1 Tjuuntiyi, tayilayiti minyma paluru tjana kuḻpi palulakutu yanu, tjira paṉṯi palyatjarra. Mungaṯu ngurrangka tjana palyaṉu. Minyma yini yalatjiya yanu, Miirinya Makatalanya ngurrara, Tjuwananya, Miirinya kutjupa, Tjayimitjaku maama, minyma kutjupa tjuṯaṯarra. 2 Yankulaya nyangu kuḻpi alytjuralpi, puḻi palunya ruulamilara wantingutja, kuḻpi alytjuralpi ngarangi. 3 Kuḻpingkaya tjarrparra puṯu nyangu Yiitjunya, mirri ngarrinytjawiya. 4 Ngaralaya puṯu kuliṉingka, wati kutjarra mantarra tjulkuratjarrapula yutitjarringkula ngarangi. 5-6 Palulanguru tjana palumpa kutjarra nguḻurringkula kata yunngurringkula nyakunytjawiya ngarangi. Paluru kutjarra tjananya watjaṉu, “Ngaangka, ngurra mirrikuṉungka wiya nyurrangarri ngurrintjaku. Paluru wiya mirri ngarrinyi, paluru kanarringkula yanu.” Piyuku paluru kutjarra tjananya watjaṉu, “Kulilaya! Paluru nyurrangarrinya panyapa yurrunpa watjaṉu manta Kaliliyila yalatji, 7 ‘Wati kutjungkuṉi yaṉanguku katja yankula tjanala kuya tjuṯangka tjakultjunku, kutjupa tjuṯangkuṉiya watiyangka nyiiḻamilara iluntankunytjaku. Munga kutjarraṉa mirri ngarrirraṉa, kana pakalku.’ ” 8 Pina yaḻarringkulaya kuliṉu Yiitjulu yurrunpa wangka palunya watjaṉutjangka.

9-11 Palulanguru kuḻpinguruya minyma paluru tjana yankula Yiitjuku kutunguḻu lipinpalangka tjanala tjakultjunu, Yiitjuku walytja kutjupa tjuṯangkaṯarra. Palumpa kutunguḻu tjuṯangku tjakulpa palunya kulira wantingu, wiyaya kuliṉu Yiitjunya kana pakantjala. Yiitjuku kutunguḻu palunya tjuṯa yini kutjupaya yaṉangu tjuṯangku watjalpayi yalatji, “Yiitjuku waarrkana tjuṯa.”

12 Piitanya pakara tjalkaḻungu kuḻpi palulakutu nyakukitja. Paluru puparrawarri nyangu, mirrikuṉu mantarra kutju ngarrinytjala. Paluru nyakula ngaṉṯikutu yanangi, punturalpi paluru kulirinangi.

13 Tjiṉṯu Tjuuntiyi palula Yiitjuku walytja kutjarrapula tawunu Yimayatjalakutu yanangi. Tawunu paluru Tjarutjalumala yila ngarangi, tuwalpa kilamita. 14 Ruutuwanapula yankula yara wangkayinangi, Yiitjunya waralyngarala mirrirringutjangka. Punturalpipula kuliṉu tjakulpa yalatji, Yiitjunya kuḻpingka ngarrinytjawiyangka. 15 Palunyatjanu Yiitjunya tjungurringkula palula kutjarrawana yanangi. 16 Wiyapula Yiitjunya nuuwimilaṉu, yaṉangu kutjupakutjurapula kulirinangi. Katutjalu pulanya pina patiṉu.

17 Yiitjulu pulanya tjapiṉu yalatji, “Yara yaalytjiyaalytji nyupali wangkayinangi?” Paluru kutjarra watjilpa ngarangi, wangkanytjawiya. 18 Kutjungkulpi, yini Kuliyapatjalu Yiitjunya tjapiṉu yalatji, “Tjarutjalumanya ngurrara yuwankarraya ninti nyinanyi, kuwarriya wati palunya iluntanutjangka. Nyuntu kutjunu ngurrpa nyinanyi, yilta?” 19 Ngurrpa nguwanpangku Yiitjulu pulanya tjapiṉu, “Tjarutjalumala kuwarri yaalytjirringu?”

