1 Walytja tjuṯa, wangka ngaatjanyaya kulila! Katutjanya nganampa aḻṯurunytju nyinanyingka, nyurrangarri palumpa tjukarurru kutu nyinanytjaku. Yalatji nyinarranyurra Katutjaku waarrka tjukarurru kutu palyantjaku. 2 Katutjaku ngurrpa tjuṯangku kuya kutu palyara nyinanyi. Palunya tjananya nguwanpa, wiyanyurra kuya kutu palyara nyinanytjaku yarrkara. Nyurrangarri yunytju kutu nyinama!, Katutjalu nyurrangarrinya nintira tjukarurruntjaku. Yalatji paluru Katutjalu nyurrangarrinya nintira tjukarurruntjala nintinyurra nyinaku palumpa tjukarurru kutu nyinanytjaku.

3 Nintingku ngayulu kuliṉi Katutjaluṉi kutu rapalpayi palumpa waarrka tjukarurru palyantjaku, wiyaṉa walytjangku kulira palyalpayi. Wiyanyurra yalatji kulintjaku, “Ngayulu Katutjaku waarrka tjukarurru kutu palyalpayi, kutjupa tjuṯangkuya wiyawanangku palyalpayi.” Yalatjinyurra kulintjaku, “Ngayulu Katutjaku waarrka palyalpayi paluruṉi nintintjala kutju. Kutjupa tjuṯangkuṯarra palumpa waarrka palyalpayi, paluru tjananya nintintjala.” 4 Yara panya yaṉangu walytjararranpatjarraya kulila! Kutjupa tjuṯangkuya kuka kuṉṯilpayi. Kutjupa tjuṯangkuya katipayi kutjantjaku. Kutjupa tjuṯangku yitjiḻinkupayi. Kutjupa tjuṯangku katirra tjananya yungkupayi ngalkuntjaku. 5 Yara panyapa nguwanpa nganaṉa kulintjaku. Yiitju Kurayitjaku walytjararranpala nyinanyingka palumpa walytja kutjupa tjuṯakuṯarra nganaṉa walytja nyinanyi. 6 Nganaṉa yuwankarrangku Katutjaku waarrka palyalpayi. Katutjalu Yiitjuku walytja kutju nintintjala, paluru yalatji Katutjaku waarrka palyantjaku. Yiitjuku walytja kutjupa paluru nintintjala yalatji walytja paluru Katutjaku waarrka palyantjaku. Yalatji nganaṉa Katutjaku waarrka palyantjaku, Katutja paluru nganaṉanya nintintjala. Tjinguru Katutjalu Yiitjuku walytja nintilku palumpa wangka yaṉangu tjuṯangka rapangku tjakultjunkunytjaku. Yalatji Katutjalu nintintjala, paluru yilta Katutjaku wangka tjanala rapangku tjakultjunkunytjaku. 7 Tjinguru Katutjalu Yiitjuku walytja kutjupa nintilku yaṉangu tjuṯa tjananya yaṉṯayaṉṯantjaku. Yalatji Katutjalu nintintjala, paluru yilta yaṉangu tjuṯa tjananya yaṉṯayaṉṯantjaku. Tjinguru Katutjalu Yiitjuku walytja kutjupa nintilku yaṉangu tjuṯa tjananya Katutjaku wangka nintintjaku. Yalatji Katutjalu nintintjala, paluru yilta yaṉangu tjuṯa tjananya nintintjaku. 8 Tjinguru Katutjalu Yiitjuku walytja kutjupa nintilku yaṉangu tjilurutjiluru tjuṯa tjananya pukuḻmankunytjaku. Yalatji Katutjalu nintintjala, paluru yilta yaṉangu tjilurutjiluru tjuṯa tjananya pukuḻmankunytjaku. Maralpa tjuṯaku mani tjawirrilyi Yiitjuku walytjangku katirra tjananya yungkupayi. Paluru tjukarurrungku tjananya yungkunytjaku ngaparrtji mantjilkitjangku kulintjawiya. Tjaatjiku mayutju tjuṯangku Yiitjuku walytja tjuṯa tjananya tjukarurrungku yaṉṯayaṉṯantjaku. Miiṉṯa tjuṯa, tjiḻpi tjuṯa, ulkumina tjuṯaṯarra nyinanyi. Palunya tjananya yaṉṯayaṉṯalpayi tjuṯangku yunypangku tjananya yaṉṯayaṉṯantjaku.

