1 Nganaṉa nintingku yalatji kuliṉi. Nganaṉa kuya palyantjala, Katutjalu yaḻṯururringkula nganampa kuya waṉipayi. Nganaṉa tjinguru tjukarurru nyinanytjawiya kuya kutu palyalku, yalatji kulira, “Palya nganaṉa kutu kuya palyalku, Katutjalu kutu aḻṯururringkula kuya nganampa waṉimalpa.” 2 Yalatji kulira kuya palyantjawiya nganaṉa tjukarurru palumpa nyinanytjaku, Yiitju Kurayitjanya waralyngarala kuya waṉikitja mirrirringutjangka. 3-4 Nganaṉa papatatji mantjira Yiitju Kurayitjaku walytjarringu. Yalatji Katutjalulanya ngulytjuṉu. Nganaṉa yalatji kulintjaku, Yiitju Kurayitjanya watiyangka waralyngarala mirrirringu. Paluru tjana mirri palunya kuḻpingka tjarrpatjunkula ngarritjunu. Paluru mirri ngarrinytjala Katutjalu ngangkari tiṉatjarrangku palunya kanara pakaltjingaṉu. Palunya nguwanpa nganaṉa papatatji mantjintajala Katutjalu ngangkari tiṉatjarrangku nganaṉanya ngulytjulpayi kana kutu nyinanytjaku. Yalatji ngulytjuṉutjangka nganaṉa kuya palyantjawiya tjukarurru nyinanytjaku.

5 Yuwa, nganaṉa papatatji mantjintjala Katutjalulanya ngulytjulpayi nganaṉa Yiitju Kurayitjaku walytjaṯarra nyinanytjaku. Nganaṉa kuliṉi Yiitjunya mirrirringkula ngarrinytjala Katutjalu palunya kanara pakaltjingaṉu. Palunya nguwanpa nganaṉanyaṯarra Katutjalu kanara pakaltjingalku kana kutu nyinanytjaku. 6-7 Kuya palyara nyinapayi tjuṯaku Yiitju Kurayitjanya waralyngarala mirrirringu kuya waṉikitja. Nganampaṯarra paluru mirrirringu, nganaṉa tjukarurru nyinanytjaku kuya palyantjawiya. Yurrunpa nganaṉa mamuku mayutjuku wangka kulira kuya palyara nyinapayi. Paluru nganampa mayutju nyinapayi. Kuwarrilpi Yiitjunya nganampa mayutju nyinanyi palumpa wangka kulira nganaṉa tjukarurru nyinanytjaku. Nganaṉa wiya mamuku wangka kulira kuya palyantjaku. 8 Yalatji paluru mirrirringu nganampa kuya ilta waṉikitja. Nganampa kuya waṉirra paluru nganaṉanya ilta ngulytjura ngurra palumpaṉungka nganaṉanya kana kutu kanyinmalpa. 9 Paluru mirringuru kanarringkula piyuku mirrirrinytjawiya kana kutu nyinamalpa. Yalatji nganaṉa nintingku kuliṉi. 10 Yuwa, paluru mirrirringu yaṉangu uwankarraku kuya waṉikitja, ngula paluru wiya piyuku mirrirriku kuya waṉikitja. Kana paluru nyinamalpa Katutjaku tjukarurru kutu. 11 Yiitju Kurayitjanya Katutjaku tjukarurru nyinapayi nguwanpa nyurrangarriṯarra Katutjaku tjukarurru nyinanytjaku, Yiitjuku walytjarringkula.

12 Kuya palyantjawiyangkunyurra wantirra nyinanytjaku. Wiyanyurra kuya palyalkitjangku kulintjaku. 13 Wiyanyurra kuya yalatjingku palyantjaku. Kurungku nyakula kuya palyantjawiya. Pinangku kulira kuya palyantjawiya. Marangku wiyanyurra pampura kuya palyantjaku. Tjina yankulanyurra wiya kuya palyantjaku. Katutjanya kutju kulira tjukarurru kutunyurra nyinanytjaku. Yalatjiya kulinma!, “Katutjalu nganaṉanya ngulytjuṉu kana kutu nyinanytjaku. Nganaṉa yunytjurringanyi palumpa tjukarurru kutu nyinanytjaku.” 14 Muutjaku luwuwana ngayulu kutu nyinanytjala Katutjaluṉi ngulytjulku. Yalatji wiya. Nyurrangarri Yiitjuku walytjarringutjangka Katutjalu nyurrangarrinya aḻṯururringkula ngulytjura kuya waṉingu. Palumpa walytjarringutjangka Katutjalu nyurrangarrinya rapaṉi tjukarurru nyinanytjaku.

