1 Palulanguru tjiṉṯu tjikitjipala nyinarra Yiitjulu tjananya Piitanya Tjayimitjanya Tjaananyaṯarra yaḻṯirra katingu puḻikutu. Tjaananya paluru Tjayimitjaku maḻanypa nyinangu. Puḻingkaya katu kaḻparra ngarangi. Yaṉangu kutjupa tjuṯa wiya puḻi palula nyinangu. 2 Paluru tjana kutju nyangu Yiitjunya, yaṉangu kutjupa nguwanpa ngaranytjala. Yuṉpa palumpa layitirringangi. Palumpara mantarra tjulkurarringkula layitirringangi. 3 Yiitjulawanapula Muutjanya, Yilaatjanya yutitjarringu, yirriṯi nyinarra wiyarringutja kutjarra. Paluru kutjarrapula Yiitjula wangkangi. 4 Piitalu palunya kutjarra nyakula Yiitjunya watjaṉu, “Mayutju. Nyuntu palya nganaṉanya ngaakutu ngalya katingu. Nyuntu yunytjurringanyingka puri maṉkurrpalatju palyalku nyurrangarrimpa, kutju nyuntupanta, kutjupara Muutjaku, kutjupara Yilaatjaku.” 5 Piitanya panyapa wangkanytjala yutuwaringku tjananya tjutuṉu. Yutuwari paluru layitirringkula pinpangi. Katutjanya yutuwaringuru wangkangu, “Ngaatjanya katja ngayuku yunytjuṉara nyinanyi. Rawangkunyurra palumpa wangka kulintjaku.” 6 Piitalungarriya wangka palunya kulira puntura nguḻurringkula waṯungarangi. 7 Yiitjulu tjanalakutu yankula pampura tjananya watjaṉu, “Pakalaya!, nguḻuwiya nyinama!” 8 Palulanguruya pakara nyangu Yiitjunya kutju ngaranytjala.

9 Puḻingkaya tjarukatinytjala Yiitjulu tjananya marrkuṉu yalatji, “Puḻingka katu nyurrangarri nyangutjangku wiya yaṉangu kutjupa tjuṯangka tjakultjunkunytjaku.” Piyuku tjananya watjaṉu yalatji, “Ngula palyanyurra tjakultjunkunytjaku, kuwarrinyurra puḻingka nyangutjangku, ngayuluṉa yaṉanguku katja mirringuru pakara kutju yananyingka, ngaṉṯinyurra palya tjakultjunkunytjaku.” 10 Palulanguru Yiitjunyaya wangka kutjupawana tjapiṉu, “Nyaakuya Muutjaku wangka nintilpayi tjuṯangku watjalpayi yalatji?, ‘Yirriṯi nyinangutja Yilaatjanya yurrunpa ngalya yanku, Kurayitjanya ngaṉṯi ngalya yanku.’ ” 11-12 Yiitjulu tjananya watjaṉu, “Yilaatjanya yilta yurrunpa ngalyanu, yaṉangu tjuṯa nintira tjukarurru nyinatjunkunytjaku. Yilaatja paluru yini Tjaananya yilta ngalya yanu. Ngalya yankula tjakultjunkunytjala, yaṉangu tjuṯangkuya palumpa wangka kulira wantipayi. Yilta Tjaana palunya nguwanpaṉiya yaṉanguku katja kulira wantiku. Palunyatjanuṉiya kulintjawiyangku pungku.” 13 Palulanguru palumpa kutunguḻu tjuṯangkulpi kuliṉu, “Yuwa, Tjaananya wati Yilaatjanya nguwanpa ngalyanu Katutjaku wangka tjakultjunkula yaṉangu tjuṯa papatatjimilantjakuṯarra.”

