1-2 Palulanguru Yiitjunyangarri tawunu Tjarutjalumalakutu yanangi. Yankulaya tawunu Pitjapatjila anta Piitjaniyilaya yilarringkula puḻi Yalipatjalaya nyinangu. Palumpa kutunguḻu kutjarra pulanya wantirriyalkitjangku Yiitjulu watjaṉu, “Nyupali tawunu nyarrakutu yarra! Nyupali yankula nyaku tuungkiyi wiima ruupatjarra ngaranytjala. Tuungkiyi palula wiya yaṉangu kaḻpapayi. Yarrarapula ngalya kati ngayulakutu! 3 Tjinguruntapula kutjupangku watjalku, ‘Nyaakitjangkupulan yarraṉi?’ Yalatjipula watjala!, ‘Mayutjura yunytjurringanyi, kanyiranta ngalya wantirriyalku nyuntulakutu.’ ” 4 Palulanguru paluru kutjarrangku yankula yilta nyangu tuungkiyi ruupatjarra tuuwangka tjayiṯingka ngaranyingka. Tuungkiyi wiima palulapula ruupa yarraṉingka, 5 yaṉangu tjuṯangku tjapiṉu palunya kutjarra, “Nyupali nyaakitjangku tuungkiyiku ruupa watiyangka yarraṉi?” 6 Paluru kutjarrangku watjaṉu Yiitjulu yurrunpa watjaṉutja. Palulanguru pulanya kulira tjana watjara iyaṉu. 7 Yiitjulakutupula tuungkiyi katirra ngaratjunu. Kuuta waṯawarapula yarrara tuungkiyingka yinytjamitjunkulapula tjunu. Yiitjunyalpi kaḻpangu tuungkiyi palula. 8 Ruutuwanaya tjungu yanangi Yiitjunya, palumpa kutunguḻu tjuṯa, yaṉangu kutjupa tjuṯaṯarra. Kuuta waṯawarayanku yarrara ruutungka yinytjamitjunangi tuungkiyingku tjinangku kanturinkunytjaku. Kutjupa tjuṯangkuya parrka kilytjuntankula tjunangi parrkalpi tuungkiyilu kanturinkunytjaku. Paluru tjana kuliṉangi, “Nganaṉa mayutju tiṉa tjuṯaku kuuta tjuṯa parrka tjuṯaṯarra ruutungka tjunkupayi. Palunya nguwanpa nganaṉa wati ngaaku kuuta tjuṯa parrka tjuṯaṯarra tjunkunytjaku, paluru ilta mayutju tiṉa nyinanyi.” 9 Yaṉangu tjuṯa Yiitjulawana yurrunpa yanangi, tjana palunya waḻkuṉangi. Yiitjula ngaṉṯiwanaṯarra kutjupa tjuṯangku palunya waḻkuṉingi, “Mayutju tiṉa ngaatjanyalaka waḻkula! Ngaatjanya Katutjakuṉu ngangkari tiṉatjarra. Nganaṉa palunya waḻkuntjaku. 10 Kurayitjalulanya walytja tjuṯa kanyilku, palunya nganaṉa waḻkuntjaku. Mayutju Tapitalu tjananya yirriṯitja tjuṯa yaṉṯayaṉṯalpayi nguwanpa, Kurayitjalulanya yaṉṯayaṉṯalku, palunya nguwanpa. Palulangurulaka Katutjanya waḻkunma!” 11 Yalatji Yiitjunya tuungkiyitjarra Tjarutjalumalawana yanangi. Palulanguru tuungkiyingka tjarukatirra Tjuwuku tjaatji tiṉangka yankula tjarrpangu. Tjaatjingka tjarrparra parra yankula nyakuyinangi. Mungarrtjirringkula paluru yanu. Yiitjunya palumpa kutunguḻu tuwalpalaṯarraya yanu piyuku tawunu Piitjaniyilakutu, ngurrakutu.