15 Tjinguru kutjupa tjuṯangku kulilku, “Katutjalu nganaṉanya ngulytjuṉu nganaṉa Yiitjuku walytjarringutja. Muutjaku luwuwana nyinanytjawiyangku nganaṉa palya kuya palyalku, Katutjalu nganampa kuya waṉimalpa.” Nganaṉa wiya yalatji kulira kuya kutu palyantjaku. 16 Mayutjuku tjukarurru nyinakitjangku nganaṉa kulira nyinapayi, waarrkana palya nyinakitjangku. Nyurrangarri tjinguru mamuku mayutjuku waarrkana nyinarra kuya palyara nyinaku. Yalatji kuya palyara nyinanytjala ngula Katutjalu nyurrangarrinya warukutu wantirriyalku. Nyurrangarri Katutjaku waarrkana nyinarra palumpa tjukarurru kutu nyinanytjaku. Yalatjinyurra tjukarurru nyinanytjala ngula kuutawutjungka Katutjanya nyurrangarrimpa kalypalpi nyinaku. 17 Yirriṯi nyurrangarri kuya palyara nyinapayi, mamuku waarrkanyurra palyara nyinapayi. Ngayulu nyurrangarrinya nintintjala wangka Yiitjunyatjarranyurra kulira palumpa walytja tjuṯalpi nyinanyi. Yalatji kulira ngayulu Katutjanya puḻkapungkupayi. 18 Kuya kutu palyantjawiyalpinyurra nyinanyi, tjukarurrulpinyurra nyinanyi.

19 Yara panyapa ngayulu watjaṉu, tjaampala mamuku waarrkana tjuṯa nyinanyi, kutjupa tjuṯa Katutjaku waarrkana nyinanyi. Yara panyapa ngayulu nyurrangarrinya watjaṉu nintilkitjangku puṯunyurra kuliltjipingkamarra. Yuwa yirriṯi nyurrangarri mamuku waarrkana tjuṯangku kuya palyara nyinapayi yalatji. Marangku pampuranyurra kuya palyara nyinapayi. Kurungku nyakulanyurra kuya palyara nyinapayi. Tjina yankulanyurra kuya palyara nyinapayi. Kuwarrilpi nyurrangarri Katutjaku tjukarurru nyinanytjaku yalatji. Marangku pampuranyurra tjukarurru palyantjaku. Kurungku nyakulanyurra tjukarurru palyantjaku. Tjina yankulanyurra tjukarurru nyinanytjaku, Katutjaku.

20 Yirriṯinyurra kuya kutu palyalpayi Katutjanya kulilwiyangku. Wiyanyurra kulilpayi Katutjaku tjukarurru nyinakitjangku, wiya. 21 Tjinguru nyurrangarri yalatji kuya palyara puntura yunypa nyinapayi? Wiya. Kuwarrinyurra kuṉṯarringanyi kuya panyapa yurrunpangku palyaṉutjangku kulira. Yaṉangungku kuya kutu palyantjala Katutjalu ngula palunya warukutu wantirriyalku. 22 Kala, kuwarri nyurrangarri Katutjaku waarrkana tjuṯa tjukarurru nyinanyi, kuya kutu palyantjawiya. Palumpa kutjunyurra tjukarurru nyinarra yunypa nyinanyi. Ngula paluru nyurrangarrinya palumpa ngurrangka nyinatjunku, kana kutu nyinanytjaku. 23 Yaṉangungku kuya kutu palyantjala paluru mirrirringkula waru tiṉangka nyinaku. Yaṉangu kutjupangku wangka Yiitjunyatjarra kulira walytjarrinytjala Katutjalu palunya palumpa ngurrangka nyinatjunku kana kutu nyinanytjaku, Yiitju Kurayitjalawanaṯarra. Paluru ilta nganampa mayutju puntu nyinanyi.