Paluru kutjarra Yiitjunya watjaṉu, “Yiitjunya Natjaritjanya ngurrara Katutjakuṉu ngangkari tiṉatjarra nyinangi, paluru Katutjaku wangka watjalpayi. Palumpa Katutjanya yunypa nyinangi, yaṉangu tjuṯaṯarra. 20 Nganampa mayutju tjuṯangku, tuḻkuku mayutju tiṉa tjuṯangkuṯarra watjaṉu tjana palunya witintjaku. Witiraya katirra ngaratjunu mayutju tjuṯangka. Paluru tjana watjaṉu Yiitjunya watiyangka nyiiḻamilara iluntankunytjaku. Iltaya tjana palunya iluntanu. 21 Paluru kana nyinanyingka nganaṉatju kulilpayi yalatji, ‘Yiitju paluru mayutju tiṉalampa nyinaku, Tjuwu tjuṯaku, ngurra tjuṯawana nyinanytja tjuṯaku. Kuwarri Ruumanya ngurrara tjuṯangku nganaṉanya kanyiṉi, palurulpi nganaṉanya mayutju tiṉangku kanyilku. Kuunyi palunya tjana iluntanu, mungaṯu Purayitiyi.’ ”

22-23 Paluru kutjarra Yiitjunya piyuku watjaṉu, “Kuwarri aaḻi minyma tjuṯangku nganaṉanyatju tjakultjunu, kuḻpi palula tjana nyangu ilkari ngurrara kutjarra. Paluru kutjarra tjanala watjaṉu, Yiitjunyakunyu kanarringkula yanu. Yuwa, minyma paluru tjana tayilayiti yanu kuḻpikutu, puṯuya ngurriṉu, mirri palumpa. 24 Palulanguru nganampatju walytja maṉkurrpa tjana kuḻpi palulakutu yanu, nyakukitja. Yankulaya puṯu nyangu mirri palumpa, minyma paluru tjana puṯu nyangutja nguwanpa.”

25 Yiitjulu pulanya watjaṉu, “Nyupali tjukarurrungku kulinmara, Katutjaku wangka watjalpayi tjuṯangkuya yurrunpa watjaṉutja. Nyupali wiya wangka palunya kuliṉi. Nyupali tjukarurrungku kulinmara wangka palunya. 26 Katutjaku wangka watjalpayi tjuṯangkuya watjaṉu Kurayitjanya palya tjana pikantankula iluntankunytjaku. Paluru mirri ngarrirra kana pakara tjungu Katutjanyapula mayutju tiṉa kutjarra nyinaku. Yalatji palya Katutjalu kuliṉu.” 27 Palulanguru Yiitjulu pulanya wangka Kurayitjanyatjarra nintirinangi, Muutjalu wakara tjunutja, Katutjaku wangka watjalpayi tjuṯangkuṯarraya wakara tjunutja.

28 Palulanguruya tjungu yankula, tawunu Yimayatjala tjana yilarringkula, Yiitjunya kutju wayinta yanu. 29 Paluru kutjarra Yiitjunya marrkuṉu, “Ngalyarra!, mungarringanyingka, yarralaka tjungu waaḻa nyarrakutu!” Yiitjulu pulanya kulira tjungu yanu, waaḻa palula tjarrparra nyinakatingu. 30 Ngurra palula tiipulangkaya tjungu nyinarra Yiitjulu mangarri mantjira, Katutjala purayirringu, “Paapa, nyuntu palya nganaṉanyatju mangarri ngaatjanya yungu.” Yalatji purayirringkula paluru mangarri palunya kilytjuntankula yungu. 31 Palulanguru Yiitjunyapula yilta kulira yunyparringu, Katutjalu pulanya pina alytjurankunytjala. Yiitjunya arrkayirringu. Puṯupula parra nyangangi. 32 Watjaṉunkupula, “Paluru ngalinya Katutjaku wangka ruutungka nintintjala, kulirali ngali yunyparringangi.” 33 Palulangurupula yunypalingku pakara mungangka Tjarutjalumalakutu piyuku yanu, walytja kutjupa tjuṯa tjananya tjakultjunkukitja. Tjarutjalumala tjarrparra paluru kutjarra yankula waaḻangka tjananya nyangu, Yiitjuku walytja tjuṯaya tjungu nyinanyingka, palumpa kutunguḻu lipinpalaṯarra. 34 Paluru tjana, palunya kutjarra tjakultjunu, “Mayutju Yiitjunya yilta kana nyinanyi, Piitalu yuti nyangu palunya.” 35 Palulanguru paluru kutjarrangku tjananya tjakultjunu, “Yiitjulu ngalinya ruutuwana nintirinangi. Palulanguru tawunu Yimayatjala, mangarri paluru kilytjuntananyingka, yiltalpilitju kuliṉu, mirringuru pakaṉutja.”

