjana kulira wantipayi. 35 Tjanaya yalatji kulintjaku. Katutjalu tjaatji tiṉa tjanampa wiya yaṉṯayaṉṯanmalpa ngurra tjuṯa tjanampaṯarra. Yaṉangu tjuṯa wiya ngurra palulawana nyinamalpa. Tjana ngula kutju ngayunya nyaku. Nyakulaṉiya yalatji waḻkulku, ‘Mayutju tiṉa ngaatjanyalaka waḻkula! Ngaatjanya Katutjakuṉu ngangkari tiṉatjarra. Nganaṉa palunya waḻkuntjaku.’ ”