14
Jonathantu Pula Pilitjiyanya Ngura Tjuṯa Pikangku Pungkunytja
1-15 Ka tjiṉṯu kutjupa Saulaku katjangku Jonathantu wangkangu palumpa wati waṟka, “Pitja kali ara Pilitjiyanya nguraṟa tjuṯaku ngurakutu, nyara kampa kutjupa.” Palu Jonathantu palumpa mamangka wangkanytja wiyaṯu. Munu paluṟu wangkangu wati panya waṟkangka, “Tjinguṟu Godalu ngalinya alpamilalku tjananya pungkula wiyantjaku. Ngali kutjara kutju palu Godalu mukuringkula ngalimpa palyalku alatjiṯu, panya kutjupangku puṯu angatjunanyi Godanya.”
Ka wati panyangku wangkangu, “Wiya palya. Nyuntu alatjiṯu wiṟu kuliṟa palyala, kaṉa ngayulu nyuntula tjunguṯu ma-pitjanyi.”
Ka Jonathantu wangkangu, “Pitja kali ma-ilariwa nyara wati Pilitjiyanya nguraṟa tjuṯaku ngurakutu, munuli utiriwa tjana nyakunytjaku. Ka tjinguṟu tjana nyakula wangkaku, ‘Paṯaṟa pula ngaṟa pala palula, kala nganaṉa ma-pitjaku nyupalilakutu.’ Tjinguṟu tjana alatjingalku, ka ngali mulapa aṟangkaṯu paṯala tjanalakutu ankunytja wiya. Palu tjinguṟu tjana alatji wangkaku, ‘Nganaṉalakutuya pitja.’ Ka ngali apu katulta tatila. Panya alatji wangkara aḻṯinyangkali kulilku, ‘Munta mulapa Mayatja Godalu nganaṉanya alpamilalku tjananya pungkula wiyantjaku.’ ”
Munu pula mulapaṯu utiringu tjana nyakunytjaku. Kaya mulapaṯu Pilitjiyanya nguraṟa tjuṯangku nyakula wangkangu, “Nyawa nyara wati Israelkunu tjuṯaya ma-ma-manyirkananyi aḻanguṟu pakaṟa kampangkaṯu kumpintjatjanu.”
Munuya Pilitjiyanya nguraṟa tjuṯangku nyakula mirangu Jonathanku pulampa, “Ngalya-pitja pula, kala nganaṉa nyupalinya pikangku pungkula nintilku.”
Ka Jonathantu wangkangu palumpa maḻpangka, “Ngalya-tatila ngayula maḻangka, panya Godalu kuwari ngalinya alpamilaṉi Pilitjiyanya nguraṟa tjuṯa pungkula wiyantjaku, kala Israelkunu tjuṯangku tjanala waintarinyi.” Munu pula ma-tatinu wanapari munu pula katulta wirkaṟa tjananya pungkula iluntanangi Pilitjiyanya nguraṟa tjuṯa. Munu pula pungkula pungkula tjuṯa mulapa iluntanangi nampa nyangatja 20. Kaya Pilitjiyanya nguraṟa tjuṯa puḻkaṟa nguḻuringkula tjititingangi ngurangka nyinanytja tjuṯa kuḻu. Ka palulanguṟu manta uringu, panya Godalu alatjingaṉu tjana nguḻuringkunytjaku.
Saulalu Tjana Pilitjiyanya Ngura Tjuṯa Pungkula Wiyantja
16-23 Ka Saulaku wati panya ngaṟala aṯunymankupai tjuṯangku ma-nyangu Pilitjiyanya nguraṟa tjuṯa tjanampa ngurangka nguḻuringkula mirara para-para-wirtjapakaṟinkunyangka. Ka Saulalu wati maṉkurta wangkangu, “Ngayuku tjaultji tjuṯaya para-kantamilala munuya nyawa ngananya tjanalakutu anu ngura nyanganguṟu.” Kaya kantamilaṟa mulapaṯu nyangu Jonathannga pula wiya ngaṟanyangka. Ka Saulalu wangkangu wati panya tjukurtjarangka, “Ngalya-kati pakutja panya miḻmiḻpa Godaku palula nganampa tjapintjikitjangku.” Ka Saulanya wati panya tjukurtjarangka ngaṟala wangkanyangka wati Pilitjiyanya nguraṟa tjuṯa nguḻu miranytja katuringu alatjiṯu, panya puṯu kuli-kuliṟaya puḻkaṟa alatjiṯu mirangi munuyanku ngurangka pikangkulta pungangi.
