10
1 Walytja tjuṯa, wangka ngaatjanyaya kulila! Ngayulu puntura yunytjurringanyi ngayuku walytja Tjuwu tjuṯangku Yiitjuku wangka kulira tjana palumpa walytjarrinytjaku. Tjana walytjarringkunytjaku ngayulu kutu Katutjanya tjanampa tjapilpayi. 2-4 Paluru tjana yilta puntura yunytjurringanyi Katutjaku tjukarurru nyinakitja. Yalatji nyinakitjangku wiyawanangkuya kulira iwarra kutjupawanaya nyinanyi, Muutjaku luwuwana. Katutjaku wangka Kurayitjanyatjarra tjana kulira wantipayi. Muutjaku wangkawana kutju wiya, Tjuwu tjuṯangku Kurayitjaku wangkawana kulira nyinanytjaku. Yalatji Tjuwuwiya tjuṯangkuṯarra kulira nyinanyingka Katutjalu tjananya ngulytjulku. Muutjaku wangka ngatalpa nguwanpa ngaranyi, Yiitjuku wangka maṯupurra ngaranyi, tjana wangka palulawanalpi tjukarurru nyinanytjaku.
Uwankarra Yiitjuku walytjarrinytjaku, Tjuwu tjuṯa Tjuwuwiya tjuṯaṯarra
5 Wati Muutjalu irriṯi wangka yalatji wakaṉu, “Ngayulu tjananya Katutjaku luwu nintilpayi. Yaṉangu luwu palumpa tjanampa uwankarraku tjukarurru nyinarra kana kutu nyinaku.” Luwu palumpa tjanampa yuwankarraku nganaṉa wiya tjukarurru nyinapayi. 6 Katutjaku wangka Yiitjunyatjarra kulira walytjarringutja tjuṯangku nganaṉa wiya yalatji tjapilku, “Nganalu ilkarikutu kaḻparra Kurayitjanya yaḻṯirra ngalya katiku?” Wiya nganaṉa wangka panyapa nguwanpangku tjapintjaku, Kurayitjanya yiltalampa ngalya yanu. 7 Nganaṉa wiya yalatji tjapintjaku, “Nganalu mirri tjuṯakutu yankula Kurayitjanya yaḻṯirra ngalya katiku?” Wiya yalatji tjapintjaku, Kurayitjanya yiltalampa mirringuru pakaṉu. 8 Katutjaku wangka yalatji ngaranyi, “Katutjakuṉu wangka yutitja ngaranyi. Kurayitjakuṉu wangkanyurra pinangku kuliṉi.” Wangka palunya Kurayitjanyatjarra nganaṉatju tjanalawana tjakultjurinkupayi. 9-10 Katutjakuṉu wangka yilta yutitja ngaranyi yalatji. Katutjalu Yiitjunya mirringuru pakaltjingaṉutjangka nganaṉa kulira palumpa walytjarringkunytjaku. Yalatji kulira nganaṉa yaṉangu kutjupa tjuṯangka tjakultjunkunytjaku yalatji, “Ngayulu kuliṉi yalatji, ngayuku mayutju Yiitjunya Katutjalu ilta mirringuru kanaṉu.” Yalatji nganaṉa kulira tjakultjunkunytjala Katutjalu nganaṉanya katirra kana kutu kanyilku, palumpa ngurrangka. Mayutju Yiitju Kurayitjaku nganaṉa kulira walytjarringkula nyinanytjala Katutjalu nganaṉanya ngulytjura nyinatjunku palumpa ngurrangka. 11 Katutjaku wangka yirriṯitja yalatji ngarrinyi, “Yaṉangu tjuṯangku wangka Kurayitjanyatjarra kulira tjana yunypa nyinaku.” 12 Yuwankarrangku palya yalatji wangka Kurayitjanyatjarra kulintjaku, Tjuwu tjuṯangku, Tjuwuwiya tjuṯangkuṯarra. Katutjanya yuwankarraku nganampa mayutju tiṉa nyinanyi. Paluru nganampa tjukarurru palyalpayi, nganaṉa tjapintjala. 13 Yalatji Katutjaku wangka irriṯi tjunutja ngarrinyi, “Yaṉangungku mayutju Katutjanya tjapintjala, Katutjalu yilta palunya kulira kana kutu nyinatjunku palumpa ngurrangka.”