36 Paluru kutjarrangku tjananya tjakultjunanyingka, Yiitjunya ngururrpa yutitjarringkula ngarangu. Ngarala tjananya watjaṉu, “Kuutayi.” 37 Kurrunpakutjuraya palumpa nyakula tjana nguḻunguḻurringu.

38 Yiitjulu tjananya watjaṉu, “Nguḻurrinytjawiyaya nyinama!, ngayuluṉa ilta kana ngaranyi, kurrunpa nguwanpa wiya.” 39-40 Paluru tjananya piyuku watjaṉu, “Kurrunpakutjura nyurrangarri wiyawanangku nyanganyi. Ngayuluṉa ngaatja ngaranyi, ilta. Nyawaṉiya!, mara, tjinaṯarra. Pampuraṉiya nyawa! Pangkiṉiya pampula! Kurrun nguwanpa wiyaṉa, ngayuluṉa ngaatja ngaranyi.” 41 Yiitjunyaya tjana kulira yunyparringkula kutu kuliṉingi, “Tjinguru ngaatjanya yilta Yiitjunya, tjinguru kurrunpa ngaranyi.” Yiitjulu tjananya tjapiṉu, “Tjingurunyurra mangarri, kuka kanyiṉi?” 42 Piitji yuṉmiraya yungu. 43 Piitji palula tjana mirangka paluru ngalkuṉu.

44 Yiitjulu tjananya piyuku watjaṉu, “Purayitiyi, mungaṯu ngayulu mirrirringkula munga kutjarra ngarrirra kanarringu. Yalatji mirrirringkula kanarrinytjaku, Muutjalu, Tapitalu piipangka tjunu, Katutjaku wangka watjalpayi tjuṯangkuṯarra. Wangka paluru yiltarringu. Irriṯi ngayulu nyurrangarrinya watjaṉu wangka palunya yiltarrinytjaku.”

45 Palulanguru Yiitjulu tjananya nintiṉu, Katutjaku wangka tjukarurrungkuya kulintjaku. 46 Yalatji tjananya watjaṉu Yiitjulu waaḻa palula, “Katutjaku wangka watjalpayi tjuṯangku palumpa wangka irriṯi wakaṉu, ngayunya Kurayitjanya, tjana pikantankula iluntankunytjaku. Tjana watjaṉu ngayulu mirri munga kutjarra ngarrirra kanarrinytjaku. 47 Paluru tjana wakaṉu wangka kutjupa. Alatji ngarrinyi, ‘Yiitju Kurayitjaku walytja tjuṯangku nyurrangarri palumpa wangka tjakultjurinkunytjaku yaṉangu tjuṯawana, manta kutjupa tjuṯawanaṯarra. Tjarutjalumalawanawarri tjananya tjakultjurinama! Tjana kulira kuya palyalwiyangku wantinytjala, Katutjalu tjanampa kuya waṉiku.’ ” 48 Yiitjulu tjananya watjaṉu yalatji, “Ngayuluṉa mirringuru kana pakara ngaranyingka, nyurrangarri ngayunya nyangutjangku yaṉangu tjuṯangka tjakultjurra! 49 Katutjaku ngurrakutu ngayulu maa yankula ngayulu nyurrangarrilakutu Katutjaku kurrunpa ngalya wantirriyalku, nyurrangarrila tjarrpanytjaku, nguḻuwiyalpinyurra nyinanytjaku. Paapa Katutjalu yurrunpa watjaṉu ngayunya, kurrunpa palunya wantirriyantjaku. Kutuya tawunu ngaangka nyinarra paṯanma!, Katutjaku kurrunpangku nyurrangarrila tjarrparra rapantjaku.”

50 Palulanguru Yiitjulu tjananya palumpa walytja tjuṯa katingu tawunu Piitjaniyilakutu. Katirra tjananya tjungura ngaratjunu. Mara katurringkula Katutjala tjanampa tjapiṉu, yaṉṯayaṉṯantjaku tjananya. 51 Yalatji tjanampa tjapira paluru ilkarikutu kaḻpangu. 52 Yiitjunya ilkarikutu kaḻpanytjala paluru tjana pupakatirra palunya waḻkuṉingi. Alatji waḻkura tjana Tjarutjalumalakutu yunypa yanu. 53 Tjuwuku tjaatji tiṉangka tjana kutu tjungurringangi Katutjanya waḻkulkitja.