1-2 Kaya tawunu panya kutjara-maṉkurnguṟu Pilitjiyanya nguraṟa tjuṯa warmaḻarira uwankara ngaparku tjunguringu tawunu ini Apikala, kaya Israelkunu tjuṯangku ngura tjunu kapitjarangka itingka wimaṟungka ma-wirkaṟa ngura ini Tjitjaṟilta. Kaya mayatja panya ngura kutjara-maṉkurnguṟu palumpa tjanampa tjaultjingka tjungu maatjaringi kapuṯu kutjupa kapuṯu kutjupa winki mulapa. Kaya Davidanya tjana palumpa tjaultji tjuṯa tjanala tjunguringkula maatjaringi Akitjaku warmaḻa tjuṯangka munuya maḻa nguwanpa pitjalinangi.

3 Ka Pilitjiyaku tjaultji tjuṯaku mayatja tjuṯangku Israelkunu tjuṯa tjanala tjungu maatjarinyangka nyakula wangkangu, “Ai! Israelkunu tjuṯaya nyaratja tjunguringu Akitjala tjanala. Nyaakuya nyaranpa?”

Ka Akitjalu wangkangu, “Wiya, Davidanya ngaṉmanypa Saulaku tjaultji nyinangi munu mungaṯu nguwanpa Saulanya wantira nganaṉala tjunguringu palumpa tjaultji tjuṯatjara. Munuya kuwari yiya kutju nganaṉala nyinangi wiṟu mulapa kura kutjupa kutjupa palyantja wiya.”

4 Palu Pilitjiyaku tjaultji tjuṯaku mayatja tjuṯa Akitjaku puḻkaṟa mirpaṉaringu munuya palula wangkangu, “Wiya, Davidanya tjananya ngurakutu wituṟa iyala tawunu panya nyuntu ungkunytjitjakutu Saulaku piṟuku maḻparingkunytjaku-tawara. Tjinguṟu paluṟu kulintja kampa kutjuparira nganaṉanya iluntankuku, ka kinga panya Saulanya palumpa pukuḻariku piṟuku. Palula-tawara uti paluṟu tjana mauṉṯalpa nyinama nganaṉala tjungu pika nyangangka tjarpanytja wiya. 5 Kulinin panyatja? Israelkunu panya minyma tjuṯa? Panya pukuḻpaya nyaṉpingi munuya inma inkara wangkangi, ‘Saulaku warmaḻa tjuṯangku wiyaṉu 1,000 warmaḻa palu Davidaku warmaḻa tjuṯangkuya palula munkara mulapa iluntanu 10,000-pa puḻka mulapa.’ Alatjiya mirawaṉira wangkangi.”

6 Ka Akitjalu Davidanya aḻṯingu munu palula mauṉṯalpa wangkangu, “Tjukaṟurungkuṉanta tjakultjunanyi Godala miṟangka, panya nyuntu warmaḻa tjuṯatjara rawa ngayula tjungu nyinangi maḻpa alatjiṯu, kaṉanku mukuringanyi nyura ngayula tjunguringkula Israelkunu tjuṯaku pikaringkunytjaku. Palu nyanga Pilitjiyaku tjaultjiku mayatja tjuṯaya puṯu mulamularinganyi nyurampa. 7 Kaya nguraku ara tjana nyurampa mirpaṉarinytjaku-tawara munuya pilunpa ma-nyinama.”

8 Palu Davidanya kuliṟa tjituṟu-tjituṟuringu munu Akitjala wangkangu, “Ngayuluṉa kura palyantja wiyaṯu nyuntumpa. Panya kuwaripatjarala pitjala nyurala tiṯutjara tjungu alatjiṯu nyinangi maḻpa mulapa. Kalanyan nganaṉanya nyaaku markuṉi nyurala tjunguringkula pikaringkunytjaku?”

9 Ka Akitjalu wangkangu, “Wiya ngayulu nyurampa puḻkaṟa pukuḻarinyi, panya nyuntu ngayuku maḻpa mulapa, angelpa puṟunypa. Palu ngayuku tjaultji tjuṯaku mayatja tjuṯangku nyuranya wangkangi pika nyangangka tjunguringkunytjaku-tawara. 10 Pala palulanguṟuya mungawinki mulapa pakaṟa maḻaku ara ngurakutu tawunu panya ngayulu nyuntunya ungkunytjalakutu.”

11 Kaya Davidanya tjana mulapaṯu wangaṉarangku kuliṟa pakaṟa parari tjiṉṯuringkunyangka anu ngura panya Pilitjiyanya nguraṟa tjuṯaku mantakutu, kaya Pilitjiyanya nguraṟa tjuṯa kutju warmaḻarira Tjitjaṟiltakutu ma-tatiningi Saulala tjanalakutu pikakitja.