3
1 Tjinguru Tjuwu tjuṯa watirringkula mungutja nyinanyi. Tjinguru Katutjanya tjanampa wiya yunyparringanyi, tjinguru paluru Tjuwuwiya tjuṯaku kutju yunyparringanyi. 2 Katutjanya yilta Tjuwu tjuṯaku yunyparringkula palumpa wangka yirriṯi tjanala tjakultjunkupayi. 3 Tjuwu tjaampalaya Katutjaku wiya tjukarurru nyinanyi. Kutjupangku tjinguru watjalku yalatji. Katutjalu tjananya yaṉṯayaṉṯantjawiyangka tjana palumpa tjukarurruwiya nyinanyi. 4 Yalatji wiya. Katutjalu tjukarurrungku tjananya yaṉṯayaṉṯara tjukarurru tjananya watjalpayi. Kutu paluru yaṉangu tjuṯa yaṉṯayaṉṯara tjukarurru watjaṉi, yaṉangu tjuṯangku kutju ngunytjitjunkupayi. Katutjaku wangka yirriṯi tjunutja yalatji ngarrinyi,
“Katutja, nyuntupa wangka yiltarriku. Nyuntunya panypurangkupayi tjuṯangku ngulalpi yalatji puntura yurrukulilku, ‘Katutjalu yilta tjukarurrungku watjalpayi.’ ”
5 Nganaṉa yaṉangu tjuṯangku kuya kutu palyantjala nyakula tjinguru yaṉangu tjukarurru nyinapayingku kulilku yalatji, Katutjanya puḻkapungkukitjangku, “Katutjalu kutju tjukarurrungku palyalpayi, yaṉangu tjuṯangku kuya palyara nyinapayi.” Yalatji ilkari ngurrara tjuṯangku Katutjanya waḻkuntjala nganaṉa kulira tjinguru yalatji watjalku, “Nganaṉanya kuya palyalpayi tjuṯa Katutjalu aḻṯururringkula warukutu wantirriyantjawiyangku wantiku.” 6 Nganaṉa wiya yalatji wiyawanangku kulintjaku. Katutjalu kuya palyalpayi tjuṯa wiya wantiku, kuutawutjungka paluru tjananya watjalku, warukutu wantirriyalkitjangku. Paluru kutu tjukarurrungku watjara palyalpayi.
7 Kutjupa tjuṯangku kuya kutu palyara tjukarurruwiya nyinanytjala tjanampa walytja tjuṯangku tjananya nyakula Katutjanya tjingapungku yalatji, “Katutja, nyuntu kutju tjukarurru nyinanyi, yaṉangu tjuṯangku kuya palyara nyinanyi, tjukarurruwiyakampa.” Tjana Katutjanya yalatji puḻkapungkula kulilku, “Katutjalu nganampa walytja kuya palyalpayi tjuṯa wantiku, wiya warukutu wantirriyalku.” Nganaṉa wiya yalatji wiyawanangku kulintjaku. 8 Kutjupa tjuṯangku yalatji watjalpayi, “Palyala kutu kuya palyantjaku. Kuyala yalatji palyantjala Katutjalu nganampa kuya kutu waṉimalpa.” Yalatji wiyala kulira palyantjaku. Yaṉangu tjaampalangkuya yalatji wiyawanangku watjalpayi, pina patingku, “Puulalungarri yaṉangu tjuṯa tjananya nintilpayi palya tjana kuya kutu palyantjaku. Katutjalu kuya tjanampa waṉimalpa, kutu.” Nganaṉatju wiya tjananya yalatji nintilpayi. Yalatji tjana wiyawanangku watjalpayi, nganampatju yunytjuwiya tjuṯangku. Katutjalu tjananya tjukarurrungku kuutawutjungka kuru watjara warukutu maa wantirriyalku.
Yaṉangu yuwankarra tjukarurruwiya nyinanyi
9 Ngayulu wangka kutjupa nyurrangarrinya watjalku. Tjinguru Tjuwu tjuṯa nganaṉanya Katutjalu ngula kuru watjalwiyangku wantiku? Wiya. Yuwankarra nganaṉanya kuru watjalku Tjuwu tjuṯa, Tjuwuwiya tjuṯaṯarra tjungura. Nganaṉa yuwankarrangku kuya palyara nyinanyi. Yalatji ngayulu yurrunpa nyurrangarrinya watjalpayi. 10-12 Wangka palunya nguwanpa Katutjaku wangka irriṯi tjunutja yalatji ngarrinyi,
“Yaṉangu yuwankarra tjukarurruwiya nyinanyi, Katutjaku kalypanytjuwiya. Yuwankarrangkuya nintiwiyangku palumpa wangka kulira wantinyi. Yuwankarraya tjukarurruwiya nyinanyi. 13 Ngunytjinytju tjuṯa tjana kutu ngunytji wangkarra nyinanyi. 14 Yaṉangu kutjupa tjuṯa tjanaya kutu yunytjuwiyangku panypuranganyi tjananya. 15-16 Yaṉangu kutjupa tjuṯa tjana kulilwiyangku tjitjantananyi, kutjupa tjuṯa tjana kulilwiyangku mirri punganyi. 17 Yaṉangu tjuṯaku tjana kalypawiya nyinarra, tjana wiya palya tjanampa nyinanyi, wiya. 18 Katutjaku tjukarurru wiya tjana nyinanyi, palunya puḻkapungkunytjawiya.”
