1 Tayitutja, nyuntu wiya wangka palunya tjananya nguwanpa tjanala nintintjaku, Yiitjuku wangka tjukarurruwana kutju nyuntu tjananya nintila! 2 Tjiḻpi tjuṯa tjananya nintinma!, tjana tjurratja puntura tjikintjawiya nyinanytjaku, tjukarurru. Nintinma tjananya yalatji!, “Nyurrangarri kutu Yiitjuku wangkaku tjukarurru nyinanytjaku. Yaṉangu tjuṯaku nyurrangarri palya nyinanytjaku, yunytju. Wiya nyurrangarri ngurrkurringkula tuunlayiki nyinanytjaku. Tjana wiyawanangku palyantjala nyurrangarri purinypangku tjananya kutu nintinma!” Yalatji tjiḻpi tjuṯa tjananya nintinma! 3 Ulkumanu tjuṯaṯarra tjananya nintinma!, tjukarurru Yiitjuku nyinanytjaku. Nintinma tjananya yalatji!, “Nyurrangarri wiya tjungurringkula yaṉangu kutjupangka tjaalymara wangkanytjaku. Nyurrangarri wiya tjurratja puntura tjikira nyinanytjaku.” Ulkumanu paluru tjana yukarra tjuṯa tjukarurru Katutjaku wangkawana nintintjaku. 4 Ulkumanu paluru tjana kungka yukarra tjuṯa yalatji nguwanpa nintintjaku, “Katutjaku wangkawana nyinarra nyurrangarri miiṯa walytjaku tjukarurru nyinarra yunypangku yaṉṯayaṉṯantjaku. Pipirri nyuntupa tjuṯaṯarra nyurrangarri puraapawayi yaṉṯayaṉṯantjaku.” 5 Yuwa, kungka miiṯatjarra tjuṯa miiṯa walytjaku tjukarurru nyinarra pipirri tjuṯaṯarra yaṉṯayaṉṯantjaku. Ngurraṯarra tjana kiliinamilara kanyintjaku. Wati miiṯangku watjantjala paluru tjukarurru palyantjaku. Yalatji kungka miiṯatjarra tjuṯa tjukarurru nyinanytjala kutjupa tjuṯangku puṯu kulilku tjananya yalatji panypurangkukitjangku, “Kungka pala tjuṯa wiya Katutjaku wangkawana tjukarurru nyinanyi.” Yuwa yalatji panypurangkukitjangkuya puṯu kulilku.

6 Yangupala tjuṯa, mituliitji tjuṯaṯarra nintinma!, Yiitjuku tjukarurru nyinanytjaku. Katutjaku ngurrpa tjuṯangku kuya palyantja nguwanpa wiya tjana kuya palyantjaku, wantinytjakuya. 7 Tayitutja, nyuntuṯarra Yiitjuku kutu tjukarurru nyinanytjaku. Yalatji nyuntu tjukarurru nyinanytjala Yiitjuku walytja kutjupa tjuṯangku yalatji kulilku, “Tayitutjanya yilta tjukarurru nyinanyi Yiitjuku.” Tjukarurru tjananya Katutjaku wangkawana nintinma!, wiya tjananya nyuntu yara kutu nintintjaku, tjana kulira yinkanytjaku. 8 Katutjaku wangka tjukarurru tjananya nintinma!, kutjupa tjuṯangkunta panypurangkutjipingka. Yalatji nyuntu tjananya tjukarurru nintintjala nyuntupa tuunlayiki tjuṯangku puṯu kulilku nyuntunya panypurangkukitjangku.

9 Yiitjuku walytja tjaampalaya waarrkana nyinanyi. Tjana waarrkarringanyi mayutju walytjaku. Palunya tjananya nintinma!, yalatji tjana mayutju walytjaku tjukarurru nyinanytjaku. Mayutjungku watjantjala tjana tjukarurru palyantjaku. Wiya tjana mayutjungka yalatji watjantjaku, “Ngayulu kuliṉi yalatji palyalkitjangku.” Wiya yalatji watjantjaku, mayutjungku watjantjala yalatji waarrkanangku palyantjaku. 10 Waarrkana paluru tjana wiya mayutjuku yulytja, manipaka mulyaṯangku mantjintjaku, miyaḻara mayutjuku ngarrinyi. Waarrkana mayutjuku tjukarurru nyinanytjala mayutjungku nyakula walytjangku kulilku, “Ngayuku waarrkana palatja yilta tjukarurru waarrkarripayi, tjukarurru watjalpayi, ngunytjinytjunkunytjawiya.” Yalatji Yiitjuku walytja waarrkana tjuṯa tjukarurru nyinanytjala, yaṉangu kutjupa tjuṯangku watjalku, “Waarrkana pala tjuṯa palya nyinanyi Katutjaku wangkawana. Nganaṉa palunya tjananya nguwanpa tjukarurru nyinakitja Katutjaku wangka kulintjaku.” Yuwa, paluru tjana Katutjaku wangka kulintjaku. Nganaṉa palumpa wangka kulintjala paluru nganaṉanya ngulytjura kana nyinatjunku, palumpa ngurrangka.

11-12 Yuwa, Katutjanya nganampa yunytju nyinarra palumpa katja paluru mantakutu ngalya wantirriyaṉu, nganaṉa yaṉangu yuwankarrangku palumpa wangka kulintjaku. Yalatji kulira nganaṉa kana kutu nyinaku. Yiitju paluru yaṉangu tjuṯa nintilpayi kuya palyantjawiyalpi tjukarurru nyinanytjaku. Yalatji nganaṉa Katutjaku wangkawana tjukarurru nyinanytjaku, Katutjalu palumpa katja ngalya wantirriyaṉu, manta ngaakutu. 13 Yuwa, nganaṉa yunypa paṯara nyinanyi nganampa mayutju tiṉa Yiitju Kurayitjanya piyuku ngalya yankunytjaku. Paluru nganaṉanya kana nyinatjunku palumpa ngurrangka. 14 Yiitjunya nganampa kuya waṉinytjaku mirrirringu. Paluru kuliṉu, “Ngayulu kuya tjanampa waṉirra kana nyinatjunku Katutjaku ngurrangka.” Paluru kuliṉu nganaṉa palumpa tjukarurru nyinanytjaku kuya kutu palyantjawiya. Yalatjiṯarra, nganaṉa palumpa walytja tjuṯa tjukarurru nyinanytjaku.

15 Tayitutja, nyuntu tjananya wangka palunya tjuṯa nintinma!, tjana kulira Yiitjuku tjukarurru nyinanytjaku. Wangka palunya tjananya pinangkatjurra!, tjana kulira Yiitjuku rapa nyinanytjaku. Tjinguru tjaampalangku wangka nyuntupa kulintjawiyangka, purinypangku tjananya nintinma!, tjana tjukarurrulpi kulintjaku. Tjinguru tjaampalangku kulilku, “Tayitutjalu wiya nganaṉanya nintintjaku, paluru yangupala nyinanyi.” Yalatji tjana kulintjala nyuntu wiya kuṉṯarringkula nintilwiyangku wantinytjaku. Kutu tjananya nintinma!, Yiitjuku waarrkanangku.