1 Yiitjulu palumpa kutunguḻu tjuṯangka tjananya watjaṉu, “Katutjanya nyurrangarri kutu tjapintjaku purrkarringkula wantinytjawiyangku. Wiyanyurra rawangku tjapira yalatji kulintjaku, ‘Ngayulu tjapintjala Katutjaluṉi kulira wantingu, wiyaṉa palunya piyuku tjapilku.’ ” Yalatji tjana kutu Katutjanya tjapintjaku, purrkarringkula wantinytjawiyangku, 2 Yiitjulu tjananya yara yalatji watjaṉu, “Tawunu kutjupangka kuutawutjuku mayutju nyinamalpa. Mayutju paluru Katutjaku wangka kulilwiya nyinarra yaṉangu tjuṯaku yaḻṯururrinytjawiya nyinaku. 3 Tawunu palula minyma waḻukuta nyinaku. Minyma paluru kutu yankula kuutawutjuku mayutju palula tjapira ngaramalpa, ‘Wati tjikipaka panyapa kuutamilara wantirriyala!, ngayulanguru.’ 4 Mayutju paluru palumpa wangka kutu kulira wantimalpa. Palulanguru mayutju palurulpi kulilku, ‘Katutjaku wangkawana ngayulu wiya aṉangu kutjupa tjuṯaku aḻṯururringkupayi, minyma waḻukuta palumpaṯarra. 5 Paluruṉi yiwarrakatirra rawangku tjapira ngarapayingka ngayuluṉara tjikipaka palunya kuutamilara wantirriyalku.’ ” 6-8 Yiitjulu tjananya piyuku watjaṉu, “Minyma paluru mayutju palula kutu tjapilpayi. Yalatji nguwanpa nyurrangarri Katutjanya kutu tjapintjaku. Katutjaku walytja tjuṯangkuya kutu tjapintjala, Katutjalu kulira tjananya yaṉṯayaṉṯalku, wiya tjananya kulira wantiku. Yaṉangu kuya tjuṯangku Katutjaku walytja tjuṯa panypurangkula punganyingka, paluru tjana mungangka tjinguru tjiṉṯungka tjapintjala, parrpaṯu kulira ngayunya mantakutu wantirriyalku, tjananya yaṉṯayaṉṯantjaku. Yaṉanguku katjaṉa piyuku ngalya yankunytjala, tjinguru aapa nguwanpalpiya ngayuku walytja tjuṯa nyinaku, kutjupa tjuṯaya tjinguru ngayunya wantirra wiyawanalpi nyinaku.”

9 Ngurra palula yaṉangu tjuṯa nyinangi. Paluru tjana yalatji wiyawanangku kuliṉingi, “Nganaṉa kutju yilta tjukarurru nyinanyi, kutjupa tjuṯaya ngunytjinytju nyinanyi.” Yiitjulu yaṉangu palunya tjuṯangka yara watjaṉu yalatji, 10-13 “Wati kutjarrapula nganampa tjaatji tiṉakutu yanku, Katutjala wangkakitja. Wati kutju Paratji tjarrparra waṉma nguwanpa ngaraku, kamantaku mani mantjilpayi palulamarra. Paratji paluru Katutjala tjapilkitja ngarala walytjangku rikinarriku alatji, ‘Katutja. Waḻkuṉiṉanta, nyuntu ngayuku yunyparringanyi, ngayulu nyuntupa tjukarurru nyinangitjangka. Ngayulu ngalytjawiya. Ngayulu wiya mulyaṯangku mantjilpayi. Wiyaṉa waṉngi kutjupakitja yankupayi, ngayulu miiṯa walytjaku tjukarurru nyinanyi. Wati kutjupa tjuṯa miiṯa kutjupakitja yankupayi. Pala paluru kamantaku mani mantjilpayi kuya nyinanyi. Ngayulu palunya nguwanpa wiya nyinanyi. Ngayuluṉa kututja mangarri ngalkuwiyangku, nyuntunyaṉanta waḻkulpayi. Wiika kutjungka kutjarrangaraṉanta mangarri ngalkuwiyangku waḻkulpayi. Ngayuku mani mantjira aapara ngayulu nyuntupa tjawirrilyi katirra tjaatjingka tjunkupayi.’

“Kamantaku mani mantjilpayi paluru Paratji palula waṉma ngaraku tjaatji palula yunngu, kuṉṯakuṉṯa. Yalatji paluru kulinmalpa, ‘Ngayuluṉa kututja kuya palyalpayi. Katutjanya ngayuku mirrpaṉpa nyinanyi.’ Palurulpi yalatji watjalku, ‘Katutja. Ngayulu kututja kuya palyalpayi, yaḻṯururriwatju kuya ngayuku waṉi!’