12 Ngarrirraya tjiṉṯurringkula pakaṉu Yiitjunya, palumpa kutunguḻu tjuṯaṯarra tjana ruutuwana yanangi, Tjarutjalumalakutu. Yiitjunya yankula paḻtjatjirratjarringu. 13 Ruutungka tjayiṯi paluru nyangu watiya awalyurru yukiritjarra. Yankula mangarriku puṯu nyangu, yukiri kuwarripa ngaranytjala. 14 Puṯu nyakula watiyangka yalatji watjaṉu yaṉangu nguwanpakutu, “Yaṉangungkunta mangarri wiya piyuku ngalku.” Yalatji watjantjala palumpa kutunguḻu tjuṯangkuya kuliṉu.

15 Tjunguya yankula Tjarutjalumala tjarrparra Tjuwuku tjaatji tiṉangkaya yankula tjarrpangu. Tjarrparra tjananya Yiitjulu nyangu yaṉangu tjuṯangkuya tjuḻpu tjuṯa tjawirrilyi tjalamilaṉingka. Kutjupa tjuṯangkuya tjawirrilyi payimilara tuḻkuku mayutjuku yungkupayi. Yiitjulu tjananya payira wantirriyaṉu. Tiipula tjuṯa tjanampa mani ngurrara tjuṯaku, mantjira waṉingu, tjuḻpu ngurrarakuṯarra. Payira tjananya wantirriyaṉu yaatjayiṯi. 16 Yaṉangungku yulytja tjaatjiwana katikitjangka paluru payira wantirriyalpayi. 17 Paluru tjananya payiṉu yalatji, “Wiyanyurra ngaangka kuka tjuṯa tjalamilantjaku, mani tiṉa mantjilkitjangku. Ngaatja Katutjaku ngurra. Katutjaku wangka ngaranyi yalatji, ‘Ngayuku tjaatji tiṉangka tjarrparraṉiya waḻkuntjaku, yaṉangu kutjupa kutjupa ngurrara tjuṯangku.’ ”

18 Yalatji payiṉutjangka tjana kulira Yiitjunya ngula mirrintankukitjangku kuliṉu, tuḻkuku mayutju tiṉa tjuṯangku, Muutjaku wangka nintilpayi tjuṯangkuṯarra. Paluru tjana yalatji kuliṉangi, “Nganaṉa wiya kuwarri Yiitjunya witira mirrintanku, yaṉangu tjuṯangkulanya ngaparrtjingku pungkupayingkamarra. Yaṉangu tjuṯangkuya wiyawanangku kuliṉi Yiitjunya palya nyinanyi. Palumpa wangkaya kulira palumpa yunytju nyinanyi. Tjana alatji wiyawanangku kuliṉi. Paluru wiya palya nyinanyi.” 19 Mungarrtjirrirraya Yiitjunya palumpa kutunguḻu tjuṯaṯarra Tjarutjalumanya wantirra yanu, Piitjaniyilakutu, ngurrakutu.