14-15 Katutjalu palumpa walytja tjuṯa wantirriyalpayi palumpa wangka tjakultjurinkunytjaku. Nganaṉa palunya kulira palumpa wangka Yiitjunyatjarra yaṉangu tjuṯawana tjakultjurinkunytjaku. Nganaṉa tjakultjurinkunytjawiyangka yaṉangu tjuṯa wangka Yiitjunyatjarraku ngurrpa nyinapayingka. Tjana wangka palumpa kulintjawiyangku puṯu kulilku Katutjaku kalypa nyinakitjangku, wiya tjana Yiitjunya tjapilku, kuya tjanampa waṉinytjaku. Yalatji Katutjaku wangka irriṯi tjunutja ngarrinyi, “Wangka palya tjakultjunkupayi tjuṯa ngalya yankula tjakultjunanyingka, yaṉangu tjuṯangku kulira yunyparriku.” 16 Wangka Yiitjunyatjarra palunya yaṉangu tjaampalangkuya kulira wantipayi. Yalatji wati Yaatjayalu irriṯi watjaṉu, “Mayutju kulilaṉi! Yaṉangu aapangku kutju nyuntupa wangka kulira tjukarurru nyinanyi, ngayulu tjanala tjakultjunanyingka.” 17 Yuwa, yaṉangu Yiitjuku walytjarringanyi wangka Yiitjunyatjarra kulira. Wangka palunya tjana kuliṉi nganaṉa wangka Yiitju Kurayitjanyatjarra tjakultjunanyingka. 18 Tjinguru Tjuwu tjuṯaya ngurrpa nyinanyi, wangka Yiitjunyatjarraku. Tjinguru kutjupangku tjanala wiya tjakultjunu. Wiya. Yiltaya wangka Yiitjunyatjarra tjanala tjakultjunkupayi. Yalatji Katutjaku wangka yirriṯi tjunutja ngarrinyi,
“Yaṉangu tjuṯangku tjanala ngurra tjuṯawana yurungka munkarraṯarra Katutjaku wangka Kurayitjanyatjarra tjakultjurinkupayi, yaṉangu tjuṯangka, ngurra tjuṯawana.”
19 Wangka Kurayitjanytjatjarra tjinguru Tjuwu tjuṯangku puṯu kuliṉu? Wiya tjana puṯu kuliṉu, tjukarurrungkuya kulira, wantingu. Yirriṯi Muutjalu watjaṉu Tjuwu tjuṯa yalatji,
“Ngayulu Katutjanya manta kutjupa ngurrara tjuṯaku yunypa nyinaku, tjana ngayuku wangka kulira walytjarrinytjala. Yalatji ngayulu tjanampa yunypa nyinanyingka nyurrangarri kulira ngayuku ngurrkurringkula nyinaku. Nyurrangarri ngayuku wangka wantirra wiyawanangku kulilku yalatji, ‘Manta kutjupa ngurrara tjuṯa mungutja nyinanyi, nganaṉakampa Katutjaku walytja tjuṯa nyinanyi.’ ”
20 Mirri pungkupayi tjuṯaku nguḻurrinytjawiyangku wati Yaatjayalu Katutjakuṉu wangka wakaṉu yalatji. Katutjalu Tjuwu tjuṯangka yalatji watjaṉu,
“Ngayuku ngurrpa Tjuwuwiya tjuṯangku ngayuku wangka kulira yunyparringkupayi. Ngayulu tjananya tjungurringkula yaṉṯayaṉṯalpayi.”
21 Wati Yaatjayalu piyuku watjaṉu Tjuwu tjuṯangku Katutjaku wangka kulira wantipayi, yalatji,
“Paluru tjana ngayuku wangka kulira wantipayi. Puṯu ngayulu tjanampa paṯalpayi tjukarurrurrinytjaku ngayuku wangkawana, yaṉṯayaṉṯalkitja.”