14 “Yalatji paluru kutjarra Katutjanya tjapira ngurrakutulpi yanku. Yilta, kamantaku mani mantjilpayiku Katutjanya palumpa kutjura yunyparriku. Paratji palumpa Katutjanya wiyara yunyparriku. Tjinguru yaṉangu walytjangku rikinarringkunytjala, Katutjanya wiyara yunypa nyinaku. Kuya waṉinytjaku yaṉangungku Katutjanya tjapintjala, yilta Katutjanyara kulira yunyparriku.”

15 Palulanguru Yiitjulakutuya katingu pipirri tjuṯa, aḻṯururringkula tjanampa pampura Katutjanya tjapintjaku. Yiitjuku kutunguḻu tjuṯangku tjananya ngalya katinyingka nyakula payiṉu, “Wiyanyurra pipirri tjuṯa Yiitjulakutu katinytjaku, wantiya!” 16-17 Yiitjulu tjananya kulira marrkuṉu, “Wanti tjananya!, pipirri tjuṯa ngayulakutuya palya ngalya katinytjaku. Pipirri ngaa tjuṯa nguwanpa, Katutjalu yaṉṯayaṉṯaṉi. Wangka ngaatjanyaya kulila! Katutjalu tjananya palumpa walytja tjuṯa yaṉṯayaṉṯara kanyiṉi. Pipirri tjuṯangkuya wangka kutjupakuṉu yilta kuliṉi, wiya kulira wantinyi. Palunyatjanu nyurrangarri yaṉangu tjuṯangku ngayuku wangka kulintjaku, pipirri ngaa tjuṯa nguwanpangku, wiya nyurrangarri kulira wantinytjaku. Palulanguru Katutjalu nyurrangarrinya ngulytjura yaṉṯayaṉṯalku.” Pipirri panyapa tjuṯa tjananya Yiitjulu aḻṯururringkula aḻṯingu, yampulkitjangku. Yampura tjananya Katutjanya tjanampa tjuṯangara tjapiṉangi.

18 Wati mayutjungku Yiitjulakutu ankula tjapiṉu, “Nintilpayi, nyuntu palya. Ngayulu yaalytji tjukarurru palyalku, kana kutu nyinakitjangku?” 19 Yiitjulu watjaṉu, “Nyaakuṉin watjaṉu ngayunya, ‘Nyuntu palya?’ Katutjanya kutju palya nyinanyi, yaṉangu wiya.” 20 Wati palunya Yiitjulu piyuku watjaṉu, “Katutjalu yirriṯi watjaṉutjangka nyuntu ninti nyinanyi. Wangka palumpara ngaranyi yalatji, ‘Yaṉangungku wiya kutjupakura miiṯa tjulyara katinytjaku. Yaṉangungku wiya kutjupa mirri pungkunytjaku. Yaṉangungku wiya yulytja mulyaṯangku mantjintjaku. Yaṉangungku wiyawanangku tjakultjunkunytjawiya. Yaṉangu paapaku maamaku pulampa kaangkinytji nyinanytjaku, wiya pulanya panypurangkunytjaku.’ ” 21 Wangka panyapa kulira wati panyapangku Yiitjunya yalatji watjaṉu, “Wangka palunya tjuṯawana ngayulu tjukarurru nyinapayi. Pipirri tiṉarringkulaṉa tjukarurru kutu nyinapayi. Kuwarri kutuṉa tjukarurrulpi nyinanyi.” 22 Yiitjulu kulira wati mayutju palunya watjaṉu, “Wangka palunya tjuṯaku palya nyuntu tjukarurru nyinapayi. Yulytja tjuṯa waaḻaṯarra tjalamilara mani mantjila! Mantjira katirra tjanampa yuwa!, mangarriwiya, ngurrawiya tjuṯaku. Maniwiyarringkula nyuntu ngayulawana tjungu yankunytjaku. Palunyatjanu nyuntu tjukarurru nyinaku. Katutjalunta ngula palumpa ngurrangka yaṉṯayaṉṯalku.” 23 Yiitjuku wangka kulira wati mayutju paluru puṯu kuliṉu yulytja tjuṯa waaḻa tjuṯaṯarra tjalamilalkitjangku. Paluru tjilurutjilururringkula yanu.

24-25 Mayutju paluru tjilurutjiluru yananyingka Yiitjulu nyakula tjananya yaṉangu tjuṯangka watjaṉu, “Katutjalu palumpa walytja tjuṯa kanyiṉi. Walytja palunya tjuṯangka tjanala tjungu nyinakitjangku yaṉangu yulytja tiṉatjarra tjuṯangkuya puṯu kuliṉi, yulytja tjuṯa wantirra nyinakitjangku. Naanytja luututjarra kiiṯa yutjuwana puṯu tjarrpapayi. Yara palunya nguwanpa yaṉangu yulytja tiṉatjarra naanytja nguwanpangku puṯu kuliṉi Katutjaku ngurrangka tjarrpakitjangku.”