19 Katutjaku wangka irriṯi piipangka tjunutja ngarrinyi nganaṉa kulintjaku. Yalatjiku nganaṉa ninti nyinanyi. Wangka palunya kulira puṯulanku watjalku Katutjala ngula, “Ngayulu nyuntupa wangka kulilwiya, wiya nyuntu ngayunya warukutu wantirriyantjaku.” Yilta Katutjalu nganaṉanya yuwankarra kuutawutjungka watjalku palumpa luwutjirratjangku, nganaṉa yuwankarrangku palumpa luwu kilytjuntanutjangka. 20 Nganaṉa Katutjaku luwuwana nyinarra puṯu Katutjaku kalyparriku. Nganaṉa wiya kutu palumpa wangkaku tjukarurru nyinapayi, nganaṉa kuya palyara wangka palunya kilytjuntankupayi. Wangka palunya ngarrinyi nganaṉa riitarringkula yalatji nintingku kulintjaku, “Ngayulu ilta Katutjaku wangka kilytjuntankupayi.”
Yiitju Kurayitjanya kulira walytjarringkula nganaṉa Katutjaku kalypalpi nyinaku
21-22 Katutjaku wangka watjalpayi tjuṯangku watjara wakaṉutja Muutjaku wangkaṯarra nganaṉa riitarringkula nintingku kulilku yalatji. Kala, kuwarri Katutjalu yaṉangu tjuṯa palumpa kalypaṉi, tjana Tjuwu tjuṯa, Tjuwuwiya tjuṯaṯarra Yiitju Kurayitjanya kulira walytjarrinytjala. Wiya paluru kuliṉi tjana Muutjaku luwuwana nyinanytjaku. 23 Yaṉangu yuwankarrangku nganaṉa kuya palyalpayi, Katutjalu kuya palyalpayi tjuṯa wiya kalypaṉi. 24 Yalatji yaṉangu tjuṯaku aḻṯururringkula Katutjalu Yiitju Kurayitjanya palumpa katja mantakutu wantirriyaṉu nganaṉanya ngulytjulkitjangku. Paluru nganaṉanya ngulytjura nyinatjunkupayi, kana kutu nyinanytjaku. 25-26 Katutjalu Yiitju Kurayitjanya mantakutu wantirriyaṉu tjawirrilyi nguwanpa waralyngarala ngurrka yintirra mirrirrinytjaku, yaṉangu tjuṯaku kuya waṉikitja. Nganampa kuya waṉingutja nganaṉa kulira Yiitjuku walytjarrinytjala Katutjanya nganampa kalyparringanyi. Katutjalu tjukarurrungku kulira irriṯi yaṉangu tjuṯaku tjanampa kuya waṉipayi, tjana tjawirrilyi pungkunytjala. Kuwarrilpi paluru tjukarurrungku yaṉangu tjuṯa ngulytjuṉi, tjana Yiitjunya kulira walytjarrinytjala.
27-28 Nganaṉa Yiitjuku walytja tjuṯa Katutjaku ngulytjurringkula wiya yalatji watjantjaku, “Ngayulu Katutjaku ngulytjurringu palumpa luwuwana kutu tjukarurru nyinarra.” Yalatji wiya. Yiitjunya kulira walytjarringkula nganaṉa Katutjaku ngulytjurringu. Nganaṉa nintingku kuliṉi. Yaṉangu Yiitjuku walytjarringkula Katutjaku ngulytjurringanyi. Wiya Muutjaku luwuwana nyinarra yaṉangu Katutjaku ngulytjurringanyi, wiya. 29-30 Kutjupa tjuṯangku watjalpayi, “Katutjanya nganampa Tjuwu tjuṯaku walytja kutju nyinanyi.” Yalatji wiya. Paluru yuwankarraku walytja nyinanyi, Tjuwuwiya tjuṯakuṯarra. Tjuwuwiya tjuṯangku, Tjuwu tjuṯangkuṯarra Yiitjukuṉu wangka kulira walytjarrinytjala paluru tjanampa kalyparringkula walytja nyinanyi. 31 Yalatji Yiitjukuṉu wangka kulira walytjarringkula nganaṉa kuliṉi Muutjaku luwu yilta tjukarurru kutu ngaranyi.