Ka Saulalu nyangatja kuliṟa wangkangu wati panya tjukurtjarangka, “Palya wanti, kala mapalku ara.” Ka Saulanya tjana palumpa tjaultji tjuṯa kuḻu tjunguringkula anu pika pungkunytjikitja munuya nyara palulalta ma-wirkaṟa nyakula urulyaraṉu, “Ai, nyangatjayanku paluṟu tjanankuṯu punganyi.” Kaya Israelkunu kutjupa tjuṯa Pilitjiyanya nguraṟa tjuṯangka ngaṉmanypa tjunguringkunytjatjanu maḻaku tjunguringu Saulala tjanala munuya palunya tjananya nguḻuṟa waṯaparaṉu Pilitjiyanya nguraṟa tjuṯa. Kaya Israelkunu kutjupa tjuṯa kuḻu apungka kumpiṟa nyinangi munuya Pilitjiyanya nguraṟa tjuṯa nguḻu wirtjapakannyangka kuliṟa tjana kuḻu pitjala tjunguringu Saulala tjanala. Ka mulapa Godalu tjananya nyara palula aṟangka puḻkaṟa alpamilaṉu Israelkunu tjuṯa.
Jonathantu Tjuratja Ngalkunytja
24-30 Kaya wati Israelkunu tjuṯa pakuringkula uḻiringu tjiṉṯu nyara palula. Panya ngaṉmanytju Saulalu wangkara nguḻutjunu wati uwankara. Paluṟu alatji tjananya wangkara painu, “Nyura ngaṉmanytju mai ngalkuwiyangku wantima. Munuya tjananya pungkula wiyantjatjanungku kutju maḻangka palya ngalkunma. Tjinguṟu kutjupangku ngaṉmanytju ngalkulampa nyara paluṟu iluku.” Kaya wati Israelkunu tjuṯangku nguḻuringkula mai ngalkuntja wiyaṯu ngaṟangi kuwaripa.
Munuya wati panya tjuṯa anu puṯikutu panya puṉu tjaṯakutu. Ka puṯi nyara tjaṯangka tjuratja mantangka ngaringi. Kaya wirkanu panya palula panya tjuratja ngarinytjala. Palu tjana mantjintja wiyaṯu panya paluṟu tjana nguḻuringangi Saulalu panya kalkuntjitjaku. Palu Jonathantu kulintja wiya palumpa mamangku Saulalu aṉangu tjuṯa wangkara nguḻutjunkunytja. Munu paluṟu watarkitjangku puṉu mantjinu, munu tjaḻatjunu tjuratjangka, munu pakaltjingaṟa anytjuṉu munu unngu wiṟuringu. Ka wati kutjungku wangkangu Jonathanta, “Kulila, nyuntumpa mamangku nganaṉala palumpa tjaultji uwankarangka nguḻutjunu alatji wangkara, ‘Wati kutjupangku mai ngalkulampa, paluṟu iluku.’ Kala kuwari mai ngalkuntja wiyanguṟu uparingulta.”
Ka Jonathantu wangkangu, “Ngayuku mamangku nyangatja kura palyaṉu ngura nyangaku. Panya ngayulu kuwari palyaringu tjuratja tjukutjuku ngalkuntjatjanu. Uti nyura tjaultji tjuṯaku nguranguṟu mai ngaṉmanytju mantjintjatjanungku ngalkunma alatjiṯu. Kala tjinguṟu winki mulapa iluntanama wati panya Pilitjiyanya nguraṟa tjuṯa nganaṉa mai puḻka ngalkuntjatjanungku.”
31-35 Kaya tjiṉṯu nyara palula wati Israelkunu tjuṯangku Pilitjiyanya nguraṟa tjuṯa pungkula pungkula waintaringu. Munuya palulanguṟu paku puḻka nyinangi. Munu paluṟu tjana tjanampa uwankara katingu tjiipi, puluka tjuṯa kuḻukuḻu munu tjana paḻtjatjiratjarira pungkula iluntara kuka warpungkula ngalkuṉu kurangku milkaḻi winki.
Ka kutjupangku wangkangu Saulala, “Nyawa tjana kuraṉi Godanya munuya ngalkuṉi kuka milkaḻi winki.”
Ka Saulalu wangkangu, “Nyura kuraringu. Apu pala puḻkaya ngalya-uṉṯuṟa waṉaṟa tjura nyangangka kuwariṯu.” Munu paluṟu wangkangu, “Ankulaya wangka wati uwankarangka, kaya puluka tjananku kutjungku kutjungku ngalya-kati tjiipi kuḻu munuya nyangangka pungkula ngalkunma. Tjana uti kuka milkaḻi winki ngalkuntja wiyangku wantima panya alatji ngalkula tjana Godanya kuraṉi.” Kaya uwankarangku kuka tjuṯa katingu nyara palulakutu munuya pungu. Ka Saulalu palyaṉu apu pitjilpa Godanya waḻkuntjikitjangku.
