Lita Nampa 2 Paulalu Walkatjuṟa Iyantja Ngura Tjitja-lanikalakutu
2 Thessalonians
Nyangatja Ngaṉmanytju Nyakula Wangkanytjaku
Nyangatja lita kutjupa Godaku tjukurpa Paulalu walkatjunkunytja Jesuku walytja tjuṯaku ngura panya Tjitja-lanikala nyinanytja tjuṯaku. Paluṟu ngaṉmanytju lita tjanampa walkatjuṟa iyaṉu, ka nyangatja lita nampa 2 paluṟu tjanampa walkatjuṟa iyantja.
Ka ngura nyara palula Jesuku walytja tjuṯa Godalawanu tjukaṟuru nyinangi. Palu aṉangu kutjupa tjuṯangku kunyu tjananya Jesunya waṉannyangka ananingi munu kuraningi. Palu Jesuku walytja tjuṯangku kunyu tjananya kuliṟa wantingi munuya Godanya tungun-tunguntu waṉaningi munuya tiṯutjara mukulya puḻka nyinangi.
Palu paluṟu tjana Jesunya maḻaku pitjanytja puṯu nguwanpa kuliningi, panya aṉangu kutjupa tjuṯangku tjanala ngunti wangkangi Jesunya ngaṉmanypa pitjanytja. Kaya palulanguṟu tjituṟu-tjituṟuringi, ka Paulalu nyanga palunya kuliṟa lita nyangatja tjanampa walkatjunu tjananya tjukaṟuruntjikitjangku. Munu paluṟu tjananya painu tjukurpa kutjupa tjuṯa kulilwiyangku wantinytjaku, panya Jesunya kuwaripaṯu nyinanyi maḻaku pitjanytja wiyaṯu. Munu paluṟu tjanala tjakultjunangi nyaaringkuku ngula Jesunya maḻaku pitjanytja kuwaripangka. Paluṟu wangkangu alatji, “Jesunya pitjanytja kuwaripangka aṉangu tjuṯa mulapa Godala tungunpungkuku munuya palunya wantiku. Ka nyara palula maḻangka Wati Kuralpainya pakalku munu aṉangu winki ngunti kuraṟa tjananya wituwitulku palunya kutju waḻkuntjaku Godanya wantira. Ka palulanguṟu kutju Jesunya maḻaku pitjaku munu paluṟu Wati panya Kuralpainya wiyalku alatjiṯu.” Alatji Paulalu tjananya wangkara tjukaṟuruningi.
Munu lita nyanga palula Paulalu tjukurpa kutjupa tjanala wangkangi panya rawa manikitja waṟkarinytjaku maiku. Panya kutjupa tjarangku waṟka wantira nyinangi Jesunya maḻaku pitjanytjaku paṯaṟa. Ka Paulalu tjananya painu munu tjananya wituwituṉu rawa waṟkarinytjaku.
Tjukurpa nyanganpa ngarinyi:
1:1-2 Paulalu ngaṉmanytju wangkanytja
1:3-12 Paulanya tjanampa pukuḻarinytja munu tjanampa Godala tjapintja
2:1-17 Paulalu Tjiṉṯu Maḻatja tjakultjunkunytja panya Jesunya pitjanytja kuwaripangka
3:1-5 Paulanya mukuringkunytja tjana palumpa Godala tjapintjaku
3:6-18 Paulalu tjananya maiku waṟkarinytjaku wituwituntja munu tjukurpa maḻatja wangkanytja
1
Paulalu Ngaṉmanytju Wangkanytja
1 Uwa, Jesuku walytja tjuṯa, ngayuluṉa Paulalu lita nyangatja nyurampa walkatjunanyi ngura pala Tjitja-lanikala nyinanytja tjuṯaku. Panya nyura Mama Godaku walytja mulapa nyinanyi Mayatja Jesuku Christaku kuḻu. Kala Tjaalatjalu Timitjilu nganaṉa maṉkurtu lita nyangatja nyuralakutu ma-iyaṉi nyurampa pukuḻarira.
2 Ka Mama Godalu Mayatja Jesulu Christalu kuḻu nyuranya pukuḻtju puḻkangku kanyinma munu nyuranya kurunpa rapaṟa pukuḻmanama.
Jesunya Maḻaku Pitjanytja
3 Uwa walytja tjuṯa, nyura kunyu Mayatja Jesuku puḻkaṟa mulamularingkula palunya tiṯutjarangku waṉalpai wantinytja wiyangku, munu kunyu nyuranku rawangku mukulyangku ngapartji-ngapartjingku alpamilalpai. Kala tjukurpa nyuranyatjara kuliṟa puḻkaṟa pukuḻarinyi munula rawangku Godanya waḻkuṉi nyura palunya wiṟuṟa waṉannyangka. Nyangatjala Godanya tjukaṟurungku waḻkuṉi nyuralanguṟu panya paluṟu nyuranya nintini palunya wiṟuṟa waṉantjaku ka nyurampa mukulya palulanguṟu puḻkaringanyi. 4 Ka nyura palunya rawangku tungun-tunguntu waṉannyangka nganaṉa ngura kutjupa tjuṯangka para-ngaṟala nyuranyatjara tjakultjunkupai Jesuku walytja kutjupa tjuṯangka. Panya aṉangu kura tjuṯangku nyuranya Jesunya waṉannyangka ananingi munu nyurampa pikaringkula nyuranya pungangi. Ka panya nyura tjananya kuliṟa wantingi alatjiṯu munu panya nyura rapangku tiṯutjarangku Jesunya waṉaningi wantinytja wiyangku. Kala alatji tjanala tjakultjunkupai nyuranyatjara Jesuku walytja kutjupa tjuṯangka.