26 Palumpa wangka kuliraya aṉangu tjuṯangku alatji wiyawanangkuya kulilpayi, “Katutjalu tjananya yulytja, manitjarra tjuṯa yungkupayi yulytja tjuṯa maniṯarra. Yalatji tjanampa yungkula yunypa nyinanyi. Yilta yulytja tiṉatjarra tjuṯa Katutjaku walytja tjuṯa nyinanyi.” Yalatjikutjuraya kulira tjana wangkarra pungu, “Yulytja tiṉatjarra tjuṯa Katutjalu wantirra, yaṉangu ngananya?, paluru ngulytjura palumpa walytja nyinatjunku?” 27 Yiitjulu tjananya nyakula watjaṉu, “Yaṉangungku puṯu kuliṉi Katutjaku walytja tjuṯangka tjungu nyinakitjangku, Katutjalu kutju yaṉangu tjuṯa ngulytjura katirra palumpa walytja tjuṯangka nyinatjunku.”

28 Piitalu Yiitjunya watjaṉu, “Nganaṉalatju, nyuntupa walytja tjuṯangku ngurra walytja wantingu, nyuntulawanalatju tjungu nyinakitjangku.” 29-30 Yiitjulu tjananya watjaṉu, “Wangka ngaatjanyaya kulila! Yaṉangu ngayuku walytja nyinakitjangku, ngayuku waarrkaṯarra palyalkitjangku walytja tjuṯaṯarra wantingutjangka, Katutjalura ngula puntura yungku, walytja tjuṯa yalatji nguwanpa wantingutjangka, miiṯa, kaaka, kangkuru, maḻanypa, katja tjuṯa, yuṉṯalpa tjuṯa, walytja kutjupa tjuṯaṯarra. Katutjalura puntura yungku ngaparrtjingku walytja tjuṯa kutjupa, ngurra kutjupaṯarra. Palulanguru ngula paluru kana kutu nyinamalpa, Katutjaku ngurrangka.” Yalatji tjananya Yiitjulu watjaṉu.

31-33 Palumpa kutunguḻu tuwalpala yaḻṯirra tjungura tjananya watjaṉu, “Kulilaya! Tjungula yananyi Tjarutjalumalakutu. Ngurra palula ngayunya yaṉanguku katjaṉiya witilku. Paluru tjana ngayunya katirra ngaratjunkuku yaṉangu Tjuwuwiya tjuṯangka, tjana ngayunya iluntankunytjaku. Paluru tjana ngayunya nyuṉpatjunkula pungku. Ngunytjiṉiya watjanmalpa yinkatjarrangku. Ngayunya panypurangkula wiipatjarrangkuṉiya pungku. Pungkulaṉiya iluntanku. Ilurra munga kutjarra mirri ngarrirraṉa kanarringkula pakalku. Yalatjiṉiya iluntankunytjaku yirriṯi Katutjaku wangka watjalpayi tjuṯangku watjara piipangka tjunu.” 34 Yiitjuku kutunguḻu tjuṯangku wangka palunya puṯu kuliṉu. Yalatjiya kutu kuliṉangi, “Yiitjunya mayutju tiṉa nganampa kutu kana nyinaku, wiya paluru iluku, wiya.”

35 Yiitjunya, palumpa kutunguḻu tjuṯaṯarra yankula tawunu Tjirikungkalpiya yilarringu. Ruutuwanaya yananyingka, wati pampa ruutu tjayiṯingka nyinangu. Kutu ruutungka paluru nyinapayi yaṉangu tjuṯangka maniku inkapayi. 36-38 Yiitjunya Natjaritjanya ngurrara yananyingka, tjakulpa kulira pampa paluru mirrarra yaḻṯingu, “Yiitju. Tapitaku walytja ngaṉṯitja, yaḻṯururriwatju!” 39 Yaṉangu tjuṯangkuya marrkuṉu wangkawiya nyinanytjaku. Paluru kutu tjuṯangara mirrarra yaḻṯingu, “Tapitaku walytja ngaṉṯitja, yaḻṯururriwatju!”

40 Yiitjulu kulira ngarala watjaṉu, “Pampa palatjaya ngalya kati!” Pampa palunyaya katingu. Yiitjula yilarringanyingka, 41 Yiitjulu pampa palunya tjapiṉu, “Nyaakun yunytjurringanyi? Yaalytjinkuṉanta?” Pampa paluru watjaṉu, “Mayutju. Kurutju aḻala!” 42 Yiitjulu palunya watjaṉu, “Kurungku nyawa! Ilta nyuntu nyanganyi. Nyuntu ngayunya ngangkari puntutjarra kulira nyuntu kuru palyarringulpi.” 43 Yilta kuru palyarringu. Yaṉangu tjuṯangku kuru palyarringutja nyakula Katutjanyaya waḻkuṉingi. Wati paluru palyarringkula Yiitjulawana tjungu yankula Katutjanya waḻkuyinangi, yunypangkulpi.