4
Pilitjiyanya Nguraṟa Tjuṯangku Pakutja Miḻmiḻpa Israeltanguṟu Katinytja
1-11 Ka ngura nyara Israeltakutu wati Pilitjiyanya nguraṟa tjuṯa warmaḻa pitjapai Israelkunu tjuṯa pikaringkunytjikitja. Munuya kutju-aṟa ngaparku tjunguringkula ila-ila ngaringi tjiṉṯungka pakaṟa pika pungkunytjikitja. Ka tjiṉṯuringkunyangka pika puḻka ngaṟangu. Kaya warmaḻa tjuṯangku winki mulapa iluntanu Israelkunu tjuṯa, wati 4,000. Kaya maṉkur-maṉkurpa ngurakutu anu. Munuya wati tjiḻpi tjuṯangka wirkaṟa wangkangu. Kaya tjiḻpi tjuṯangku tjanala tjapinu, “Palu nyaaku Godalu warmaḻa tjuṯa wantir'iyaṉu nganaṉanya iluntankunytjaku? Munta-uwa, wanyula arkaṟa pakutja panya kalkuntja miḻmiḻpa mantjila tiintanguṟu munula ma-kati manta nyara pika pungkupaikutu. Ka tjinguṟu Godalu nganaṉanya alpamilalku nyara palula.”
Munuya palulanguṟu wati maṉkur-maṉkurpa iyaṉu pakutja palunya mantjintjaku, panya Iilaiku katja kutjarangku pakutja palunya kanyiningi tiintangka panya unngu. Kaya pakutja panya miḻmiḻpa ankula mantjiṟa ngura nyara palulakutu wirkakatingu. Kaya Israelkunu tjuṯangku nyakula pukuḻarira puḻkaṟa mirangu. Ka manta uringu tjana miranyangka.
Kaya warmaḻa tjuṯangku kulinu Israelkunu tjuṯa miranyangka, munuya wangkangu, “Nyaaku nyaranpa miranyi Israelkunu nyara tjuṯaku ngurangka?” Munuya palulanguṟu maḻalta kulinu, “Munta-uwa, pakutja panya miḻmiḻpaya kunyu mantjinu.” Munuya nguḻuringu alatji kuliṟa, “Panya tjanampa God kuwari tjanala wirkaṟa ngaṟanyi tjanala tjungu, munulanya tjinguṟu kuwari uwankara wiyalku, panya alatji ngaṉmanypa ngaṟanytja wiyaṯu. Kuwari-manti kura mulapalta ngaṟaku nganampa. Nganalulanya wankalku? Panya tjanampa God witulya puḻka mulapa, panya uwankara iluntara wiyaṉu ngura panya Itjipala. Wiya, tjana kutju wanyu wati. Nganaṉa watiṯu. Rapariwala ngapartji pungkunytjikitja.”
Ka palulanguṟu pikalta ngaṟangu tjananku pungkunytjaku, kayanku pungangilta. Kaya Pilitjiyanya nguraṟa warmaḻa tjuṯa waintaringu alatjiṯu munuya wati winki mulapa Israelkunu tjuṯa iluntanu. Kaya maṉkur-maṉkurpa kutju wankaringkula anu ngurakutu. Kaya pakutja panya miḻmiḻpa warmaḻa tjuṯangku mantjiṟa katingu, panya Iilaiku katja kutjara kuḻu ilungu nyara palula.
Wati Tjukurtjara Elinya Wiyaringkunytja
12-22 Ka tjiṉṯu nyara palula wati kutju wirtjapakaṉu pikangka uṯu-uṯu, munu ngurangka wirkaṟa aṉangu nguratja tjuṯangka tjakultjunu, kaya puḻkaṟa ulangi. Ka Iilailu ula kuliṟa tjapinu, “Nyaaringu nyanganpa?”
Ka wati panya paluṟu Iilaila tjakultjunu alatji, “Pitjanguṉa nyuntula wangkanytjikitja.”
Ka Iilailu wangkangu, “Nyaa? Walangkuṉi wangka.”
Ka wati panyangku wangkangu, “Wati panyanpaya nguḻu uwankara wirtjapakaṉu, ka uwankara manta-kutjuringu. Winki mulapaya wiyaṉu Pilitjiyanya nguraṟa tjuṯangku. Ka nyuntumpa kuḻu. Nyuntu kutjultan nyinanyi. Kaya pakutja panya miḻmiḻpa kuḻu katingu.”
Ka tjiḻpi panya Iilailu kuliṟa kankara punkaṉu munu nguṉṯi kaṯakatira ilungu. Panya paluṟu yiya tjuṯa mulatu Israelkunu tjuṯa kanyiningi.
Ka Iilainya katja kutjara kuḻu ilunyangka minyma panya palumpa mingkayi kuliṟa puḻkaṟa tjituṟu-tjituṟuringu munu nyara palulanguṟu paluṟu tjuni iniringu. Ka iṯi panya ngaṉmanypa wirkanu kuwaripangka, munu wirkaṟa ngunytju palumpa pika puḻka palyaṉu. Ka minyma panya paluṟu iṯi katja kanyiṟa pukuḻarinytja wiya watarku alatjiṯu ngaringi panya paluṟu rawangku kuliningi palumpa kuri, mingkayi kuḻu ilunytjitja munu puṯu pukuḻarira ilungu iṯi kanyintjatjanu. Palu minyma paluṟu ilunytja kuwaripangka iṯi palunya ininu Ikapatanya. Ini nyanga paluṟu wangkanyi ‘Witulya Pitalytji Wiya’, panya warmaḻa tjuṯangku pakutja panya miḻmiḻpa ngura tjanampakutu katinyangka Godaku pitalytjingku Israelnga wantikatingu.