36-46 Palulanguṟu Saulalu wangkangu, “Arala kuwari Pilitjiyanya nguraṟa tjuṯakutu munula tjana kanyintja uwankara mantjila tjananya pungkula wiyantjatjanungku.”
Kaya wangkangu, “Palya, nyuntu wangkanyangkala uwankarangku wiṟu kulini.”
Palu wati panya tjukurtjarangku wangkangu, “Wiya, wanyula Godala-waraṟa tjapila, kalanya paluṟu nintilku nyaa palyantjaku.”
Ka Saulalu tjapinu Godala, “Nganaṉa palya Pilitjiyanya nguraṟa tjuṯa nguḻuṟa waṉantjikitja ankuku? Ka nyuntu wanyu nganaṉanya iluntankunytjaku alpamilalku?” Alatji paluṟu Godala tjapinu. Palu tjiṉṯu nyara palula Godalu ngapartji wangkanytja wiya Saulala. Ka nyara palulanguṟu Saulalu palumpa tjaultji tjuṯaku mayatja tjuṯangka wangkangu, “Ngalya-pitjaya uwankara, kala ngurila nganalu kuwari kura palyaṉu. Munula nguriṟa nyakula wati palunya iluntankuku. Mulamulangkuṉa wangkanyi Godala miṟangka, tjinguṟu ngayuku katjangku Jonathantu kura palyaṟampa paluṟu iluku.” Palu uwankaraya wangka wiya ngaṟangi.
Ka Saulalu piṟuku wangkangu wati Israelkunu tjuṯangka, “Nyura nyarangka kampa kutjupa ngaṟa. Ka ngayuku katja Jonathannga ngali kampa kutjupa nyangangka ngaṟaku. Ka Godalu kampa kutju ngurkantankuku tjinguṟu nyuranya, tjinguṟu ngalinya.”
Kaya wangkangu, “Uwa palya, nyuntu wangkanyangkala palya kulini.”
Ka Saulalu Mayatja Godala tjapinu wangkara, “Nintinmaṉi God tjukurpa tjukaṟuru. Nganalu kuwari kura palyaṉu?” Ka palulanguṟu puṉu ngurkantankupai kutjara katu waṉingu nyakunytjikitjangku, munuya nyangu kampa nyangatja nintinnyangka panya Saulanya pulanya katjaṟara. Kaya wati kutjupa tjuṯa ngurkantankunytja wiyaṯu ngaṟangi.
Ka Saulalu wangkangu, “Piṟuku waṉi. Ka tjinguṟu ngayunya kura nyinanyangka nintilku, munta tjinguṟu ngayuku katja.” Ka arkaṟa waṉingi nyakunytjikitjangku. Ka Jonathannga ngurkantanu. Ka Saulalu wangkangu Jonathanta, “Wangkaṉi nyaan wanyu palyaṉu.”
Ka Jonathantu wangkangu, “Ngayulu paḻtjatjiratjarira tjuratja puṉungka tjaḻatjunkula anytjuṉu. Munuṉa palulanguṟu kutju iluku ngayulu.”
Ka Saulalu wangkangu palumpa katjangka, “Wiya nyuntu ilunyi alatjiṯu panya ngayulu kalkuṉu ngalkunnyangka iluntankunytjikitjangku. Tjinguṟu nyuntu ilunytja wiyangkampa Mamalu ngayunya iluntankuku.”
Palu tjaultji tjuṯangkuya wangkangu Saulala, “Nyaakun Jonathannga iluntankuku? Paluṟu panya aṉangu Israelkunu tjuṯa kuwari wankaṟunu. Munu paluṟu uti ilunytja wiya nyinama, panya palunya Godalu alpamilaṉu alatjiṯu.” Alatjiya Jonathanku anga-wangkangu Saulala. Ka Saulalu palunya iluntankunytja wiyaṯu.
Ka palula maḻangkaya piṟuku Pilitjiyanya nguraṟa tjuṯa pikangku waṯaparaṟa pungkunytja wiyangku wantingu. Munuya maḻaku anu ngura walytjakutu.
47-52 Uwa, Saulanya panya mayatja puḻkaringu Israelku munu paluṟu tjaultji tjuṯatjarangku pikangku pungkupai Israelku pikaringkupai tjuṯa ngura winkingka para-arintaṟa. Munu paluṟu wati Israelkunu kutjupa kuṉpu rapa puḻka ngaṟanyangka nyakula palunya ngurkantaṟa tjungulpai palumpa tjaultji tjuṯangka tjanampa pikangku pungkunytjaku.