20 Tjana ngarrirra tjiṉṯurringkula ruutuwana yanangi awalyurru palunyaya nyangu, piḻṯirrirra ngaranyingka. 21 Yiitjulu mungaṯu watjaṉutjangka kulira Piitalu Yiitjunya watjaṉu, “Mayutju, watiya palatja nyawa! Nyuntu watjaṉutjangka piḻṯirringu.” 22 Yiitjulu tjananya watjaṉu, “Katutjanyanyurra kulintjaku. Paluru palyalpayi, nganaṉa tjapintjala. 23 Wangka ngaatjanyaya kulila! Nyurrangarri ngayuku wangka yiltangku kulira ngayukuṉu ngangkaritjarrangku kutjupa kutjupa palyalku. Puḻi nyarrangka yaṉangu nguwanpa nyuntu tjinguru yalatji wangkanyingka, ‘Pakara yankula yuru tiṉangka tjarrpa!’ Palulanguru yilta puḻi nyarratja pakara yankula yuru tiṉangka tjarrparra ngaraku. 24 Palunya nguwanpa Katutjangkanyurra tjapintjaku, tjukarurrungku. Tjapilkitjangkuya yalatji kulila!, ‘Ngayulu tjapintjala, Katutjalu yilta palyalku.’ Tjinguru nyuntu tjapilku Katutjalu yaṉangu kutjupa yaṉṯayaṉṯantjaku. Paluru kulira yilta yaṉṯayaṉṯalku. Tjinguru nyuntu tjapilku palumpa wangkaku nintirrikitjangku. Paluru kuliranta nintilku. Yalatji Katutjalu kulira palyaṉi, nganaṉa palunya tjukarurrungku kulira tjapintjala. 25-26 Yaṉangu kutjupa tjuṯakunyurra kalypangku nyinarra Katutjanya tjanampa tjapintjaku. Yalatjinyurra yaṉangu tjuṯaku kalypangku nyinarra tjapiṉingka, paapa Katutjalu ilkari ngurrarangku nyuntupa kulira kuya waṉiku. Paluru nyuntupa kalyparriku.” Yalatji Yiitjulu tjananya watjara wantingu.

27 Tjarutjalumalaya Yiitjunya, palumpa kutunguḻu tjuṯa tjarrparra Tjuwuku tjaatji tiṉakutu yanu. Tjaatji tiṉa palulawana tjana yanangi. Palunyatjanu tuḻkuku mayutju tiṉa tjuṯa tjungurringu wangkakitja, Muutjaku wangka nintilpayi tjuṯaṯarra, tjiḻpi tjuṯaṯarra. 28 Paluru tjana tjungurringkula Yiitjunya yalatji tjapiṉu, “Watjalalanyatju! Mayutju nganalunta watjaṉu, yaṉangu tjuṯa tjananya nyuntu nintira palyantjaku?” 29 Yiitjulu tjananya watjaṉu, “Wanyuwarri, ngayulu nyurrangarrinya tjapilku. Ngayulu nyurrangarrinya tjapintjala, tjukarurruya watjala! Tjukarurrunyurra ngayunya watjantjala ngayululpi nyurranya ngaparrtjingku tjukarurru watjalku, mayutjungkuṉi watjara wantirriyaṉutjangka.” 30 Yiitjulu tjananya alatji tjapiṉu, “Tjaanalu tjananya yaṉangu tjuṯa kapingka tjarrpatjunkula papatatjimilalpayi. Mayutju nganalu Tjaananya watjaṉu, yaṉangu tjuṯa tjarrpatjunkula papatatjimilantjaku?, tjinguru Katutjalu?, tjinguru mayutju yaṉangungku, nganalu? Watjalaṉiya ngayunya!” 31 Kulira tjana wangkarra waṉingi yalatji, “Tjinguru mayutju Katutjanya nganaṉa watjaṉutjangka, Yiitjulu nganaṉanya tjapilku, ‘Nyaaku nyurrangarri Tjaananya kulira wantipayi?’ Yalatji tjapilpayingkamarra nganaṉa wiya mayutju Katutjanya watjalku. 32 Tjinguru nganaṉa mayutju yaṉangu watjantjala, yaṉangu tjuṯangku kulira nganampa pikarringkula pungkupayingka. Tjana kuliṉi Katutjalu Tjaananya wantirriyaṉutja. Palulamarra nganaṉa wiya yaṉangu mayutju watjalku, Yiitjunya.” 33 Tuḻkuku mayutju paluru tjana watjalkitjangku puṯu kulira Yiitjula ngurrpa wangkangu. Palulanguru Yiitjulu tjananya watjaṉu, “Nyurrangarri ngayunya tjukarurru watjanmara nganalu Tjaananya yaṉangu tjuṯa papatatjimilantjaku watjaṉutjangka. Kala nyurrangarri ngayunya ngurrpa watjaṉutjangka, ngayulu nyurrangarrila wiya watjaṉi, mayutjungkuṉi ngayunya wantirriyaṉutja.”