5 Uwa, panya aṉangu kutjupa tjuṯangku nyurampa tjituṟu-tjituṟu palyantjikitja mukuringkupai, ka panya nyura tjananya kuliṟa wantira Jesunya tungun-tunguntu alatjiṯu waṉaṉi. Palu ngula Godalu aṉangu uwankara palula kuranyu ngaṟatjunkula kutju kutju ngurkantaṟa tjaralku, kaya nyara palula aṟangka uwankarangku nyakula kulilku alatji, “Munta mulapa Godalu alatjiṯu tjukaṟurungku ngurkantankupai.” Ka nyuranya Godalu wangkaku alatji, “Nyuranya panyaya anaṟa pikangku pungangi nyura ngayunya waṉannyangka. Nyara palulanguṟuya nyuranya kuraningi ngayuku walytja nyinanyangka. Ka nyura ngayunya tungun-tunguntu tiṯutjarangku waṉannyangka ngayulu nyurampa puḻkaṟa pukuḻarinyi munuṉa nyuranya walytjanmaṟa tiṯutjarangku kanyilku ngayuku alatjiṯu nyinanytjaku.” Alatji Godalu nyurampa pukuḻarira nyurala wangkaku. 6 Panya Godalu tjukaṟurungku alatjiṯu ngurkantankupai. Munu paluṟu nyuranya anaṟa kuraṟa pungkunyangka nyakula aṉangu panya nyuranya kuralpai tjuṯa palu puṟunypaṯu palunya tjananya nyakula ngapartji pailku. 7 Munu paluṟu nyuranya pukuḻmaṟa wiṟuṟa kanyilku nganaṉanya kuḻu nyurala tjunguṟa, ka nyuntunya nganaṉanya puṯu piṟuku pikatjaralku.
Panya Godalu nganaṉanya alatjinkuku ngula tjiṉṯu maḻatjangka Mayatja Jesunya ilkaṟinguṟu pitjanyangka. Panya nyara palula aṟa paluṟu witulya puḻka mulapa pitjaku angelpa mungilyitjara waṟu winkitjara puḻkaṟa nguḻuringkunytjaku. 8 Munu paluṟu pitjala tjananya ngapartji pungkuku aṉangu panya Godanya wantipai tjuṯa, panya tjana Tjukurpa Palya Jesunyatjara kuliṟa wantira kura tjuṯa tiṯutjarangku palyaningi. 9 Ka palulanguṟu Godalu tjananya paiṟa iyalku tiṯutjara paṯu nyinanytjaku Godala tjungu wiya. Kaya paluṟu tjana Godala pitalytji puḻkangka nyinanytja wiya mungawaḻuṟungka nyinara puṯu palyakitja ngaṟaku, munuya palunya witulya puḻka mulapa nyinanyangka nyakunytja wiya alatjiṯu nyinaku.
10 Uwa, Jesunya pitjanyangka mulapa nyanga alatjiriku. Kala tjiṉṯu nyara palula aṉangu panya palumpa walytja tjuṯangku palunya nyakula kurunpa winki pukuḻarira wangkaku, “Ai, nganampa wiṟu mulapa wirkanu.” Munula palumpa puḻkaṟa pukuḻarira palunya waḻkuṟa mirawaṉiku. Ka nyura kuḻu nganaṉala tjunguringkula palunya nyakula mirawaṉikuṯu, panya nyura palumpa mulamularingu ngaṉmanypa nganaṉa nyurala tjukurpa palunyatjara tjakultjunkunyangka.
11 Uwa, munula nyanga palunya kuliṟa nganaṉa Godala nyurampa rawangku tjapilpai nyura tjukaṟurungku palunya rawangku waṉantjaku. Panya Godalu nyuranya ngurkantanu tjukaṟuru palumpa walytja mulapa nyinanytjaku. Ka nyura panya Jesuku mulamularingkula rawa mukuringanyi kutjupa kutjupa wiṟu tjuṯa Godaku palyantjikitja, kala palulanguṟu Godala rawangku tjapilpai nyurampa paluṟu nyuranya witulyangku nintintjaku nyura wiṟu tjuṯa uwankaraṯu tjungungku tjukaṟurungku palyantjaku. 12 Nyanga palumpala tjapilpai aṉangu tjuṯangku nyuranya wiṟuṟa palyannyangka nyakula Mayatja Jesunya Christanya puḻkaṟa waḻkuṟa palunya mirawaṉinytjaku, ka nyara palulanguṟu paluṟu nyuranya nyakula palyanmankuku. Palu nyanga alatjiriku Godalu munu Mayatja Jesulu Christalu nyuranya pukuḻtju puḻkangku witulyankunyangka kutju.