14 Puḻinguru tjana tjarukatirra yankula yaṉangu tjuṯangka tjanala tjungurringu. Wati kutju Yiitjulakutu ngalya yankula pupakatirra wangkangu, 15 “Mayutju. Ngayuku katjaku yaḻṯururringkula palyala! Tayimingka paluru kaṯiṯi patjara punkalpayi. Yalatji mamungku patjantjala paluru warukutu punkalpayi, kapikutuṯarra. 16 Nyuntupa kutunguḻu tjuṯangkaṉa tjananya ngayulu puṯu tjapiṉu mamu payira wantirriyantjaku. Puṯuya payira wantirriyaṉu.” 17 Yiitjulu tjananya yaṉangu tjuṯa, palumpa kutunguḻu tjuṯaṯarra watjaṉu, “Nyurrangarri ngayuku wangka kulira wantipayi. Rawaṉa nyurranya nintiṉangi. Kuliranyurra ninti nyinamara. Yaalytjingaranyurra pina alytjurarringkula kulilku? Uḻa palatja yaḻṯirra ngalya kati, ngayulakutu!” 18 Yiitjulu uḻa palula watjaṉu, “Mamu, uḻa ngaatjanya wantirra yarra!” Yalatji Yiitjulu mamu palunya payira wantirriyara uḻa palunya palyaṉu. Palyalpi paluru nyinangu. 19 Yaṉangu tjuṯa yila ngaranytjawiyangka palumpa kutunguḻu tjuṯangkuya tjapiṉu, “Nyaangurulatju mamu palunya puṯu payira wantirriyaṉu?” 20-21 Yiitjulu tjananya watjaṉu, “Ngayuku wangka yiltangku kulira nyurrangarri rapangku mamu palunya ngayukuṉu ngangkari tiṉatjarrangku payira wantirriyanmara. Wangka ngaatjanyaya kulila! Ngayuku wangka nyurrangarri yiltangku kulira ngayukuṉu ngangkaritjarrangku puḻi ngaatjanya yaṉangu nguwanpa watjalku, ‘Puḻi, pakara ngurra kutjupakutu yarra, nyarrakutu!’ Palulanguru ngurra kutjupakutu puḻi palatja yankula ngaraku.”

22-23 Yiitjunya, palumpa kutunguḻu tjuṯaṯarra yankula manta Kaliliyila tjana nyinangu. Ngurra palula Yiitjulu tjananya watjaṉu yalatji, “Wati kutjungkuṉi yaṉanguku katja tjakultjunku tjananya, kutjupa tjuṯangkuṉiya witira iluntankunytjaku. Ilta tjana ngayunya iluntanku. Munga kutjarraṉa mirri ngarriku, Katutjaluṉi pakaltjingalku.” Kuliraya puntura watjilarringu.

24 Palulanguruya Yiitjunya, palumpa kutunguḻu tjuṯaṯarra yankula tawunu Kapaniyamala tjarrparra nyinangu. Tjaatji tiṉaku mani mantjilpayi maṉkurrpangkuya Piitanya yiwarrangka nyakula tjapiṉu, “Nyuntupa mayutjungkukampa tjaatjiku mani yungkupayi?” 25 Piitalu tjananya yuwa wangkangu. Palulanguru paluru yankula waaḻangka tjarrpanytjala Yiitjulu Piitanya yalatji tjapiṉu, “Nyaalytji nyuntu kuliṉi? Tjinguru kamantaku mani wiyarringkunytjala kamanta ngurrara mayutju tiṉangku mani kutjupa yaṉangu nganalangarri mantjilku?, tjinguru palumpaṉu katja tjuṯangka?, tjinguru yaṉangu kutjupa tjuṯangka?” 26 Piitalu palunya watjaṉu, “Kutjupa tjuṯangka.” Yiitjulu watjaṉu, “Yuwa, katjapiṯi wantirra paluru kutjupa tjuṯangka kamantaku mani mantjilku, katjapiṯingku wiya yungku kamantaku mantjira kanyintjaku. Ngayulu mayutju tiṉaku katja nyinarra wiya mani tjaatjiku yungkunytjaku. 27 Tjinguru ngayulu tjananya tjaatjiku mani yungkunytjawiyangka tjana ngayuku ngurrkurriku. Piita, mani nyuntu tjananya katirra yungkunytjaku. Nyuntu yurukutu yankula ngarala puturru yiritjarra waṉi! Piitjingku patjara nganytjantjala, yurungka puturru yurrkura mantjila, piitjitjarra! Mantjira tjaa alytjurarra!, puḻi maninu nyakuku. Mani palunya mantjira katirra tjananya yuwa!, tjaatjiku mayutju tjuṯaku. Yalatji tjananya watjala!, ‘Ngaatja ngayuku, Yiitjukuṯarra.’ ”