9-10 Yaṉangu kutjupa tjuṯaku nyurrangarri yilta yunytju nyinanytjaku. Palunya tjananya kulira yaṉṯayaṉṯantjaku, panypurangkunytjawiyangku. Kuya palyalpayi tjuṯangka wiyanyurra tjungurringkula kuya kutu palyantjaku. Wantirra tjananya Yiitjuku tjukarurru nyinama! Walytja kutjupa tjuṯangkunyurra yunytju nyinarra tjukarurru tjanampa palya nyinanytjaku, mayutju nguwanpa tjuṯaku. 11 Mayutju Kurayitjaku waarrka kutuya tjukarurru palyantjaku, yunypangku, purrkarringkula wantinytjawiyangku. 12 Yunypanyurra kutu nyinanytjaku, ngula kana kutu nyinakitja. Kutjupa tjuṯangku nyurrangarrinya panypurangkula punganyingka kutunyurra tjukarurru nyinanytjaku. Puṯu kulira kutunyurra Katutjanya tjapintjaku. 13 Yiitjuku walytja kutjupa tjuṯangkuya mangarriku tjinguru maniku puṯu kulintjala yuwa tjananyaya! Yiitjuku walytja ngurra kutjupanguru ngalya yankunytjala yunyparringkula palunya ngurrangka paḻtjara ngarritjurra!

14 Yunytjuwiya tjuṯangku nyurrangarrinya panypurangkula punganyingka, Katutjanya tjanampa tjapila!, paluru tjukarurru tjanampa palyantjaku. Katutjanya wiya tjanampa tjapintjaku, ngaparrtjingku pungkula tjananya wiyantjaku, wiya. 15 Yaṉangu kutjupa yunyparringkula nyinanyingka tjungurringkulanyurra palumpa yunyparringkunytjaku. Yaṉangu kutjupa wiḻa kuyarringkula nyinarra yulanyingka tjungurringkulanyurra palulawana yulanytjaku. 16 Yaṉangu yuwankarraku nyurrangarri palya kalypa nyinanytjaku, pikapikarrinytjawiya. Walytjangku puḻkawaṉinytjawiya kutjupa tjuṯaku waarrkana nguwanpanyurra nyinanytjaku. Maralpa tjuṯaku palya nyinarra walytjarrinytjaku, tjananya nyakula wiya wantinytjaku. 17 Kutjupangkunta kuya palyantjala wiya nyuntu ngaparrtjingku kuya palyantjaku. Tjukarurru kutunyurra nyinanytjaku kutjupa tjuṯa nyurrangarrimpa yunypa nyinanytjaku. 18 Yaṉangu yuwankarraku nyurrangarri kalypa nyinanytjaku pikapikarrinytjawiya.

19 Walytja tjuṯa, wangka ngaatjanyaya kulila! Kutjupangkunta kuya palyantjala, wiya ngaparrtjingku palula kuya palyantjaku. Katutjalu kutju ngula palunya ngaparrtjingku kaatjimilara warukutu wantirriyalku. Palunya nguwanpa Katutjakuṉu wangka yalatji ngaranyi,

20 Katutjaku wangka kutjupa yalatji ngaranyi,

21 Kutjupangkunta kuya palyantjala, tjukarurrura palyala!, ngaparrtjingku kuya palyantjawiyangku. Yalatji tjukarurrura palumpa palyala!, paluru kulira nyuntupa kalypalpi nyinanytjaku.